Kato ni Taro

◼ Na cava na vuna meda qaqarauni kina nida vunau ena meli?

Na vunautaki ni itukutuku vinaka ena meli e dua na sala yaga e sa dau vakayagataki makawa tu mai. Ia mai na veika rerevaki e se qai yaco wale tiko ga oqo e vuravura, era rere na lewe vuqa na dolava na nodra meli. Vakabibi, ke vou vei ira na irairai ni waqanivola, qai sega ni volai tu kina na itikotiko i koya e volavola, e volai ga e liga se sa rui vavaku. Sa rawa nira kasami. De dua era na kolotaka laivi ni bera mada ga nira dolava. Na cava meda cakava me tarova oqo?

E daumaka ke taipataki ruarua na ivola kei na waqanivola. Me taipataki sara ga ena waqanivola na yaca itaukeinivale, me kua ni “Vua na iTaukeinivale.” Mo kua ni guilecava me tiko tale ga ena waqanivola na nomu katonimeli se nomu itikotiko. Ia ke tiko na vuna vinaka o sega ni rawa ni vakaraitaka kina na nomu katonimeli se itikotiko, e rawa ni o vola ga na yacamu kei na vanua e tiko kina na Kingdom Hall. E kerei me kua nida guilecava me volai na yacada ena ivola kece eda vakacuruma ena meli. Ia, kua ga nida vakayagataka na katonimeli se itikotiko ni valenivolavola ni tabana.​—Yalovinaka, raica na Kato ni Taro ni Noda Cakacaka Vakaitalatala ni Matanitu, Noveba 1996.

E so tale na vakatutu kei na dua na ivakaraitaki ni volavolai ni vola e koto ena ivola, Me Yaga Nomu Curu ena Koronivuli ni Vuli Vunau, taqana 71-3. Na idusidusi oqo ena vukei keda ena noda volavola meda wasea vinaka kina na itukutuku vinaka.