Na Vakamau Marautaki e Dokai Kina o Jiova

Rau Vakamau O Welsh Kei Elthea Ena 1985 Mai Soweto, E Sauca Aferika. Rau Dau Sarava Kei Zinzi Na Luvedrau Goneyalewa Na Itaba Ni Nodrau Vakamau, Rau Marau Ni Rau Raica Lesu Na Gauna Oya. Dau Vinakata O Zinzi Me Tukuna Se O Cei Soti A Sureti Era Tiko Ena Itaba, Vakabibi O Tinana Ena Totoka Ni Nona Isulu.

A ROGOCI taumada na vunau ni vakamau a vakayacori ena dua na valenisoqo e Soweto. Tarava sara nodra lagasere ni veivakacaucautaki vua na Kalou na itabagone lotu Vakarisito. Mai tarava yani na kana kei na nodra marautaka na sureti na rogoca ena gauna vata oya na tepi ni Kingdom melodies ni voqa tu mai vakamalua. Sega na yaqona ni valagi, sega tale ga na ivakatagi karakaravisa se danisi. Ia era marautaka dina na sureti na nodra veimaliwai kei na nodra lululu vei rau na veiwatini. Rauta ni tolu na aua na balavu ni soqo. “Dua na vakamau guiguilecavi dredre,” kaya o Raymond, e dua na qase lotu Vakarisito.

Rau a cakacaka tiko o Welsh kei Elthea ena valenitabana ni Watch Tower Bible and Tract Society, e Sauca Aferika ena gauna erau vakamau kina. Rau cakava ga e dua na vakamau lailai, na kena ga erau rawata. So na lotu Vakarisito era biuta na cakacaka vakatabakidua, ra lai vaqara cakacaka saumi me rawa nira vakarautaka e dua na vakamau levu. Ia erau sega ni veivutunitaka o Welsh kei Elthea na nodrau cakava e dua ga na vakamau lailai, me rawa ni rau cakacaka tiko ga vakatabakidua ena nodrau qarava na Kalou me yacova na gauna sa sucu kina o Zinzi.

Vakacava ke rau vinakata na veiwatini me so na ivakatagi kei na sere ni cumu, vaka kina na danisi, se meke, ena nodrau vakamau? Vakacava ke rau lewa me caka kina na gunu yaqona ni viti se yaqona ni valagi? Vakacava ke rau vinakata me dua na vakamau levu, e baleta ni rau rawata? Rau na vakadeitaka vakacava ni na dua na soqo marautaki, me kilikili kei na dau veiqaravi ni Kalou? E dodonu me vakasamataki sara vakavinaka na veitaro oqo vata kei na ivakaro vakaivolatabu oqo: “O koya ga, se dou kana, se dou gunu, se cava na ka dou sa kitaka, mo dou kitaka kecega me vakarokorokotaki kina na Kalou.”​—1 Korinica 10:31.

Me Kua na Marau Vakalialia

E sega ni vinaka ke sega ni lasa na vakamau. Ia ena vakarerevaki tale ke sivia na lasa. Levu na vakamau era vakayacora na sega ni iVakadinadina, e dau yaco e so na ka e sega ni dokai kina na Kalou. Me kena ivakaraitaki, na gunu kei na mateni. Ka ni rarawa ni yaco tale ga oqo ena so na vakamau ni lotu Vakarisito.

E veivakasalataki na iVolatabu ni dau “vakosakosa na waini.” (Vosa Vakaibalebale 20:1, NW) Na vosa vakaiperiu e vakadewataki me “kosakosa” e kena ibalebale “cakava me rogo levu.” Ke dua e kosakosa ena nona gunu yaqona ni valagi, ia vakasamataka na ka e rawa ni yaco ina dua na ilawalawa era gunu vakasivia! Sa na tini dina ga ena mateni, na marau vakalialia, kei na veika vaka oya, oqori na “cakacaka ni i tovo vakayago,” me vaka e tukuna na iVolatabu. Na itovo oqori ena sega ni vakadonui kina e dua me bula tawamudu ena ruku ni veiliutaki ni Matanitu ni Kalou, ke sega ni veivutuni.​—Kalatia 5:​19-21, VV.

