Ra Vakasinaita Tiko na Vale i Jiova na “Ka Sa Domoni”

“[O yau o Jiova] ka’u na vakayavalataka na veimatanitu kecega, ena qai yaco mai na ka sa domoni e na veimatanitu kecega; ia ka’u na vakasinaita na vale oqo e nai ukuuku.”​—AKEAI 2:7.

1. Ke yaco na leqa, na cava ena liu ga kina noda vakasama vei ira na lewe ni noda vuvale?

NA KA domoni cava e sinai tu ena nomu vale? E tu beka na nomu idabedabe dakoba isaulevu, na kompiuta vou duadua, se kele tu ena nomu qaraji e dua na motoka vou? Ke ra mani tu mada ga ena nomu vale na ka kece oqo, o na se vakadinata ga ni ka talei duadua o iratou na lewenivale​—na nomu vuvale, se vakaevei? Kaya mada ni o yadra cecekala mai ena dua na bogi ni o boica na kubou. Sa kama tiko na nomu vale, sa vo ga e vica wale sara na miniti mo dro kina! Cava na imatai ni ka o na goleva? Nomu idabedabe dakoba? Nomu kompiuta? Nomu motoka? Se na liu ga nomu vakasama vei iratou na lewe ni nomu vuvale? Sa macala ga ni ratou na bibi cake vei iko, ni talei cake sara na tamata mai na iyaya.

2. E yaco i vei na levu ni bulibuli i Jiova, ia na tikina cava e dau marautaka o Jisu?

² Ia oqo, vakasamataka mada na Kalou o Jiova kei na Luvena, o Jisu Karisito. O Jiova e “buli lomalagi, kei vuravura, kei na waitui, kei na ka kecega sa tu kina.” (Cakacaka 4:​24) Na Luvena, o koya na “matai daucakacaka,” na itini e taurivaka o Jiova me buli kina na veika kece tale e so. (Vosa Vakaibalebale 8:​30, 31; Joni 1:3; Kolosa 1:​15-​17) Sa macala tu ga ni rau raica vakabibi o Jiova kei Jisu na ka buli kece. (Vakatauvatana Vakatekivu 1:​31.) Ia ena veika kece e buli, e vei beka o nanuma ni na bibi duadua vei rau​—na tamata se na veika tale e so? E kaya na vatuka ni vuku o Jisu Karisito: “Ka’u a daumarautaki ira na luve ni tamata,” se me vaka e kaya na vakadewa i William F. Beck ni o Jisu e “dau taleitaki ira na tamata.”

3. Na parofisai cava e cavuta o Jiova ena gusu i Akeai?

³ Sega ni lomatarotarotaki ni raici ira vakabibi na tamata o Jiova. E dua na ivakadinadina ni ka oqo e kune ena vosa vakaparofisai e cavuta ena yabaki 520 B.S.K. ena gusu i Akeai na parofita. E kaya o Jiova: “Ka’u na vakayavalataka na veimatanitu kecega, ena qai yaco mai na ka sa domoni e na veimatanitu kecega; ia ka’u na vakasinaita na vale oqo e nai ukuuku. . . . Ena levu nai ukuuku ni vale oqo kimuri ka lailai nai ukuuku ni vale eliu.”​—Akeai 2:7, 9.

4, 5. (a)  Na cava ena via veicalati toka kina me nanumi ni vosa “ka sa domoni” e vakaibalebaletaki tiko ina iyau vakayago? (b) Na cava sara mada na “ka sa domoni,” ia ena vuku ni cava o tukuna kina oqori?

⁴ Na “ka sa domoni” cava ena vakasinaita na vale i Jiova me vakaiukuukutaka ena iukuuku e se sega ni laurai vakadua? Na iyaya isaulevu beka kei na iyaya ceuti vakamaqosa? Na koula, siliva, kei na vatutalei? Ena via veicalati toka ke nanumi oqo. Nanuma lesu ni yacova e vicasagavulu na bilioni na dola na levu ni ilavo a taravaki kina na valenisoro taumada, a curumi ena limanadrau na yabaki yani e liu!a Sa macala ga ni na sega ni loma i Jiova vei ira na ilawalawa Jiu lailai era sa vakalesui ina nodra vanua mera tara na valenisoro ena uasivia na lagilagi ni iyau ena kena a tara o Solomoni, se vakaevei?

