Ra Uqeti na Lewenikalasi 108 e Kiliati Mera Gumatua ena Veiqaravi Tabu

ENA iVolatabu, e dau vakatokai na qaravi Kalou me “veiqaravi tabu.” E yavutaki mai na dua na vosa vakirisi e vakaibalebaletaki ena nona qaravi na Kalou. (Roma 9:​4, NW) Na le 5,562 era tiko ena porokaramu ni tuvaitutu ni kalasi 108 ni Watchtower Bible School of Gilead era rogoci ira na vosa ena nodra vakasalataki ira na gonevuli mera gumatua tiko ga ena veiqaravi tabu e vakadonuya na Kalou o Jiova.a

E jeameni ni tuvaitutu oqo o Theodore Jaracz, e dua na lewe ni iLawalawa Dauvakatulewa ni iVakadinadina i Jiova. E dola na porokaramu oqo ena sere naba 52, “Na Yaca i Tamada.” E kaya na ikarua ni qaqanisere: “Mami qara [na] sala me na dokai na yacamuni.” Oqo sara ga na ka e lomadra na gonevuli era mai tuvaitutu tiko oqo (era cavutu mai na 10 na matanitu), mera lai vakayagataka na ka era tuberi kina nira sa na lesi ina 17 na matanitu era na kaulotu kina.

Ena itekitekivu ni nona vosa, e lesuva kina o Brother Jaracz na vuli vula lima titobu era sa mai vakacavara na gonevuli, me vakarautaki ira ina nodra ilesilesi i vanuatani. Oqo e vukei ira mera “vakadeitaka na ka kece ga,” oya mera dikeva vinaka ena rarama ni Vosa ni Kalou na ka era sa vulica oti, ra qai “taura matua na ka e vinaka.” (1 Cesalonaika 5:​21, NW) E vakauqeti ira mera yalodina tiko ga ena nodra kabiti Jiova, na nona Vosa, kei na ilesilesi era sa vakarautaki kina. Na cava ena vukei ira ena nodra vakayacora na veika kece oqo?

Na iVakasala Momona me Baleta na Veiqaravi Tabu

E vosa o Lon Schilling, e dua na lewe ni Bethel Operations Committee ena ulutaga, “O na Vakaraitaka ni O Tamata Yalomatua?” E vosa o koya ena bibi ni yalomatua, ni tamata yalomatua ena tiko vua na vuku vakalou. (Jemesa 3:​17, NW) Na tamata yalomatua ena dau yalorawarawa, ena sega ni dau veitovaki, ena matau, dauveinanumi, ena dauvosota. “O ira na tamata yalomatua e dau rabailevu nodra rai nira veimaliwai kei ira na tani. E sega ni dau qiqo nodra rai,” e kaya o Brother Schilling. Na cava ena vukea e dua na daukaulotu me yalomatua tiko ga? Me yalomalumalumu, me dau rogoci ira na tani, me vuli vei ira, me dau tu vakarau tale ga me rogoca na nodra nanuma na tani ena gauna vata oya me kua ni vakawaicalataka e dua na ivakavuvuli vakaivolatabu.​—1 Korinica 9:​19-23.

Na ulutaga vakavure vakasama e tarava, “Kua ni Guilecava Mo Kana!” e vosa kina o Samuel Herd, e dua tale na lewe ni iLawalawa Dauvakatulewa. E vakabibitaka o koya na yaga ni kana vakavinaka vakayalo me rawa ni kaukaua vinaka tiko ga kina e dua e vakaitavi ena veiqaravi tabu. “Na nomuni itavi vakayalo,” e kaya o Brother Herd, “ena qai bini mai ni oni sa na lai vakaitavi ena vunau kei na veivakavulici ena nomuni ilesilesi. Ena vinakati kina vei kemuni mo ni vakalevutaka na kakana vakayalo oni kania me rawa ni veiraurau kei na itavi oni na colata ena nomuni kaukaua.” Ni kania vakalevu e dua na daukaulotu na kakana vakayalo, ena sega ni vakila na lauqa vakayalo se me vakanananu lesu i vale. Ena lomavakacegu tu ga, ena dei tale ga vua na nona lewa me kua ni biuta na nona ilesilesi ni veiqaravi tabu.​—Filipai 4:13.

