E Yaga Noda Vosota na Rarawa

“Eda sa dauvakatokai ira era sa vosota me ra kalougata.”​—JEMESA 5:​11.

1, 2. Eda kila vakacava ni sega sara ga ni inaki i Jiova meda rarawa?

E SEGA ni dua e vinakata me bula rarawa tu; e cata tale ga oqori na Dauveibuli, o Jiova na Kalou. Eda kila na dina ni tikina oqori nida wilika sara ga ena nona Vosa, da qai dikeva na veika e yaco ni buli rau oti na imatai ni tagane kei na yalewa. A buli e liu na tagane. “A sa bulia na tamata na Kalou ko Jiova mai na kuvu ni qele, ka ceguva ki na ucuna nai cegu ni bula, a sa yaco kina na tamata me yalo bula.” (Vakatekivu 2:7) E uasivi vakaoti na yago i Atama kei na nona vakasama, ena sega ni tauvimate se mate.

² Ia, a vakacava tu na vanua a bula kina o Atama? “A sa tea e dua na were na Kalou ko Jiova, mai na tu-i-cake mai Iteni, a sa kauta kina na tamata ka bulia ko koya. A sa vakatubura mai na qele na Kalou ko Jiova na kau kecega sa vinaka na kenai rairai, ka yaga me kakana.” (Vakatekivu 2:​8, 9) Sega ni vakabekataki ni a totoka dina na vanua e bula kina. E sega sara ga ni bau rarawa e Iteni.

3. Na ivakarau ni bula cava erau a tauyavu kina na imatai ni veiwatini?

³ Eda wilika ena Vakatekivu 2:​18: “Sa kaya na Kalou ko Jiova, Sa sega ni vinaka me tiko duadua na tamata: au na bulia e dua na dauveivuke e yaga vua.” E bulia gona o Jiova e dua na wati Atama e uasivi, me rau tauyavutaka e dua na vuvale mamarau. (Vakatekivu 2:​21-​23) Tomana na iVolatabu: “Sa vosavakalougatataki rau na Kalou, a sa kaya vei rau na Kalou, Drau vakaluveni, ka tubu me lewe vuqa, ka vakatawai vuravura, ka vakamalumalumutaka.” (Vakatekivu 1:​28) E nodrau itavi dokai na imatai ni veiwatini me rau vakatawai Iteni, me parataisi kina na vuravura taucoko. Rau na vakaluveni, ia era na sega ni dau rarawa. E vakasakiti dina na itekitekivu ni nodrau bula!​—Vakatekivu 1:​31.

Tekivu na Rarawa

4. Na cava e vakadinadinataki me baleta na bula ni kawatamata ena veitabagauna sa oti?

⁴ Ia, nida dikeva na ivakarau ni bula ni kawatamata ena veitabagauna sa oti, e macala ni a yaco e dua na ka ca. Era rarawa gona vakalevu na kawatamata ena levu ni ka ca e yaco tu. Ena veitabagauna sa oti, era tautauvimate na kawa i Atama, ra qase, ra tini mate sara. Na noda vuravura sa sega tale ni qai parataisi era tawana na matatamata mamarau. E vakamacalataki vinaka na keda ituvaki ena Roma 8:​22: “Sa vutugu vata ko vuravura taucoko, ka sa yaluma e na rarawa, ka yacova na siga oqo.”

5. Erau vakaitavi vakacava na imatai ni itubutubu ena kena takavi keda na kawatamata na rarawa?

⁵ Me kua ni beitaki o Jiova ena vuku ni rarawa levu sa bikai keda tu mai vakabalavu. (2 Samuela 22:31) O keda tale ga eda rawa ni vakavuna. “Era sa ca sara, era sa kitaka nai valavala velavela.” (Same 14:1) Ena itekitekivu ni nodrau bula na imatai ni noda itubutubu rau a vakalougatataki ena veika vinaka. Me kua ni mudu na veika vinaka oqori ena gadrevi me rau talairawarawa tiko ga vua na Kalou, ia rau a sega ni via vakararavi vei Jiova o Atama kei Ivi. Rau ivalavala ca ena gauna ga erau biuti Jiova kina. Rau vakila tale ga na malumalumu me yacova ni rau mate. E dewavi keda kina na nodrau ivalavala ca.​—Vakatekivu 3:​17-​19; Roma 5:​12.

6. A vakaitavi tale ga vakacava o Setani ena itekitekivu ni rarawa?

⁶ E dua na ibulibuli vakayalo e qai vakatokai me o Setani na Tevoro a vakaitavi tale ga ena rarawa kece ni kawatamata. A tu vua na galala ni vakatulewa. E vakayagataka cala ena nona saga me sokaloutaki. Ia, e dodonu me sokaloutaki ga o Jiova, sega ni o ira nona ibulibuli. O Setani ga a vakavuna me rau kua ni vakararavi vei Jiova o Atama kei Ivi, me rau via ‘vaka na Kalou, me rau kila na ka vinaka kei na ka ca.’​—Vakatekivu 3:5.