⁵ Na cava ga na “ka sa domoni” ena vakasinaita na vale i Jiova? Matata vinaka ni oqo na tamata. Me cava tale, ni ka e marautaka cake o Jiova, e sega ni siliva kei na koula, ia na tamata ga era sokalou vua baleta nira lomani koya. (Vosa Vakaibalebale 27:11; 1 Korinica 10:26) Io, o Jiova e vakamareqeta na tagane, yalewa, kei na gone era sokalou vua ena sala e vakadonuya o koya. (Joni 4:​23, 24) Oqo gona o ira na “ka sa domoni.” Era talei cake sara vei Jiova mai na iyau totoka kece e ukutaki kina na valenisoro i Solomoni.

6. Na cava na inaki ni valenisoro makawa ni Kalou?

⁶ Levu na ka e caka me tarovi kina na taravaki ni valenisoro, ia a vakaoti ga ena 515 B.S.K. Ni se bera ni sorovaki koya o Jisu, a se dau uto tiko ni sokalou savasava na valenisoro e Jerusalemi vei ira e levu na “ka sa domoni,” era wili kina na Jiu vakayago kei ira na kai Matanitu Tani tavuki. Ia na valenisoro e vakatakarakarataka e dua na ka e lagilagi cake sara, me vaka eda na qai raica.

Yaco Taumada Ena iMatai ni Senitiuri

7. (a) E vakatayaloyalotaka na cava na valenisoro makawa ni Kalou mai Jerusalemi? (b) Vakamacalataka na veika e cakava na bete levu ena Siga ni Veibuluti.

⁷ Na valenisoro mai Jerusalemi e vakatayaloyalotaka e dua na ituvatuva levu cake ni sokalou. Oya na valenisoro vakayalo ni Kalou, e tauyavutaka o Jiova ena 29 S.K., e kena Bete Levu o Jisu. (Iperiu 5:​4-​10; 9:​11, 12) Raica mada oqo na itavi ni bete levu kei Isireli e via lakolako vata kei na ka e cakava o Jisu. E veiyabaki ena Siga ni Veibuluti, ena torova yani na icabocabonisoro ena rara ni valenisoro na bete levu qai cabora kina e dua na bulumakau me isoro ni nodra ivalavala ca na bete. Oti oya, sa qai kauta ina valenisoro na dra ni bulumakau, curu yani ina katuba e wasea na rara ni valenisoro mai na Loqi Tabu, qai lako sivita sara na ilatilati e wasea na Loqi Tabu mai na Loqi Tabu Sara. Ni sa tiko na bete levu ena loma ni Loqi Tabu Sara, sa qai vakaturuma na dra ena mata ni kato ni veiyalayalati. Oti oya, ni muria na kena ilakolako vata tiko ga oqo, sa qai cabora e dua na me mera sorovaki kina na yavusa e 12 kei Isireli era sega ni bete. (Vunau ni Soro 16:​5-​15) E lai vakaibalebale vakacava na ka e caka oya ina valenisoro vakayalo ni Kalou?

8. (a) Ena vakasama cava e tukuni kina ni a cabori o Jisu ena itekitekivu ni 29 S.K.? (b) Na veiwekani vakasakiti cava a koto ena kedrau maliwa o Jisu kei Jiova ena gauna kece ni cakacaka vakaitalatala i Jisu e vuravura?

⁸ Na nona papitaiso qai lumuti ena yalo tabu ni Kalou o Jisu ena 29 S.K., e vaka ga na nona cabori o Jisu ena icabocabonisoro e vakatayaloyalotaka na loma ni Kalou. (Luke 3:​21, 22) Me cava tale, ni ka e yaco oya e dusia na itekitekivu ni bula ni vakuai koya i Jisu ena cici tiko me tolu veimama na yabaki. (Iperiu 10:​5-​10) Ena loma ni gauna oya, e dua na veiwekani vakayalo e koto ena kedrau maliwa o Jisu kei na Kalou, e vakatuburi kina vakayalo o Jisu. E dredre me yacova noda vakasama na tamata na ibalebale ni veiwekani vakasakiti oya i Jisu vata kei na Tamana vakalomalagi. E vaka ga ni tabonaka nodra rai vakayalo e dua na ilati, me vaka ga ni a tabonaka na Loqi Tabu na ilati mai na matadra era wavu tu ena rara ni valeniveitavaki.​—Lako Yani 40:28.