E dua na qasenivuli e Kiliati, o Lawrence Bowen, e vakauqeti ira na gonevuli mera “Lesu Ina iVakatekivu.” Na cava e vakaibalebaletaka? E kerei ira kece na vakarorogo mera cega na nodra iVolatabu ina Vosa Vakaibalebale 1:​7, e tukuni kina: “Na rerevaki Jiova sa vu [se, “ivakatekivu,” NW] ni lomavuku.” E tomana o koya: “Ke dua na kila e vakabekataki kina ni bula tiko o Jiova, e sega ni kila dina oqori.” Sa qai vakatauvatana o Brother Bowen na tikitiki ni dua na iyaloyalo e sagai mera biu vata, kei na veika matailalai era vakamacalataki ena Vosa ni Kalou, na iVolatabu. Ni biu vata na tikitikina, sa na qai laurai na iyaloyalo. Na levu ga ni tikitikina lalai era biubiu vata, na levu tale ga ni iyaloyalo e laurai, lako vata kei na kena taleitaki. Oqo ena vukei keda kece ena noda veiqaravi tabu vua na Kalou.

E mai tinia na tolu na vosa veitaravi oqo o Wallace Liverance, na vunivola ni koronivuli. E nona usutu, “Dau Vakavinavinaka ni Oqo e Nomu iSoro Vua na Kalou.” Sa qai vakamacalataka nona vakabula e tini na vukavuka o Jisu. (Luke 17:​11-19) E dua ga e lesu me lai vakacaucautaka na Kalou, me vakavinavinakataki Jisu. E kaya o Brother Liverance: “Sega ni vakabekataki ni ratou marau vakalevu na kena vo ni ratou sa savasava. Eratou marautaka, ia e kena irairai ni ka ga eratou vinakata me vakatokai iratou na bete me ratou savasava.” Na nona vakasavasavataki vakayalo e dua ni sa mai kila na ka dina, lako vata kei na nona vakavinavinaka, e dodonu me uqeti koya me vakavinavinakataka na vinaka ni Kalou. Era vakauqeti na gonevuli ena kalasi 108 e Kiliati mera dau vakananuma na cakacaka kece ni Kalou kei na nona vinaka me rawa kina ni laurai ena nodra cakacaka kei na nodra oga na nodra vakavinavinaka vua na Kalou.​—Same 50:​14, 23; 116:​12, 17.

Talanoataki, Vakamacalataki Tale ga e So na Kena iCakacaka

E vosa tarava o Mark Noumair, e dua tale ga na qasenivuli e Kiliati. E lewe ni nona ivakamacala na nodra italanoa ni cakacaka vakavunau na lewenikalasi ena gauna era vuli tiko kina. Vei ira na mai vuli oqo e Kiliati, na balavu ni gauna era vakaitavi voli kina ena cakacaka vakaitalatala vakatabakidua e rauta nira ya12 na yabaki. Ena nodra gauna ni vuli, sa ra mai tauyavutaka sara e levu na vuli iVolatabu kei ira na veimataqali tamata, oqo e vakaraitaka nira sa kila vinaka tu na gonevuli na ka mera cakava mera yaco kina mera ‘ka kece ga vei ira na tamata kece ga.’​—1 Korinica 9:22.

Oti na nodra vakasavuirogorogo na gonevuli, erau sa qai vakatarogi ira e so na lewenivuvale e Peceli kei na so na ivakatawa dauveilakoyaki era a vuli e Kiliati o Charles Molohan kei William Samuelson. E dua vei ira na vakatarogi o Robert Pevy, a kaulotu tu ina Yatu Filipaini ni oti nona vuli mai na kalasi 51 e Kiliati. E vakaraitaka vei ira na gonevuli: “Ni basika e dua na leqa, o keda kece eda dau via vakaraitaka na kena iwali eda nanuma. Ena tiko ga e dua ena siviti iko, ena vakatura e dua na ka e vinaka cake. Ia, ke o rai ina iVolatabu mo dikeva kina se cava na rai ni Kalou, ena sega tale ni dua e sivita na ivakamacala o na kunea kina. Sega ni dua ena vakacala.”

