Wilivola Vinaka

E KAYA na iVolatabu ni vinakata na Kalou mera “kila sara na ivakavuvuli dina” na tamata kece ga. (1 Tim. 2:4) O koya gona, meda kua ni guilecava ni noda inaki nida wilika i cake na iVolatabu meda vakadewa na ivakavuvuli dina.

E bibi vei ira na itabaqase, vaka kina vei ira na itabagone, mera saga mera dau wilika i cake na iVolatabu kei na ivoladusidusi vakaivolatabu. Cava na vuna? Nida iVakadinadina i Jiova, e noda itavi kece meda tukuni Jiova yani kei na ka e vinakata. Oqo ena okati kina vakalevu na wilivola—eda wilivola beka vua e le dua se vei ira e le vica. Eda dau wilivola tale ga vei ira noda lewe ni vuvale. Ena Koronivuli ni Vuli Vunau, era dau vukei na lewe ni ivavakoso—tagane kei na yalewa, qase kei na gone—mera vakavinakataka nodra wilivola i cake.

E sega ni ka me tauri vakamamada na noda wilivolatabu i cake, eda wilivola beka vua e dua, se da wilivola ena ivavakoso. E vakavuna na Kalou na iVolatabu. Kena ikuri ni “bula na vosa ni Kalou, ka kaukauwa, . . . a sa vakalewa sara na nanuma kei nai naki ni yaloda.” (Iper. 4:12) E duatani duadua na kilaka ena Vosa ni Kalou, ena sega ni kune ena dua tale na vanua. Ni dua e vulica, ena rawa ni kilai koya kina na Kalou dina duadua ga, me volekati koya, me walia tale ga na leqa e sotava e veisiga. E vakamacalataka na iVolatabu na ka me cakava e dua me bula kina ena vuravura vou ni Kalou. O koya gona, me noda inaki mada ga meda wilika ena noda vinaka taucoko.—Same 119:140; Jere. 26:2.

Ka Mo Cakava Mo Dua Kina na Dau Wilivola Vinaka. Levu na ka e rawa nida cakava meda maqosa kina ena wilivola, ia e kena itekitekivu sara ga noda saga meda dau wilivola vinaka. Oqo e kena ibalebale meda wilika ga na ka e volai. Meda kua sara ni calata e so na vosa nida wilivola, cavuta vakavo, se vakarogotaka cala nida kilasevata kei na dua tale na vosa ni tautauvata na kena matanivola.

O na rawa ga ni vakarogotaka donu na vosa ke o kila na ka o wilika tiko. Ena vinakati kina na vakavakarau vinaka. Toso na gauna sa rawa ni liu sara tiko na matamu ni o wiliwili, o na raica rawa kina na taladrodro ni vakasama, taladrodro tale ga nomu wilivola.

E bibi tale ga na vakavakadigo ena vosa e volai. O na kila mai na vakavakadigo na vanua mo cegu kina, dede ni nomu cegu, kei na gauna me veisau kina na rorogo ni domomu. Ena so na vosa ni vanua, ena rawa ni veisautaka sara ga vakadua na ibalebale ni iyatuvosa ke o sega ni veisautaka na irogorogo ni domomu ni o raica na vakavakadigo. Kena ivakaraitaki, ke o sega ni veisautaka na irogorogo ni domomu ni o raica na icegutaro, ena rawa ni vuki na taro oqori me sa itukutuku dodonu ga. So na gauna, e dau vakayagataki e so na vakavakadigo me muria ga na lawa ni tuvavosa. So na vosa e dredre na wilika ke sega ni volai na ivakatakilakila e so me kilai kina na kena vakarogotaki. Ia ena vosa vakaviti, saga mo kila na icavucavuti ni vosa kece. Oqo e bibi sara ga ke o vinakata me vakaibalebale na nomu wilivola. Kua ni guilecava ni nomu inaki mo vakadewa na vakasama, e sega ni nomu inaki mo cavu vosa wale ga.

E bibi na vakavakarau ke o vinakata mo dua na dau wiliwili vinaka. Wilika mada ga e dua na parakaravu, oti qai lesuva tiko me yacova ni sa sega ni cala na nomu wiliwili. Ke sa rawa vinaka oqori, dewa ina parakaravu e tarava. Qai tinia ena nomu saga mo wilika e vica na drauniveva mo kua ni calata e dua na vosa, cavuta cala, se tatao. Ni o sa cakava oti, mo qai kerea e dua me rogoci iko me qai vakadodonutaki iko ke rogoca e dua na cala.

Ena so na vanua, e vakaleqa nodra wiliwili e so na ca ni mata, qai sega na cina vinaka ni wilivola. Ena vinaka cake sara na wiliwili ke caka e dua na ka me vakavinakataki kina na veika vaka oqo.

Toso na gauna, e rawa nira sureti na tacida dau wiliwili vinaka mera wiliwili ena Vulivola ni iVavakoso se na Vuli Vale ni Vakatawa. Ia, na nomu qarava vinaka na itavi bibi oqo e sega ni yala ga ena nomu cavuta vakadodonu na vosa. Mo maqosa ena wiliwili e matanalevu ena ivavakoso, e dodonu mo qacoya mada e liu na nomu dau wiliwili vakataki iko. E okati e ke na nomu kila tiko nira sega ni biu tu vakaveitalia na vosa era tiko ena dua na iyatuvosa. Sega ni rawa mo vakalecalecava e so mo qai nanuma me matata na ka o wilika. Ke o wilika cala na vosa ni o wiliwili taudua tiko mada ga, ena sega ni macala na ibalebale ni iyatuvosa. Na wiliki cala ni vosa e rawa ni vu ena sega ni kauaitaki ni vosa e volai kei na vanua e vakayagataki kina. Saga mo kila na ibalebale ni vosa yadua ena dui vanua e vakayagataki kina. Raica se veisautaka vakacava na ibalebale ni dua na iyatuvosa na vakavakadigo. Nanuma tale ga ni dua na vakasama e rawa ni tiko ena vica na vosa. Ni o wiliwili gona, kua ni wilika yadudua na vosa, wilika vata na vosa e vakavotuya e dua na vakasama. E rui bibi mo kila na ka o wilika tiko, ke sega o na sega ni vakadewa na ivakavuvuli dina vei ira na tani ena nomu wiliwili.

A vola na yapositolo o Paula vua e dua na qase lotu Vakarisito matua: ‘Mo gumatua ena wili iVolatabu vei ira na lewe vuqa.’ (1 Tim. 4:13, VV) Sega ni vakabekataki ni oqo e rawa ni noda isausau kece.