Na vosa vakirisi ni “marau vakalialia” e vakaibalebaletaki ina dua na ilala itabagone kosakosa era mateni toka vakalailai, era lagasere, era dadanisi, era vakatagi ena nodra yabe tiko e gaunisala. Ke vakasausataki na yaqona ni valagi ena soqo ni vakamau, lako vata na ivakatagi karakaravisa kei na danisi vakalialia, ena rawa ni lai tini ina marau vakalialia. Ena ituvaki oqori e dau rawarawa sara nodra vakacalai na malumalumu tu vakayalo, ena nodra vakayacora e so na itovo vakayago me vaka “na dauveibutakoci, na i vakarau vakasisila, na i valavala velavela, [se ra tini mera ] daucudrucudru.” Na cava me vakayacori me kua kina ni vakaleqa na itovo vakayago na marautaki ni nodrau vakamau e rua na lotu Vakarisito? Meda vakasamataka mada na ka e tukuna na iVolatabu me baleta e dua na vakamau me rawa nida qai sauma na taro oqori.

Na Vakamau a Tiko Kina o Jisu

A sureti o Jisu kei ira na nona tisaipeli ena dua na vakamau a vakayacori e Kena mai Kalili. Ratou a ciqoma na veisureti oqori, kuria na marautaki ni soqo oya na nona a vakaitavi tale ga kina o Jisu. Ni sa oti koso na waini, e qai vakalevutaka tale o Jisu ena waini vinaka sara ena nona cakamana. Sa macala ga ni na qai vakayagataka tiko na vo ni waini o tagane vakawati kei ira na wekana ni sa oti na vakamau.​—Joni 2:​3-​11.

Vica na ka eda vulica rawa ena vakamau a tiko kina o Jisu. A sega ni curu botolaki o Jisu kei iratou nona tisaipeli ena kana magiti ni vakamau. E tukuna vakamatata sara ga na iVolatabu ni ratou sureti. (Joni 2:​1, 2) E vakavica nona kaya o Jisu ena rua na nona vosa vakatautauvata nira a sureti na vulagi ena kana magiti ni vakamau.​—Maciu 22:​2-4, 8, 9; Luke 14:​8-​10.

Ena so na vanua era dau curu botolaki ga yani na tamata ena kana magiti ni vakamau. Oqo ena rawa ni vakalevutaka na icolacola vakailavo. Ke rau sega ni tu vinaka vakailavo na veiwatini, ena rawa ni vakavuna me rau lai dinau me rawa kina ni rau vakarautaka na kakana kei na gunu me veirauti kei na ilala levu era na tabili yani. Ke rau lewa gona na veiwatini lotu Vakarisito me dua ga na vakamau lailai mera sureti ga kina e vica, e dodonu mera ciqoma, mera doka tale ga na nodrau itokani lotu Vakarisito era sega ni sureti. E nanuma lesu e dua na tagane mai Cape Town, Sauca Aferika, ni a sureti ira ga e 200 na vulagi ena nona vakamau. Ia e ka ni kurabui nira yaco yani e 600, e vakavuna sara ga me oti koso na kakana. Ra maliwai ira na curu botolaki yani e dua na ilala vulagi era vakasinaita e dua na basi ena nodra sarasara wavoki tiko e Cape Town ena muanimacawa e caka kina na vakamau. Na tamata e vakasarasarataki ira tiko na vulagi erau veiwekani toka kei koya na yalewa e vakamau, e nanuma o koya ni tu vua na dodonu me kauti ira yani na vulagi ena vakamau dina ga ni sega ni tukuna rawa yani!

