Kato ni Taro
◼ Ke rau via vakamau ena Kingdom Hall e rua, na cava me rau veivosakitaka kei ratou na qase ni ivavakoso?
E lagiti o Jiova ena vakamau e tuvanaki me salavata kei na ivakavuvuli vakaivolatabu. Qori e dina me baleta na vakamau e caka ena Kingdom Hall, ni veika era raica na tiko voleka ni caka e kea e dusi kina na isoqosoqo. E veiganiti me ratou veivosakitaka e so na tikina na qase ni ivavakoso kei rau na vakamau me rawa ni “caka sara vaka vinaka ka tuvalaki vakamatau” na ka kece.—1 Kor. 14:40, VV.
Me rau kerea na vakayagataki ni Kingdom Hall o rau na vakamau, ena nodrau volavola ina komiti ni cakacaka ni dua na ivavakoso e dau vakayagataka na Kingdom Hall. E dodonu me vakau na ivola ni se vo levu na gauna qai tukuni kina na tikinisiga kei na gauna ena vakayagataki kina na Kingdom Hall. Me rau nanuma na vakamau niratou na sega ni veisautaka na qase ni ivavakoso na ituvatuva ni soqoni me rawa ni caka na vakamau. Kuria ya, me rau ivakaraitaki vinaka na vakamau, nodrau ivakarau ni bula me salavata kei na ivakavuvuli vakaivolatabu kei na ivakatagedegede dodonu i Jiova.
Me lagiti na Kalou, e dodonu vei rau na vakamau me rau veivosaki kei na komiti ni cakacaka ni bera ni vakadeitaki na veika erau tuvanaka. Eratou na sega ni togoraka na qase na nodratou rai, ia ke tuvanaki e dua na ka e sega ni kilikili, o rau na vakamau me rau muria nodratou veidusimaki na qase. Me vakayagataki ga na ivakatagi ena noda ivolanisere. Na ukutaki ni Kingdom Hall se tuva ni idabedabe e dodonu tale ga me vakadonui. Ke caka na veitaba se vidio, me kua ni caka e dua na ka ena beci kina na vakamau. Eratou rawa ni tuvanaka na qase ni ivavakoso na vakatovotovo ena Kingdom Hall, me kua ga ni vakalatilati ena ituvatuva tale e so ni ivavakoso. Me kua ni kabi ena papa ni itukutuku na ivola ni veisureti. Ia eratou rawa ni kacivaka na qase ena gauna ni Soqoni ni Cakacaka ni na vakayacori tiko e dua na vakamau ena Kingdom Hall.
E sega ni tukuni ni dodonu meratou papitaiso kece na duri vata kei rau na vakamau, e sega ga ni vinaka mera digitaki o ira e veisaqasaqa nodra ivakarau ni bula kei na ivakavuvuli vakaivolatabu se lomatarotarotaki nodra ivalavala mai vei ira na tiko ena vakamau. Ke rawa, e dodonu me veivakamautaki e dua na qase ni ivavakoso. Era rawata na qase na ivakatagedegede mera veivakavulici ena Vosa ni Kalou, e ganiti ira gona mera vakabibitaka na ivakavuvuli vakaivolatabu ena vakamau.—1 Tim. 3:2.
Ni bibi nona itavi na qase ni ivavakoso ena cakava na vakamau, e dodonu gona me dau tukuni vakailiu vua na veika e vauca na vakamau. Ena dau veivosaki kei rau na vakamau me baleta nodrau ivalavala ena gauna ni veibuku; e bibi me rau kua ni vunitaka e dua na ka. Ke dua vei rau a vakawati tu eliu, e dodonu me vakadinadinataka ni sa galala vakalawa, vakaivolatabu tale ga me vakawati tale. (Maciu 19:9) Qori ena okati kina nona vakaraitaka vua na qase ni ivavakoso na ilavelave ni ivola ni veisere.
Ke rau dau veivosaki qai veitokoni vinaka vei ira na qase ni ivavakoso o rau na vakamau, era na marau kece na tiko ena vakamau.—Vkai. 15:22; Iper. 13:17.