iTuvatuva Vou ni Laibri ena Kingdom Hall

Sa vica vata mai oqo na yabaki na kena yaga tiko vei ira na ivavakoso e veiyasa i vuravura na nodra vakayagataka na laibri ni Kingdom Hall, e dau yacana tu na laibri ni Koronivuli ni Vuli Vunau. E liu, e dau kena ivakarau mera yadua na laibri na veivavakoso. Ia oqo, ni vakavuqa mera wasea vata tiko na vakayagataki ni dua na Kingdom Hall e sivia e dua na ivavakoso, qai so na ivavakoso e duidui na nodra vosa, e nanumi me sa na yadua ga na laibri ena Kingdom Hall na duidui vosa e vakayagataki kina. Sa na vakatokai ga me laibri ni Kingdom Hall, qai vinakati me na tawa vinaka, me tu tale ga kina na ivola vovou kece. Ena Kingdom Hall lelevu e sivia na dua na kena vanua ni soqoni, me yadua na laibri na vosa yadua e vakayagataki kina.

E nuitaki ni ituvatuva oqo ena musuka sobu na isau vakailavo ni laibri, ena sega tale ga ni vakaosooso. Kuria, ni kau vata mai na ivola ni rua na laibri, se sivia, e macala ni na levu sara na ivola e rawati. Ia nira cokovata na ivola mai na vica na laibri, e rawa nira tautauvata e so na ivola, me qai maroroi vinaka na kena caca me baleta na Kingdom Hall vovou era tara. Ke taukena na Kingdom Hall e dua na kompiuta e tugani tu kina na Watchtower Library ena CD-ROM, ena yaga sara oqo vei ira e so na tacida.

Me baleta na laibri yadua ni Kingdom Hall, ena lesi e dua na tacida tagane me qarava vakatabakidua, se me kena librarian, ia ena vinaka me lesi ga ina itavi oqo e dua na ivakatawa ni Koronivuli ni Vuli Vunau. Ni toso na gauna me vakuria tiko na tacida oqo na laibri ena ivola veiganiti, me vakatakilakilataka tale ga vakamaqosa na waqanivola kece e loma, me vakaraitaka ni ivola ni laibri ni Kingdom Hall. Me vakadua ena dua na yabaki me wilika kece na iwiliwili ni ivola ena laibri me vakadeitaka ni sega ni dua na ivola e yali, qai tu vinaka kece tu. Me kua ni dua e kauta tani mai na Kingdom Hall na ivola ni kena laibri.

Sega ni vakabekataki nida vakila kece na lewe ni ivavakoso na yaga ni laibri ni Kingdom Hall. Meda vakamareqeta mada ga na isolisoli oqo ena noda qarauna da qai vakayagataka vinaka meda ‘kilai koya kina na Kalou.’​—Vkai. 2:5.