Ke da imuri dina i Jisu, eda na sega ni curu botolaki tu ga yani ena vanua ni kana magiti ni vakamau meda lai vakayagataka na kakana e vakarautaki me baleti ira na sureti. O ira e lomadra mera lako ga yani dina nira sega ni sureti e dodonu mera tarogi ira, ‘Keu na lako ina soqo ni vakamau, e sega beka ni ivakaraitaki ni noqu sega ni lomani rau na veiwatini vou? Ena vakatubura beka na leqa, me na vakacacana tale ga na kena marautaki na soqo?’ Na lotu Vakarisito yalomatua ena sega ni cudru ke sega ni sureti, ia ena rawa ni vakauta ga e dua na itukutuku ni vakanuinui vinaka vei rau na veiwatini kei na nona nuitaka ni na vakalougatataki rau o Jiova. Ena rawa tale ga ni qai vakauta vei rau na veiwatini e dua nona iloloma, me ikuri ni nodrau marautaka na siga ni nodrau vakamau.​—Dauvunau 7:9; Efeso 4:​28.

O Cei me Vakatulewa?

Ena so na vanua e Aferika, era dau cicivaka na vakamau na wekadrau qase cake. Rairai rau na taleitaka na veiwatini na kena icakacaka oqo, ni na vakamamadataka nodrau icolacola vakailavo. Rairai rau na vakasamataka tale ga, ke na mani yaco e dua na leqa erau na galala mai kina. Ia ni se bera ni rau vakadonuya na nodra veivuke na wekadrau era via vakaitavi kina, me rau vakadeitaka rawa ni na rokovi na ka erau vinakata me vakayacori.

Dina ni Luve ni Kalou o Jisu, e “lako sobu mai lomalagi,” ia e sega ga ni mai vakatulewa ena vakamau a vakayacori e Kena. (Joni 6:​41) E tukuna ga na iVolatabu ni duatani a lesi me “i liuliu ni soqo.” (Joni 2:8, VV) Na turaga oqo ena vakarorogo vua na iliuliu vou ni matavuvale, oya na tagane e se qai vakamau.​—Joni 2:​9, 10.

E dodonu mera rokova na iliuliu ni matavuvale vou na wekana lotu Vakarisito. Nona itutu vou oqo e lesi koya kina na Kalou. (Kolosa 3:​18-​20) E nona itavi me lewa na cava me vakayacori ena nona vakamau. E vinaka me yalorawarawa, ena nona okata na veika e vinakata o yalewa, o nona itubutubu, kei na itubutubu i yalewa. Kevaka era cikeva na wekadrau mera cicivaka na vakamau, ia e veicalati na ka erau vinakata na veiwatini, sa na rawa ga me rau tukuna vakavinaka ni rau sega ni vakadonuya na nodra gagadre, erau sa na cicivaka ga nodrau vakamau. Na kena vakayacori oqo ena sega kina ni yaco e dua na ka me vakaleqai rau na veiwatini ni rau dau vakananuma lesu nodrau vakamau. Me kena ivakaraitaki, ena nodrau soqo ni vakamau e rua na lotu Vakarisito mai Aferika, a laveta e dua na bilo waini ni vakanuinui vinaka (toast) e dua na wekadrau a liutaka tiko na soqo, na ka e vakayacora era vakacerecerei kina na mate!

So na gauna erau na biubiu na veiwatini me rau lai honeymoon ni bera ni oti na soqo ni vakamau. Ke mani yaco oqori, e dodonu me digitaka o tagane vakamau e dua e nuitaki me cicivaka na soqo me raica na kena vakamuri tiko ga na ivakavuvuli vakaivolatabu, kei na gauna veirauti me tini kina na soqo.