Sa qai mai taucoko sara na porokaramu vakayalo totoka oqo ni mai tinia o John Barr, e dua na lewe ni iLawalawa Dauvakatulewa ena ulutaga “Me Vakadonuya na Kalou Nomu Veiqaravi Tabu.” E dusia o koya na sala me vakaraitaki kina ena cakacaka vakaitalatala na veiqaravi tabu mera vukei kina na tamata yalomalumalumu mera qarava na Kalou ena sala e vakadonuya. Ni wilika oti na vosa i Jisu ena Maciu 4:​10, sa qai kaya o Brother Barr, “Na noda qaravi Jiova duadua ga e kena ibalebale nida na cata na iwalewale kece ni qaravi matakau, me vaka na kocokoco, na via vutuniyau, kei na noda via biuti keda i cake. Eda marau nira ivakaraitaki vinaka sara ena tikina oqo o ira noda daukaulotu ena veitabayabaki me tekivu sara mai na 1940 vakacaca! Keimami nuidei ni o kemuni na lewenikalasi 108 oni tuvaitutu nikua oni na muria tale ga na nodra ivakaraitaki vinaka. Oni na lai cabora vei Jiova na nomuni veiqaravi tabu, ni o koya duadua ga e dodonu me cabori vua.”

E itinitini vinaka dina oya ina porokaramu vinaka oqo. Sa qai soli na gauna me rogoci kina na nodra vakanuinui vinaka e so mai na veiyasa i vuravura, na soli ni nodra sitivikiti, kei na wiliki ni nodra ivola na lewenikalasi era vakaraitaka toka kina nodra vakavinavinakataka na nodra vuli. Era vakadreti na gonevuli mera yalodina tiko ga ena nodra ilesilesi, vaka kina ena nodra qaravi Jiova. Era sa qai tinia vata na porokaramu ena sere kei na masu o ira kece na tiko ena tuvaitutu, wili kina o ira na sureti mai na 25 na matanitu.

[iVakamacala e ra]

[Kato ena tabana e 23

Vanua era cavutu mai kina: 10

Vanua era lesi kina: 17

Levu ni gonevuli: 46

iVakatautauvata ni nodra yabaki: 34

iVakatautauvata ni yabaki ena dina: 16

iVakatautauvata ni yabaki ena cakacaka vakaitalatala vakatabakidua: 12

[iYaloyalo ena tabana e 24]

Nodra Tuvaitutu na Kalasi 108 ni Watchtower Bible School of Gilead

E nabataki na iyatu me tekivu mai liu me yaco i muri, e tuvai na yaca me tekivu mai na imawi me gole ina imatau.

(1) Amadori, E.; Cook, O.; Byrne, M.; Lee, A.(2)Newsome; Pederzolli, A.; Bigras, H.; Kato, T.; Gatewood, D. (3)Eade, D.; Eade, J.; Wells, S.; Jamison, J.; Gonzales, M.; Gonzales, J. (4)Kato, T.; Lohn, D.; Niklaus, Y.; Preiss, S.; Foster, P.; Ibarra, J. (5)Amadori, M.; Manning, M.; James, M.; Boström, A.; Gatewood, B.; Newsome, D. (6)Foster, B.; Jamison, R.; Hifinger, A.; Koffel, C.; Koffel, T.; Byrne, G. (7) Hifinger, K.; Manning, C.; Cook, J.; Boström, J.; Lohn, E.; Pederzolli, A. (8) James, A.; Wells, L.; Preiss, D.; Niklaus, E.; Lee, M.; Ibarra, P.; Bigras, Y.