E Yaga Vakacava na Neimami Laibri ena Vale ni Soqoni?

O via vakadidike mo kila vinaka na iVolatabu? O via kila e dua na tikinivolatabu se dua na tamata, dua na vanua, se dua na ka e tukuni ena iVolatabu? Se o dau vakasamataka ke na rawa ni vukei iko na Vosa ni Kalou ena dua na ka o leqataka? Mo vakayagataka gona na laibri ena Vale ni Soqoni.

E tu kina na iyaya ni vakadidike yaga. De dua e sega ni tiko kece vei iko na ivoladusidusi kece vakaivolatabu era tabaka na iVakadinadina i Jiova ena nomu vosa. Ia na laibri ena Vale ni Soqoni e tu kina e levu na ivola se qai tabaki ga. Ena rairai tu tale ga kina e dua na ivolavosa vinaka, veimataqali ivakadewa ni iVolatabu, kei na so tale na ivola yaga. O rawa ni vakayagataka na laibri ni bera ni tekivu na soqoni se na gauna e oti kina. Ke tiko kina e dua na kompiuta, de dua sa biu tu kina na Watchtower Library. Qo e dua na porokaramu ni kompiuta e tu kina e levu na neimami ivola, e rawarawa tale ga ni o vakadidike kina ena dua na ulutaga, vosa, se tikinivolatabu.

E yaga vei ira na gonevuli era vakaitavi ena Soqoni ni Bula vaKarisito kei na Cakacaka Vakaitalatala. O rawa ni vakayagataka vinaka na laibri ena Vale ni Soqoni ni o vakarautaka na nomu itavi. E qarava na laibri na ivakatawa ni Soqoni ni Bula vaKarisito kei na Cakacaka Vakaitalatala. Na nona itavi me raica ni sa tu kece kina na ivola vovou, me raica tale ga me tuvanaki vinaka. E rawa ni vukei iko o koya se na nomu qasenivuli ni iVolatabu ena itukutuku o vinakata. Ia e sega ni dodonu me kau tani mai na laibri e dua na ivola e tu kina. E bibi tale ga me kua ni volavolai na ivola e vakayagataki.

E tukuna na iVolatabu ni o koya e via “kila na ka e baleta na Kalou,” e dodonu me tu vakarau me vakasaqara me vaka na “iyau vuni.” (Vosa Vakaibalebale 2:1-5) O rawa ni vakayagataka na laibri ena Vale ni Soqoni mo vakadidike kina.

• Na iyaya ni vakadidike cava e tiko ena laibri ni Vale ni Soqoni?

• O cei e rawa ni vukei iko mo vakayagataka vinaka na laibri?