Lalawataki Vinaka Qai Yalomatua

E kena irairai ni levu dina na kakana e vakarautaki ena vakamau a tiko kina o Jisu, e vakamacalataka na iVolatabu ni oqori na kana magiti ni vakamau. E macala ni a levu tale ga na waini. Sega ni vakabekataki ni na rogoci tiko na ivakatagi veiganiti, ena rakorako tale ga na meke e vakayacori kina me vaka ga era dau vakayacora na Jiu. Ena vosa vakatautauvata kilai levu i Jisu me baleta na gone cidroi, e kauta cake mai kina na tikina oqo. Sa dua na ka nona marau na tama vutuniyau ena italanoa oya ni sa veivutuni o luvena qai lesu tale mai, e kaya kina: “Me da kana ka mamarau.” E macala ena vosa i Jisu ni soqo oqo e okati kina na “[i]vakatagi kei na meke.”​—Luke 15:23, 25, VV.

Ia na vakamau e caka mai Kena e sega ni cavuti kina na ivakatagi kei na meke. E sega sara mada ga ni cavuti na meke ena dua na vakamau e volai ena iVolatabu. Dina nira dau meke na dau veiqaravi yalodina ni Kalou ena gauna vakaivolatabu, ia e sega ga ni vakabibitaki ena nodra soqo ni vakamau. Ena rawa beka nida vuli kina?

So na vakamau mai Aferika e dau vakayagataki kina na iyaya ni ivakatagi vakalivaliva kaukaua sara. Sa sega mada ga ni rawa nira veitalanoa na sureti ni sa rui rogolevu tale na ivakatagi. Dau so na gauna e oti koso ga na kakana, ia e bula ga na danisi kei na kena ivukivuki tawakilikili. Sa vaka ga e dua na soqo ni danisi, sa sega ni kana magiti ni vakamau. Kena ikuri e dau totolo sara nodra curu botolaki yani na dau vakatubuca, ni kauti ira yani na rogolevu ni ivakatagi.

Me vaka ni sega ni vakabibitaki ena vakamau e volai ena iVolatabu na ivakatagi kei na danisi, ena rawa beka ni nodrau idusidusi oqo na veiwatini erau nakita tiko me rau na vakamau me rawa ni vakarokorokotaki kina o Jiova? Na kena vakarautaki tiko e vica na vakamau mai na ceva kei Aferika ena dua na gauna lekaleka se qai oti ga oqo, era digitaki e so na itabagone lotu Vakarisito mera na vakaitavi ena danisi, dua mada ga na gauna levu e kania na nodra vakatovotovo. E taura sara ga vakalevu nodra gauna ena loma ni vica vata na vula. Ia e dodonu meda volia na gauna na lotu Vakarisito me baleta “na veika e bibi,” me vaka na vunautaki ni itukutuku vinaka, na vuli vakataki keda, kei na lako ina soqoni vakarisito.​—Efeso 5:​16; Filipai 1:​10, NW.

Na levu ni waini e vakarautaka o Jisu mai Kena, e laurai ni dua na vakamau levu qai levu na ka e caka kina. Ia e rawa nida vakabauta ni sega kina na kosakosa, era sega tale ga ni gunu vakasivia na sureti me vaka era dau vakayacora ena so na nodra soqo ni vakamau na Jiu. (Joni 2:​10) Eda kila vakacava oqo? Baleta ni tiko kina na Turaga o Jisu Karisito. E sega tale ga ni dua ena ucui Jisu ena levu ni nona qaqarauni me muria na ivakasala ni Kalou me baleta na vakailala ca: “Mo kakua ni tiko kei ira era daugunu waini.”​—Vosa Vakaibalebale 23:20.

