E Vulici na Kena Tauci Vakamatau na Vosa

E ROGOCA o Peggy ni vosa karakara tiko na luvena qase vei koya e gone. Mani tarogi koya, “E dodonu beka mo vosa vaka oqo vei tacimu?” A tomana tale: “O vakararawataki koya sara ga!” Na cava na vu ni nona vosa vaka oqo? E via vakavulici luvena qase me kila na sala me tauca vakamatau kina na nona vosa, me bucina tale ga na yalo ni veinanumi.

Na yapositolo o Paula a uqeta na nona itokani cauravou o Timoci “me yalovinaka [se, “dau tauca vakamatau na nona vosa,” NW] vei ira na tamata kece ga.” Ni cakava oqo ena sega kina ni vakamosia na yalodra na tani. (2 Timoci 2:​24, VV) Na cava soti e kovuti ena vakasama oqo? E rawa vakacava ni o vakavinakataka na tikina oqo? Rawa vakacava ni o vukei ira na tani mera vulica na sala me dau tau vakamatau kina na nodra vosa?

Tauci Vakamatau na Vosa

Ni dua e tauca vakamatau na nona vosa ena dau maqosataka na ibiubiu ni nona vosa ni sotava e dua na ituvaki drakidrakita. Na vosa vakavalagi e vakadewataki tiko oqo me ‘tauci vakamatau ni vosa,’ a vakayagataki taumada ina vosa na “tara.” Me vaka ga na noda vakila nida tara e dua na ka e dregadregata, malumu, yagoyagovinaka, katakata, se vutivutia, ena vakila tale ga na kedra ituvaki na tani o koya e dau nona ivakarau me tauca vakamatau na nona vosa, ni kila ni ka e kaya se cakava ena cakayaco vua na tani. Ia e sega ni vauci ga e ke na noda kila na ka meda kaya; e okati sara tale ga kina na noda sega ni via vakamosia na yalodra na tani.

Laurai ena itukutuku vakaivolatabu ni o Kiesai, na cauravou dauveiqaravi i Ilaisa, e dua a sega ni dau matau na ka e cakava. A mate na luvetagane ni marama ni Sunemi, a mani lakovi Ilaisa ni via lai kere veivuke. Ia ni tarogi vua se vakaevei na ituvaki ni nona bula, a kaya: “Sa vinaka.” Ni via torovi koya gona yani na parofita ni Kalou, “A sa toro ko Kiesai, me biliga tani.” Duatani sara na ka e kaya o Ilaisa: “Mo laiva ga; ni sa rarawa na yalona.”​​—⁠2 Tui 4:​17-​20, 25-​27.

E rawa vakacava me baleca qai sabalia tu vaka oya na ka e cakava o Kiesai? Io, a sega beka ni tukutuku vakadodonu na marama ni Sunemi ena gauna e tarogi kina na kena ituvaki. Ia, e sega ga ni kena ivalavala meda dau dolava vakaveitalia na lomada vua eda sega ni veikilai. Me kuria, e macala ni na votu e matana na marama oya na nona lomanuiqawaqawa. Kena irairai ni a siqema na tikina oya o Ilaisa, ia e sega ni vakila o Kiesai, se sega ga ni via kila. Laurai gona e ke e dua na vuna levu e rawa ni dau sabalia kina na ka eda cakava se itautau ni noda vosa. Oya ke sa rui vakabibitaki koya vakasivia e dua, ni nanuma ni bibi duadua ga na nona itavi. Lai vakavuna me sega ni raica rawa, se vakawalena na ka era gadreva o ira na veitaratara kei koya. Eda rawa ni vakatauvatani koya kei na dua na draiva ni basi. Ena levu ni nona vakusakusa ni sega ni via berata na gauna e lavaki me cici kina, sa lai sega wale ni kele me vakavodo pasidia!

O koya gona, ke sega nida via muria na ivakaraitaki sabalia i Kiesai, da saga meda dau caka vinaka se vosa vakavinaka vei ira na tani, nida sega ni kila na ituvaki ni yalodra. Da tovolea meda yadrava e so na ivakatakilakila lalai e rawa ni vakaraitaka na vusolo ni yalo e colata tu e dua, da qai tauca vua na vosa e veiganiti, se da vakaraitaka vua na yalololoma. E rawa gona vakacava ni o vakavinakataka na tikina oqo?

