Saga Mo Volekati Jiova

E VOLA na tisaipeli o Jemesa: “Toro voleka yani vua na Kalou, ka na toro voleka mai vei kemudou ko koya.” (Jemesa 4: 8) A lagata tale ga na daunisame o Tevita: “Era volekati Jiova ga o ira era rerevaki koya.” (Same 25:​14, NW) E macala e ke ni vinakata o Jiova meda volekati koya. Ia, sega ni o ira kece era qarava tiko na Kalou ra qai muria tiko na nona lawa era vakila nira volekati koya.

Vakacava o iko? Drau veivolekati kei na Kalou? Sega ni vakatitiqataki ni o na via toro voleka yani vua. Na cava meda cakava meda volekati Jiova kina? Na cava ena vinakati vei keda? Ena kunei na isaunitaro oqo ena ikatolu ni wase ni ivola na Vosa Vakaibalebale.

Noda Vakaraitaka na Loloma Kei na Dina

E tekivuna o Tui Solomoni e Isireli makawa na ikatolu ni wase ni Vosa Vakaibalebale ena veivosa oqo: “Na luvequ, mo kakua ni guilecava na noqu vunau; ia me muria tiko na noqui vakaro na lomamu: ni na vakaikuritaki kina vei iko na siga e vuqa, kei na bula dede, kei na sautu.” (Vosa Vakaibalebale 3:​1, 2) E vakavuna na Kalou na ka e vola o Solomoni, o koya gona na ivakasala vakatama e tukuna oqo vei keda e vu sara tiko ga mai vei Jiova. Eda vakasalataki e ke meda muria na ivakaro ni Kalou​—na nona lawa, se ivakavuvuli, kei na nona vunau​—era volai tu ena iVolatabu. Ke da vakayacora oqo, ena qai ‘vakaikuritaki vei keda na siga e vuqa, kei na bula dede, kei na sautu.’ Io, ena gauna mada ga oqo, eda na vakila na bula vakacegu, eda na sega tale ga ni vakaogai keda ena veika eda na rawa ni matedole kina, me vaka e dau yaco vei ira na tamata ivalavala ca. Kena ilutua ni rawa meda bula tawamudu ena vuravura vou ni vakacegu.​—Vosa Vakaibalebale 1:​24-31; 2:​21, 22.

E tomana o Solomoni ena nona kaya: “Me kakua ni takali vei iko na yalololoma kei na dina: mo vakaitaube mada kina; mo vola sara ki na lomamu: ko na qai kunea na loloma ka rogo vinaka e na mata ni Kalou kei na mata ni tamata.”​—Vosa Vakaibalebale 3:​3, 4.

Na vosa taumada e mai vakadewataki tiko oqo me “yalololoma kei na dina” e dau cavuti tale ga me “loloma yalodina” e tiko kina na vakasama ni dua e sega ni rawa ni veidabui, e lomadina, e yalodina. Sa noda inaki dei beka meda yalodina tiko ga vei Jiova se mani vakacava sara na ka dredre eda sotava? Eda dau vakaraitaka beka na yalololoma kei na dina ena noda veimaliwai kei ira na tacida vakayalo? Eda dau saga beka meda volekati ira tiko ga? Ena noda veimaliwai e veisiga, eda dau saga me ‘tiko ga e yameda na ivakavuvuli ni loloma,’ ke da mani vakatovolei sara mada ga vaka ca?​—Vosa Vakaibalebale 31:26.

E Kalou dau loloma o Jiova, o koya gona, e “dau tu vakarau me veivosoti.” (Same 86:​5, NW) Ke da sa veivutunitaka na noda cala, da qai vakadodonutaka na noda ilakolako, e vakadeitaki vei keda ni na solia vei keda o Jiova na “gauna ni vakacegu.” (Cakacaka 3:19) Sega li ni dodonu tale ga meda vakatotomuria na noda Kalou ena noda vosoti ira na tani era cala vei keda?​—Maciu 6:​14, 15.

E “Kalou daudina” o Jiova, e vinakata tale ga mera daudina o ira era via toro voleka yani vua. (Same 31:5) Meda namaka beka me noda iTokani o Jiova ke rua tiko na noda ivakarau ni bula​—dua nida veimaliwai tiko kei ira noda itokani lotu Vakarisito, dua tale ni sega ni dua na lotu Vakarisito e raici keda​—me vakataki ira na “tamata lasulasu” [“sega ni dau dina,” NW] era dau ubia na nodra ivalavala dina? (Same 26:4) Ena ka lialia sara ke dua e cakava oqo, ni “sa luvawale ga na ka kecega, ka vakarairaitaki sara, e na mata i [Jiova].”​—Iperiu 4:13.