Dodonu ga me Veiliutaki o Jiova

7. Na cava e vakadinadinataki ena ca ni talaidredre vei Jiova?

⁷ Na kena sa vakilai tu na ca ni talaidredre, e vakadinadinataka ni o Jiova ga e dodonu me veiliutaki, qai donu nona lewa ni Turaga Cecere ni Lomalagi kei Vuravura. E laurai ena vica na udolu na yabaki sa oti ni a tauyavutaka o Setani, a yaco me “turaga ni vuravura oqo,” na veiliutaki e sega ni veivakacegui baleta ni ca, tawadodonu, qai voravora. (Joni 12:31) Na dede ni nodra liutaki tiko vakaca na kawatamata ena kaukaua i Setani, e vakavotuya ga nira lekata dina na lewadodonu. (Jeremaia 10:23) O koya gona, se mani veiliutaki cava e sega ni okati kina o Jiova, sa macala ga ni na guce. Bau vakadinadinataki sara ga oqo ena volaitukutuku makawa ni kawatamata.

8. Na cava sa nakita tu o Jiova me baleta na veiliutaki vakatamata kece e vuravura, ena vakayacora vakacava?

⁸ Sa vica vata na udolu oqo na yabaki e vakatara tu kina o Jiova na nodra liutaki ira ga na tamata, ra sega ni nuitaki koya, ia sa kena gauna oqo me vakarusa na veiliutaki kece e vuravura qai vakaisosomitaka ena nona Matanitu. E tukuni ena dua na kena parofisai: “E na nodra gauna na tui [nodra veiliutaki na tamata] ko ya ena qai vakatura na Kalou ni lomalagi e dua na matanitu [nona matanitu vakalomalagi e liutaka o Karisito], ena sega sara ni vakarusai rawa: . . . ia ena vurumemeataka ga ka vakaotia na veimatanitu oqori, ka na tu ga ka sega ni mudu.” (Taniela 2:​44) Sa na oti vakadua na veiliutaki vakatimoni, vakatamata tale ga, ia na Matanitu duadua ga vakalomalagi ni Kalou ena tudei qai veiliutaki e vuravura. Ena kena Tui o Karisito, ra qai le 144,000 na tamata yalodina era digitaki yani e vuravura mera veiliutaki vata.​—Vakatakila 14:1.

Yaga ni Vosota Nida Vakararawataki

9, 10. E yaga vakacava vei Jisu nona vakararawataki?

⁹ E ka vakasakiti meda dikeva mada na nodra ivakatagedegede na lai veiliutaki ena Matanitu vakalomalagi. Kena imatai, e vakaraitaka sara ga o Jisu ni ganiti koya na itavi ni Tui. A cakava tiko na loma i Tamana ni tu vata kei koya ena dua na gauna balavu, me nona “matai daucakacaka.” (Vosa Vakaibalebale 8:​22-​31) Ni talai koya mai vuravura o Jiova, a sega ni tu vakasuka. E mai vakabibitaka na dodonu ni veiliutaki cecere i Jiova kei na nona Matanitu. E ivakaraitaki vinaka dina o Jisu ena nona vakamalumalumu ina veiliutaki cecere oya.​—Maciu 4:​17; 6:9.

¹⁰ A vakacacani o Jisu, tini vakamatei sara. Ni se cakacaka tiko vakaitalatala, a raica votu na nodra vakaloloma na tamata. E dua beka na yaga ni nona raica na veika oqori, vaka kina nona vakararawataki? Io. Kaya na Iperiu 5:​8, (VV): “E dina ga ni Luve ni Kalou ko koya ia e a vulica na talairawarawa mai na veika rarawa e sota kaya.” Na veika e donuya ena nona bula tiko e vuravura e vakavuna me dau loloma qai veinanumi. A vakila sara ga na leqa e tara tu na kawatamata. E dau lomani ira na rarawa tu qai kila na bibi ni nona itavi me vakabulai ira. Dikeva mada na ka e tukuna na yapositolo o Paula me baleta na tikina oqo ena Iperiu: “Sa i koya oqo sa kilikili kina kei koya me yaco me vakataki ira sara na tacina e na ka kece ga; me yaco rawa kina me nodra Bete Levu, dauloloma ka lomadina e na cakacaka ni Kalou; me sorovaka na nodra i valavala ca na tamata. Me vaka ni a sa dau veretaki ka vakararawataki ko koya, sa rawa vua edaidai me vukei ira era sa dau veretaki.” “Ni sa sega ni noda bete levu ko koya sa sega ni lomani keda rawa ni da sa malumalumu; ia sa dauveretaki vakatautauvata e na ka kecega ko koya, ia ka sega na nona cala. E na vuku ni ka oqori tou toro doudou kina ki nai tikotiko - vakaturaga loloma, me da vinakati kina, me da lomani talega ka vukei e na gauna e yaga kina.”​—Iperiu 2:​17, 18, VV; 4:​14-​16; Maciu 9:​36; 11:​28-​30.

