‘Vakacegui Ira Kece na Rarawa’
“Ni sa lumuti au ko Jiova . . . me vakacegui ira kecega era sa tagi.”—AISEA 61:1, 2.
1. Na cava e cakava o Jisu vei ira na rarawa, na cava na vuna?
E TUKUNA o Jisu Karisito: “Na qau kakana meu cakava na loma i koya e talai au mai, meu vakaotia tale ga nona cakacaka.” (Joni 4:34) Ni vakayacora o Jisu na nona ilesilesi vakalou, e vakavotuya sara ga na itovo vakasakiti i Tamana. E dua vei ira na itovo qori na nona lomani ira na kawatamata o Jiova. (1 Joni 4:7-10) E tukuna na yapositolo o Paula na sala e vakaraitaka kina na loloma qori o Jiova ena nona vakatokai koya me “Kalou e dau vakacegui keda ena ka kece ga.” (2 Kor. 1:3) A vakaraitaka o Jisu na loloma qori ena nona vakayacora na ka e parofisaitaka o Aisea. (Wilika Aisea 61:1, 2.) A wilika sara ga o Jisu na parofisai qori ena valenilotu e Nasareci qai tukuna ni vakayacori vua qori. (Luke 4:16-21) Ena gauna kece e cakacaka vakaitalatala voli kina o Jisu, a vakacegui ira vakayalololoma na rarawa, e vakayaloqaqataki ira, ra vakila tale ga na lomavakacegu.
2, 3. Na cava mera vakatotomuri Karisito kina na nona imuri ena nona dau veivakacegui?
2 E bibi vei ira kece na imuri Jisu mera vakatotomuri koya ena nona dau vakacegui ira na rarawa. (1 Kor. 11:1) E tukuna o Paula: “Moni veivakacegui tiko, moni veivakauqeti.” (1 Ces. 5:11) E vinakati vakalevu meda vakacegui ira tale eso, vakabibi nida sa bula tu qo ena gauna e “vakilai kina e levu na ka dredre.” (2 Tim. 3:1) E veiyasai vuravura, e tubu tiko ga na kedra iwiliwili na tamata yalomalumalumu era vakararawataki ra qai yalolailai ena ka era tukuna kei na ka era cakava eso tale.
3 Ena iotioti ni veisiga ni ituvaki ca qo, e parofisaitaka kina na iVolatabu ni levu era na “dau lomani ira ga . . , era na lomana na ilavo, era na dau tukutukuni ira, era na qaciqacia, era na dau vosavakacaca, era na talaidredre vei ira nodra itubutubu, era na sega ni dau vakavinavinaka, era na sega ni yalodina, sa na yali vei ira na veilomani vakaveiwekani, era na sega ni via okati ena dua na veiyalayalati, era na dau vakaucaca, era na sega ni lewa vinaka na yalodra, era na voravora, era na sega ni vinakata na ka e dodonu, era na dau veinakicataki, era na domoqa, era na dokadoka, era na lomana ga na marau era sega ni lomana na Kalou.” E sa qai ca tiko ga na itovo va qori baleta nira ‘sa qai torosobu ga na tamata ca kei ira na dauveidabui.’—2 Tim. 3:2-4, 13.
4. Na cava e sa yaco tiko ena ituvaki kei vuravura nikua?
4 E sega ni dodonu meda kurabuitaka qori baleta e vakamatatataki tu ena Vosa ni Kalou ni “lewa tiko na Vunica na vuravura taucoko.” (1 Joni 5:19) E okati ena “vuravura taucoko” na veika vakapolitiki, na lotu, kei na tabana ni veivoli, wili tale ga kina na itukutuku lasu. Sa rauta me vakatokai o Setani na Tevoro me “turaga ni vuravura” kei na “kalou ni veika vakavuravura qo.” (Joni 14:30; 2 Kor. 4:4) E torosobu tiko ga na ituvaki kei vuravura ni sa cudru vakalevu nikua o Setani, e kila ni sa lekaleka na nona gauna me na vakarusai koya kina o Jiova. (Vkta. 12:12) E veivakacegui dina nida kila ni na sega ni dede na nona vakalaiva tiko o Jiova me veiliutaki tiko o Setani, ena vakaotia tale ga na ituvaki ca qo. Ena sauma tale ga o Jiova na nona vakalewa o Setani na nona veiliutaki!—Vkte., wase 3; Jope, wase 2.