E dodonu me vakamareqeti na loloma kei na dina me vaka e dua na ‘itaube’ dredre, ni na vakavuna meda ‘rogo vinaka ena mata ni Kalou kei na mata ni tamata.’ Me kua ni laurai wale ga na veika oqo ena ka eda cakava, me volai tale ga ena ‘lomada,’ me tiki sara ga ni noda bula.

Saga Mo Dau Vakararavi Vakatabakidua Vei Jiova

E tomana na tui vuku: “Mo vakararavi vei Jiova e na vu ni yalomu: ka mo kakua ni vakararavi ki na nomu yalomatua: mo vakarogotaka vua na nomu sala kecega, ia ena vakadodonutaka na nomui lakolako ko koya.”​—Vosa Vakaibalebale 3:​5, 6.

E sega ni dua na vuna eda kila rawa meda kua kina ni vakararavi vei Jiova. Ni Dauveibuli, e Kalou “kaukauwa” qai “daugumatua sara.” (Aisea 40:​26, 29) E tu vua na kaukaua me vakayacora kece na ka e yalataka. Ni yacana mada ga e kena ibalebale, “O Koya e Vakavuna me Yaco,” e vakavuna meda nuidei ni na vakayacora kece na ka e yalataka! Na nona ‘sega ni rawa tale ga ni vosa lasu na Kalou’ e ivakadei tale ni o koya na vatuka ni dina. (Iperiu 6:18) E tiki ni nona bula levu duadua na loloma. (1 Joni 4:8) E “dodonu ko Jiova e na nonai valavala kecega, ka yalololoma e nona cakacaka kecega.” (Same 145:17) Ke sega ni rawa vei keda meda vakararavi vua na Kalou, sa na qai rawa meda vakararavi vei cei? Io, me rawa nida qai vakararavi vua, e dodonu meda “tovolea mada ka raica ni sa yalovinaka ko Jiova” ena noda bulataka sara ga na ka eda vulica ena iVolatabu kei na noda vakasamataka na veika vinaka eda vakila kina.​—Same 34:8.

Ena sala cava eda na ‘vakarogotaka kina vei Jiova na noda sala kece ga’? E uqeti na daunisame me kaya: “Au na veinanuyaka talega ki na nomuni cakacaka kecega, ka veivosakitaka na nomuni valavala.” (Same 77:12) Ni tawarairai na Kalou, na noda veinanuyaka na veika lelevu e dau cakava kei na nona ivalavala vei ira na nona tamata ena yaga vakalevu sara ena noda saga meda volekati koya.

Na masu e dua na sala levu eda vakarogotaka kina vei Jiova na noda sala. O Tui Tevita e dau tagici Jiova “e na veisiga.” (Same 86:3) Vakalevu me dau masu o Tevita ena veibogi, ni dro voli ena vanualiwa. (Same 63:​6, 7) E veivakaroti na yapositolo o Paula: “Dou masu tikoga e na masumasu kecega kei na daukerekere e na Yalo Tabu.” (Efeso 6:18) Eda dau masu ena gauna cava? Eda dau talaucaka beka na lomada nida vosa vua na Kalou? Nida sotava na veika dredre, eda dau kere veivuke vua? Eda dau masuta beka na nona veidusimaki ni bera nida vakatulewataka e so na ka bibi? Na noda masu vei Jiova mai vu ni lomada ena vakavolekati keda sara vua. E vakadeitaka tale ga vei keda ni na rogoca noda masu, qai ‘vakadodonutaka noda sala.’

E ka sesewa dina noda via ‘vakararavi ina noda yalomatua,’ se vei ira na tamata rogo e vuravura, ni dodonu meda vakararavi ga vakatabakidua vei Jiova. “Mo kakua ni nanuma ni ko sa vuku,” e veivakadreti o Solomoni. Ena yasana adua, e vakarota: “Mo rerevaki Jiova, ka lako tani mai na ca: ena ka ni bula ki na nomu vicovico, ka na vakauto kina na suimu.” (Vosa Vakaibalebale 3:​7, 8) Na noda dokai koya dina na Kalou kei na noda sega ni via vakacudrui koya e dodonu me cakayaco ena ka eda cakava, noda vakasama, kei na lomada. Eda na sega ni cakava na ka ca, eda na bulabula vakayalo, eda na mamarau tale ga ke tiko vei keda na veidokai oqo.

