Me Yaga Sara Nomu Wili iVolatabu

1-3. E yaga vakacava na noda wilika na iVolatabu kei na noda muria na kena ivakavuvuli?

“AU VAKAVINAVINAKATAKI Jiova e veimataka ni vukei au meu kila na iVolatabu.” Qori na ka e tukuna e dua na tacida yalewa itabaqase sa wilika oti vaka vasagavulu vakacaca na iVolatabu, e se wiliwili tiko ga. A vola e dua tale na yalewa gone lotu vaKarisito ni vukei koya na nona dau wili iVolatabu me vakabauta ni bula dina tiko o Jiova. Qori e vakavolekati koya sara ga vua na Tamana vakalomalagi. A kaya: “Au sa qai marau ga vakalevu!”

² A uqeti keda kece na yapositolo o Pita meda “vinakata na wainisucu dina e tiko ena vosa ni Kalou.” (1 Pita 2:2) O ira era vakayacora qori ena nodra vulica na iVolatabu ra qai muria na kena ivakavuvuli, ena savasava na nodra lewaeloma qai vakainaki na nodra bula. Era na veitokani dredre tale ga kei ira era lomana ra qai qarava na Kalou dina. Era vuna bibi kece qori meda ‘marautaka kina na lawa ni Kalou.’ (Roma 7:22) Ia e levu tale na kena yaga. Raica mada qo eso.

³ Na levu ga ni nomu vulica na veika me baleti Jiova kei Luvena, na levu tale ga ni nomu lomani rau kei na nomu lomani ira eso tale. O na kila ena ka dina o vulica ena iVolatabu na sala ena vakabulai ira kina na kawatamata talairawarawa na Kalou ni vakarusai na ituvaki ca qo. E veivakacegui na itukutuku o vunautaka ena nomu cakacaka vakaitalatala. Ena vakalougatataki iko o Jiova ni o vakavulici ira tale na so ena veika o wilika ena Vosa ni Kalou.

WILIKA QAI VAKASAMATAKA

4. Ni tukuni me wiliki ‘toka e ra’ na iVolatabu, na cava na kena ibalebale?

⁴ E sega ni vinakata o Jiova mera wilika vakusakusa na nona tamata na nona Vosa. A tukuna vei Josua ena gauna makawa: “Ai vola ni vunau oqo me kakua ni yali e na gusumu; ia mo vakanananu kina [se wilika toka e ra] e na siga kei na bogi.” (Josua 1:8; Same 1:2) Vakacava e vakaibalebaletaki tiko ena ivakasala qori mo cavuta lo na vosa kece o wilika mai na Vakatekivu ina Vakatakila? Sega. E kena ibalebale ga mo wilika ena kena ivakarau o rawa ni vakasama kina vakatitobu. Ni o wilika ‘toka e ra’ na iVolatabu, o na rawa ni vakasamataka na tikina ena yaga vakalevu qai veivakayaloqaqataki ena gauna sara ga o wiliwili tiko kina. Ni o raica na matavosa, tikinivolatabu se italanoa va qori, wilika vakamalua, de dua o rawa ni cavuta lo na vosa qori ena yamemu se tebenigusumu. Ni o cakava qori, ena rawa ni tarai iko dina na ivakavuvuli vakaivolatabu o vulica kina. Na cava e bibi kina qo? Na nomu kila vinaka na ivakasala ni Kalou ena uqeti iko sara ga mo muria.

5-7. Tukuna na ivakaraitaki e yaga kina na nomu wilika toka e ra na Vosa ni Kalou (a) me savasava tiko ga na nomu itovo; (b) mo dau veivosoti qai yalololoma vei ira eso tale; (c) mo nuitaki Jiova tale ga ni o sotava mada ga na ituvaki dredre.

⁵ Na nomu wiliwili toka e ra ena yaga sara ni o dikeva na ivola ena iVolatabu o sega soti ni kila vinaka. Me kena ivakaraitaki, vakasamataka mada qo e tolu na ituvaki. Kena imatai, e dua na cauravou lotu vaKarisito sa lai yaco toka ena parofisai i Osea na nona wili iVolatabu. E cegu vakalailai ena wase 4 ni wilika toka e ra na tikina e 11 ina 13. (Wilika Osea 4:​11-13.) Na vuna? E tarai koya na veitikina qori ni saga tiko me vorata na veitemaki mai koronivuli me cakava na ka tawakilikili. E vakasamataka na veitikina e wilika qai kaya e lomana: ‘O Jiova e raica na veika ca e caka lo. Au sega ni via vakacudrui koya.’ E vakadeitaka na tacida qori me savasava tiko ga na nona itovo ena mata ni Kalou.

