Taro na Dauwiliwili

Na cava e vakavuna na nodra tabili ina “vale” ni sokalou dina “na ka sa domoni e na veimatanitu kecega”?​—Akeai 2:7.

A tukuna tu mai vaka e liu o Jiova vua na parofita o Akeai: “Ka’u na vakayavalataka na veimatanitu kecega, ena qai yaco mai na ka sa domoni e na veimatanitu kecega; ia ka’u na vakasinaita na vale oqo e nai ukuuku.” (Akeai 2:⁠7) E tukuni e ke nira na vakayavalati na “veimatanitu kecega,” ia, oqori beka na ka e vakavuna mera tabili mai na yalomalumalumu⁠​—⁠⁠o ira “na ka sa domoni”​​—⁠mera ciqoma na sokalou dina? E sega.

Dikeva mada na ka e vakayavalata na veimatanitu, kei na ka e qai yaco kina. E kaya na iVolatabu “era sa daucudru na veimatanitu, ka vakananuma na ka wale ko ira na lewe ni veivanua.” (Same 2:⁠1) Na “ka wale” era “vakananuma” na veimatanitu, oya na nodra sega ni vinakata me mudu na nodra veiliutaki. Koya gona, ena vakayavalati ira sara ga ke ra raica e dua na ka e rawa ni vakaleqa na nodra veiliutaki.

O ira na iVakadinadina i Jiova era sa kacivaka tiko e vuravura raraba na Matanitu ni Kalou e sa tauyavu oti, era raica gona na veimatanitu ni oqori na ka e rawa ni vakaleqa na nodra veiliutaki. Ni Matanitu oqo, e veiliutaki kina o Jisu Karisito, ena mai “vurumemeataka . . . ka vakaotia na veimatanitu [vakatamata]” era tu oqo. (Taniela 2:​44) Na itukutuku gona ni veivakarusai e okati ena noda cakacaka vakavunau e vakayavalati ira sara tiko ga na veimatanitu. (Aisea 61:⁠2) Sa qai kaukaua ga na nodra yavalati ena vuku ni kena sa qai tubu tiko ga na levu ni vanua e kacivaki kina na itukutuku vinaka. Ia, na cava e dusia na veivakayavalati e sa tukuni makawa tu mai ena Akeai 2:⁠7?

Eda wilika ena Akeai 2:6: “Ni sa kaya vakaoqo ko Jiova ni lewe vuqa; Sa vakadua tale, sa vo e lailai, ka’u na qai vakayavalataki lomalagi, kei vuravura, kei na waitui, kei na vanua mamaca.” A tokaruataka o Paula na tikina vata oqo ena nona vola: “Sa yalataka ko koya ka vaka, ‘Au na vakayavalata vakadua tale mada na vuravura, io kei na lomalagi tale ga.’ Na vosa oqo, ‘vakadua tale mada,’ sa vakaraitaka nira na biu laivi na veika era sa vakayavalati rawa me vaka ni ra sa ka buki wale ga me rawa kina ni qai vakavo tu ga na ka sa sega ni yavalati rawa [na Matanitu ni Kalou].” (Iperiu 12:​26, 27, VV) Io, ena vakarusai dina na ituvaki ca e yaco tu nikua me rawa ni tauyavutaki na vuravura vou ena liutaka na Kalou.

E sega gona ni vu ni nodra tabili mai ina sokalou dina na tamata yalomalumalumu na nodra yavalati na veimatanitu. Na ka e vakavuna nodra tabili vei Jiova kei na nona sokaloutaki, oya na kena kacivaki e vuravura raraba na itukutuku vinaka ni Matanitu ni Kalou e sa tauyavu oti. Oqori tale ga na ka e vakavuna na nodra yavalati na veimatanitu. Ni kena kacivaki na ‘itukutuku vinaka e tawamudu’ e uqeti ira era vakarau tu mera mai qarava na Kalou dina.​​—⁠Vakatakila 14:​6, 7, VV.

Na itukutuku ni Matanitu ni Kalou e itukutuku ni veivakarusai, e itukutuku tale ga ni veivakabulai. (Aisea 61:​1, 2) E rua na ka e macala ena kena kacivaki na itukutuku vinaka e vuravura raraba: na nodra vakayavalati na veimatanitu, kei na nodra tabili mai mera vakacaucautaki Jiova na ka sa domoni ena veimatanitu.