Me Vakacegui Iko na Kaukaua i Jiova

“Ni sa rui levu na noqu nanuma sa leqa kina na lomaqu, sa vakamarautaka na yaloqu na nomuni dauveivakacegui.”​—SAME 94:19.

E TIKO ena iVolatabu na vosa ni veivakacegui vei ira kece era gadreva. Sa rauta me kaya na World Book Encyclopedia ni “vuqa era dau goleva na iVolatabu nira vinakata mera vakacegui, mera biuta kina nodra vakanuinui, mera dusimaki tale ga ena gauna ni leqa kei na veilecayaki.” Na cava na vuna?

Baleta ni a vakavuna na iVolatabu na noda Dauveibuli dau loloma, “na Kalou ni veivakacegui kecega,” e ‘vakacegui keda ena noda rarawa kece.’ (2 Korinica 1:​3, 4) Na Kalou oqo e ‘vu ni veivakacegui.’ (Roma 15:5) E ivakaraitaki o Jiova ena nona vakarautaka na sala meda vakacegui kina. E talai Karisito Jisu mai na Luvena duabau i vuravura me rawa nida vakanuinui kina, me vakacegui keda tale ga. E vakavulica o Jisu: “Ni sa lomani ira na kai vuravura vakaoqo na Kalou, me solia kina na Luvena e dua bauga sa vakatubura, me kakua ni rusa ko ira yadua era sa vakabauti koya, me ra rawata ga na bula tawa mudu.” (Joni 3:​16) Tukuna na iVolatabu ni o Jiova e “colata na nodai colacola e na veisiga, io, na Kalou na nodai vakabula.” (Same 68:19) O ira na daurerevaka na Kalou era na nuidei nira kaya: “Au a raici Jiova ni sa tu e mataqu e na veisiga kecega; ka’u na sega ni yavalati, ni sa tu ko koya e na ligaqu i matau.”​—Same 16:8.

Na veitikinivolatabu vaka oqori e vakaraitaka na titobu ni nona lomani keda na Kalou o Jiova. E laurai ni lomana dina me vakacegui keda ni tu vua na kaukaua, me vakaotia tale ga na mosi ena gauna eda rarawa kina. “Sa dausolia na kaukauwa vei ira sa malumalumu: ia ena vakalevutaka na kaukauwa vei ira era sa sega ni gumatua rawa.” (Aisea 40:29) Ena rawa gona vakacava me vakacegui keda na kaukaua i Jiova?

Na Maleka ni Veikaroni i Jiova

E vola na daunisame: “Mo biuta vei Jiova na nomui colacola bibi, ena tokoni iko ko koya: ena sega ni laivi ira na yalododonu me ra vakayavalataki e na dua na gauna.” (Same 55:22) E kauaitaka dina na kawatamata na Kalou o Jiova. E vakadeitaka vei ira na lotu Vakarisito ena imatai ni senitiuri na yapositolo o Pita: “Sa daunanumi kemudou [na Kalou].” (1 Pita 5:7) E vakamatatataka o Jisu Karisito na levu ni nona vakamareqeta na tamata na Kalou ena nona kaya: “E sega li ni i sau wale ga ni lima na siparo e rua na sede? Ia e sega ni dua bulu na siparo e bau guilecavi e na mata ni Kalou. Ia ko i kemudou, na drau ni ulumudou yadudua sara mada ga era wili. O koya gona mo dou kakua kina ni rere, ni dou sa bibi cake vua na Kalou mai vei ira na siparo e vuqa.” (Luke 12:​6, 7, VV) Nona vakamareqeti keda na Kalou e kauaitaka kina na veika matailalai me baleti keda. E kila na veika eda sega tu mada ga ni kila, baleta ni taleitaki keda dina.

E vakacegui Susana dina, na goneyalewa dauvolitaki koya e vakamacalataki tiko ena ulutaga taumada, na nona vakila na veikauaitaki i Jiova. Sa voleka sara toka ga ni vakamatei koya o Susana ena gauna e qai veitaratara kina kei ira na iVakadinadina i Jiova. A vakadonuya me vulica na iVolatabu, a vukei koya sara ga me kila ni o Jiova e dua e kauaitaki koya dina. Oqo e tara sara ga na lomana, e uqeti koya me veisautaka nona bula, qai yalataki koya vua na Kalou. E vakavuna tale ga me kakua ni beci koya ena ivakarau ni nona bula makawa, ia me toso tiko ga e liu veitalia na ka dredre e sotava, me vinaka tiko ga na nona rai. E kaya: “Au vakabauta deivaki ni o Jiova ena sega ni laivi au. Au raica ni dina na ka e volai ena 1 Pita 5:7. E kaya: ‘Dou biuta vei [Jiova] na nomudou lomaocaoca kecega, ni sa daunanumi kemudou ko koya.’”