11. Ena yaga vakacava vei ira na qai veiliutaki vakatui ra bete tale ga na nodra bula taumada e vuravura?

¹¹ E rawa ni tukuni tale ga oqori vei ira na le 144,000, era “vakabulai” mai vuravura mera veiliutaki kei Karisito Jisu ena Matanitu vakalomalagi. (Vakatakila 14:4) Era tamata ga vakataki keda, ra qai bula maliwai ira na vakararawataki e vuravura, era vakila tale ga na bula rarawa. Levu era vakacacani, qai so mada ga era vakamatei nira yalodina tiko vei Jiova kei na nodra soli ira mera imuri i Jisu. Era ‘sega sara ga ni bau madualaka na itukutuku ni noda Turaga, ia era vosota ga na veivakararawataki ena vuku ni tukutuku vinaka.’ (2 Timoci 1:8) Na veika gona e yacovi ira ena nodra bula tu e vuravura, e veiganiti kina mera na liutaka na kawatamata mai lomalagi. Era vulica mera dauloloma, ra yalovinaka, ra qai dauveivukei.​—Vakatakila 5:​10; 14:​2-5; 20:6.

Nodra Marau na Nuitaka na Bula e Vuravura

12, 13. E yaga vakacava vei ira na nuitaka na bula e vuravura na nodra vakararawataki?

¹² Vakacava na rarawa eda vakila tu nikua, ena yaga beka vei keda na nuitaka na bula tawamudu ena parataisi e vuravura, e sega kina na tauvimate, rarawa kei na mate? E sega sara ga ni dua e taleitaka na mosi kei na yaluma e vu mai na noda rarawa voli. Ia, ke da dau vosota na veivakararawataki vaka oya, ena vinaka cake sara na noda itovo da qai bula mamarau.

¹³ Dikeva na ka e tukuna na Vosa ni Kalou me baleta na tikina oqori: “Kevaka dou sa vakararawataki e na vuku ni valavala dodonu, dou sa kalougata kina.” “Kevaka dou sa vakasewasewani e na vuku ni yaca i Karisito, dou sa kalougata kina.” (1 Pita 3:​14; 4:​14) “Dou sa kalougata, ni dou sa vakasewasewani, ka vakacacani, ka vosavakacacataki vakailasu e na ka kecega e ca, e na vukuqu: dou reki, ka marau vakalevu: ni sa levu na kenai sau vei kemudou mai lomalagi.” (Maciu 5:​11, 12) “Sa kalougata na tamata sa vosota ni sa vakatovolei io, ni sa vakatavolei oti, ena rawata nai sala ni bula.”​—Jemesa 1:​12.

14. E yaco vakacava na veivakararawataki me vu ni marau vei ira na dau sokaloutaki Jiova?

¹⁴ E sega ni vu ni marau na noda vakararawataki tiko. Ia e vu ni marau ga kei na vakacegu nida kila nida vakararawataki ena noda cakava tiko na loma i Jiova da qai vakatotomuri Jisu. Kena ivakaraitaki ena imatai ni senitiuri, era a vesu e so na yapositolo, ra veilewaitaki ena nodra mataveilewai levu na Jiu ra qai vakararawataki ena vuku ni nodra vunautaki Jisu Karisito. Era mokulaki ra qai sereki. Na cava eratou qai cakava? Kaya na iVolatabu ni ratou “sa lako tani e matadra na mataveilewai, eratou sa reki ni ratou sa yaga me ratou vakacacani e na vuku ni yacana.” (Cakacaka 5:​17-​41) Eratou sega ni marautaka nodratou moku kei na mosi e lako muria mai. Eratou marautaka ga ni yaco na veika oqori ni ratou yalodina tiko vei Jiova, ratou qai vakatotomuri Jisu.​—Cakacaka 16:25; 2 Korinica 12:10; 1 Pita 4:​13.

