Me Marautaki me Dokai Tale ga Nomu Siga ni Vakamau

“E DUA vei ira na siga au na sega ni guilecava na noqu siga ni vakamau, e siga marautaki dina,” e kaya o Gordon, e dua na turaga e sa voleka ni 60 na yabaki na dede ni nona vakawati. Na cava e dau guiguilecavi dredre kina vei ira na lotu Vakarisito dina na nodra siga ni vakamau? Baleta oya na siga era tauca kina e dua na vosa ni bubului bibi vei rau e rua era lomana sara vakalevu​​—o koya me watidra, kei na Kalou o Jiova. (Maciu 22:37; Efeso 5:​22-​29) Io, e dodonu mera marautaka nodra siga ni vakamau o ira era lalawataka tiko mera vakawati, era na vinakata tale ga mera dokai koya a tauyavutaka na vakawati.​​—Vakatekivu 2:​18-​24; Maciu 19:​5, 6.

Na cava e rawa ni cakava o tagane vou me dokai kina na nona siga ni vakamau, me marautaka tale ga? Na cava e rawa ni cakava o yalewa vou me vakaraitaka kina nona dokai koya na watina, kei na nona dokai Jiova? Na cava e rawa nira cakava na kena vo mera vakaivotavota kina ena kena sagai me marautaki dina na siga ni vakamau? Eda na sauma na vica na taro oqo ena noda dikeva e so na yavu vakaivolatabu, na noda bulataka tale ga na yavu oqori ena vakalailaitaka na leqa e rawa ni yaco ena gauna bibi oqo.

O Cei me Lewa?

Ena levu na matanitu, e sa soli na kaukaua vakalawa vei ira e so na qase ni iVakadinadina i Jiova mera vakayaco vakamau. Ena so tale na vanua, na itavi vakalawa oqo e qarava duadua ga na kena valenivolavola vakamatanitu. Vei ira e yaco oqo ena nodra vanua, e levu era dau vinakata me vakayacori tale ga e dua na kena ivunau vakaivolatabu. Ena vunau vaka oqo, e dau uqeti kina o koya na tagane vou me vakasamataka sara vakabibi na itavi e lesia na Kalou vei koya na ulunivale. (1 Korinica 11:3) O koya gona, e itavi sara ga nei koya na tagane vou me lewa na veika ena vakayacori ena gauna ni vakamau. Na vakarautaki ni vakamau kei na soqo beka ena vakayacori ni oti oya ena dau vakarautaki makawa tu yani ni se vo levu na gauna. Ia, na cava ena ka ni bolebole kina na vakavakarau oqo?

Dua na vuna ni o ira na weka ena yasana vei tagane se yasana vei yalewa era na via lewa e so na ka e navuci me vakayacori. E kaya o Rodolfo, e sa vakaitavi ena levu sara na vakamau: “E so na tagane vou era dau curuoso tale vei ira na weka era dau via lewa e so na ka, vakabibi o ira na weka era cau ena saumi vakailavo ni soqo ni vakamau. Era na vinakata sara beka me muri ga na nodra ile ena ituvatuva ni vakamau se kena soqo. Oqo e sa na beci kina na itavi vakaivolatabu i tagane vou, ni o koya ga e dodonu me lewa na veika e vakayacori ena nona soqo.”

E kaya o Max, e dua e sa dau vakayacora tiko mai na vakamau ena 35 vakacaca na yabaki: “Sa laurai nikua na nodra sa lewa sara tiko ga vakalevu na yalewa vou na veika e vakayacori ena vakamau, vaka kina ena kena soqo, sa sega soti ni rogoci na domo i tagane.” E kaya o David, e dua e sa qarava e levu sara na vakamau: “Levu na tagane vou e sega ni matau vei ira na veiliutaki, era sega tale ga ni dau vakaitavi vakalevu ena vakarautaki ni vakamau.” E rawa vakacava vei tagane vou me colata sara ga na nona itavi?

Ena Vakilai na Marau ke Veivosakitaki na Ka

Ena qarava vinaka o tagane vou na nona itavi me baleta na tuvanaki ni nona vakamau kevaka e veivosakitaka vakamatata na ka kece e vinakata. E tukuna vakadodonu na iVolatabu: “Ni sa sega na bose, sa sega ni yaco na ka e nanumi.” (Vosa Vakaibalebale 15:22) Ia, ena sega ni vakamosi ulu ke veivosakitaka rawa o tagane vou na ituvatuva ni vakamau kei koya me na watina, kei ira tale ga na lewe ni nodrau vuvale, bau kina o ira e rawa nira tauca vua e so na ivakasala momona mai na iVolatabu.