Vunautaki Tiko e Vuravura na iTukutuku Vinaka
5. E sa vakayacori tiko vakacava ena iotioti ni veisiga qo na parofisai me baleta na cakacaka vakavunau?
5 Ena gauna dredre duadua eda bula tu kina qo, e sa vakayacori tiko kina na ka e parofisaitaka o Jisu. E tukuna: “Ena vunautaki mada na itukutuku vinaka ni matanitu ni Kalou ena veiyasa i vuravura me ivakadinadina ina veimatanitu kece, sa na qai yaco na icavacava.” (Maciu 24:14) Na cakacaka ni kena vunautaki na Matanitu ni Kalou e sa vakayacori tiko ena kena ivakatagedegede levu duadua. Nikua, era vunautaka tiko na Matanitu ni Kalou e sivia na 7,500,000 na iVakadinadina i Jiova, era lewena e sivia na 107,000 na ivavakoso e vuravura. Na Matanitu ni Kalou tale ga e dau usutu ni nona vunau o Jisu kei na nona dau veivakavulici. (Maciu 4:17) Na noda cakacaka vakavunau nikua era vakacegui kina o ira na rarawa. Ena loma ni rua na yabaki sa oti era papitaiso kina e le 570,601 mera iVakadinadina i Jiova!
6. Na cava o nanuma me baleta na toso ni noda cakacaka vakavunau?
6 Na levu ni ivola vakaivolatabu era vakadewataka qai veisoliyaka na iVakadinadina i Jiova ena sivia na 500 na vosa, e vakadinadinataka na toso ni cakacaka vakavunau. E sega ni bau vakayacori qo ena dua na gauna sa oti! E vakasakiti dina ni tiko na isoqosoqo i Jiova e vuravura, wili kina na ka e cakava tiko kei na ka sa rawata. Ke sega na veidusimaki kei na veitokoni ni yalo tabu ni Kalou, ena sega ni tubu na isoqosoqo i Jiova ena vuravura e lewa tu qo o Setani. Ni vunautaki tiko na itukutuku vinaka ena vuravura raraba, era sega ni marautaka wale ga na tacida vakayalo na veivakacegui ni iVolatabu, era marautaka tale ga o ira na rarawa era ciqoma na itukutuku ni Matanitu ni Kalou.
Vakacegui Ira na Tacida Vakayalo
7. (a) Na cava meda kua kina ni nanuma ni na vakaotia na Kalou ena gauna qo na ituvaki rarawa? (b) Eda kila vakacava nida rawa ni vosota na veivakacacani kei na veivakatovolei?
7 E sinai tu ena vuravura qo na ca kei na rarawa, e macala ga nida na sotava kina eso na ituvaki ena vakararawataki keda. Me kua ni nanumi ni na vakaotia na Kalou na ka e dau vakavuna na rarawa baleta ni se bera ni vakarusa na ituvaki ni vuravura qo. Ena gauna mada ga qo, na veivakacacani eda sotava ena laurai kina na noda yalodina kei na noda tokona na veiliutaki cecere i Jiova. (2 Tim. 3:12) Ia ena veivuke kei na nona veivakacegui na Tamada vakalomalagi, eda rawa ni vakataki ira na lotu vaKarisito lumuti e Cesalonaika, era vosota ena yalodina na veivakacacani kei na veivakatovolei.—Wilika 2 Cesalonaika 1:3-5.
8. Na ivakadinadina vakaivolatabu cava e dusia ni dau vakacegui ira na nona dauveiqaravi o Jiova?
8 E macala ga ni dau vakacegui ira na nona tamata o Jiova ena gauna era vinakata kina. Kena ivakaraitaki, a yalolailai qai dro na parofita o Ilaija ni via vakamatei koya na Ranadi ca o Jesepeli. E tukuna mada ga na parofita qori ni vinaka ga me mate. Ia a sega ni cudruvi Ilaija o Jiova, a vakacegui koya ga qai vakayaloqaqataki koya me tomana na nona cakacaka vakaparofita. (1 Tui 19:1-21) E laurai tale ga na nona dau veivakacegui o Jiova ena ka era sotava na ivavakoso vaKarisito ena imatai ni senitiuri. Kena ivakaraitaki, eda wilika ni ‘dua na gauna a bulabula qai vakilai na vakacegu ena ivavakoso taucoko o Jutia, Kalili, kei Samaria.’ Era “vakila tale ga na veivakacegui ni yalo tabu. Qo e vakavuna me tubu tiko ga na kedra iwiliwili.” (Caka. 9:31) Eda kalougata dina nida rawa tale ga ni ‘vakacegui ena yalo tabu’!
