Ra Taroga na iTabagone
Au na Vosa Vakacava Vei Rau Noqu iTubutubu?
“Dua na ka noqu sasaga meu tukuna vei rau na noqu itubutubu na lomaqu, ia au rarawataka ni rau sega ni via vakarorogo. Au saga ena noqu igu meu sereka na ka e tu e lomaqu, ia a dreve ga!”—Rosa.a
NI O se gone, sega ni vakabekataki ni o dau kere ivakasala vei rau nomu itubutubu. O na tukuna vei rau na itukutuku cava ga o kila. O doudou ni vakaraitaka na lomamu kei na nomu vakasama, o qai nuitaka vakaoti nodrau ivakasala.
Ia ena gauna qo, o rairai nanuma ni rau sa sega ni kauaitaki iko vakalevu na nomu itubutubu. “Ena dua na gauna ni keitou vakayakavi tiko, au tagi qai talaucaka na lomaqu,” e tukuna o Adi. “Rau vakarogoci au noqu itubutubu, ia rau sega sara ni kauai.” Na cava e qai yaco? “Au lako ina rumu, qai sorova tale na tagi!”
Ena so na gauna o na rairai nanuma ni vinaka cake mo kua ni talaucaka na lomamu vei rau na nomu itubutubu. “Au veivosakitaka kei rau noqu itubutubu e levu na ulutaga,” e tukuna e dua na gonetagane o Koresi. “Ia ena so na gauna e vinaka me rau kua ni kila na ka kece e tu ena noqu vakasama.”
E cala beka mo kua ni tukuna eso na ka o vakasamataka tu? Sega—mo kua ga ni vakacalai. (Vosa Vakaibalebale 3:32) Ke rau mani sega ni kauaitaka na kemu ituvaki na nomu itubutubu se o lomalomarua na vosa, e macala kina e dua na ka: Ena vinakati mo veivosaki kei rau—ena vinakati tale ga me rau rogoci iko.
Veivosaki Tiko Ga!
Ena so na ituvaki, na nomu veivosaki kei rau nomu itubutubu e vaka na vakau motoka. O na muria e dua tale na gaunisala ke sogo na kena o muria tiko. Me kena ivakaraitaki.
iLati #1: O via vosa vei rau nomu itubutubu, ia kena irairai ni rau sega ni vakarorogo. “E dau dredre vei au meu veivosaki kei tamaqu,” e tukuna e dua na goneyalewa o Lia. “Ena so na gauna niu vosa tiko vua, ena tukuna tale mai, ‘Vosoti au, na cava o tukuna?’”
TARO: Vakacava ke via veivosakitaka o Lia e dua na leqa? Qo e tolu na vakatutu.
Vakatutu A
Kailavaki tamana. Ena rairai kailavaka yani o Lia: “Sobo, rogoci au mada! Au via tukuna vei iko e dua na ka!”
Vakatutu B
Kua ni vosa vei tamana. Ena rawa sara ga vei Lia kua ni talaucaka nona leqa vei rau na nona itubutubu.
Vakatutu C
Waraka e dua tale na gauna veiganiti me tukuna kina na lomana. E rawa ni veivosaki sara ga kei tamana, se vola e dua na ivola me vakaraitaka kina na nona leqa.
Na vakatutu cava o nanuma me muria o Lia?․․․․․
Meda raica mada se cava e rawati ena vakatutu qo. E dau osooso vakalevu o tamai Lia—qai sega ni kila na rarawa nei luvena. Ke mani digia o Lia na Vakatutu A, ena sega ni kila o tamana na vuna e kailavaki koya tiko kina. Na ivukivuki va qo ena sega ni kauaitaka kina o tamana na ka e tukuna, e ivakaraitaki tale ga ni sega ni doka na nona itubutubu. (Efeso 6:2) Ena sega ni rawati e dua na ka ena ituvaki ya.
De dua ena rawarawa ke muri na Vakatutu B ia e sega ni ka vakayalomatua. Baleta? “Ni sa sega na bose, sa sega ni yaco na ka e nanumi: ia ni ra sa lewe vuqa na daubose, sa vakataudeitaki.” (Vosa Vakaibalebale 15:22) Ena vinakati gona vei Lia me veivosaki keirau nona itubutubu me rawa ni wali kina nona leqa. Erau na vinakata tale ga me rau kila na ka e yaco tiko ena nona bula, me rau rawa ni vukei koya. Ena sega ni rawati e dua na ka ni sega na veivosaki.
