Tukuna ga na iTukutuku Dina

CAVA e rawa ni vakavuna me sega ni dina na nona itukutuku e dua na lotu Vakarisito? E rogoca beka e dua na ka, lai vakadewataka sara, sega mada ga ni vakadeitaka. Se rawa ni cala na ka e tukuna ni sega beka ni wilika vinaka na ivurevure ni nona itukutuku. Nida qarauna meda tukuna na ka dina, ena veika lalai sara mada ga, era na raica na rogoci keda ni sega na vuna me lomalomaruataki tale kina na veika bibi cake eda talaucaka.

Ena Cakacaka Vakavunau. Levu era dau taqaya nira se qai lako vakadua ena cakacaka vakavunau, era nanuma ni se lailai na ka era kila. Ia, sega ni dede sa ra liaca ni rawa nira vakamacala vinaka e veivale ke ra kila wale mada ga na yavu ni ivakavuvuli dina. E rawa vakacava? Na kena dina ga na vakavakarau.

Ni bera ni o lako ina cakacaka vakavunau, vulica vinaka mada na ulutaga o na via lai veivosakitaka. Vakasamataka se taro vakacava e rawa nira taroga mai na itaukeinivale me baleta na ulutaga oqori. Vakasaqara na kena isau ena iVolatabu. O na sega ni veilecayaki nira sa na taro mai na itaukeinivale, o na sauma vinaka na nodra taro. Vakacava ke o vakarau lai vakavulica e dua nomu vuli iVolatabu? Dikeva vinaka na tikina drau na lai vulica. Me matata vei iko na isaunitaro yadua, kei na kedra yavu vakaivolatabu.

Vakaevei ke tarogi iko ena dua na taro dredre e dua na itaukeinivale se dua drau cakacakavata? Kua ni sauma ga me rawa ke sega ni matata vei iko na kena isau. “A lomana na yalododonu sa daunanuma na ka me kaya.” (Vkai. 15:28) E rawa ni yaga vei iko ena gauna oqo na Reasoning From the Scriptures se ivola lailai na “Usutu Vakaivolatabu me Veivosakitaki.” Ke o sega ni kauti rau tu na ivola oqo, tukuna ni o na lai vaqara mai na kena isau, mo na qai lesuvi koya tale. Ke via kila dina na isaunitaro o koya e taro, ena sega ni dua na ka vua nona waraki iko. De dua ena tarai koya tale ga nomu yalomalumalumu.

Ena rawa ni vukei iko tale ga ena nomu wasea vakadodonu na ivakavuvuli vakaivolatabu na nomu tomana e dua na dautukutuku matua ena cakacaka vakavunau. Raica toka na tikinivolatabu era vakayagataka kei na kena ivakamacala. Dau yalomalumalumu, ciqoma na ka era vakatura se nodra veivakadodonutaki. O Apolosa, e dua na tisaipeli gugumatua, a vakila sara ga na yaga ni veivuke e caka vua. E tukuna o Luke ni o Apolosa e “matai e na vosa,” e “buta vinaka tale ga e na i Vola Tabu,” qai “qacoya ni vosa se vakatavuvulitaka vakadodonu na veika e baleti Jisu.” Ia, se sega ni taucoko na ka e kila. Ni rau raica oqo o Akuila kei Pirisila, “e rau sa qai vakamatatataka sara vua na Sala ni Kalou.”—Caka. 18:24-28, VV.

“Taura Dei na i Vakavuvuli Dina.” E dodonu me laurai ena noda itavi ena soqoni nida sega ni lecava ni ivavakoso e “duru kei na yavu ni vakavuvuli dina.” (1 Tim. 3:15) Me rawa nida tutaka tiko ga na ka dina, e bibi meda kila na ibalebale kece ni tikinivolatabu eda na vakayagataka ena noda vunau. Meda kila na vuna era a volai kina kei na kedra inaki.

E rawa ni lai vakadewataki na ka o tukuna ena soqoni ni ivavakoso. Eda dau “cala kecega e na ka e vuqa.” (Jeme. 3:2) Ia, ena yaga vei iko nomu saga mo dau tukuna ga na itukutuku dina. E levu na tacida era curu ena Koronivuli ni Vuli Vunau era na lai qase ni ivavakoso mai muri. O ira oqo ena ‘levu cake na ka e namaki vei ira.’ (Luke 12:48, VV) Ke sega ni qarauna e dua na qase na nona ivakasala, qai lai leqa kina e dua na lewe ni ivavakoso, e rawa ni tau vua na cudru i Jiova. (Maciu 12:36, 37) O koya gona, na tacida e lesi me qase ni ivavakoso e dodonu “me taura dei na i vakavuvuli dina sa vakatavulici kina ka me rawa kina ni vakatavuvulitaka na i vakavuvuli vinaka.”—Taito 1:9, VV.

