Era Guta Mera Cabori Ira

“O IRA na nomuni tamata era na via vakacabori ira mei madrali.” (Same 110:3) Macala ni vakaibalebale dina na malanivosa oqo vei ira na lewe 46 na gonevuli ni ika118 ni kalasi ni koronivuli o Kiliati na Watchtower Bible School of Gilead. Ia, na cava sara mada era a cakava me rawa kina nira lai vuli ena koronivuli e tuberi ira na daukaulotu vovou mera na qarava rawa na nodra gagadre vakayalo na leweniveivanua tani? Rau sauma o Mike kei Stacie, erau lewenikalasi oqo, ena nodrau vakamacalataka: “Keirau a vakatulewataka me rawarawa ga na neirau bula. E vakalailaitaka gona na ka e rawa ni vakasesei keirau, me rawa kina ni keirau vakaliuca tiko ga na veika vakayalo. Keirau vakabisinisi qai cici vinaka sara tale ga, ia keirau vakadeitaka me kua vakadua ni keirau laiva oya me vakaosota na neirau isausau vakayalo.” Era ucui Mike kei Stacie na vo ni lewenikalasi ena nodra guta mera cabori ira, ra sa vakarau tu kina oqo mera lai veiqaravi vakadautukutuku ni Matanitu ni Kalou ena va na iwase ni vanua lelevu e vuravura.

Ena Vakarauwai, 12 Maji, 2005, era sega ni kinoca rawa na nodra marau na lewe 6,843 nira vakarorogo tiko ena porokaramu ni tuvaitutu. A jeameni ni soqo o Theodore Jaracz, e lewe ni iLawalawa Dauvakatulewa ni iVakadinadina i Jiova. Ni oti na nona kidavaki ira vakabulabula na vulagi era cavutu mai ena 28 na matanitu, e vakamua na nona ivakamacala ena yaga ni vulici ni iVolatabu. A cavuqaqataka o Brother Jaracz na tago ni vosa i William Lyon Phelps, e dua na dauniveivakatavulici ni Mereke: “O ira yadua era kila vinaka na iVolatabu, era tamata vuli.” Dina ni yaga na vuli, ia e yaga cake sara na vulici ni iVolatabu. E vukei keda meda kilai koya na Kalou me rawa nida na rawata kina na bula tawamudu. (Joni 17:3) E vakavinavinakataki ira na gonevuli o Brother Jaracz ena nodra cabori ira mera vakaitavi vakalevu ena porokaramu ni kena vulici na iVolatabu, e sa cicivaki tiko oqo ena sivia e 98,000 na ivavakoso ni iVakadinadina i Jiova e vuravura raraba.

Tau Donu na Vosa ni Veiuqeti Vei Ira na Gonevuli

Ni doladola oti na jeameni, a vosa tarava o William Samuelson ena ulutaga, “Na Sala O Rawa ni Vaka Kina na Vuniolive Bulabula ena Vale ni Kalou,” e yavutaki ena Same 52:8. Vakamacalataka o Brother Samuelson ni iVolatabu e vakayagataka na vuniolive me vakatakarakarataka na vuavuaivinaka, na rairai totoka kei na rakorako. (Jeremaia 11:16) E vakatauvatani ira gona na gonevuli o Brother Samuelson mera vaka na vuniolive ena nona kaya: “Ena okati kemuni o Jiova mo ni rairai totoka, oni qai rakorako ni oni na vakayacora ena yalodina na nomuni itavi ni vunautaka na Matanitu ni Kalou ena vanua oni dui lesi kina vakaulotu.” Me vaka ga na kena vinakati me ti vinaka na waka ni vuniolive me rawa ni bulata kina na gauna ni lauqa, ena vinakati tale ga mera saga na gonevuli me ti vinaka na wakadra vakayalo. Bibi dina oqo me rawa nira vosota kina na nodra na sega ni kauai na tamata ena vanua era na veiqaravi kina se nodra na lai sotava na veitusaqati se na leqa tale e so.​​—Maciu 13:21; Kolosa 2:​6, 7, VV.

