TARO 3
Au na Rawa Vakacava ni Veitalanoa kei Rau na Noqu iTubutubu?
CAVA O NA CAKAVA?
Vakasamataka mada na ituvaki qo e sotava o Geoff, e yabaki 17. Sa vakaotia na cakacaka ni vale e tukuni vua. E mani lai sara tivi me vakacegu toka kina.
E katakata o tamana ni raici koya.
“Geoffrey! Na cava o vakalusi gauna tiko kina ena sara tivi, o sega ni vukei tacimu ena nona ka ni vuli? O sega ni dau cakava na ka e tukuni vei iko!”
E kaya lo o Geoff: “Oilei, se baci tekivu.”
E taroga sara o tamana: “Ei, na cava o kaya?”
“Sega ni dua na ka, Ta,” e kaya vakacudrucudru o Geoff.
Sa qai katakata ga o tamana, e kaya lesu vei Geoff: “Kua ni vosa mai va qori vei au!”
Ke o tu ena ituvaki ya, na cava o na cakava me kua kina na veiba?
VAKASAMA QAI VAKATULEWA!
Na nomu veivosaki kei rau na nomu itubutubu e vaka ga na draiva. Ke sogo na gaunisala o muria tiko ena vuku ni dua na ituvaki e yaco, o rawa ni muria e dua tale na gaunisala.
KENA IVAKARAITAKI:
E kaya e dua na goneyalewa o Leah: “E dau dredre na veivosaki kei noqu Ta. Ni keirau veivosaki ena so na gauna, oti ga vakalailai sa dau tukuna, ‘Vosota, na cava tale o kaya?’”
TOLU NA KA E RAWA NI CAKAVA O LEAH.
Kailavaki nona Ta.
E kailavaka o Leah: “Ae, au vosa tiko vei iko! Rogoci au mada!”
Galuvi nona Ta.
Nanuma o Leah me sa kua ni talaucaka na nona leqa vei nona Ta.
Waraka e dua na gauna veiganiti me veivosakitaki tale kina na leqa.
E rawa ni veitalanoa o Leah kei na nona Ta ena dua tale na gauna, se talaucaka na nona leqa ena dua na ivola vei tamana.
Na cava o nanuma ni dodonu me cakava o Leah?
VAKASAMATAKA MADA: E curuoso toka ena levu na ka na vakasama i tamai Leah, e sega ni kila kina na ituvaki e sotava tiko o luvena. Ke muria gona o Leah na imatai ni vakatutu, ena tawayaga wale ga na nona kailavaki tamana. Qori ena vakadredretaka na veivosaki, ena vakaraitaka tale ga ni sega ni dokai nona Ta o Leah. (Efeso 6:2) Kena ibalebale e sega ni vinaka na imatai ni vakatutu.
Kua ni vakalaiva eso na ituvaki me tarova na nomu veivosaki kei rau na nomu itubutubu
Na cava e sega ni vinaka tale ga kina na ikarua ni vakatutu? Ke sega ni veivosaki o Leah kei na nona Ta, ena sega ni kila o tamana na ka e sotava tiko, ena sega tale ga ni rawa ni vukei koya. E sega ni vinaka kina na veigaluvi, ia me veivosakitaki na leqa.
E vakatutu vinaka duadua me muria o Leah na kena ikatolu. Ke dredre mada ga ena imatai ni gauna me vosa vei nona Ta, e rawa ni waraka o Leah e dua na gauna veiganiti me rau veivosaki tale kina. E rawa ni volavola tale ga vei nona Ta ke nanuma ni na rawarawa cake vua.
E yaga tale ga na volavola ni rawa ni vakasamataka vinaka o Leah na ka me tukuna. Na nona talaucaka na lomana ena ivola e rawa ni kila vinaka kina o nona Ta na ituvaki e sotava tiko. Kena ibalebale erau na vakila ruarua na yaga ni ikatolu ni vakatutu o Leah kei nona Ta. Se mani veivosaki se volavola, na ikatolu ni vakatutu e muri kina na ivakasala vakaivolatabu me ‘guti na bula veiyaloni.’—Roma 14:19.
Na cava eso tale na ka e rawa ni cakava o Leah?
Vakasamataka e dua tale na vakatutu, qai vola ena vanua e lala toka e ra. Vola tale ga na yaga ni vakatutu qori.
Vosa Vakadodonu
Nanuma tiko ni rau rawa ni taura cala na ka o kaya na nomu itubutubu.
KENA IVAKARAITAKI:
Ni rau taroga na nomu itubutubu se cava o matararawa kina, o na rairai kaya: “Au sega ni via veitalanoataka.”
Ia rau na nanuma nomu itubutubu ni o kaya: “Drau sega ni nuitaki, au na sega ni tukuna kina vei kemudrau na noqu leqa. Au na tukuna ga vei ira na noqu itokani.”
Kaya mada o sotava e dua na leqa rau qai kaya na nomu itubutubu ni rawa ni rau veivuke. Ia o qai kaya: “Kua ni leqa. Au kila na ka meu cakava.”
Rau na rairai nanuma nomu itubutubu ni o kaya:
De dua ena vinaka cake mo kaya: