Na Cava na Matanitu ni Kalou?

KA E KAYA NA IVOLATABU

“Ena vakarautaka na Kalou ni lomalagi e dua na matanitu ena sega sara ni vakarusai.”​—Taniela 2:44, Vakadewa ni Vuravura Vou.

“E soli vei keda e dua na gonetagane, ena vakatau vua na matanitu.”​—Aisea 9:6, ivakamacala e ra.

KENA YAGA VEI IKO

• Dua na matanitu lewadodonu e rawa ni vakacegui iko.​—Aisea 48:17, 18.

• Ena vuravura vou sa roro tiko mai, ena vinaka vakaoti na bula, o na marau tale ga kina.​—Vakatakila 21:3, 4.

EDA RAWA NI VAKABAUTA NA KA E KAYA NA IVOLATABU?

Io, qo e rua na vuna:

• A vakaraitaka sara ga o Jisu na ka ena cakava na Matanitu ni Kalou. A vakavulici ratou nona imuri me ratou masuta me yaco mai na Matanitu ni Kalou, me caka tale ga na loma ni Kalou e vuravura. (Maciu 6:9, 10) A vakaraitaka tale ga o Jisu na sala ena saumi kina na masu qori.

  Ni se tiko e vuravura o Jisu, a vakani ira na walokai, vakabulai ira na tauvimate kei ira na mate! (Maciu 15:29-38; Joni 11:38-44) Me vaka ni na qai veiliutaki ena Matanitu ni Kalou o Jisu, e vakaraitaka kina na ka ena cakava na Matanitu qori vei ira na vakarurugi kina.​—Vakatakila 11:15.

• Na ituvaki kei vuravura nikua e vakaraitaka ni sa voleka na Matanitu ni Kalou. A parofisaitaka o Jisu ni bera ni kauta mai na sautu e vuravura na Matanitu ni Kalou, ena yaco mada na ivalu, leqa ni kakana, kei na uneune.​—Maciu 24:3, 7.

  Eda raica sara tu ga qori nikua. Eda nuidei gona ni sa voleka me vakaotia na Matanitu ni Kalou na leqa kece qori.