Io, e bibi vei rau na sa veimusumusuki me rau veivosakitaka rawa e liu na nodrau lalawa, kei na veika erau nanuma me na vakayacori. Ena vuku ni cava? Rogoca mada e so na vosa e cavuta o Ivan kei na watina o Delwyn, erau sa marautaka voli mai nodrau bula vakawati ena dua na gauna balavu, ia e duidui vakalevu sara na bula erau a susu mai kina. E kaya o Ivan me baleta na nodrau a tuvanaka nodrau siga ni vakamau: “Sa matata tu vei au na ka au vinakata me caka, mera na tiko tale ga kina na noqu itokani kece, dua na kena keke vinaka, me na tokara tale ga o watiqu e dua na vinivo vulavula totoka ni vakamau. Ena yasana kadua, e vinakata o Delwyn me na dua ga na vakamau lailai, rawarawa ga, me kua ni dua na keke. Sega mada ga ni vinakata me tokara na vinivo ni vakamau.”

Rau qai walia vakacava na nodrau duidui? Ena nodrau veivosaki vinaka, rau veivosaki tale ga vakadodonu. (Vosa Vakaibalebale 12:18) E kaya o Ivan: “Keirau raica vata e so na ulutaga vakaivolatabu me baleta na vakamau, me vaka na kena e tabaki ena Vale ni Vakatawa ni 15 Epereli, 1984.a Na ulutaga oqo e solia vei keirau na rai vakayalo ena veika e vauca na vakamau. Ena vuku ni duidui ni bula keirau susugi mai kina, keirau sa qai veisautaka na neirau dui rai me keirau duavata ena ka me na vakayacori me salavata kei na idusidusi ena iVolatabu.”

Via vakatale ga oqo na ka erau cakava o Aret kei Penny. E kaya o Aret me baleta na nodrau siga ni vakamau: “Keirau veivosakitaka kei Penny na duidui ni ka keirau vinakata me vakayacori, oti keirau sa qai duavata ena ka me caka. Keirau masuta na veivakalougatataki i Jiova ena neirau siga ni vakamau. Au kerea tale ga nodratou ivakasala na neirau itubutubu, kei na so na tuakaqu matua ena ivavakoso era sa vakawati. E yaga sara ga na veika era vakatura. E qai yaco na neirau vakamau me dua na gauna taleitaki.”

Me Kilikili Tiko ga na iSulusulu kei na Sasauni

E macala ni na vinakata o tagane vou kei yalewa vou me rau vakaisulu vinaka ena siga ni nodrau vakamau. (Same 45:​8-​15) Ena taura beka na gauna kei na nodrau iyau na nodrau saga me rau raica na isulu e veiganiti me rau tokara. Na idusidusi vakaivolatabu cava ena vukei rau me rau digitaka na isulu e rairai vinaka, e rakorako tale ga me rau tokara?

Vakacava na isulu me na tokara o yalewa vou. E duidui na isulu ni vakamau e tokari ena veimatanitu, ia na idusidusi vakaivolatabu ena yaga ena veivanua kece ga. Na yalewa e dodonu me vakaisulu “e nai sulu e kilikili, ni ra sa lokomi ka yalomatua.” Na idusidusi oqo e bibi mera muria na yalewa lotu Vakarisito ena veigauna kece, okati tale ga kina na gauna ni vakamau. Na marautaki ni dua na vakamau e sega ni vakatau ena tokari ni “i sulu i sau dredre.” (1 Timoci 2:​9, raica tale ga na VV; 1 Pita 3:​3, 4) E dau veivakacegui dina ni muri na idusidusi oqo!

