Qarauna Vinaka Sara na Nomu Vakasama
1. Na cava na usutu ni soqo ni tabacakacaka ena yabaki ni cakacaka ni isoqosoqo ni 2013, na cava na inaki ni porokaramu?
1 A vakavulici ira na nona tisaipeli o Jisu mera lomani Jiova ena lomadra taucoko, nodra bula taucoko, kei na nodra vakasama taucoko. (Maciu 22:37, 38) Na soqo ni tikina, soqo ni tabacakacaka, kei na soqo sigadua ena yabaki qo e tuvanaki me vukei keda meda vakavinakataka na ivakarau ni lomada. O se rairai nanuma tiko na usutu ni noda soqo ni tikina ‘Qarauna Vinaka na Lomamu!’ Na soqo sigadua ni yabaki ni cakacaka ni isoqosoqo ena 2013 e kena usutu “Qarauna Vinaka Sara na Nomu Lewaeloma.” Na soqo ni tabacakacaka era na vakarau vakayacori veitaravi me tekivu ena vula mai qo e kena usutu “Qarauna Vinaka Sara na Nomu Vakasama,” e yavutaki ena Maciu 22:37. Na porokaramu qori e vakarautaki me vukei keda yadua meda dikeva na veika eda dau vakasamataka me rawa ni vakamarautaki Jiova vakalevu.
2. Na taro cava meda vakasamataka tiko na kena isau nida vakarorogo tiko ena porokaramu?
2 Ka ena Vakamacalataki: Nida vakarorogo tiko ena soqo ni tabacakacaka, meda vakasamataka na isau ni taro e toka e ra, e vakavotui kina na veitikina bibi:
• Eda na levea vakacava na ivakarau ni ‘vakasama vakatamata’?
• Eda na veivuke vakacava ena cereki ni iubi e vakamatabokotaka tu na nodra vakasama na sega ni vakabauta?
• Na ivakarau ni rai cava me tiko vei keda?
• E yaga vakacava na noda vakasamataka na veika vinaka?
• Rawa vakacava ni moica o Jiova na noda vakasama?
• Cava mera cakava na tagane vakawati, yalewa vakawati, itubutubu, kei ira na gone me marau kina na vuvale?
• Eda na vakarautaki keda tu vakacava ina siga i Jiova?
• Ni tukuni me yadra tiko na noda vakasama ina itavi, na cava na kena ibalebale?
• Ena yaga vakacava nona bulataka e dua na veika e vulica?
3. Na cava e bibi kina meda tiko ena siga ruarua ni soqo, vakarorogo vinaka, da qai bulataka na ka eda vulica kina?
3 O Setani e taketetaka tiko na noda vakasama qai saga me vakacalai keda kina. (2 Kor. 11:3) E dodonu gona meda vala meda lewa vinaka na veika eda vakasamataka me rawa ni vakamarautaki Jiova. E bibi me tiko ga vei keda na rai i Karisito, meda vorata tale ga na veivakamuai ni vuravura ca qo. (1 Kor. 2:16) Mo lalawataka rawa qo mo tiko ena siga ruarua ni soqo ni tabacakacaka. Vakarorogo vinaka tale ga. Nida bulataka na itukutuku bibi eda rogoca ena soqo qori, ena yadra tiko kina na noda vakasama nida gugumatua ena cakacaka e vauca na Matanitu ni Kalou.—1 Pita 1:13.