Kauaitaka na iTuvaki ni Yalodra na Tani

Vakasakiti dina na nona rawa ni dau siqema o Jisu na rarawa e sotava tu e dua, kei na nona kila na sala malumu me vosa kina. Dua na kena ivakaraitaki na gauna a kana tiko kina o Jisu ena vale ni dua na Farisi, o Saimoni. A torovi Jisu e dua “na yalewa e na koro, . . . sa yalewa i valavala ca.” E via vaka ga na marama ni Sunemi, e sega ni rorogo na domona, ia na veika e cakava e boroya e dua na iyaloyalo matata vei Jisu me baleta na mavoa ni yalona. “Sa kauta mai e dua na tavaya alapasita sa tawa e nai lumu: a sa tu mai dakuna ki yavana [daku i Jisu], ka tagi, a sa vuya na yavana e na wai ni matana, a sa quaraka e na drau ni uluna, a sa reguca na yavana, ka lumuta e nai lumu.” Taura rawa o Jisu na ibalebale ni ka e cakava na marama oya. Sega ni o koya ga oya, e siqema rawa tale ga o Jisu na nona sa vosavosaiyalona toka ni vakalelewa o Saimoni: “Kevaka sa parofita ko koya oqo, sa kila na yalewa oqo sa tarai koya, kei na nonai valavala talega; ni sa yalewa i valavala ca.”​​—⁠Luke 7:​37-​39.

Vakacava ke a biliraka tani na marama oya o Jisu, ena sega beka ni qai kuria ga na mosi ni yalona? Se, me a kaya beka vei Saimoni o Jisu: “Tamata lialia! O sega ni vakila na nona veivutuni?” Kena veibasai, a tauca vakamatau sara o Jisu na nona vosa vei Saimoni ena nona talanoataka e dua na ivakatautauvata me baleta e dua na turaga e bokoca na nodrau dinau e lewe rua na tamata. E dua a levu na nona dinau, ia e lailai ga na nona dinau o koya kadua. “Ko cei vei rau ena lomani koya vakalevu”? a taroga vua o Jisu. A sega ni via vakacalai Saimoni sara o Jisu, ia a vakavinavinakataka ni a sauma vakadodonu na isaunitaro. Sa qai vukei Saimoni vakamalua ena nona tokaruataka na veika e cakava na marama oya me ivakaraitaki ni vusolo ni yalona kei na nona veivutuni. Ni vosa oti vei Saimoni o Jisu, a vuki vua na marama oya me vakaraitaka ni vakila sara tale ga na vusolo ni yalona. Mani kaya vua ni sa bokoci na nona ivalavala ca, qai kuria vaka oqo: “Sa vakabulai iko na nomu vakabauta; mo lako e na vakacegu.” Macala ni vosa e tauci vakamatau oya, a uqeti koya me lai tomana tiko ga na nona nakita me cakava na ka dodonu! (Luke 7:​40-​50) Kena ibalebale, ni nona dau yadrava o Jisu na ivakatakilakila lalai e vakavotuya na rarawa e bika tu e dua, a rawa kina vua me dau tauca vakamatau na nona vosa, e veivuke tale ga ena yalololoma.

O Jisu a vukei Saimoni ena tikina oqo, e rawa tale ga nida vulica, da qai vakavulici ira tale na so meda siqema rawa na ituvaki ni yalona e dua, mai na nona imoimoi. Era yaga sara e ke na italatala lotu Vakarisito era sa kenadau, ni so na gauna e rawa nira vakavulici ira era se vou ena cakacaka vakavunau mera siqema rawa na ituvaki ni yalodra na tani. Dua na gauna vinaka ke rau vunau vata tiko e dua sa kenadau kei na dua e vou. Ni rau wasea oti na itukutuku vinaka ni Matanitu ni Kalou ena dua na matanikatuba, e rawa ni rau vakalewa na veika erau raica e kilai kina na ituvaki ni yalo i koya erau vunau vua. E mamadua beka o itaukeinivale, e sega ni kauai, e cudru se osooso? Na sala cava ena vukei kina vakavinaka? Ena yasana kadua, o ira na qase ni ivavakoso e rawa tale ga nira veivakameautaki ena kedra maliwa na lewe ni ivavakoso era veileqaleqati ena vuku ni vosa sabalia. Mera vukei yadudua na okati ena leqa oqo mera kauaitaka na ituvaki ni yalo e tiko vua e dua tale era veileqaleqati tiko. E cudru beka, se nanuma ni sega ni kauaitaki, de tauri cala na ka e kaya? Ena veivuke vakacava e ke na vosa e tau vakayalololoma?

Vei kemuni na itubutubu, e vinaka mo ni vakavulici ira na luvemuni mera dau veinanumi, ni oqo ena uqeti ira me dau tau kina vakamatau na nodra vosa. Na luve i Peggy sa cavuti oti, a qai raica ni duatani na mata i tacina, ni sa vakaruburubu qai tuturu vakamalua na wainimatana, e vakila kina na yalorarawa sa tarai tacina. Marau o tinana ni a cakava na ka dodonu na luvena qase, oya me veivutunitaka, qai veisautaka na ivalavala ni nona vosa vei tacina. Laurai ni a yaga sara vei rau ruarua na luve i Peggy na nodrau se vakavulici ni rau se gone me rau dau tauca vakamatau na nodrau vosa, ni votu oqo ni rau sa tamatabula. E yaco me vuavuaivinaka sara na nodrau cakacaka ni veivakatisaipelitaki, e vinaka tale ga kina na nodrau itavi vakaivakatawa ena ivavakoso vakarisito.

Vakaraitaka ni O Kauai

Sa qai bibi ga mo tauca vakamatau na nomu vosa ke o yalocataka e dua, ni rawarawa sara me tau na vosa ni veibeci. E vinaka mo vakacaucautaki koya rawa mada ena dua na ka vinaka a cakava. Kua ni o vakadiloya, saga me wali na leqa. De vinaka mo vakamacalataka vua drau veileqaleqati ni mosi vei iko na ka e cakava, kei na ka o na marautaka me veisautaki ena ituvaki drau sotava tiko. Oti oya, qai vakatudaliga ina ka ena tukuna. De dua, o taura cala ga na ka e cakava.

E noda ivalavala ga na tamata meda taleitaka meda rogoci, veitalia ke o kila ni sega ni duavata kei na nomu vakasama o koya drau veitalanoa tiko. A tauca vakamatau o Jisu na nona vosa vei Marica, e vakaraitaka ni vakila na lomaocaoca e tarai Marica tu. A kaya: “I Marica, I Marica, ko sa lomaocaoca ka veinanumayaka na ka e vuqa.” (Luke 10:41) Ni dua gona e talaucaka na leqa ni lomana, kua ni totolo na vakamacalataka na kena iwali o nanuma, vakarogoci koya mada ga vakamalua. Dua na sala o rawa ni vakaraitaka kina na nomu kauai, ke o cavuta sara ga ena nomu vosa na leqa e kau cake mai oya. Oqo e dua na sala o rawa ni vakaraitaka vakayalololoma kina ni o kauai ena ka e yaco.

Vakalewa Vinaka na Ka Mo Kua ni Kaya

A vinakata o Ranadi Esiteri me kerea na turaga watina me vukica na inaki ca sa bucina tu o Emani me baleti ira na Jiu. Mani qaseqasetaka sara na nona tuvanaka vakamatau na ka me cakava me marau kina na yalo i watina. Ni sa kila ni marautaka na watina na ka e vakarautaka, sa qai vakalasikata cake na nona kerekere. Nida vakananuma na ka e cakava, eda vuli mai na nona kila na ka me kua ni kaya. A sega ni bau tukuna vakalailai o Esiteri vei watina, ni rawa ni beitaki tale ga ena bucibucini ca i Emani, baleta ni a solia na galala vei Emani me vakayacora na lomana.​​—⁠Esiteri 5:​1-8; 7:​1, 2; 8:⁠5.

Nida muria na ivakaraitaki oqo, vakacava ke o sikovi koya na kena ikasa tawavakabauta e dua na tacida yalewa lotu Vakarisito, ena veiganiti beka mo sa cega sara vua na iVolatabu? Se na vinaka mo tauca vakamatau na ka o kaya ena nomudrau veitalanoataka mada e so na ka e dau taleitaka? Ni dua e se qai butuka vakadua yani na Kingdom Hall qai sega ni veiganiti na nona isulusulu, se tokatu yani e dua sa yali tu vakadede, e vinaka mo kidavaki koya ga ena marau, kua ni o vakalewa na nona isulusulu se nona yali tu vakadede. Ni o raica ni cala na nona rai e dua se qai tekivu taleitaka tiko na ka dina, de vinaka mo kua ni vakadodonutaki koya ena gauna vata ga e cavuta kina na rai cala oya. (Joni 16:12) Na noda tauca vakamatau na noda vosa e okati tale ga kina na noda vakalewa vinaka na ka me kua nida kaya.

Vosa e Veivakacegui

Ke da vulica meda dau tauca vakamatau na noda vosa, ena vakavinakataka na noda veimaliwai kei ira na tani, veitalia sara mada ga ke dua e taura cala na ka eda cakava qai rarawataki keda se cati keda. Me kena ivakaraitaki o ira na kai Ifireimi, ena nodra ‘a veileti vakaukaua’ kei Kitioni, ia a qai tauca vakamatau na nona vosa ni vakamacalataka vakamatata na ka dina a yaco, a vakalesuya tale ga na nodra vakasama mera nanuma na veika lelevu era sa rawata na turaga ni Ifireimi. A matau dina na itautau ni vosa i Kitioni ni taura rawa na vu ni nodra cudru, lai malumu wale na nodra yalokatakata nira raica na nona yalomalumalumu.​​—⁠Dauveilewai 8:​1-3; Vosa Vakaibalebale 16:⁠24.

Tovolea mo dau vakasamataka ena veigauna se na cakayaco vakacava na nomu itautau ni vosa vei ira na tani. O koya gona, ke o saga mo vulica mo dau tauca vakamatau na nomu vosa, o na vakila na marau e tukuni ena Vosa Vakaibalebale 15:23: “Sa na marau na tamata e na vuku ni vosa ni gusuna: ia na kena vinaka na vosa e na gauna e yaga kina!”

[iYaloyalo ena tabana e 31]

Mera vakavulici ira na luvedra na itubutubu mera dau veinanumi

[iYaloyalo ena tabana e 31]

O ira na italatala lotu Vakarisito era sa kenadau e rawa nira vakavulici ira era se vou mera siqema rawa na ituvaki ni yalodra na tani