E kaya o David, sa cavuti oti: “Levu na veiwatini e dodonu mera vakacaucautaki nira a saga sara ga mera muria na idusidusi vakaivolatabu. Ia, ena so na vakamau, e so na yalewa vou kei na nodra itokani era duri vata e sa rui mamare na isulu era tokara, e so tale era dara na isulu e laurai kina vakalevu na yagodra.” Ena nona veivosaki e dua na qase kei rau na vakarau vakamau tiko, a vukei rau na qase me tiko vei rau na rai vakayalo. Ena sala cava? A tarogi rau se vakacava na isulu erau vakasamataka tiko, e rawa ni tokari ena soqoni vakarisito? De duatani beka na iculacula ni isulu ni vakamau mai na isulu ni soqoni, ia na isulu e rakorako e dodonu me salavata kei na ivakatagedegede vakarisito. Ke ra nanuma mada ga e so na tamata ni vuravura ni sa rui dredre na muri ni ivakarau ni bula e volai ena iVolatabu, ena tu vakarau ga na lotu Vakarisito me sabaya na sasaga ni vuravura me moici keda.​​—Roma 12:2; 1 Pita 4:4.

“Keirau sa sega ni qai kauaitaka soti kei Aret na isulu se soqo ni vakamau,” e kaya o Penny, “keirau sa kauaitaka ga na veika e vakayacori ena vakamau ena Kingdom Hall, ni oqo ga e okati kina na ka vakayalo, qai tiki bibi ni siga oya. Me yacova mai oqo, e se guiguilecavi dredre tu ga vei au na totoka ni veimaliwai ena siga oya, kei na noqu vakamautaka na tagane au a domona. Au sega ni vakasamataka tale tiko na isulu au a tokara se kakana au a kania.” E ka vakayalomatua dina me rau nanuma tiko oqo e rua erau vakarautaka tiko na nodrau siga ni vakamau.

Kingdom Hall​—E Vanua ni Vakamau Uasivi

Levu na lotu Vakarisito era dau vinakata sara ga me vakayacori nodra vakamau ena Kingdom Hall, ke tiko e dua ena nodra yasayasa. Ena vuku ni cava? E kaya e dua na veiwatini: “Keirau kila ni ituvatuva i Jiova na vakamau. Na neirau vakamau ena Kingdom Hall, na noda vanua ni sokalou, e vakadeitaka vei keirau mai na kena itekitekivu ni dodonu me tiki ni neirau bula vakawati o Jiova. E dua tale na vuna e uasivi ga kina na vakayacori ni vakamau ena Kingdom Hall oya ni vakaraitaka vei ira na wekada tawavakabauta era tiko ena vakamau ni noda qaravi Jiova e tiki bibi ni noda bula.”

Ke sa vakadonuya na ilawalawa qase e qarava tiko na Kingdom Hall me vakayacori kina nomudrau vakamau, e daumaka mo drau vakaraitaka totolo sara vei ira na qase na ituvatuva drau sa navuca tiko. Dua na sala erau vakaraitaka kina na veiwatini vou na nodrau dokai ira na sureti ena nodrau vakamau na nodrau yaco yani ena kena gauna. Erau na raica tale ga na ka kece e caka me kilikili, me dokai tale ga.b (1 Korinica 14:40) Ena sega ni yaco kina ena nodrau vakamau na veika e sega soti ni vinaka e sa takalevu tu ena levu na vakamau vakavuravura ena gauna oqo.​​—1 Joni 2:​15, 16.

O ira na tiko ena soqo ni vakamau e rawa nira vakaraitaka tale ga ni tiko vei ira na rai vakalou. Me kena ivakaraitaki, era na sega ni vakatauvatana na vakamau oqori kei na dua tale, mera kaya beka ni sega ga ni sivia e dua tale na vakamau. Na lotu Vakarisito matua tale ga ena kila ni bibi cake na nona tiko ena vakamau ena Kingdom Hall e caka kina na vunau vakaivolatabu mai na tiko ena kena kana magiti se soqo ni oti oya. Ia, ke digia e dua na lotu Vakarisito me tiko ena dua ga vei rau ena vuku ni kena ituvaki, e daumaka cake me tiko ena vunau ni vakamau ena Kingdom Hall. E kaya o William, e dua na qase ni ivavakoso: “Ke ra sega ni tiko ena Kingdom Hall e so na sureti ra qai lai tiko ga ena kena soqo ni oti oya, e sega tale ga ni dua nodra ulubale vinaka, era sa vakaraitaka na nodra sega ni kauaitaka na bibi ni vakamau. Ke da sega mada ga ni sureti ena soqo ni vakamau e qai lai vakayacori e muri, e rawa ga nida vakaraitaka noda tokoni rau na veiwatini vou ena noda tiko ena vakamau e vakayacori ena Kingdom Hall, e rawa tale ga nida vakamacala vei ira na wekadrau era sega ni tiko ena dina.”

