Sala E Veivakacegui Kina Na Kalou

E tukuna na yapositolo o Paula ni o Jiovaa “na Kalou e dau vakacegui keda ena ka kece, e vakacegui keda ena veika dredre kece eda sotava.” (2 Korinica 1:3, 4) E vakadeitaka gona vei keda na iVolatabu ni rawa ni vukei keda na Kalou, e rawa ni veivakacegui tale ga ena ituvaki cava ga eda sotava.

Ia e tiko na ka meda cakava me vakacegui keda kina na Kalou. E vaka ga nida tauvimate, ena qai vukei keda ga o vuniwai ke da lai raici koya. A taroga na parofita o Emosi: “Erau na lako vata e rua ke rau sega ni veinaki?” (Emosi 3:3) Sa rauta meda uqeti ena iVolatabu: “Toro voleka vua na Kalou ena qai toro voleka mai vei kemuni o koya.”​—Jemesa 4:8.

E rua na vuna meda nuidei kina ni na toro volekati keda mai na Kalou. Kena imatai, e dau tukuna wasoma ni tu vakarau me vukei keda. (Raica na kato.) Kena ikarua, na Kalou sa vakacegui ira oti eso era bula dina ena noda gauna qo kei na veigauna sa oti.

Me vakataki ira ga e levu nikua, e dau kere veivuke tale ga vua na Kalou o Tui Tevita ni sotava na leqa. A masuti Jiova ena dua na gauna: “Ni rogoca noqu vakamamasu niu kere veivuke vei kemuni.” Vakacava a rogoca na Kalou na nona vakamamasu? Io, e tomana o Tevita: “Au sa ciqoma na nona veivuke, qai marau vakalevu na lomaqu.”​—Same 28:2, 7.

SALA E VEIVAKACEGUI KINA O JISU

E vinakata na Kalou me dau veivakacegui tale ga o Jisu. Qori na vuna e dua kina na nona itavi lesi vakalou me “vakabulai ira na vusolo na lomadra,” qai “vakacegui ira kece na tagi.” (Aisea 61:1, 2) A dau kauaitaki ira dina na ‘oca qai bikai ena icolacola bibi’ o Jisu me vaka ga e parofisaitaki.​—Maciu 11:28-30.

A veivakacegui o Jisu ena nona ivakasala yaga, nona veikauaitaki, kei na nona veivakabulai. Kena ivakaraitaki, a kerei Jisu e dua na vukavuka: “Ke oni vinakata, ni vakasavasavataki au mada.” E tuburi Jisu na loloma, mani kaya: “Au vinakata! Mo savasava mai.” (Marika 1:40, 41) E yali vakadua vua na tagane ya na vukavuka.

Sa sega ni tiko e vuravura nikua o Jisu me vakacegui keda yadudua. Ia e se veivakacegui tiko ga o Jiova, “na Kalou e dau vakacegui keda ena ka kece.” (2 Korinica 1:3) Raica mada e va na sala e dau veivakacegui kina na Kalou.

• Na iVolatabu. “Na ka kece e volai e liu e volai meda vakavulici kina, me noda na inuinui e rawati mai na noda vosota kei na noda vakacegui mai na veika e volai ena iVolatabu.”​—Roma 15:4.

• Yalo Tabu ni Kalou. Oti toka ga vakalailai na mate i Jisu, era vakila na vakacegu na lewe ni ivavakoso vaKarisito nira “rerevaki Jiova . . . era vakila tale ga na veivakacegui ni yalo tabu.” (Cakacaka 9:31) E igu kaukaua ni Kalou na yalo tabu, qai vakayagataka qori na Kalou me vakacegui keda kina ena ituvaki cava ga eda sotava.

• Masu. E kaya na iVolatabu: “Moni kua ni lomaocaocataka e dua na ka, . . . na ka kece me vakaraitaki vua na Kalou . . . ena qai taqomaka na lomamuni kei na nomuni vakasama na vakacegu ni Kalou e uasivia na vakasama kece.”​—Filipai 4:6, 7.

• O ira eda vakabauta vata era rawa ni veivakacegui tale ga nida sotava na ituvaki dredre. E kaya na yapositolo o Paula ni ratou ‘dau veivakacegui’ na nona itokani ni sotava na ‘leqa, ni vakararawataki tale ga.’​—Kolosa 4:11; 1 Cesalonaika 3:7.

Na cava mo nuidei kina ni dau veivakacegui dina ena vica na sala qori na Kalou? E vinaka meda dikeva tale mada na vica na ivakaraitaki e cavuti ena imatai ni ulutaga. Qori ena vakadeitaka vei iko ni dau dina na Kalou ena nona yalayala ‘me veivakacegui me vaka ga na tina e vakaceguya na luvena tagane.’​—Aisea 66:13.