Ena rawa ni oti na rarawa?

KA E KAYA NA IVOLATABU

“Na Kalou . . . ena qusia tani tale ga na wainimata kece mai na matadra, sa na sega tale na mate, na lolosi, na tagiyaso, kei na mosi.”​—Vakatakila 21:3, 4, Vakadewa ni Vuravura Vou.

KENA YAGA VEI IKO

Vakadeitaka ni sega ni vakavuna na Kalou na noda leqa.​—Jemesa 1:13.

Veivakacegui nida kila ni kauaitaka sara ga na Kalou na noda rarawa.​—Sakaraia 2:8.

Nuitaka ni na oti na veika rarawa kece.​—Same 37:9-11.

EDA RAWA NI VAKABAUTA NA KA E KAYA NA IVOLATABU?

Io, qo e rua na vuna:

• E cata na Kalou na rarawa kei na veika tawadodonu. Vakasamataka na rarawa ni Kalou nira vakararawataki vakaca na nona tamata ena gauna vakaivolatabu. E kaya na iVolatabu ni vusolo na lomana ena vukudra era “vakararawataki ira” na nona tamata.​—Dauveilewai 2:18, Vakadewa ni Vuravura Vou.

  Na Kalou e cati ira sara ga era dau veivakacacani. Kena ivakaraitaki, e kaya na iVolatabu ni ka vakasisila vua “na liga e vakadavea na nodra dra na sega ni cala.”​—Vosa Vakaibalebale 6:16, 17.

• E kauaitaki keda yadua na Kalou. “Ni sa kila na tamata yadua na kena ca ni lomana, kei na nona rarawa,” qori tale ga na ka e vakila o Jiova!​—2 Veigauna 6:29, 30, Ai Vola Tabu.

  Sa voleka na gauna me vakaotia kina na noda rarawa na matanitu i Jiova. (Maciu 6:9, 10) Ena gauna mada ga qo, e dau vakacegui ira na qarai koya ena yalodina.​—Cakacaka 17:27; 2 Korinica 1:3, 4.