O John E. Barr, e dua vei ratou na lewe tolu mai na iLawalawa Dauvakatulewa eratou vakaitavi ena porokaramu, e vosa ena ulutaga, “O i Kemuni na Masima kei Vuravura.” (Maciu 5:​13) Kaya o Brother Barr ni masima e maroroya na kakana me kua ni midra, na nodra vunautaka gona na daukaulotu na Matanitu ni Kalou ena vakabulai ira era vakarorogo mera maroroi kina mai na midra vakayalo qai maroroya tale ga na nodra bula savasava. Vaka ga e dua na tama o Brother Barr ena nona vakadreti ira vakayalololoma na gonevuli mera lai saga mera “veiyaloni” kei ira na so. (Marika 9:​50, VV) “Ni bucina na vua ni yalo tabu, mo ni qai vakadeitaka mada ga me laurai e veigauna ena nomuni itovo kei na nomuni vosa na yalovinaka kei na veinanumi,” e vakadreta o Brother Barr.

“Vodo Waqa ena Wai Titobu,” na ulutaga e vosa kina o Wallace Liverance, e dua na qasenivuli e Kiliati. Dau rawarawa ni mua donu na waqa ke soko tiko ena wai titobu. Ena tautauvata kei na noda kila vinaka “na veika titobu ni Kalou”​​—oya na ka dina me baleta na nona inaki kei na sala ena vakavatukanataki kina​​—ni na vukea e dua me toso tiko ga vakayalo. (1 Korinica 2:​10) Ke dua e toka ga ena vanua matia vakayalo ena nanuma ni sa rauti koya “na vu ni vakavuvuli ni Kalou,” ia oqo ena tarova na nona toso, e rawa sara ga ni ‘kasa kina na nona vakabauta.’ (Iperiu 5:​12, 13; 1 Timoci 1:​19) “Mo ni laiva gona na ‘titobu ni nona vutu ni vuku kei na nona yalomatua na Kalou’ me vakaukauataki kemuni ena nomuni ilesilesi vakadaukaulotu,” e tinia o Brother Liverance.​​—Roma 11:33.

O Mark Noumair, e dua tale na qasenivuli e Kiliati, a vosa ena ulutaga, “Oni na Vakamareqeta Beka na Nomuni iVotavota?” Sa sivia oqo e 60 na yabaki na kena kilai tu mai o Kiliati me koronivuli nuitaki qai vinaka na kena irogorogo. Vu vakatabakidua oqo ena ‘ivakadinadina vinaka’ era sa kotora tu mai o ira sa tauri ivola oti. (Vakatekivu 31:48) Sa mai vakatautaki toka vei ira na gonevuli ni ika118 ni kalasi na ivotavota oqo. Uqeti ira tale ga na gonevuli o Brother Noumair mera vakatotomuri ira na kai Tikoa ni gauna makawa, oya ena nodra lai cakacaka vata ena yalomalumalumu kei ira na nodra itokani daukaulotu, vaka kina na ivavakoso era na lewena. Ra vakadreti me kua nira muria na nodra rai na “turaga” dokadoka e cavuta o Niemaia, ia mera cakacaka galugalu ga ra qai kua ni lai vakacakacakai ira.​​—Niemaia 3:5.

Yaga na Vakasavuirogorogo kei na Nodra Vakatarogi na So

E tarava mai na ulutaga, “Sa Tete Tiko ga na Vosa ni Kalou.” (Cakacaka 6:​7, VV) Liutaka o Lawrence Bowen, e dua tale na qasenivuli e Kiliati, na nodra vakatasuasuataka na gonevuli e so na ka era sotava kei na ka era cakava ena nodra cakacaka vakavunau ena gauna era vuli tiko kina. Votu ena vakatasuasua oya na nodra yalogu na gonevuli ni kacivaka na Vosa ni Kalou, qai vakalougatataka tale ga o Jiova na nodra sasaga.

O Richard Ashe e vakatarogi ira e so na lewenivuvale e Peceli era cakacaka vakavoleka kei na koronivuli. Matata mai na nodra ivakamacala ni o ira na lewenivuvale e Peceli era tokoni ira vinaka na gonevuli me rawa ni yaga na nodra vuli. Tarava o Geoffrey Jackson, ena nona vakatarogi ratou e vica na vuli oti e Kiliati. Ratou vakamacalataka na vakatarogi oqo ni bula ni kaulotu e dolava e vuqa na sala me vakacaucautaki qai dokai kina o Jiova. Kaya e dua vei ratou: “Era dau vakaraica na tamata na ka kece o cakava ni o dua na daukaulotu. O na vakadigovi, ena kauaitaki na ka o kaya, ra dau qai tugana lo toka.” Ra uqeti gona na gonevuli mera nanuma tiko mera ivakaraitaki vinaka ena veigauna kece. Sega ni vakabekataki ni na yaga vakalevu ena gauna e muri na veivakadreti oqo.