Ena Vakatutu C, a sega ni laiva o Lia me yala ga e kea na veivosaki, ia a saga me qai veivosaki tale ena dua na gauna. Ena rairai vinaka cake vei Lia me vola e dua na ivola vei tamana. Qo ena rawa ni vakamacalataka vinaka kina na ka sara ga e via tukuna tiko vei tamana. Ni wilika na ivola o tamana, ena kila kina na ka a saga tiko o luvena me tukuna vua, ena rairai kila tale ga na nona leqa. Na vakatutu qo e yaga vei rau vakaveitamani.
Na vakatutu cava tale ena rairai digia o Lia? Ke o vakasamataka e dua, qai vola e ra. Vola tale ga na ka ena rairai rawati ena vakatutu ya.
․․․․․
iLati #2: Rau via veivosaki nomu itubutubu, ia o sega ni vinakata. “E vakasevaki noqu dau tarogi ena levu na ka niu suka mai na vuli,” e tukuna o Sera. “Au sega ni via vakasamataka tale na ka ni vuli ena gauna qori, rau qai tarogi au na noqu itubutubu: ‘Vakacava na vuli nikua? Dua na leqa?’” Sega ni vakabekataki ni vinaka na inaki ni nodrau taro na nona itubutubu. Ia e kaya ga o Sera, “E dau dredre meu veivosakitaka na ka ni vuli vakabibi niu wawale.”
TARO: Na cava e rawa ni cakava o Sera ena ituvaki ya? Me vaka ga ena ivakaraitaki sa oti, e rawa ni muria e tolu na vakatutu.
Vakatutu A
Sega ni via veivosaki. Ena rawa ni tukuna: “Sa rauta mada. Au sega ni via veitalanoa ena gauna qo!”
Vakatutu B
Veivosaki ga kei rau. Dina ni wawale vakalevu, e se rawa ga ni sauma ena voraki nodrau taro.
Vakatutu C
Kua ni veivosakitaki na ka ni “vuli,” ia me veivosakitaki e dua tale na ulutaga. Rawa ni tukuna o Sera me na qai veivosakitaka tale ena dua na gauna ni sa galala nona vakasama. Oti, e rawa ni tukuna ena nona kauai: “Vakacava nomudrau siga nikua. E vinaka na ka kece?”
Na vakatutu cava o nanuma me muria o Sera?․․․․
Meda dikeva tale mada se cava e rawati ena vakatutu yadua.
Ni bera ni vakatulewataka me muria na Vakatutu A, a lomaleqa qai sega ni via vosa o Sera. Ia ni digia na vakatutu qo, se lomaleqa ga, ia e rarawataka tale ga nona vosa vakalialia vei rau nona itubutubu.—Vosa Vakaibalebale 29:11.
Erau sega gona ni na taleitaka nona itubutubu nona vosa vakalialia, se nona galu. De dua erau na kasami ni dua na ka e vunitaka tiko o Sera. Erau na rairai saga me talaucaka na lomana, ia qo ena kuria ga nona rarawa. Ena sega tale ga ni rawati e dua na ka ena vakatutu qo.
E vinaka cake na Vakatutu B mai na Vakatutu A. Ratou a qai tini veivosaki o Sera kei rau nona itubutubu. Ia ni sega ni veiuqeti nodratou veivosaki, a sega ni rawati na ka ratou vinakata—ya na veivosaki vakadodonu ena yalovinaka.
E vinaka cake vei Sera na Vakatutu C, me veivosakitaki na ka ni “vuli” ena dua tale na gauna. Erau na marau tale ga na nona itubutubu ke saga me dau tekivuna na veivosaki. Ena rairai yaga na vakatutu qo ni ratou saga kece me muria na ivakavuvuli ena Filipai 2:4, e kaya: “Me ra kakua ni dui nanuma ga na tamata yadua na ka e baleti ira, ia me ra dau nanuma tale ga na ka e baleti ira na tani.”—Na Veiyalayalati Vou.
Raica e levu tale na ulutaga ena “Young People Ask” ena Web site www.watchtower.org/ype
[iVakamacala e ra]
a Eso na yaca sa veisau.