Na Marau ena Yacova Sara Yani na Nomu Veisiga Mai Muri

O vuravura ena gauna oqo e sa vukica na vakamau me dua na bisinisi vakaitamera. E tauri ena dua na vakadidike wale tiko ga oqo mai Mereke ni ivakatautauvata ni isau ni dua na vakamau mai kea e via rauta tiko e “$22,000 se veimama ni ilavo e rawata [e veiyabaki] e dua na vuvale e Mereke.” Era coriti na vakawati vou kei ira na wekadra ena nodra veivakamuai na dauvolivolitaki. Era vakayagataka kina ena dua ga na siga e dua na ilavo vakaitamera, ra qai mai sausaumi voli yani ena vica vata na yabaki. E sala vinaka beka oqo vua e dua me tauyavutaka kina nona bula vakawati? O ira na lecava se vakalecalecava na idusidusi vakaivolatabu e rawa nira vakayagataka vakalevu sara na iyau ena nodra vakamau, ia e duidui sara oqo vei ira na lotu Vakarisito!

Ni vakalailaitaki na kedra iwiliwili na sureti me veirauti, me mamada tale ga na kena icolacola, qai vakabibitaki ga na ka e caka ena Kingdom Hall, sa rawa kina vei ira e levu na veiwatini lotu Vakarisito mera vakayagataka na nodra gauna kei na iyau ena veika e vauca na nodra yalayala vua na Kalou. (Maciu 6:​33) Dikeva mada na kedrau ivakaraitaki o Lloyd kei Alexandra, erau tomana tiko ga nodrau cakacaka vakaitalatala vakatabakidua me 17 oqo na yabaki mai na gauna erau vakamau kina. E kaya o Lloyd: “Era na nanuma beka e so ni vakaloloma na neirau vakamau, ia keirau sa bau marautaka sara ga kei Alexandra. Keirau duavata ni neirau soqo ni vakamau e sega ni dodonu me bikai keirau tu ena dua na gauna balavu na kena icolacola, ia me vakamarautaki keirau ga baleta ni ituvatuvanaki i Jiova.”

E kuria o Alexandra: “Au a painia voli ni bera neirau vakamau, au qai sega ni vinakata me ka levu na neirau vakamau baleta niu sa na biuta kina na cakacaka vakapainia meu qara na ilavo me saumi kina. E siga bibi vei keirau na neirau siga ni vakamau. Ia, oya e imatai ni siga wale ga, e bibi cake sara me keirau kauaitaka na vo ni neirau bula keirau sa na tiko vata voli kina. Keirau rogoca na ivakasala, oya me keirau kua ni kauaitaka vakasivia na soqo ni kena caka na vakamau, ia keirau qara na veidusimaki i Jiova me vukei keirau ena neirau sa na bula vata tiko ni oti na vakamau. Neirau muria oqo keirau vakila sara ga kina na veivakalougatataki i Jiova.”c

E siga bibi dina na nomu siga ni vakamau. Na ka o vakabibitaka kei na ka o cakava ena siga oya e sa rawa ni dusia na sala e sa na muria na nomu bula vakawati ena veiyabaki e muri mai. O koya gona, vakararavi ena veidusimaki i Jiova. (Vosa Vakaibalebale 3:​5, 6) Me bibi tiko vei iko ena nomu siga ni vakamau na veika vakayalo. Drau veitokoni ena itavi e dui solia vei kemudrau na Kalou. O sa rawa ni viria kina e dua na yavu vinaka ena nomu bula vakawati, na yavu ena vakadeitaki iko ena nomu siga ni vakamau, vakabibi ena veisiga mai muri. ​​—Vosa Vakaibalebale 18:22.

[iVakamacala e ra]

[iYaloyalo ena tabana e 29]

Me rau veivosakitaka vakadodonu ena veidokai na veika me na vakayacori ena nodrau siga ni vakamau

[iYaloyalo ena tabana e 31]

Me bibi duadua ena nomu siga ni vakamau na veika vakayalo