9. Na cava e veivakacegui kina na noda vulica na veika me baleti Jisu?
9 Nida lotu vaKarisito, eda vakacegui nida vulica na veika me baleti Jisu Karisito kei na noda muria na we ni yavana. E tukuna o Jisu: “Ni lako mai vei au o kemuni kece oni oca, oni bikai voli ena icolacola bibi, au na vakacegui kemuni. Ni mai cola na noqu ivua moni vuli vei au, niu yalomalumalumu, au yalomalua tale ga, oni na kunea kina na vakacegu. E veivakacegui na noqu ivua, e mamada tale ga na noqu icolacola.” (Maciu 11:28-30) Nida vulica na nona dau veivakayaloqaqataki o Jisu da qai muria na nona ivakaraitaki vinaka, ena vakacegui keda vakalevu mai na lomaocaoca.
10, 11. O cei e rawa ni veivakacegui ena ivavakoso?
10 E rawa tale ga ni vakacegui keda o ira na tacida vakayalo. Kena ivakaraitaki, vakasamataka mada na nodra dau vukei ira na rarawa na qase ni ivavakoso. E vola na tisaipeli o Jemesa: “E dua vei kemuni e tauvimate tiko [vakayalo]? Me kacivi ira na qase ni ivavakoso, mera masulaki koya.” Na cava ena yaco kina? “Na masu ni vakabauta ena vakabulai koya e tauvimate, ena vakaukauataki koya o Jiova. Ke valavala ca ena vosoti.” (Jeme. 5:14, 15) E rawa tale ga nira veivakacegui eso tale na lewe ni ivavakoso.
11 E dau rawarawa vei ira na yalewa mera dau veitalanoataka na nodra leqa. Ia e dau yaga vakalevu na nodra veivakasalataki na tacida yalewa matua vei ira na tacida yalewa gone. O ira na tacida yalewa matua vakayalo qori era rairai sotava tale ga na ituvaki dredre ena dua na gauna. E rawa ni yaga vakalevu na nodra yalololoma kei na nodra veikauaitaki. (Wilika Taito 2:3-5.) E dodonu gona vei ira na qase kei ira tale eso mera dau “vosa vakayalovinaka vei ira na yalolailai” era maliwai keda. (1 Ces. 5:14, 15) E vinaka tale ga meda nanuma tiko ni Kalou ena “vakacegui keda ena noda rarawa kece, meda vakacegui ira kina era sotava na veimataqali rarawa.”—2 Kor. 1:4.
12. Na cava e bibi kina meda tiko ena soqoni vaKarisito?
12 E dua na sala vinaka duadua meda vakacegui kina, oya noda tiko ena soqoni vaKarisito. E dau veivosakitaki kina na iVolatabu, ena vakayaloqaqataki keda. Eda wilika ni o Jutasa kei Sailasa “erau sega ni cegu ena nodrau tauca na vosa ni veiuqeti me rau vakayaloqaqataki ira na veitacini.” (Caka. 15:32) Eda dau veivakayaloqaqataki na lewe ni ivavakoso ni bera ni tekivu na soqoni kei na gauna e oti kina. Koya gona, ke da vakararawataki ena vuku ni so na ituvaki dredre, meda kua mada ga ni vakayawaki keda, qori e sega ni iwali ni leqa. (Vkai. 18:1) Ia eda na muria ga na nona ivakasala uqeti vakalou na yapositolo o Paula: “Meda dau veinanumi, meda veivakauqeti, meda veilomani, meda caka vinaka tale ga, meda kua ni vakawaletaka na soqoni me vaka e nodra ivalavala eso, ia meda veivakayaloqaqataki, vakabibi nida raica ni sa voleka mai na siga.”—Iper. 10:24, 25.
Vakacegui ena Vosa ni Kalou
13, 14. Vakamacalataka na sala e rawa ni vakacegui keda kina na iVolatabu.
13 Ke da sa papitaiso oti se eda se qai vulica tiko na veika me baleta na Kalou kei na nona inaki, eda rawa ni vakacegui vakalevu mai na Vosa volai ni Kalou. E vola o Paula: “Na ka kece e volai e liu e volai meda vakavulici kina, me noda na inuinui e rawati mai na noda vosota kei na noda vakacegui mai na veika e volai ena iVolatabu.” (Roma 15:4) E rawa ni vakacegui keda na iVolatabu, ‘me rawa tale ga nida tu vakarau kina meda vakayacora na cakacaka vinaka kece.’ (2 Tim. 3:16, 17) Ena vakacegui keda vakalevu nida kila na ka dina me baleta na inaki ni Kalou kei na noda nuitaka vakaoti na inuinui me baleta na gauna e se bera mai. Meda vakayagataka vinaka mada ga na Vosa ni Kalou kei na ivola vakaivolatabu e dau veivakacegui qai yaga ena levu na sala.