⁶ Ena ikarua ni ituvaki, e wilika tiko e dua na tacida yalewa na parofisai i Joeli, sa mai yaco sara na nona wiliwili ena wase 2, tikina e 13. (Wilika Joeli 2:13.) Ni wilika toka e ra na tikinivolatabu qori, e vakasamataka na sala me vakatotomuri Jiova kina ena nona “dauyalovinaka ka yalololoma, sa berabera ni cudru, ka sa ka levu na nona loloma.” E vakadeitaka sara ga ni na saga me muduka na nona dau cavuta na vosa gaga kei na vosa mosimosi ena so na gauna vei watina kei ira tale na so.

⁷ Ena ikatolu ni ituvaki, raitayaloyalotaka mada e dua na tama lotu vaKarisito e vakacegui mai na nona cakacaka qai leqataka na nodratou bula na nona vuvale. E wilika toka e ra ena Neumi 1:7 ni o Jiova e “kilai ira era vakararavi vua,” qai taqomaki ira me vaka e dua na “vakaruru kaukauwa e na siga ni rarawa.” E vakacegui koya sara ga qori. Ni kila e dau veikaroni vakayalololoma o Jiova, sa sega tale ni lomaleqa vakasivia. E dewa na nona wiliwili ena tikina e 15 qai wilika toka e ra. (Wilika Neumi 1:15.) E raica rawa na tacida qori ni nona vunautaka na itukutuku vinaka ni sotava na ituvaki dredre, e vakaraitaka sara ga ni nuitaki Jiova me nona idrodro. Ni vaqara tiko e dua na nona cakacaka, ena tokona tale tiko ga na cakacaka vakavunau ena lomanimacawa.

8. Tukuna vakalekaleka e dua na vatutalei vakayalo o kunea ena nomu wili iVolatabu.

⁸ Eda se qai veivosakitaka oti ga eso na tikina yaga mai na ivola ena iVolatabu era rairai nanuma eso ni dredre me kilai na kena ibalebale. Ke o vinakata mo vulica eso na ka ni o dikeva na ivola na Osea, Joeli, kei na Neumi, e vinaka mo wilika toka e ra eso tale na tikina mai na ivola qori. O na vakavukui qai vakacegui vakalevu ena veika eratou vola na parofita! Vakacava na vo ni ivola ena iVolatabu? Na Vosa ni Kalou e vaka na vanua ni keli daimani. E macala ga ni o na kelikeli vinaka mo kunea na daimani! Io, ni o wili iVolatabu me nomu isausau tale ga mo kunea na vatutalei e tu kina, oya na nona veidusimaki kei na nona veivakayaloqaqataki na Kalou.

SAGA MO KILA NA IVOLATABU

9. Eda rawa ni vakalevutaka vakacava na noda kila na loma ni Kalou?

⁹ E bibi mo wilika e veisiga na iVolatabu, ia e vinaka tale ga mo kila na ibalebale ni ka o wilika. Mo vakayagataka vinaka gona na ivola e vakarautaka na isoqosoqo i Jiova mo vakadikeva kina eso tale na itukutuku me baleti ira na tamata, vanua, se ituvaki o wilika ena iVolatabu. Ke o via kila se rawa ni yaga vakacava ena nomu bula e dua na ivakavuvuli vakaivolatabu, o rawa ni kerea e dua na qase ni ivavakoso se dua tale na lotu vaKarisito matua me vukei iko. Na bibi ni noda vakalevutaka na ka eda kila e vakavotui ena nona ivakaraitaki o Apolosa, dua na lotu vaKarisito ena imatai ni senitiuri a saga sara ga me cakava qori.

10, 11. (a) A vukei vakacava o Apolosa me vakavinakataka na iwalewale ni nona vunautaka na itukutuku vinaka? (b) Na cava eda vulica ena ivakaraitaki i Apolosa? (Raica na kato “E Toso Vata Tiko kei na iSoqosoqo na ka o Vakavuvulitaka?”)

¹⁰ O Apolosa a dua na lotu vaKarisito Jiu “e bau kila vinaka tale ga na iVolatabu” qai “gumatua ena veiuqeti ni yalo tabu.” E tukuna me baleti koya na Cakacaka: “Me tukuna, me vakavulica tale ga vakadodonu na veika me baleti Jisu, ia se kila tiko ga na veipapitaisotaki i Joni.” A sega ni kila o Apolosa ni sa veisau na ivakavuvuli ni papitaiso a vunautaka tiko. Erau rogoca e dua na veiwatini lotu vaKarisito o Akuila kei Virisila na nona veivakavulici o Apolosa e Efeso, rau mani vakamacalataka “vakadodonu vua na sala ni Kalou.” (Caka. 18:​24-26) A yaga vakacava qori vei Apolosa?