Veivakacegui na iNuinui e Yavutaki Ena iVolatabu

Na sala kilai levu e dau veivakacegui kina na Kalou oya na nona Vosa volai, e tu kina na inuinui totoka me baleta na gauna mai muri. E vola na yapositolo o Paula: “Na ka kecega sa volai eliu sa volai me da vakatavulici kina, me noda na vosota kei na vakacegui sa vu mai nai Vola Tabu, me rawa kina nai nuinui.” (Roma 15:4) Ena nona volavola o Paula e semai rau vata na inuinui kei na vakacegu ni kaya: “Ia . . . na Kalou ko Tamada, o koya ka lomani keda, ka solia vei keda e na loloma na vakacegu sa sega ni mudu kei nai nuinui vinaka, me vakaceguya mada na yalomudou, ka vakataudeitaki kemudou e na vosa kei na cakacaka vinaka kecega.” (2 Cesalonaika 2:​16, 17) Okati ena “[i]nuinui vinaka” oqo, na bula uasivi, kei na bula marau tawamudu ena vuravura parataisi.​—2 Pita 3:​13.

Na dei kei na ramase ni inuinui oqori e vakayaloqaqataki Limanisa na tagane paralasi dau gunu yaqona ni valagi e vakamacalataki ena ulutaga taumada. Ni wilika o koya na nodra ivola vakaivolatabu na iVakadinadina i Jiova, e marau ni vulica kina ni na lewa na vuravura vou na Matanitu ni Kalou, e sa na bulabula vinaka tale ga kina o koya. E wilika ena iVolatabu na vosa ni yalayala totoka me baleta na veivakabulai vakacakamana: “Ena qai rai na matadra na mataboko, ka rogo na daligadra na didivara. Ena qai ladelade na lokiloki me vaka na me kila, ka sere na yamedra na galu.” (Aisea 35:​5, 6) Ena nona vinakata o Limanisa me vakadonui me bula ena Parataisi, e dua na veisau levu e vakayacora. Sa muduka vakadua na gunu. Era raica tale ga na nona veisau o ira era vakaitikotiko vata, kei ira nona veikilai. Ena gauna oqo e sa vica tiko nona vuli iVolatabu, e sa wasea tale ga vei ira e so na vakacegu e kunei ena inuinui e yavutaki ena iVolatabu.

Na Yaga ni Masu

Ni dua na ka e vakamosia na yaloda, ena rawa nida kunea na vakacegu kevaka eda masuti Jiova. Ena rawa ni vakamamadataka na bibi ni noda icolacola. Nida vakamamasu tiko ena rawa ni vakacegui keda na noda nanuma lesu na ka e tukuni ena Vosa ni Kalou. Na same balavu duadua e volai ena iVolatabu, e vaka na qaqanimasu na qaqana. E lagata o koya e bulia: “Au sa nanuma na nomuni lewa eliu, Jiova; ka’u sa vakacegui au kina.” (Same 119:52) Ena ituvaki dredre sara, vakauasivi nida tauvimate bibi, e dau sega ni dua ga na kena iwali. Nida sasaga gona vakataki keda ga, eda na sega beka ni kila se i vei meda gole kina. Ia e vuqa era vakadinadinataka ni kevaka era sa cakava oti na ka kece era rawata, e veivakacegui dina nira qai masuta na veivuke ni Kalou, qai so na gauna ena basika mai kina na iwali ni leqa e sega ni namaki.​—1 Korinica 10:13.

A cicivaki o Peti i valenibula me lai qaravi kina vakatotolo, e vakila ni vakacegui koya sara ga na nona masu. E kaya ni sa bula vinaka: “Au masuti Jiova, au vulica tale ga meu vakararavitaka vakatabakidua vua na noqu bula, au sa nuitaki koya ga me qai lewa se cava e cakava. Au sega ni bau tavaiyaya; au vakila sara ga na vakacegu ni Kalou e cavuti ena Filipai 4:​6, 7.” E veivakacegui tale ga vei keda kece na rua na tikinivolatabu oqo! E veivakasalataki o Paula: “Dou kakua sara ni lomaocaoca; ia e na ka kecega me vakatakilai vua na Kalou na nomudou kerekere e na masu kei na dau cikecike kei na vakavinavinaka. Ia na vakacegu ni Kalou, sa uasivia na ka kecega e kilai rawa, ena vakataudeitaka na yalomudou kei na lomamudou e na vuku i Karisito Jisu.”

