Tuvana Vinaka Nomu iVakamacala

NI BERA ni o tuvana vinaka nomu ivakamacala, mo na vakadeitaka mada nomu inaki. E nomu inaki beka mo vakamacalataka ga e dua na ulutaga—dua beka na vakabauta, ivalavala, itovo, se ivakarau ni bula? O via vakadinadinataka beka se coqa e dua na ile? O via vakaraitaka beka na talei ni dua na ka se o via veivakauqeti? Se o cei ga o na vakamacala vua—le dua se le vica—ena mana na nomu ivakamacala ke matata vei iko na ka era sa kila rawa tu, kei na nodra nanuma me baleta na ka oqori. Ni o sa cakava rawa oqo, sa qai vakarautaka nomu suinivosa me na rawati kina na nomu inaki.

E kaya na Cakacaka 9:22 (VV) me baleta na cakacaka vakaitalatala nei Saula (Paula) mai Tamasiko nira a “veilecayaki kina na Jiu era tiko e Tamasiko, ka sega ni dua e saqata rawa na nona vakadinadinataka tiko ni sa Karisito dina sara ga ko Jisu.” Ia, a vakacava na iwalewale ni ivakamacala i Paula? Me vaka eda wilika ena ivolatukutuku ni cakacaka vakaitalatala i Paula mai Anitioki kei Cesalonaika, a yavutaka na nona ivakamacala ena nodra vakabauta dei na Jiu na iVolatabu Vakaiperiu, kei na nodra dau tukuna nira vakabauta na ka e kaya me baleti koya na Mesaia. Oti, sa qai digitaka o Paula e so na tikina mai na iVolatabu Vakaiperiu era vakamacalataka na nona bula na Mesaia kei na nona cakacaka vakaitalatala. E cavuqaqataka na veitikinivolatabu oqo, sa qai vakatauvatana kei na veika a yaco vei Jisu. Sa qai tinia ena nona vakaraitaka ni o Jisu ga oqo na Karisito, na Mesaia. (Caka. 13:16-41; 17:2, 3) E rawa tale ga ni vakauqeti ira na tani na nomu ivakamacala ke o tuvana vinaka.

Vakarautaki ni iVakamacala. Levu na sala o rawa ni vakarautaka kina nomu ivakamacala, ia me tuvani vinaka ga. De dua o na raica ni yaga mo muria e vica vata na kena iwalewale. Raica mada e vica na kena ivakaraitaki oqo.

Tuvai vakaiwasewase. Oqo e okati kina na nomu tuvana vakaiwasewase na nomu ivakamacala me rawati kina nomu inaki. Na iwasewase yadua e rawa ni okati kina na veitikina bibi mera na vakamatatataka na nomu ulutaga. E rawa nira ile matata mera vakadinadinataka se saqata e dua na vakasama. Nomu na digia na tikina mo na vakamacalataka se kua, ena vakatau vei ira era rogoci iko kei na nomu inaki.

Oqo e dua na ivakaraitaki ni ivakamacala e tuvai vakaiwasewase. E rawa ni okati ena nomu vakamacalataka na yaca ni Kalou na (1) vuna e bibi kina meda kila na yaca ni Kalou, (2) o cei na yaca ni Kalou kei na (3) sala eda doka kina na yaca ni Kalou.

Levu na ka eda na vulica me baleta na vosa e tuvai vakaiwasewase nida vakadikeva na ivola e vakarautaka na “dauveiqaravi yalo dina ka vuku” me vakayagataki ena vuli iVolatabu. (Maciu 24:45, VV) O ira na ivola oqo era vakamacalataki kina e levu na ulutaga, se usutu, mera kila rawa kina na gonevuli na yavu ni ivakavuvuli vakaivolatabu. Na ivola lelevu cake e dau vica vata na kena wase, qai dau wasei na wase yadua ena vica na ulutaga lalai. Na ulutaga yadua e vakarautaki koya na gonevuli ena veika me vakamacalataki tarava mai, e vakataucokotaka tale ga na iyaloyalo e vinakati me vakavotui ena wase taucoko.