¹¹ Ni vunau oti e Efeso o Apolosa, a gole sara i Akaia. “Ni yaco yani e vukei ira sara vakalevu na veiwekani era sa mai vakabauta ena vuku ni loloma soli wale ni Kalou. E gumatua ni vakadinadinataka e matanalevu nodra cala na Jiu, e vakaraitaka tale ga mai na iVolatabu ni o Jisu na Karisito.” (Caka. 18:​27, 28) Sa rawa ni vakamacalataka vakadodonu ena gauna qori o Apolosa na ibalebale ni nona papitaiso e dua na lotu vaKarisito. Ni sa levu na ka e kila, e “vukei ira sara vakalevu” na ka vou mera toso vakayalo. Na cava eda vulica kina? Me vakataki Apolosa ga, meda saga meda kila na ka eda wilika ena iVolatabu. Ia ni vukei keda e dua na tacida matua ena sala meda vakavinakataka kina na noda veivakavulici, e vinaka meda ciqoma ena yalomalumalumu kei na marau. Ke da cakava qori, ena vinaka cake na noda veiqaravi tabu.

VUKEI IRA TALE ESO ENA KA O KILA

12, 13. Tukuna na ivakaraitaki o rawa ni vakayagataka kina vakamaqosa na iVolatabu mo vukea e dua na vuli iVolatabu me toso vakayalo.

¹² Me vakataki Virisila, Akuila, kei Apolosa, eda rawa tale ga ni vu ni veivakalougatataki vei ira eso tale. E dau tarai iko vakacava ni o vakayaloqaqataka e dua me valuta na ka dredre e vakataotaka tiko na nona toso vakayalo? Ke o dua na qase ni ivavakoso, e tarai iko vakacava na nona vakavinavinakataki iko e dua na tacimu vakayalo ena ivakasala vakaivolatabu a vukei koya ena dua na ituvaki dredre a sotava? Io, eda na lomavakacegu qai marau nida vakayagataka na Vosa ni Kalou meda vukei ira kina eso tale mera vakavinakataka na nodra ivakarau ni bula.a Raica mada na sala o rawa ni cakava kina qori.

¹³ E levu na Isireli ena gauna i Ilaija era lomalomaruataka na veika e vauca na sokalou dina kei na sokalou lasu. Na nona ivakasala o Ilaija vei ira qori e rawa ni vukea e dua na vuli iVolatabu e lomalomarua tiko qai sega ni via toso vakayalo. (Wilika 1 Tui 18:21.) Vakasamataka mada na ituvaki qo: Ke leqataka tiko e dua na tataleitaki na nodra rai na nona itokani se vuvale, o rawa ni vukei koya me vakatulewataka me qaravi Jiova ena nomudrau veivosakitaka na Aisea 51:​12, 13.​—Wilika.

14. Na cava ena vukei iko mo nanuma na tikinivolatabu o via vakayagataka mo vukea kina e dua?

¹⁴ E tu ena iVolatabu e levu na ivakasala e rawa ni veivakayaloqaqataki, veivakadodonutaki, se veivakaukauataki vei ira era wilika. Ia o na rairai taroga: ‘Au na kila vakacava na tikinivolatabu e veiganiti kei na ituvaki e sotavi?’ Wilika e veisiga na iVolatabu qai vakasamataka vakatitobu na nona rai na Kalou. Ni o cakava qori, o na kila e levu na ivakasala vakalou ena rawa ni vakalesuya mai na nomu vakasama na yalo tabu i Jiova ena gauna o gadreva kina.​—Mari. 13:11; wilika Joni 14:26.b

15. Na cava mo cakava mo kila vinaka kina na Vosa ni Kalou?

¹⁵ Me vakataki Tui Solomoni ga, masuti Jiova me vakavukui iko mo vakayacora kina na nomu ilesilesi vakalou. (2 Vei. 1:​7-10) Vakatotomuri ira tale ga na parofita ena gauna makawa ena nomu ‘vakadikeva qai vakasaqara matua’ na Vosa ni Kalou mo kila kina na ka dina me baleti Jiova kei na nona inaki. (1 Pita 1:​10-12) A uqeti Timoci na yapositolo o Paula me vakania vinaka sara na lomana “ena vosa ni vakabauta kei na ivakavuvuli totoka.” (1 Tim. 4:6) Ni o cakava qori, o na rawa sara ga ni vukei ira vakayalo eso tale, o na tara cake tale ga na nomu vakabauta.