9. Na cava e sega ni curu rawa kina i lomalagi o Jisu ena yagona vakatamata, ia e wali vakacava na tikina oya?

⁹ E dina ni luve vakayalo lumuti ni Kalou o Jisu, ia ena yagona vakatamata, ena sega ga ni rawa vua me lai bula i lomalagi. Baleta na cava? Ni dra kei na lewe ena sega ni taukena rawa na Matanitu vakalomalagi ni Kalou. (1 Korinica 15:​44, 50) Na ilati e tarovi Jisu ena tikina oqo na yagona vakatamata, qai vakatayaloyalotaka vinaka na ilatilati e wasea na Loqi Tabu mai na Loqi Tabu Sara ena valenisoro makawa ni Kalou. (Iperiu 10:​20, VV) Ia tolu ga na siga ni oti nona mate, a vakaturi Jisu na Kalou ina bula vakayalo. (1 Pita 3:​18) Sa qai rawa e kea me curu o koya ina Loqi Tabu Sara ni valenisoro vakayalo ni Kalou​—mai lomalagi. Na ka sara ga oya e yaco. E vola kina o Paula: “Ni sa sega ni curu na Karisito ki na loqi tabu [e dusia tiko na Loqi Tabu Sara] sa caka e na liga, oqori sai vakatakarakara ga ni ka dina; sa curu ki na lomalagi dina ga, me rairai edaidai e na mata ni Kalou e na vukuda.”​—Iperiu 9:​24.

10. Na cava e cakava o Jisu ni sa lesu i lomalagi?

¹⁰ Mai lomalagi, sa qai ‘vakaturuma na dra’ ni nona isoro o Jisu ena nona cabora vei Jiova na yaga ni nona dra me ivoli ni bula. Ia e sega ni yala ga e kea na ka e cakava o Jisu. Ni voleka tiko ni mate, e kaya vei ira nona imuri: “Ka’u sa lako me’u vakarautaka na tikina me nomudou. Ia kevaka ka’u sa lako ka vakarautaka na tikina me nomudou, au na lako tale mai, ka kauti kemudou vei au; mo dou tiko talega e na vanua ka’u sa tiko kina.” (Joni 14:​2, 3) O koya gona, ena nona rawata o Jisu me curu ina Loqi Tabu Sara, se i lomalagi, e dolava kina na sala vei ira e so tale mera curu tale ga kina. (Iperiu 6:​19, 20, NW) Era na le 144,000 o ira oya, era na qai veiqaravi vakabete ena ruku i Jisu ena ituvatuva ni valenisoro vakayalo ni Kalou. (Vakatakila 7:4; 14:1; 20:6) Me vaka ga ni a kauta taumada na dra ni bulumakau na bete levu kei Isireli ina Loqi Tabu Sara me sorovaki kina nodra ivalavala ca na bete, e taurivaki vaka kina e liu na yaga ni dra i Jisu sa vakadavei vei ira na bete le 144,000 era veiqaravi ena rukuna.b

Na “Ka sa Domoni” ni Gauna Oqo

11. E cabora na me ena vuku i cei na bete levu kei Isireli, ia e vakatakarakarataka na cava oya?

¹¹ Kena irairai ni a mai cava na cakacaka ni nodra kumuni vakatabakidua na lumuti ena yabaki 1935.c Ia a se sega ni oti na cakacaka i Jiova me vakaiukuukutaka na nona vale. Sega, a se vo tiko mera kumuni na “ka sa domoni.” Nanuma tiko ni a cabora na bete levu kei Isireli e rua na manumanu​—na bulumakau me baleta na nodra ivalavala ca na bete kei na me, me baleta na nodra ivalavala ca na yavusa era sega ni bete. O ira na bete era vakatayaloyalotaki ira na lumuti nira na veiqaravi vata kei Jisu ena Matanitu vakalomalagi, ia era vakatakarakarataki cei ga na yavusa era sega ni bete? Na kena isau e kune ena vosa i Jisu e volai ena Joni 10:16: “Eso tani tale na noqu sipi, era sa sega ni tiko e na bai oqo: sa kilikili me’u kauti ira talega mai, a ra na rogoca na domoqu; ena qai dua bau na qele ni sipi, ka dua bau nai vakatawa.” O koya gona, na dra i Jisu sa vakadavei e yaga ina rua na iwasewase tamata​—taumada, vei ira na lotu Vakarisito e nodra inuinui mera veiliutaki kei Jisu e lomalagi, kena ikarua, vei ira era vakanamata mera bula tawamudu ena parataisi e vuravura. Kena irairai gona ni o ira na ikarua ni iwasewase oqo era vakatayaloyalotaki tiko ena parofisai i Akeai mera “ka sa domoni.”​—Maika 4:​1, 2; 1 Joni 2:​1, 2.