14 E ivakaraitaki vinaka vei keda o Jisu ni dau vakayagataka na iVolatabu me veivakavulici kina, me veivakacegui tale ga. Kena ivakaraitaki, ni oti na nona vakaturi, a rairai ena dua na gauna vei rua na nona tisaipeli qai ‘vakamacalataka vei rau na iVolatabu.’ E uqeti rau sara ga na ka e tukuna. (Luke 24:32) E muria o Paula na nona ivakaraitaki vinaka o Jisu, ena nona dau ‘veivosakitaka na iVolatabu.’ O ira na vakarogoci Paula e Peria, ‘era rogoca na vosa qai gu na lomadra mera dikeva na iVolatabu e veisiga.’ (Caka. 17:2, 10, 11) E bibi meda dau wilika e veisiga na iVolatabu, kei na ivola vakaivolatabu e vakarautaki me vakacegui keda, da qai nuidei ena gauna dredre qo!
Eso Tale na Sala Meda Veivakacegui Kina
15, 16. Na cava eso na ka eda rawa ni veivuke kina meda vakacegui ira na tacida vakayalo?
15 Eda rawa ni veivuke da qai vakacegui ira na tacida vakayalo ena levu tale na sala. Kena ivakaraitaki, eda rawa ni vukei ira na tabaqase ena nodra volivoli kei ira tale ga na tacida vakayalo era tauvimate. De dua eda rawa ni vukei ira tale eso ena so tale na itavi, qori eda sa vakaraitaka tiko nida kauaitaki ira. (Fpai. 2:4) Eda rawa ni vakavinavinakataki ira na tacida vakayalo ena nodra itovo vinaka, me vaka na nodra dau loloma, yalomatua, nodra yaloqaqa kei na nodra vakabauta.
16 Eda na vakacegui ira na itabaqase ena noda sikovi ira, vakarogoci ira vinaka nira talanoataka na ka era sotava kei na veivakalougatataki era vakila ena nodra qaravi Jiova. Qo ena rawa sara ga ni uqeti keda qai vakacegui keda! Nida sikovi ira, eda rawa ni wilika vei ira na iVolatabu se ivola vakaivolatabu. De dua eda rawa ni raica vata kei ira na ulutaga ni Vale ni Vakatawa ena vulici ena macawa oya se na ka ena vulici ena Vuli iVolatabu ni iVavakoso. Eda rawa ni sarava vata e dua na DVD vakaivolatabu. Eda rawa tale ga ni wilika se talanoataka eso na irogo veiuqeti mai na noda ivola.
17, 18. Nida nona tamata yalodina, na cava eda vakadeitaka kina ni o Jiova ena tokoni keda qai vakacegui keda?
17 Ke da siqema ni rarawa e dua na tacida vakayalo, eda rawa sara ga ni masulaki koya. (Roma 15:30; Kolo. 4:12) Nida vosota tiko na dredre ni bula da qai saga meda vakacegui ira tale eso, eda na vakatotomuria kina na nona vakabauta kei na nona nuidei na daunisame, ena nona seretaka: “Mo biuta vei Jiova na nomui colacola bibi, ena tokoni iko ko koya: Ena sega ni laivi ira na yalododonu me ra vakayavalataki e na dua na gauna.” (Same 55:22) Io, o Jiova ena vakacegui keda e veigauna, ena tokoni keda tale ga ke da yalodina vua.
18 E tukuna na Kalou vei ira na dau sokalou vua ena gauna makawa: “Koi au, io koi au, ka’u sa vakacegui kemudou.” (Aisea 51:12) Ena cakava tale ga qori vei keda o Jiova, ena vakalougatataka tale ga na noda caka vinaka kei na ka eda tukuna nida vakacegui ira tiko na rarawa. Ke noda inuinui na bula e lomalagi se vuravura, ena vakacegui keda na vosa i Paula vei ira na nona itokani lotu vaKarisito lumuti: “Na noda Turaga o Jisu Karisito kei na Kalou na Tamada, o koya e lomani keda, e dau vakacegui keda me tawamudu, e vakarautaka vei keda na inuinui ena vuku ni loloma soli wale, me vakacegui kemuni mada ga, me vakadeitaki kemuni ena cakacaka vinaka kece ga kei na vosa.”—2 Ces. 2:16, 17.
O se Nanuma Tiko?
• E vakacava sara mada na toso ni noda cakacaka ni veivakacegui?
• Na cava eso na ka eda rawa ni cakava meda veivakacegui kina?
• Na ivakadinadina vakaivolatabu cava e vakaraitaka ni dau vakacegui ira na nona tamata o Jiova?
[iYaloyalo ena tabana e 28]
O dau vakacegui ira na rarawa?
[iYaloyalo ena tabana e 30]
E rawa nira veivakacegui na gone kei na qase