O koya gona, ke rau lewa na veiwatini me caka na gunu ena nodrau vakamau, e dodonu me rau raica nira tiko e so mera lewa vakamatau na kena vakayagataki na gunu. Ke rau lewa tale ga me caka na ivakatagi, ia me rau digitaka ga na ivakatagi e veiganiti, me qai dua na tacida nuitaki me lewa tiko na levu ni kena rorogo. Sega ni dodonu mera lewa na soqo o ira na sureti ena nodra vakacuruma na ivakatagi e sega ni veiganiti, se mera tosoya cake me sivia na kena rorogo. Ke caka na danisi, me vakayacori ga na kena e rakorako. Ke laurai nira danisi vakalialia na wekadrau tawavakabauta se o ira na lotu Vakarisito sega ni matua vakayalo, ena rawa ni veisautaka na tagane vakawati na ivakatagi me rogoci, se kerea ga vakayalovinaka me sa kua na danisi. Ke sega ni vakayacori oqo, ena rawa ni vakasausataki na vakamau mera tini tarabe kina e so.​—Roma 14:21.

Na rerevaki ni so na mataqali danisi ni gauna oqo, lako vata kei na ivakatagi karakaravisa kei na gunu vakaveitalia, era sa lewa kina e so na tagane lotu Vakarisito me kua ni vakayacori na veika oqo ena nodra soqo ni vakamau. Era vakadiloi kina e so, ia e dodonu mera vakacaucautaki ena ka era sa lewa nira sega ni vinakata me vakayacori e dua na ka me qai vosabeci kina na yaca tabu ni Kalou. Ena yasana kadua era vinakata e so na tagane vakawati me rogoci na ivakatagi veiganiti, me caka na danisi, me caka tale ga vakarauta na gunu. Se mani cava e vakayacori, e nona itavi sara ga na tagane vakawati me lewa na cava me vakayacori ena nona vakamau.

So mai Aferika era sega ni matua vakayalo era vakalewa na vakamau kilikili ni lotu Vakarisito, era kaya ni vaka ga na somate. Oqo e sega ni rai ni tamata yalomatua. Dina ni rawa ni vakamalaudetaki keda vakalailai na gagadre ni yagoda ivalavala ca, ia e dau vakacaraka tale na lewaeloma ni lotu Vakarisito, e beci tale ga kina na yaca ni Kalou. (Roma 2:​24) Ena yasana kadua, na yalo tabu ga ni Kalou e kauta mai na marau dina. (Kalatia 5:​22) Era marau e vuqa na veiwatini lotu Vakarisito nira vakananuma lesu na siga era vakamau kina, era vakasamataka ni dua dina na gauna marautaki qai sega ni vakatarabetaki kina e dua.​—2 Korinica 6:3.

O Welsh kei Elthea erau dau nanuma lesu tu ga na nodra veivakacaucautaki na wekadrau tawavakabauta era a tiko ena nodrau vakamau. Kaya e dua vei ira: “Keimami sa oca ena mataqali vakamau kosakosa sa caka tu nikua. Ia e totoka dina qai rakorako na vakamau qo.”

Kena e bibi duadua ni rokovi o koya e tauyavutaka na vakawati, na Kalou o Jiova, ena vakamau vakarisito e marautaki qai kilikili.

[Kato/​iYaloyalo ena tabana e 22]

NA KA ME NANUMI ENA SOQO NI VAKAMAU

• Ke o sureta e dua na wekamu tawavakabauta me dua nona vosa, o sa vakadeitaka ni na sega ni muria na kena ivalavala sega ni vakarisito?

• Ke caka na ivakatagi, o sa digitaka ga na kena e veiganiti?

• O sa vakadeitaka ni na veirauti toka ga na rorogo ni ivakatagi?

• Ke vakatarai me caka na danisi, ena rawa ni caka me kilikili?

• Ke vakarautaki na yaqona ni valagi se yaqona ni viti, o sa vakadeitaka ni na vakarauta ga na levu ni ka me gunuvi?

• Era na lewa vinaka o ira na vakarautaka tiko?

• O sa lokuca na gauna veiganiti me tini kina na soqo ni vakamau?

• O sa vakadeitaka ni ratou na tiko e so eratou nuitaki me raica na kena tini vinaka na ka kece?