Dau Veivakacegui na Yalo Tabu

Ena bogi ni bera nona mate, a vakaraitaka vakamatata o Jisu vei iratou na nona yapositolo ni sa na vakarau me biuti iratou. Eratou lomaleqa, ratou rarawa tale ga. (Joni 13:​33, 36; 14:​27-​31) Nona raica rawa o Jisu ni gadrevi me ratou na dau vakacegui tiko ga, e yalataka kina: “Ka’u na masuti Tamaqu, ena qai solia vei kemudou e dua tale na Dauveivakacegui, me tiko ga kei kemudou ka sega ni mudu.” (Joni 14:16; ivakamacala e ra ni NW) E tukuna tiko o Jisu na yalo tabu ni Kalou. Na yalo tabu e vukei iratou sara na yapositolo, e vakacegui iratou ni ratou vakatovolei, e vakaukauataki iratou me ratou vakayacora tiko ga na loma ni Kalou.​—Cakacaka 4:​31.

Na wati Ana, a voleka sara ni mate ena dua na vakacalaka bibi, ia a vosota o Ana na rarawa kei na mosi ena ituvaki dredre oya. Na cava e vukei koya? E kaya: “Ke sega na veivukei ni yalo tabu i Jiova, ena dredre me keirau kaukaua tiko ga me keirau vosota na ka keirau sotava. E votu mamaca na kaukaua i Jiova ena neirau malumalumu, e ivakavakacegu dina ena gauna ni rarawa.”

Mataveitacini Dau Veivakacegui

Se mani vakacava na ka eda dui sotava, se na mosi ni ka e yaco vei keda, se rawa ga nida vakacegui vei ira na mataveitacini ena ivavakoso i Jiova. Na mataveitacini oqo era dau veitokoni, era dau veivukei vei ira na lewena. Na mataveitacini oqo era tiko kina na noda itokani era dau veikauaitaki era dau veivakacegui, era tu vakarau mera veivukei mera vakamamadataka na noda rarawa ena gauna ni leqa.​—2 Korinica 7:​5-7.

Era vakavulici na lewe ni ivavakoso vakarisito mera “caka vinaka vei ira na tamata kecega, ka vakalevu vei ira era veitokani e na vakabauta.” (Kalatia 6:​10) Nodra vakavulici ena iVolatabu e uqeti ira mera veilomani vakaveitacini mera veikauaitaki vakataki ira. (Roma 12:10; 1 Pita 3:8) Era dau yaloyalovinaka, ra veivakacegui, ra dauveinanumi na tacida vakayalo ena ivavakoso.​—Efeso 4:32.

Rau vakila o Jo kei Repeka, na nodra veivakacegui kei na nodra veitokoni na lewe ni ivavakoso vakarisito ena gauna e mate kina na luvedrau. Erau kaya: “E vukei keirau o Jiova kei ira na lewe ni nona ivavakoso dau loloma ena gauna keirau sotava kina na leqa. Vica vata na drau na card, na ivola, keirau taura, vaka kina na nodra talevoni mai. Keirau qai raica kina na talei ni noda mataveitacini. Ni keirau se veilecayaki tu ga ena leqa e tarai keirau, era sa mai veivuke na lewe ni vica na ivavakoso, ra mai vakarautaka na kakana, ra samaka tale ga na vale.”

Lomavakacegu!

Ni dau tarai keda na leqa me vaka na ravuravu ni cagi kaukaua, kei na rarawa e vaka na bisa ni uca kei na ucacevata, e tu vakarau na Kalou me veitaqomaki ena nona vakacegui keda. E vaka oqo na nona vakamacalataki koya e dua na daunisame me baleta na nona dau veivakacegui kei na veikaroni: “Ena vakarurugi iko e na lawena, ia ko na vakararavi ki na ruku ni tabana.” (Same 91:4) Kena irairai ni taurivaki tiko e ke e dua na ikeli me ivakatayaloyalo. E vakatayaloyalotaki tiko e dua na manumanu vuka e vakila ni sa voleka mai na leqa qai dedeka na tabana me karoni ira na luvena. E tukuni Jiova tiko ga ni dua na dauveikaroni dina vei ira kece era dro vua.​—Same 7:1.

Ke o vinakata mo kilai koya vinaka na Kalou, na nona itovo, nona inaki, kei na kaukaua e tu vua me veivakacegui kina, vakacava mo vulica mada na nona Vosa. O ira na iVakadinadina i Jiova era marau mera vukei iko. Io, me vakacegui iko mada ga na kaukaua i Jiova!

[iYaloyalo ena tabana e 7]

E veivakacegui na inuinui e yavutaki ena iVolatabu me baleta na gauna sa tu oqo e liu