12. Ena sala cava era sa vakamuai tiko kina nikua ina vale ni Kalou e levu na “ka sa domoni”?

¹² Era se vakasinaita tiko ga na vale i Jiova na “ka sa domoni” oqo. Vica na yabaki wale tiko ga oqo, era lavelaveti na vakatatabu ena Tokalau kei Urope, so na matanitu e Aferika, kei na so tale na vanua, me rawa ni vunautaki kina vakalevu na itukutuku vinaka ni Matanitu ni Kalou sa tauyavu oti ena veivanua a dau sega sara tu ga ni cakacakataki. Nira sa curu mai ina ituvatuva ni valenisoro ni Kalou o ira na ka domoni, sa ra qai vuki sasaga tale mera vukea e so tale mera tisaipeli, me vaka ga e vakarota o Jisu. (Maciu 28:​19, 20, VV) Nira cakava oqo, era sotava kina e levu, na gone kei na qase, e rawa tale ga nira mai dua na “ka sa domoni” mera vakaiukuukutaka na vale i Jiova. Meda dikeva mada e vica na ivakaraitaki se yaco tiko vakacava oqo.

13. Ena sala cava e vakaraitaka kina e dua na goneyalewa lailai mai Bolivia nona gugumatua me vakatetea na itukutuku ni Matanitu ni Kalou?

¹³ Mai Bolivia, e kerei nona qasenivuli e dua na goneyalewa yabaki lima, erau iVakadinadina i Jiova na nona itubutubu, me na kua tiko mada ni vuli ena dua na macawa, na macawa ena veisiko tiko kina na ivakatawa ni tabacakacaka. Baleta na cava? A via vakaitavi ena cakacaka vakaitalatala ena macawa bibi oya. Rau kurabui dina kina na nona itubutubu, ia erau marau ni rau raica vua na mataqali yalo vaka oya. Sa lima tiko nona vuli iVolatabu na goneyalewa lailai oya, qai so vei ira na gonevuli oqo era sa dau tiko ena soqoni vakarisito. Sa bau lai sureta sara nona qasenivuli mai koronivuli ina soqoni ena Kingdom Hall. De dua ena toso ni gauna, era na qai vakaraitaka e so nona vuli iVolatabu nira dua vei ira na “ka sa domoni” ena vakaiukuukutaki kina na vale i Jiova.

14. E vakalougatataki vakacava nona sasaga e dua na ganeda mai Korea me vosa vua e dua e vaka me sega tu ni lomana me veivosaki?

¹⁴ A wawa tiko ena ikelekele ni sitima mai Korea e dua na yalewa lotu Vakarisito, mani torova sara e dua na gonevuli a rogo ivakatagi tiko ena kena irogorogo e coba i daligana. “O lotu cava?” e taroga. “Au sega ni taleitaka na lotu,” e kaya na gonevuli. Sega ni yalolailai na ganeda. E kaya tale, “Ena dua ga na siga, ena qai votu e lomana e dua me sa vaqara na lotu me lotu kina. Ia kevaka e lecava tu na veika e baleta na lotu, sa na rawa ni cala na nona digidigi.” Veisau e kea na irairai i koya na gonevuli, mai kauai sara ina ka e kaya tiko na ganeda. Mani vakaraitaka vua na ganeda na ivola Is There a Creator Who Cares About You? qai kaya ni na yaga vakalevu vua na ivola oya ena gauna me sa lomana kina me digia na nona lotu. Sega ni bera nona taura na ivola. Ena macawa e tarava, e tekivu vulica na iVolatabu kei ira na iVakadinadina i Jiova, ia nikua, sa dau tiko ena soqoni kece.