Ka e caka kei na kena itinitini. E dua tale ga na sala e tuvani vinaka kina na ivakamacala oya na cavuti taumada ni ka e caka qai vakamacalataki na kena itinitini.

Ke o vosa vei ira e le vica se vua e dua e bibi me raica vinaka na itinitini ni ka e cakava tiko se nanuma me cakava, ena vinaka sara mo muria na kena iwalewale oqo. E tiko ena Vosa Vakaibalebale wase 7 e dua na kena ivakaraitaki vinaka. E vakamacalataki vinaka kina nona yaco e dua na cauravou “sega ni vakayalo” me coko (ka e caka) vua e dua na yalewa dautagane, qai vakila e muri na kena ca (kena itinitini).—Vkai. 7:7.

Ke o via vakabibitaka na nomu itukutuku, o na via veidutaitaka beka na rarawa era sotava o ira era sega ni muria na sala i Jiova kei na marau era vakila o ira era rogoci Jiova. A via vaka sara ga oqo na ivakamacala i Mosese ni uqeti koya o Jiova me vosa vei ira na Isireli ni bera nira curuma na Vanua Yalataki.—Vkru., wase 28.

So na gauna, e vinaka meda tekivu ena noda tukuna na rarawa a vakilai (kena itinitini), oti meda qai kauta mai e so na ivakamacala me vakamatatataka na vuna e yaco kina na rarawa oya (ka e caka). Oqo e vakalevu me dau okati kina na vakamacalataki ni leqa kei na kena iwali.

Leqa kei na kena iwali. Ena cakacaka vakavunau, e rawa ni via vakarorogo e dua ke o vakamacalataka na leqa sa takalevu tu nikua, o qai vakaraitaka na kena iwali. O rawa ni vakaraitaka ga mai o iko na leqa oqo, se me tukuna mai o koya drau veivosaki.

Dua beka vei ira na leqa oqo na noda qase mai da lai mate tale yani, na basulawa, se na kena sa sega ni tau vakadodonu na lewa ena levu na vanua. Sega ni gadrevi me vakamacalataki tale vakabalavu na leqa vaka oqo baleta ni sega ni dua vei keda e vulagi kina. Tekivu ga ena nomu cavuta na leqa, qai vakamacalataka na kena iwali e tukuna na iVolatabu.

Ena yasana adua, e so na leqa e vakila ga na tamata yadua. E sotava beka e so na ka dredre e dua na itubutubu ledua, yalolailai e dua ena bibi ni kena mate, se vakalolomataki e dua mai vua e dua tale. Ia, me rawa ni yaga na nomu ivakamacala, e bibi mo dau vakarorogo vinaka mada e liu. E vutucoqa ena iVolatabu na itukutuku veivakacegui me baleta na leqa vaka oqo. Ia, me vakayagataki ga vakadodonu. Ke o vinakata me yaga dina nomu ivakamacala vei koya o via vakaceguya, vakamatatataka vua se na vakaotia vakadua na nona leqa na ka o tukuna, se na walia ga vakalekaleka, se na vukei koya ga me vosota rawa baleta ni leqa e sotava ena qai walia na veiliutaki ni Kalou ena vuravura vou. E bibi oqo me vakila kina ni yaga vua nomu ivakamacala vakaivolatabu. Ke sega, ena mate wale na nomu ivakamacala.

Tuvai veitaravi. So na ka e volai era dau tuvai mera muria ga na kedra veitaravi. Ena ivola na Lako Yani me kena ivakaraitaki, e volatukutukutaki kina na Tini na Kuita me muria ga na kedra veitaravi. Ena Iperiu wase 11, e vola vakaveitaravi kina o Paula na yacadra na tagane kei na yalewa vakabauta, me muria ga na dui gauna era bula kina.