VAKASAMATAKA MADA
◼ E yaga vakacava na gauna ena veivosaki?—Vosa Vakaibalebale 25:11.
◼ Cava e yaga kina nomu sasaga mo veivosaki kei rau nomu itubutubu?—Jope 12:12.
[Kato/iYaloyalo ena tabana e 10]
TAURI CALA NA VEIVOSAKI?
E dredre beka mo veivosaki kei rau nomu itubutubu? De dua e rau taura cala na ka o vakaibalebaletaka tiko.
Nomu tukuna . . .
“Au sega ni via veivosakitaka.”
Rau nanuma nomu itubutubu . . .
“Au na talaucaka ga na lomaqu kei na ka au nanuma vei ira na noqu itokani, drau sega soti ni bibi ena noqu bula, au na sega gona ni tukuna vei kemudrau na lomaqu.”
Nomu tukuna . . .
“O sega ni kila.”
Rau nanuma nomu itubutubu . . .
“Drau sa qase qai sega ni ganiti au nomudrau ivakarau ni bula. Kua ni vakalusia nomu gauna mo via kila na kequ ituvaki.”
[Kato/iYaloyalo ena tabana e 13]
NA KA ERA TUKUNA NOMU ICABA
“Au tukuna vei rau noqu itubutubu ni dua na leqa au sotava tiko e koronivuli, au kidroataka nodrau vakarorogo matua. E wali rawarawa na leqa ena nodrau veivuke!” —Neli.
“Sega ni dau rawarawa na veivosaki kei rau nomu itubutubu, ia ni o talaucaka na lomamu vei rau, o na vakila ni vakacegu nomu vakasama.”—Daiana.
[Kato ena tabana e 13]
MERA NANUMA NA ITUBUTUBU
Ni o itubutubu dau kauai, de dua o vaqaqa se cava e dredre me vosa kina vei iko o luvemu. Vakasamataka mada na ka era tukuna eso na itabagone ena Yadra, na vuna e dredre kina mera veivosaki kei ira nodra itubutubu. Tarogi iko mada ena taro era toka e ra, qai wilika na kena tikinivolatabu.
“E dau dredre meu torovi Ta baleta ni sa rui osooso ena cakacaka kei na qaravi ni veika me baleta na ivavakoso. E sega na gauna veiganiti meu vosa kina vua.”—Adriu.
‘Au dau vakaraitaka ni sega na gauna meu veivosaki kina kei ratou na luvequ? Ke vaka kina, cava meu cakava meu torovi rawarawa kina? Gauna cava au na vagalalataka meu veivosaki kina kei ratou na luvequ?’—Vakarua 6:7.
“Au vosa tagitagi vei tinaqu me baleta noqu a veiba mai koronivuli. Au a vinakata me vakacegui au, ia a vosataki au tale mai. Me yacova mai qo, au sega tale ni lai tukuna vua eso na ka bibi.”—Keni.
‘Na cava au na cakava nira tukuna vei au na luvequ nodra leqa? Au na vakarogoci ira beka ni bera niu veivakadodonutaki?’—Jemesa 1:19.
“Kena irairai ni levu na gauna erau na tukuna na itubutubu ni rau na sega ni cudru ke dou veivosaki, ia erau se cudru ga. E vakila sara ga o gone ni dabuitaki.”—Rejieli.
‘Ke tukuna o luvequ e dua na ka e vakararawataki au, au na lewai au vakacava?’—Vosa Vakaibalebale 10:19.
“Levu na gauna niu tukuna vei Na eso na ka e baleti au, e dau lai talanoataka sara vei ira nona itokani. Au sega gona ni nuitaki koya ena dua na gauna balavu.”—Siteri.
‘Au dau kauaitaki luvequ ena noqu sega ni lai tukuna na veika a tukuna vei au me baleti koya?’—Vosa Vakaibalebale 25:9.
“Levu na ka au via veivosakitaka kei rau na noqu itubutubu. Au na waraka ga me dua vei rau na tekivuna na veivosaki.”—Keresi.
‘Au dau vakaliuliu beka meu veivosaki kei luvequ cauravou se goneyalewa? Gauna veiganiti cava keirau rawa ni veivosaki kina?’—Dauvunau 3:7.
[iYaloyalo ena tabana e 11]
Ke dua na ka e latia nomu veivosaki, qara e dua tale na sala mo veivosaki kina kei rau nomu itubutubu!