Sereki Vinaka na Ulutaga

O IRA na sa dau matau ena vosa era kila ni na sega ni vakaibalebale e dua na vosa ke sega na kena ulutaga. Nira vakarautaka e dua na vosa, ena vukei ira na ulutaga mera vakadikeva na itukutuku ga e veiganiti, ra qai vakasamataka vakabibi. Nira lai vosa, e yaga nodra ivakamacala nira sega ni talimagimagi, era vakamacalataka vinaka ga na ka e vauca nodra ulutaga. Ena kasa vei ira na vakarorogo na veitikina bibi era kauta cake mai kei na vuna era vakayagataka kina ke tokona qai sereka nodra ulutaga na veitikina bibi oqori.

E dina ni dau vakatokai na ulutaga me yaca e kovuti kina na lewe ni noda ivakamacala, ia o na vakadinadinataka ni na momona cake nomu vunau ke o raica na ka ga e dodonu mo vakabibitaka ena dua na ulutaga. Rawa ni yavutaki nomu vunau ena ulutaga me vaka na Matanitu ni Kalou, na iVolatabu, se na veivakaturi, ia era ulutaga rabailevu. E levu tale na ulutaga e rawa nira buli mai na ulutaga lelevu oqo me vakaraitaka na tikina ga mo vakabibitaka. Me kena ivakaraitaki: “Na Matanitu ni Kalou e Dua Dina na Matanitu,” “Na Matanitu ni Kalou ena Vukica na Vuravura me Parataisi,” “E Vakavuna na Kalou na Volai ni iVolatabu,” “Na iVolatabu e iDusidusi Yaga ena Gauna Oqo,” “Na Veivakaturi e Vu ni Vakacegu Vei Ira na Lolosi,” kei na “Eda na Tudei Nida Vakacacani ke Da Nuitaka na Veivakaturi.” Ena duidui nodra vakamacalataki na ulutaga oqo, ni duidui na ka e vakabibitaki kina.

Na ka a vakabibitaka voli o Jisu Karisito ena nona cakacaka vakavunau ni se bula vakatamata e vuravura e salavata kei na usutu se ulutaga levu ni iVolatabu, oya na kena “sa voleka na matanitu vakalomalagi.” (Maciu 4:17) E qai vakamatatataki vakacava na ulutaga oqo? Duanadraukatini vakacaca na vanua ena va na Kosipeli e tukuni kina na Matanitu oqo. Ia, a sega ni cavuta wale tiko ga o Jisu na “matanitu.” Ena nona veivakavulici, vaka kina ena nona cakamana, e vakaraitaka kina ni o koya ga na Luve ni Kalou, na Mesaia, o koya ena solia vua o Jiova na Matanitu. E vakaraitaka tale ga o Jisu ni sa rawa ena vukuna mera mai lewe ni Matanitu oya e so tale. Sa qai vakaraitaka na ka ena vinakati vei ira mera na mai lewe ni Matanitu oqo. Ena nona veivakavulici kei na cakacaka veivakurabuitaki e cakava, e vakaraitaka kina na ka ena cakava na Matanitu ni Kalou ena noda bula, vakaraitaka tale ga ni nona vakayagataka na yalo tabu ni Kalou me vakasevi ira kina na timoni e vakadinadinataka vei ira na rogoci koya ni sa ‘yaco dina vei ira na Matanitu ni Kalou.’ (Luke 11:20) Na Matanitu sara ga oqo a tukuna o Jisu mera vunautaka na nona tisaipeli.—Maciu 10:7; 24:14.

Vakayagataka na Ulutaga e Veiganiti. Ena lekaleka wale beka na nomu ivakamacala ni vakatauvatani kei na balavu ni ivakamacala ena iVolatabu, ia me vaka ga na iVolatabu, e bibi me dua na kena ulutaga veiganiti.

Ke vakatau vei iko na ulutaga mo vosa kina, vakasamataka mada se cava o na via vakabibitaka. Ni o digia na ulutaga lalai se tikina bibi me lewe ni nomu suinivosa, raica mera tokona kece na nomu ulutaga levu.

Ke sa lesi rawa mai nomu ulutaga, vakalewa vinaka me matata vei iko na ka e dodonu mo vakabibitaka. So na gauna ena ka ni sasaga toka mo qai taura rawa na ibalebale dina ni dua na ulutaga kei na veika e vauci kina. Ke na vakatau vei iko na lewe ni nomu ulutaga, digia vinaka na ka mo na vakamacalataka me rawa ni votu tiko ga mai kina na ulutaga. Ena yasana adua, ke vakarautaki tale ga mai na lewe ni nomu ivakamacala, se na gadrevi tiko ga mo vakasamataka se o vakayagataka vakacava me veisemati vinaka tiko ga kei na nomu ulutaga. E dodonu mo na vakasamataka se cava e bibi kina vei ira na vakarorogo na ivakamacala e vakarautaki mai, kei na cava me na nomu inaki ni o sa na talaucaka. Oqo ena vakarawarawataka nomu kila na ka mo na vakabibitaka ni o sa na vakamacala.

Sala me Vakabibitaki Kina na Ulutaga. O na rawa ga ni vakabibitaka vinaka nomu ulutaga ke o digitaka vinaka na ka mo na vakamacalataka, o tuvana vinaka tale ga. Ena sega ni dredre nomu vakabibitaka nomu ulutaga ke o digitaka ga na veika e tokona nomu ulutaga, o muria tale ga na icakacaka ni suinivosa e vakaturi ena ivola oqo.

Ena matata tale ga e dua na ulutaga kevaka e dau talevi. Kena ivakaraitaki na sere. Eda kila ni sere e dau tu na kena ulutaga se yacana. Na kena ulutaga oqo e dau qai talevi vakavica ni lagati tiko na sere. So na gauna e sega ni talevi na vosa sara ga e ulutaga ni sere. So na gauna e talevi e dua se rua ga na vosa mai na ulutaga ni sere, so tale na gauna e rawa ni veisau na ilagalaga ni italetale ni sere, rawa tale ga ni totolo vakalailai, ia se kena iwalewale cava e bulia o koya na daunivucu, ena raica ga me matata na ulutaga ni sere se ka e vakabibitaka. E dodonu me vaka tale ga oya na ulutaga ni vunau. Na talevi ni vosa e so mai na ulutaga ni vakacagau tiko na vunau e vaka na italetale ni sere. E rawa ni o vakavotuya lesu tiko mai na ulutaga ni vunau ena nomu vakayagataka e dua na matavosa e tautauvata ga na kena ibalebale, se nomu biuta na ulutaga ena dua tale na kena ibiubiu. Ni o cakava oqo, era na sega ni guilecava na vakarorogo na veika bibi e vauca nomu ulutaga.

Na ivakavuvuli eda veivosakitaka ena lesoni oqo e sega ni yaga ga ena vunau mai na buturara, e yaga tale ga ena noda veivosaki ena cakacaka vakavunau. Ena guiguilecavi dredre e dua mada ga na veivosaki lekaleka ke o vakamatatataka na nomu ulutaga se ka o via vakabibitaka. Na ka mada ga o vakavulica vua na nomu vuli iVolatabu ena kasa vua ke o vakabibitaka vinaka na ulutaga. Ena sega ni ka wale nomu saga mo bulia e dua na ulutaga veiganiti, kei na nomu sereka vakavinaka, ni na vukei iko mo kenadau ena vosa kei na veivakavulici mai na Vosa ni Kalou.