Ni o tukuna veitaravi e so na ka sa yaco oti, o sa vakarawarawataka vei ira na vakarorogo mera kila se a basika mai vakacava e dua tale na ituvaki. E yaga oqo ni o vakamacalataka na veika e yaco ena noda itabagauna oqo se gauna vakaivolatabu. Ena sala oqo, o sa vakayagataka tiko kina na ivakamacala e tuvai veitaravi, kei na nomu vakamacalataka na ka e yaco kei na kena itinitini. Ke o via vakamacalataka na ka e kaya na iVolatabu me na yaco mai muri, na kena icakacaka rawarawa duadua mo na tuva veitaravi ga na nomu ivakamacala ni na rawarawa mera vakamuria na vakarorogo, mera nanuma tale ga.

Nomu tuva veitaravi nomu ivakamacala e sega ni kena ibalebale mo sa na tekivu ga mai na kena itekitekivu. So na gauna, ena laulau cake ke tekivu nomu ivakamacala ena dua na ka vakasakiti a yaco. Me kena ivakaraitaki, ni o vakamacalataka na kena italanoa e dua, o na digia beka mo talanoataka na gauna a vakatovolei sara ga kina na nona bula. Ni o sa uqeti ira rawa na vakarorogo, sa rawa ni o qai tuvana na ka era yaco veitaravi yani me qai lai tini ena veivakatovolei levu oya.

Vakamacalataka ga na Ka e Yaga. Se mani vakacava na nomu tuvana na nomu ivakamacala, e bibi ga mo qarauna mo vakamacalataka ga na ka e yaga. Ena vakatau na ka o digia mo vakamacalataka mai na usutu ni nomu vosa, kei ira era rogoci iko. Na ka e bibi mo na vakamacalataka vei ira e so e rawa ni vakalusi gauna wale ga vei ira e so tale. Mo na vakadeitaka tale ga ni ka kece o tukuna ena yaga ena nomu vakamatatataka na nomu inaki. Ke sega, ena rawa ni sega ni veilauti na nomu ivakamacala, veitalia sara kevaka e taleitaki.

Ni o vakekeli tiko, o na raica beka e levu na ivakamacala e baleta na ulutaga o na vosa kina. Mo na vakayagataki ira kece beka? Ena rawa ni sevataki tale na nomu inaki ke rui sivia na ka o tukuna vei ira na vakarorogo. Ena rawarawa cake me nanumi nomu ivakamacala ke vica wale ga na tikina o vosa kina ia o vakamatatataka, e ca ni levu wale ga na ka o tukuna qai baya. Sega ni kena ibalebale oqo me sa kua ni vakacurumi ena nomu vosa e so na ikuri ni itukutuku. Ia, mo qarauna ga me kua ni sivia tale de vakabuawataka na nomu inaki. Dikeva na kena vakacurumi vakamaqosa ena Marika 7:3, 4 kei na Joni 4:1-3, 7-9 e so na ikuri ni itukutuku matailalai.

Ni o vakamacalataka oti e dua na tikina bibi mo dewa ina dua tale, qarauna me semasema vinaka na nomu ivakamacala me rawa nira vakamuri iko tiko ga na vakarorogo. Me rawa ni dewa vinaka e dua na vakasama ina dua tale, ena vinakati beka mo na bulia e dua na kena isema. Ena veiganiti beka me isema e dua na tamonivosa, se dua na iyatuvosa me sema vata na rua na vakasama. Levu na vanua era vakacuruma ga e dua na vosa rawarawa, dua sara beka ga na malanivosa, me sema na vakasama sa cavuti oti kei na kena e vakarau cavuti.

O na rawata vinaka na nomu inaki ke o tuvana vinaka nomu ivakamacala, o vakayagataka tale ga na ivakamacala ga e yaga.