Solia Vei Jiova na Nomu Vinaka Taucoko

Na sala cava tale e rawa nida volekati koya kina na Kalou? E vakasalataki keda na tui: “Mo dokai Jiova e na nomui yau, kei nai sevu ni nomu vuata kecega.” (Vosa Vakaibalebale 3:9) Na noda dokai Jiova e kena ibalebale meda cibitaki koya, meda vakacerecerei koya tale ga e matanalevu ena noda vakaitavi kei na noda tokona na cakacaka ni kena vunautaki na yacana. Na iyau eda dokai Jiova kina oya na noda gauna, noda taledi, noda kaukaua, kei na noda iyau vakayago. Ia, mera ulu ni noda iyau​—na noda vinaka taucoko. E dodonu me laurai ena noda vakayagataka na veika eda taukena nida ‘vakaliuca tiko ga na matanitu ni Kalou kei na nona yalododonu!’​— Maciu 6:33.

Ena sega ni ka ni oca vei keda na noda dokai Jiova ena noda iyau. E vakadeitaka vei keda o Solomoni: “Ena qai tawa sara kina na nomu lololo, ka vuabale na nomui keli-ni-waini e na waini vou.” (Vosa Vakaibalebale 3:10) E macala ni noda vutuniyau vakayalo eda na sega ni lai vutuniyau sara kina vakayago, ia eda na vakalougatataki ga ke da vakayagataka na veika eda taukena meda dokai Jiova kina. Vei Jisu, na nona cakava na loma i tamana e “kakana” vua. (Joni 4:​34) Na noda vakaitavi tale ga ena cakacaka vakavunau kei na nodra vakavulici e so mera tisaipeli e vakalagilagi kina o Jiova, eda na vakila tale ga na kena vinaka. Ke da dei tu ga ena cakacaka oqo, ena qai sinai na noda lololo vakayalo. Na noda marau ena vaka na waini e vuabale.

Sega li nida dau masuti Jiova tale ga ena ka me rauti keda se meda bula kina e veisiga? (Maciu 6:11) Na veika li e tu vei keda era vu ga mai vua na Tamada dau loloma vakalomalagi. Ia, ena qai sovaraka mai vakalevu o Jiova na nona veivakalougatataki ke da vakayagataka na iyau e tu vei keda meda vakacaucautaki koya kina.​—1 Korinica 4:7.

Ciqoma na Veivakavulici i Jiova

E kila e dua na tui kei Isireli na bibi ni veivakavulici ena noda saga meda veivolekati kei Jiova, e vakasalataki keda kina: “Na luvequ, mo kakua ni beca ni sa vakavulici iko ko Jiova; se yalowai ni sa vunauci iko ko koya: ni sai koya sa lomana ko Jiova, sa vunauca ko koya; me vaka sa ia na tamata vua na luvena sa vinakata ko koya.”​—Vosa Vakaibalebale 3:​11, 12.

E dina, e sega ni ka rawarawa beka vei keda ni dua e vunauci keda. “Ia ka sega ni ka ni marau na dauveicudruvi [“veivakavulici,” NW] ni sa ia tiko, a ka rarawa ga: ia emuri sa qai vuataka na vua ni yalododonu era sa vakacegui kina ko ira sa caka vei ira.” (Iperiu 12:11) Na veivakavulici kei na veivakadodonutaki e tiki ni nona vakarautaki keda na Kalou meda volekati koya kina. Na veivakadodonutaki i Jiova​—se vu mai vei rau na noda itubutubu, mai na ivavakoso vakarisito, se na noda vakananuma na Vosa ni Kalou nida vuli vakataki keda​—e ivakaraitaki ni nona lomani keda. Eda na vuku kevaka eda ciqoma.

Taura Matua na Vuku Kei na Yalomatua

Tarava nona vakaraitaka o Solomoni ni bibi na vuku kei na yalomatua vei koya e via veivolekati kei na Kalou. E kaya o koya: “Sa kalougata na tamata sa kunea na vuku, kei na tamata sa rawata na yalomatua: ni sa vinaka na dauveivoli kina ka ca na dauveivoli e na siliva, a kena tubu talega sa vinaka ka ca na kena tubu na koula dina. . . . A kau ni bula ko koya vei ira era taura; ka sa kalougata ko koya yadua sa taura matua tiko.”​—Vosa Vakaibalebale 3:​13-18.

E kaya na tui ni vakamacalataka tale tiko vei keda na nona vakaraitaka o Jiova nona vuku kei na yalomatua ena vakasakiti ni veika e bulia: “Sa tauyavutaki vuravura ko Jiova e na nona vuku; ka sa vakarautaki lomalagi e na nona lewa [“yalomatua,” NW]: . . . na luvequ, me kakua ni yali e matamu na ka oqori: mo taura ga na vuku dina kei na lewa vinaka: ena qai kena bula ni yalomu, kei na kenai ukuuku ni domomu.”​—Vosa Vakaibalebale 3:​19-22.