15. E tekivutaka vakacava e dua na goneyalewa mai Japani nona vuli iVolatabu, na cava e rawata kina?

¹⁵ Mai Japani, na ganeda yabaki 12, o Megumi e wilika na nona koronivuli me nona yalava ni vunau kei na veivakavulici. Sa bau lai vica sara kina na nona vuli iVolatabu. E rawata vakacava o Megumi? E dau wili iVolatabu se vakarautaka na veika e baleta na soqoni ena gauna ni vakasigalevu, ra qai dau via kila kina na nona lewenikalasi se cava e cakava tiko. E so era tarogi Megumi se cava e sega ni vakaitavi kina ena so na ka e caka e koronivuli. Dau sauma nodra vakatataro o Megumi, e kaya tale ga vei ira ni tiko na yaca ni Kalou. Na ka oqo e sa qai dau vakavulomatarotaro vei ira na vakarorogo. Sega ni bera o koya ni sureti ira mera vuli iVolatabu. Nikua, sa 20 tiko nona vuli iVolatabu o Megumi​—18 vei ira oqori era lewe ga ni nona kalasi.

16. E rawata vakacava e dua na tacida mai Cameroon me tekivutaka na vuli iVolatabu kei na so era a vakalialiai koya mada?

¹⁶ Mai Cameroon, eratou kaciva e dua na tacida e soli ivola voli e gaunisala e le walu na tagane. Eratou via vakalialia na tacida, eratou mani tarogi koya se cava e sega ni vakabauta kina na Letoluvakalou, na bukawaqa mai eli, se na tawamate rawa ni yalo. E sauma vakaivolatabu na nodratou taro na tacida. Mai na nona ivakamacala, e tolu vei iratou na walu na tagane oya eratou vakadonuya me ratou vuli iVolatabu. E dua vei iratou, o Taniela, sa dau tiko ena soqoni, bau vakarusa sara ga na iyaya kece ni vakatevoro a tu vua. (Vakatakila 21:8) A papitaiso ena loma ga ni dua na yabaki.

17. Erau qaseqasetaka vakacava e rua na tacida mai El Salvador na sala me rau vunau rawa kina vua e dua e dau bese ni rogoca na itukutuku ni Matanitu ni Kalou?

¹⁷ Mai El Salvador, e dua na itaukeinivale e dau vesuka nona koli dauveikati ena mata ni nona katuba ena gauna e dau raici ira kina na iVakadinadina i Jiova ena nona yasayasa. Dau waraka mera vakanadaku na iVakadinadina qai kauta tale yani na koli i vale. Era sega sara ga ni vosa rawa vua na tacida. Dua na siga sa qai tovolei e dua na iwalewale vou. Ni rau kila na tacida ni rawa ni rogoci rau tiko na tamata oya, rau mani vunau ga vua na koli. Rau lako yani i matanivale, vakabula vua na koli, rau kaya sara ni rau marau ni rawa me rau vosa vua. Rau vakamacalataka ni na dua na gauna sa na parataisi o vuravura, sa na sega tale ni dua me na cudru​—io, na manumanu mada ga era sa na manoa. Oti, rau vakamoce vakavinaka vua na koli, rau vakanadaku sara me rau sa lesu. Ka ni kurabui vei rau ni sa curu mai tuba na itaukeinivale qai kere veivosoti ena nona sega ni dau via rogoci ira na iVakadinadina. A taura e so na ivoladraudrau, tekivu vuli iVolatabu sara. Sa dua sara na tacida ena gauna oqo o koya​—e dua na “ka sa domoni”!

“Kakua ni Rere”

18. Na cava e so na ka dredre era sotava na lotu Vakarisito, ia e dau raici ira vakacava na tamata era sokalou vua o Jiova?

¹⁸ Vakaevei o iko, o sa vakaitavi tiko ena cakacaka bibi oqo me baleta na Matanitu ni Kalou, oya ena nomu vunau kei na nomu vukea e so tale mera tisaipeli? Ke vaka kina, sa dua dina na itavi dokai o soli iko tiko kina. Ni cakacaka sara ga oqo era vakamuai tiko mai kina ina vale i Jiova o ira na “ka sa domoni.” (Joni 6:​44) Sa macala ni so na gauna o na oca mai se yalolailai. So na gauna, e so​—vei ira sara mada ga na dauveiqaravi yalodina i Jiova​—era valuta na vakasama nira tamata e sega na kedra yaga. Ia mo nuidei! O Jiova e raici ira yadua era sokalou vua mera ka domoni, qai kauai vakalevu o koya ena ka mo bula kina.​—2 Pita 3:9.

19. Na vosa ni veivakayaloqaqataki cava e cavuta o Jiova ena gusu i Akeai, ia ena vakaukauataki keda vakacava na vosa oqori?