Qarauna tale ga me salavata kei “nai vakarau ni vosa dina” ena iVolatabu taucoko na ka o veivakadreti kina. (2 Tim. 1:13) Kua ni yalolailai ena tikina oqo ke o se qai tekivu ena nomu porokaramu ni wili iVolatabu. De dua o se bera ni vakaotia nomu sasaga mo wilika vakaoti na iVolatabu taucoko. Tomana tiko ga. Ia, ni toso tiko nomu wiliwili, dikeva se na vukei iko vakacava na veika e vakaturi e ke ena nomu vakalewa na itukutuku o na via vakayagataka ena nomu veivakavulici.

Kena imatai, tarogi iko mada: ‘E salavata beka na itukutuku oqo kei na ka au sa vulica mai na iVolatabu? Ena vakamuai ira beka na vakarorogo vei Jiova, se na vakavuna tale mera raica cake na vuku vakavuravura, qai uqeti ira mera vakaliuca?’ A kaya o Jisu: “Sa ka dina na nomuni vosa.” (Joni 17:17; Vkru. 13:1-5; 1 Kor. 1:19-21) Kena ikarua, mo qai vakayagataka vinaka na ivola ni vakekeli e vakarautaka na dauveiqaravi yalodina ka vuku. Na iyaya oqo era na vukei iko mo kila vinaka na ibalebale ni veitikinivolatabu kei na kedra ivakavakayagataki dodonu. Ke salavata nomu ivakamacala “kei nai vakarau ni vosa dina,” o qai vakararavi ina veidusimaki i Jiova ena nomu vakamacalataka na ibalebale ni veitikinivolatabu kei na kedra ivakavakayagataki, ena sega ni vakamelei rawa na ka o tukuna.

Vakadeitaka na Nomu iTukutuku. Ni o vosa mai na buturara, ena yaga nomu kauta mai e so na itukutuku buta katakata, ka era kaya e so se ka era sotava. O na vakadeitaka vakacava nira a yaco dina na veika oqo? Dua ena nomu vakayagataka ga na itukutuku era kau mai ena ivurevure nuitaki. Vakadeitaka tale ga ni o sa vakayagataka tiko na itukutuku e se dina tiko ga. Rawa ni veisau na vika se wiliwili ni dua na ka ni toso na gauna; na vakadidike vakasaenitisi e dau oti ga e veisau; na nanuma tale ga e dau yavutaki ena itukutuku makawa e rawa ni veisau me salavata kei na vakadidike vou e so. Dau qarauna gona na itukutuku o vakayagataka mai na niusiveva, retioyaloyalo, walesi, Internet, se sala ni vakau itukutuku tale e so. E veivakasalataki na Vosa Vakaibalebale 14:15: “O koya sa yalowai sa vakabauta na vosa kecega: Ia na tamata yalomatua sa daulewa vakavinaka na nonai lakolako.” Tarogi iko mada: ‘E dau raici ni oqo e ivurevure ni itukutuku nuitaki? Rawa ni dua tale beka na vanua e vakadeitaki kina na itukutuku oqo?’ Kua ni vakayagataka e dua na itukutuku ke o lomalomaruataka.

Ni o sa vakadeitaka oti na dina ni dua na itukutuku, vakasamataka tale ga se o na vakayagataka vakacava. Kua ni kauta mai e dua na itukutuku e duatani na ka e vakamacalataka mo qai mai moica me salavata kei na ka o via tukuna. Ni o via vakabibitaka na ka o tukuna, kua ni vakatubutaka nomu ivakamacala ena nomu vukica na “so” me “lewe levu,” na “lewe levu” me “tamata kece,” kei na “so na gauna” me “gauna kece ga.” Na vakatubutaki ni itukutuku e okati kina na iwiliwili, na levu ni dua na ka, na rabailevu ni kena cakayaco, se kena bibi, e vakacacana wale ga na dina ni dua na ivakamacala.

O na kilai ni o tamata dau dina ke o dau qarauna mo tukuna ga na ka dina. O na vakavuna meda rogo vinaka na iVakadinadina i Jiova. Vakauasivi ni na rogo vinaka kina o “Jiova, na Kalou daudina.”—Same 31:5.