Erau itovo vakalou na vuku kei na yalomatua. Sega ni rauta wale ga na noda vakaitovotaki keda kina, e dodonu meda taura matua, meda kua ni vakasavuligataka noda vulica vagumatau na Vosa ni Kalou kei na noda bulataka sara na ka eda vulica. “Ko na qai lako vakavinaka e na nomu sala,” e tomana o Solomoni, “ia ena sega ni tavutu na yavamu.” E kaya tale: “Ni ko sa davo sobu, ko na sega ni rere; io ko na davo sobu, ka na vinaka na nomu moce.”​—Vosa Vakaibalebale 3:​23, 24.

Io, e rawa nida lako ena nuidei, da moce tale ga ena vakacegu nida waraka tiko na kena yaco mai me vaka na daubutako na ‘rusa vakidacala’ ni vuravura ca i Setani. (1 Cesalonaika 5:​2, 3; 1 Joni 5:19) Ni sa na cabolo na rarawa levu e sa voleka tiko mai oqo, e rawa nida nuidei ena veivakadeitaki oqo: “Kakua ni ko taqayataka na rere vakidacala, se na nodra rusa nai valavala ca, ni sa yaco mai: ni na nomu ga ko Jiova mo vakararavi vua, ka na tarova na yavamu ko koya me kakua ni tacori.”​—Vosa Vakaibalebale 3:​25, 26; Maciu 24:21.

Cakava na Ka Vinaka

E vakamasuta o Solomoni: “Mo kakua ni bureitaka na ka vinaka vei ira e dodonu me nodra, ni sa rawa vei iko mo cakava.” (Vosa Vakaibalebale 3:27) Na noda caka vinaka vei ira na tani e okati kina na noda lomasoli meda vakayagataka vei ira na noda iyau, e levu na sala e rawa ni vakayacori kina oqo. Ia, sega li ni ka vinaka duadua eda rawa ni cakava ena “gauna ni vakataotioti” oqo na noda vukei ira na tani mera mai veivolekati kei na Kalou? (Taniela 12:9) O koya gona, oqo na gauna meda solia kina noda gumatua taucoko ena kacivaki ni Matanitu ni Kalou kei na noda vakavulici ira na tani, ena kena levu ga e rawa, mera tisaipeli.​—Maciu 28:​19, 20.

E vola tale ga na tui vuku e so na ka meda qarauna, ena nona kaya: “Kakua ni kaya vua na kai nomu, Mo lako mada, ka mani lako tale mai, au na qai solia vei iko e na mataka; ka ni sa tu vei iko na ka koya. Kakua ni nakita na ka ca vua na kai nomu ni sa tiko vakavinaka kei iko. Kakua ni veileti walega kei na dua na tamata, kevaka sa sega ni caka ca vei iko. Mo kakua ni vuvutaka na tamatai valavala vakasaurara ka mo kakua talega ni digitaka e dua na nona sala.”​—Vosa Vakaibalebale 3:​28-31.

Ni tinia tiko na vuna e tauca kina na nona ivakasala, sa qai kaya o Solomoni: “Ni sa ka vakasisila vei Jiova na yalovakatani: a sa tiko ga kei ira na yalododonu na nona vosa vuni. Na cudru i Jiova sa tiko e na nodra vale nai valavala ca: ia sa vakalougatataka ko koya na nodrai tikotiko na yalododonu e dina sa vakalialiai ira ko koya era sa dauveivakalialiai: ia sa solia na loloma vei ira na yalomalumalumu. Ko ira na vuku, ena nodra na vakarokorokotaki: ia sa nodra ivotavota na lialia me ra madua.”​—Vosa Vakaibalebale 3:​32-35.

Ke da vinakata meda veivolekati kei Jiova, meda kua ni cakacaka vakailawaki se veidabui. (Vosa Vakaibalebale 6:​16-19) Ena qai vakadonui keda ga na Kalou, me vakalougatataki keda tale ga ke da cakava na ka e dodonu e matana. De dua, era na dokai keda tale ga na tani nira raica nida vakaraitaka na vuku vakalou. O koya gona, meda cata na ivalavala vakailawaki e kilai tani kina na vuravura ca rerevaki oqo. Io, meda cakava tiko ga na ka e dodonu, da qai saga meda volekati Jiova!

[iYaloyalo ena tabana e 25]

“Dokai Jiova e na nomui yau”