¹⁹ Kevaka eda yalolailai, se vu oqori mai na veivakacacani se ituvaki leqataki cava tale, ena vakayaloqaqataki keda na vosa i Jiova vei ira na Jiu era vakalesui tale tiko ina nodra vanua. Eda wilika ena Akeai 2:​4-6: “Ia mo gumatua mada ga Serupapeli, sa kaya ko Jiova; mo gumatua talega, Josua na luve i Jiosataki, na bete levu; mo dou gumatua kece talega, na lewe ni vanua, sa kaya ko Jiova, ia dou ia na cakacaka, ni’u sa tiko vata kei kemudou, sa kaya ko Jiova ni lewe vuqa. Me vaka na noqu vosa ni veiyalayalati kei kemudou, ni dou a lako mai Ijipita, sa tiko ga kei kemudou na Yaloqu: dou kakua ni rere. Ni sa kaya vakaoqo ko Jiova ni lewe vuqa; Sa vakadua tale, sa vo e lailai, ka’u na qai vakayavalataki lomalagi, kei vuravura, kei na waitui, kei na vanua mamaca.” Eda raica e ke ni sega wale ga ni uqeti keda o Jiova meda kaukaua tiko, ia e vakarautaka tale ga na sala meda vakaukauataki kina. Ena sala cava? Rogoca mada na vosa veivakacegui oqo: “[Au] sa tiko vata kei kemudou.” Sa bau veivakayaloqaqataki dina oqo, se mani vakacava na dredre ni ka e tu e matada, o Jiova e tiko vata kei keda!​—Roma 8:​31.

20. Ena sala cava e sa vakasinaiti tiko kina nikua na vale i Jiova ena sala e se sega ni bau yaco vakadua?

²⁰ E sega tale ni vakatitiqataki ni tiko dina vata kei ira nona tamata o Jiova. Sa yaco sara ga na ka me vaka e cavuta o koya ena gusu i Akeai na parofita: “Ena levu nai ukuuku ni vale oqo kimuri ka lailai nai ukuuku ni vale eliu . . . ia e na yasana oqo ka’u na ia kina na veivinakati.” (Akeai 2:9) Sa dina, e kune duadua ga ena valenisoro vakayalo i Jiova edaidai na iukuuku lagilagi duadua. Me cava tale, ni vica vata na draunaudolu era tabili mai ina sokalou dina e veiyabaki. Era vakani vinaka vakayalo o ira oqo, ia ena vuravura mada ga oqo e yavavala vakalevu, era vakila tu na bula vakacegu. Na bula vakacegu era vakila e vakatayaloyalotaka na bula vakacegu e uasivi sara era na qai vakila ena vuravura ni Kalou.​—Aisea 9:​6, 7; Luke 12:42.

21. Na cava sara mada me noda inaki dei?

²¹ Se tiko oqo e matada na gauna me na qai yavalata kina na veimatanitu o Jiova ena Amaketoni. (Vakatakila 16:​14, 16) Meda vakayagataka mada ga na gauna e se vo tiko meda veivuke kina ena nodra vakabulai e levu tale. Meda yalogu mada ga da qai nuitaki Jiova mai vu ni lomada. Me qai noda inaki dei meda sokaloutaki koya tiko ga ena nona valenisoro levu vakayalo, meda vakasinaita ena levu tale na “ka sa domoni” me yacova ni sa kaya o Jiova ni sa cava na noda cakacaka.

[iVakamacala e ra]

O se Nanuma Tiko?

• Na cava e talei cake sara vei Jiova?

• Na rua na iwasewase cava e yaga vei ira na dra i Jisu a vakadavei?

• O cei na “ka sa domoni” mera na vakasinaita na vale i Jiova ena iukuuku?

• Na ivakadinadina cava e tu meda kila kina ni sa yaco tiko nikua na parofisai i Akeai?

[iTaba ni droini ena tabana e 16]

(Raica tale na ivola)

O kila beka na veika e vakatakarakarataki ena valenisoro i Jiova e liu?

Loqi Tabu Sara

iLatilati

Loqi Tabu

Varada

iCabocabonisoro

Rara ni Valenisoro

[iYaloyalo ena tabana e 17]

E cabora e dua na bulumakau na bete levu me baleta na nodra ivalavala ca na bete, kei na me ena vuku ni nodra ivalavala ca na yavusa i Isireli era sega ni bete

[iYaloyalo ena tabana e 18]

Na vunautaki ni Matanitu ni Kalou e vuravura raraba e sa vakayarayarataki ira tiko mai e lewe vuqa ina vale i Jiova