O Stephen Lett, e dua tale ga na lewe ni iLawalawa Dauvakatulewa, a nona na iotioti ni vunau e kena ulutaga, “Ni Lako Yani na Lai Vakadavea na ‘Wai Bula.’ ” (Joni 7:​38) E kaya ni sa oti oqo e lima na vula na kena yaga vinaka tiko vei ira na gonevuli na nodra gunu mai na wai titobu ni ka dina ni Vosa ni Kalou. Na cava gona mera na cakava na daukaulotu vou ena kila era sa mai tugana oqo? Uqeti ira na gonevuli o Brother Lett me kua nira burogotaka na wai vakayalo ia mera lai wasea me rawa ni yaco tale ga kina na lomadra e so “me mata-ni-wai sa tovure ki[na] na bula tawa mudu.” (Joni 4:​14) Tomana o Brother Lett ena nona kaya: “Ia, mo ni kua ni guilecava ni o Jiova ‘na ivurevure ni wai bula,’ sa dodonu ga mo ni na vakamua vua na veidokadokai kei na veivakalagilagi. Ni yalovosovoso tale ga na vukei ira na biuta mai na lauqa vakayalo kei Papiloni na Ka Levu.” (Jeremaia 2:​13) Tinia o Brother Lett na nona ivunau ena nona uqeti ira na gonevuli me lai bulabula na nodra vakatotomuria na yalo tabu kei na wati ni Lami ena nodra kaya tale ga: “Lako mai. Ia me lako mai ko koya sa viagunu. O koya sa vinakata, me mai gunuva walega na wai ni bula.”​​—Vakatakila 22:17.

A vakacavara na soqo o Brother Jaracz ena nona vakasavuya na iloloma e vakau mai na vica vata na matanitu. Sa qai salamuria na kena wiliki na nodra ivola ni vakavinavinaka na lewenikalasi.

E rawa beka ni o cabori iko mo lai veiqaravi ena vanua e gadrevi vakalevu kina na veivuke? Ke rawa, kakavaka na isausau vakayalo me vakataki ira na gonevuli era tauri ivola oqo. Rawa tale ga ni o na kunea kina na marau kei na lomavakacegu e salavata kei na nona guta e dua me cabori koya ena yalomarau ina cakacaka ni Kalou​​—vakadaukaulotu ina dua na vanua tani se mo italatala voleka ga.

[Kato ena tabana e 13]

VEIKA ME BALETA NA KALASI

Vanua era cavutu mai kina: 8

Vanua era lesi kina: 19

Levu ni gonevuli: 46

iVakatautauvata ni nodra yabaki: 33.0

iVakatautauvata ni yabaki ena dina: 16.5

iVakatautauvata ni yabaki ena cakacaka vakaitalatala vakatabakidua: 12.9

[iYaloyalo ena tabana e 15]

Nodra Tuvaitutu na Kalasi 118 ni Watchtower Bible School of Gilead

E nabataki na iyatu me tekivu mai liu me yaco i muri, e tuvai na yaca me tekivu mai na imawi me gole ina imatau.

(1) Brockmeyer, A. Moloney, S.; Symonds, N.; Lopez, Y.; Howard, C. (2) Jastrzebski, T.; Brown, D.; Hernandez, H.; Malagón, I.; Jones, A.; Connell, L. (3) Howard, J.; Lareau, E.; Shams, B.; Hayes, S.; Brown, O. (4) Burrell J.; Hammer, M.; Mayer, A.; Kim, K.; Stanley, R.; Rainey, R. (5) Jastrzebski, P.; Zilavetz, K.; Ferris; Torres, B.; Torres, F. (6) Connell, J., R.; Moloney, M.; Malagón, J.; Shams, R.; Hayes, J. (7) Ferris, A.; Hammer, J.; Stanley, G.; Kim, C.; Symonds, S.; Lopez, D.; Burrell, D. (8) Brockmeyer, D.; Mayer, J.; Rainey, S.; Zilavetz, S.; Jones, R.; Lareau, J.