VEITAQOMAKI NA VOSA NI KALOU

16. (a) A yaga vakacava vei ira e Peria na nodra “dikeva na iVolatabu e veisiga”? (b) Na cava e rui bibi kina ena gauna qo meda wili iVolatabu e veisiga?

¹⁶ E dau nodra ivakarau na Jiu era tiko e Peria, dua na siti e Masitonia, mera “dikeva na iVolatabu e veisiga.” Ni vunautaka o Paula vei ira qori na itukutuku vinaka, era veidutaitaka sara na ka e tukuna kei na ka era kila mai na iVolatabu. Na cava e qai yaco? Era vakadeitaka e levu ni dina na ka e vakavulica, era mani “vakabauta.” (Caka. 17:​10-12) Qori e vakaraitaka ni na dei na noda vakabauti Jiova ke da wili iVolatabu e veisiga. Ke da via bula ena vuravura vou ni Kalou, e bibi me tiko vei keda na vakabauta va qori, “na noda vakadeitaka e lomada ni na yaco dina na ka eda nuitaka.”​—Iper. 11:1.

17, 18. (a) Ena taqomaka vakacava na utoda vakatakarakara na lotu vaKarisito na dei ni noda vakabauta kei na noda loloma? (b) Ena taqomaki keda vakacava mai na leqa na inuinui?

¹⁷ E tiko na vuna vinaka a vola kina o Paula: “Vei keda na gone ni siga, meda yalomatua tiko mada ga da qai dara me isasabai ni sereda na vakabauta kei na loloma, me isala ni uluda na inuinui ni bula.” (1 Ces. 5:8) E vinakati vua na sotia me taqomaka na utona vei ira na meca. Na lotu vaKarisito tale ga me taqomaka na utona vakatakarakara mai na veivakamuai ni ivalavala ca. Na cava ena yaco ke lomani Jiova e dua, e lomani ira eso tale qai vakabauta dei na yalayala ni Kalou? Na dauveiqaravi ni Kalou qori e sa tokara sara tiko ga na isasabai vakayalo ni sereda e vinaka duadua. Ena rairai sega ni cakava na ka ena sega ni vakadonui koya kina na Kalou.

¹⁸ A cavuta tale ga o Paula na isala ni uluda, “na inuinui ni bula.” Ke sega ni taqomaka na uluna na sotia ena gauna vakaivolatabu, ena rawarawa sara na nona mate ena ivalu. Ia ke kaukaua na nona isala, ena sega ni mavoa levu na uluna ke lauta mada ga eso na ka. Nida vulica na Vosa i Jiova, eda na vaqaqacotaka tiko ga na noda nuitaka na nona veivakabulai. Ni dei na noda inuinui, eda na cati ira na vukitani kei na nodra “veivosaki tawayaga” e vaka na vidikoso. (2 Tim. 2:​16-19) Ena vakaukauataki keda tale ga na noda inuinui meda dei nira saga eso meda cakava na ivalavala e cata o Jiova.

KA E BIBI ENA NODA VAKABULAI

19, 20. Na cava eda vakamareqeta kina vakalevu na Vosa ni Kalou, eda na vakaraitaka vakacava na noda taleitaka? (Raica na kato “Solia Vei au o Jiova na ka Sara ga au Gadreva.”)

¹⁹ Nida sa qai volekata tiko ga qo na icavacava, sa qai gadrevi ga vakalevu meda nuitaka na Vosa i Jiova. Ena vukei keda na kena ivakasala meda valuta na noda malumalumu, da qai lewa vinaka na gagadre ni yagoda ivalavala ca. Ena vakayaloqaqataki keda qai vakacegui keda meda kua kina ni rawai ena veivakatovolei i Setani kei na nona vuravura. Na idusidusi e vakarautaka o Jiova ena nona Vosa ena vukei keda meda muria tiko ga na sala ina bula.

²⁰ Meda nanuma tiko ni nona inaki na Kalou mera “bula na veimataqali tamata kece.” Eda wili tiko na dauveiqaravi i Jiova ena “veimataqali tamata kece,” kei ira tale ga eda vukea ena noda cakacaka vakavunau kei na noda veivakavulici. Ia o ira kece era via bula e dodonu mera kila “na ka dina.” (1 Tim. 2:4) E bibi kina meda wili iVolatabu qai bulataka na kena ivakasala uqeti vakalou ke da via bula ena icavacava. Io, na noda wili iVolatabu e veisiga e vakaraitaka nida vakamareqeta vakalevu na ka dina ena Vosa i Jiova.​—Joni 17:17.