15. Ena qai yaga vakacava ena noda bula sa tu mai liu na noda vosota na rarawa ena gauna oqo?

¹⁵ Kevaka e tiko vei keda na rai donu me baleta na veivakacacani kei na veitusaqati, eda na dau yalovosovoso. Ena yaga ena noda vosota na veivakararawataki eda na sota kaya e muri. Eda wilika: “O i kemuni na wekaqu, ni okata ga me ka ni reki na nomuni sota kaya na veimataqali veivakatovolei e vuqa; ni ko ni kila sa dau vakatubura na yalo vosota na vakatovolei ni nomuni vakabauta.” (Jemesa 1:​2, 3, VV) E kaya tale ga na Roma 5:​3-5: “Me da sa daureki talega e na vuku ni veika rarawa: ni da sa kila sa tubu na dauvosota mai na ka rarawa; ia na dauveivakatovolei mai na dauvosota; ia nai nuinui mai na dauveivakatovolei. Ia sa sega na madua e na vuku ni nuinui.” Koya gona na levu ga ni noda vosota na veivakatovolei nida muria tiko na bula vakarisito, eda sa vakarautaki keda tiko meda vosota na veivakararawataki eda na donuya ena gauna ca eda sa bula tu kina oqo.

Ena Vakaicocovitaki Keda o Jiova

16. Ena vakaicocovitaki ira vakacava na tui ra qai bete tale ga o Jiova ena vuku ni nodra vosota na rarawa?

¹⁶ Kevaka mada ga eda vakayalia na iyau vakavuravura nida vakacacani se tusaqati ena noda yalodina tiko ina ivalavala vakarisito, eda na lomavakacegu nida kila ni na qai vakaicocovitaki keda o Jiova. Kena ivakaraitaki, e vola na yapositolo o Paula vei ira na nuitaka na bula e lomalagi: “Dou . . . reki ni sa kovei na nomudoui yau, ni dou sa kila e na lomamudou sa tu ga . . . na nomudoui yau e vinaka cake” ni dou sa veiliutaki ena Matanitu ni Kalou. (Iperiu 10:34) Vakasamataka mada na nodra marau ni liutaki ira o Jiova kei Karisito mera vakaitavi tale ga ena nodra vakalougatataki na kawatamata ena vuravura vou. Dina kina na vosa ni yapositolo o Paula vei ira na lotu Vakarisito yalodina: “Au vakasamataka ni veika rarawa eda sota kaya tiko e daidai e na sega ni rawa ni vakatautauvatani kei na lagilagi e na qai vakaraitaki vei keda e na gauna mai muri.”​—Roma 8:​18, VV.

17. Ena vakalougatataki ira vakacava o Jiova na nuitaka na bula e vuravura, nira yalodina tiko vua?

¹⁷ E vaka tale ga kina vei ira na nuitaka na bula e vuravura, se mani cava era vakayalia se ra vakuai ira kina ena nodra qaravi Jiova, ena qai levu sara na ka e vakaicocovitaka vei ira ena gauna se bera mai. Ena vakalougatataki ira ena bula uasivi, qai tawamudu ena parataisi e vuravura. Ena vuravura vou oya ena “tavoya tani kecega na wai-ni-mata mai na matadra; ia ena sega tale na ciba, se na rarawa, se na tagi, ka na sega tale na vutugu.” (Vakatakila 21:4) Sa dua dina na yalayala totoka! Se mani cava eda vakuai keda kina ena vuravura oqo nida qaravi Jiova tiko, ena sega ga ni vakatauvatani rawa kei na bula totoka sa tu mai liu, ena vakalougatataki ira kina na nona tamata yalodina nira vosota na veivakararawataki.

18. Na vosa ni yalayala cava e veivakacegui e cavuta o Jiova ena nona Vosa?

¹⁸ Na veivakararawataki cava ga eda vosota yani oqo, ena sega sara ga ni vakalatilati ena noda marautaka na bula tawamudu ena vuravura vou ni Kalou. Sa na qai oti vakadua na veivakararawataki oqori nida sa vakila na bula totoka ena vuravura vou. Eda wilika ena Aisea 65:​17, 18: “Ena sega ni nanumi na ka eliu, ena sega ni curu tale ki na lomamudou. Ia dou reki ka marau ka sega ni mudu e na ka kau sa cakava.” Veiganiti gona nona tukuna na taci Jisu vakacabecabe, o Jemesa: “Eda sa dauvakatokai ira era sa vosota me ra kalougata.” (Jemesa 5:​11) Kevaka gona eda vosota ena yalodina na veivakararawataki ena gauna oqo, ena yaga vei keda nikua, vaka kina na gauna se bera mai.

O na Sauma Vakacava?

• Eda mai vakararawataki tu vakacava na kawatamata?

• Ena yaga vakacava nodra vakararawataki o ira era na qai veiliutaki e vuravura kei ira na lewenivanua?

• Eda na marau vakacava nikua, dina ga nida rarawa tu?

[iYaloyalo ena tabana e 27]

A totoka na veigauna sa tu e liu vei rau na imatai ni noda itubutubu

[iYaloyalo ena tabana e 29]

Nona raica sara ga o Jisu na rarawa e vakarautaki koya me dua na Tui vinaka qai Bete Levu

[iYaloyalo ena tabana e 31]

Eratou ‘reki na yapositolo ni yaga nodratou vakacacani’ ena vuku ni nodratou vakabauta