Koronivuli o Kiliati​—Vakarautaki Ira Voli na Daukaulotu me 60 na Yabaki

“DUA na ka na vuli iVolatabu keimami cakava, e toroi keimami voleka sara ga vei Jiova, levu tale ga na ka keimami vulica me baleta na nona isoqosoqo. Oqo e vakarautaki keimami sara ga ena bula keimami na lai sotava ni keimami sa na veilesiyaki.” Oqo na ka a cavuta e dua e vuli ena imatai ni Kalasi ena Koronivuli o Kiliati me baleta na veituberi a caka vei ira. E sega ni cegu na Koronivuli o Kiliati ena nona vakarautaki ira tiko na daukaulotu, me tekivu sara ena kena tauyavu ena 60 na yabaki sa oti. Ena 8 Maji, 2003, a vakayacori kina na tuvaitutu ni ika114 ni kalasi ena Watchtower Educational Center e Patterson, Niu Yoka. Era vakatudaliga ena vunau, veitarotarogi, kei na veitalanoa e vakarautaki na lewe 6,404 era tiko ena tuvaitutu, wili tale ga e ke o ira e kaburaki vei ira na porokaramu ena retioyaloyalo.

A jeameni o Theodore Jaracz, e dua na lewe ni iLawalawa Dauvakatulewa. E tekivuna nona ivakamacala ena nona cavuta na vanua era cavutu mai kina o ira na tiko ena siga oya. E so na vulagi era cavutu sara mai Esia, ena Caribbean, Amerika e Loma, Sauca Amerika, kei Urope. E yavutaka nona ivakamacala o Brother Jaracz ena 2 Timoci 4:​5, qai vakabibitaka na cakacaka era vakarautaki yani kina vakatabakidua e Kiliati na daukaulotu​—mera ‘vakayacora na cakacaka ni veivakalotutaki.’ Era na vakatakila na ka dina na daukaulotu ena nodra veivakavulici ena iVolatabu.

Vosa ni Tatau Vei Ira na Gonevuli

Era veitaravi yani e so na ulutaga leleka. Liu vei ira na vakaitavi kina o John Larson, e dua na lewe ni Komiti ni Valenitabana e Mereke, ena nona vosa ena ulutaga, “Kevaka sa Totaki Keda na Kalou, o Cei me Noda Meca?” (Roma 8:​31) E vakamacalataka na vuna vakaivolatabu mera nuitaka kina na tiko ena vuli ni o Jiova ena vukei ira mera vosota na ka dredre cava ga era na sotava ena nodra ilesilesi. Ni vakamacalataka na Roma 8:​38, 39, e kaya o Brother Larson vei ira na gonevuli: “Ni vakasamataka mada na kaukaua sa dau vakaraitaka na Kalou ena vukumuni, qai nanuma tiko ni sega ni dua na ka e rawa ni tagutuva nona kauaitaki iko o Jiova.”

E vosa tarava o Guy Pierce, e dua na lewe ni iLawalawa Dauvakatulewa. E digia o koya na ulutaga “Mo Mata Mamarau Tiko Ga!” (Luke 10:​23, NW) E vakamacalataka o koya ni marau dina e okati kina noda kilai Jiova kei na noda kila nona inaki tawamudu, vaka kina noda raica na vakavatukanataki ni parofisai e so ena iVolatabu. Se e vei ga era na lesi kina na gonevuli oqo, e rawa nira vakila tu ga na marau dina ke ra mata mamarau tiko ga. E vakayaloqaqataki ira na lewenikalasi o Brother Pierce mera dau vakananuma na vinaka i Jiova, me dei tale ga e lomadra kei na nodra vakasama mera na cakava tiko ga na loma ni Kalou. (Same 77:12) Ke tu vei ira na rai dodonu, ra qai yaloqaqa tiko ga, era na vosota rawa na veika dredre cava ga e basika.

Oti, era sa qai rogoca na lewenikalasi na nodrau vosa ni tatau e rua na qasenivuli erau a tuberi ira tiko e veisiga. “O Via Dokai?” Oqori na taro a taroga o Lawrence Bowen ena ulutaga ni nona vunau. Vei ira e levu, oqo e okati kina nodra rogo, rokovi, kei na nodra vakacerecerei. Ia, e duatani na nona rai na daunisame o Esafa. E vakaraitaka o koya ni ka dokai dina duadua ga me dua erau veivolekati sara kei Jiova. (Same 73:​24, 25) Era uqeti na gonevuli mera qarauna me qaqaco tiko ga nodra veiwekani kei Jiova. Ena rawa ga oqo kevaka era vulica tiko ga vakatitobu na iVolatabu. Era ‘gadreva na agilosi mera dikeva’ vakamatailalai na veika e vauca na inaki i Jiova ena vuku i Karisito. (1 Pita 1:​12) Era via kilai Tamadra ena kena levu era rawata me rawa kina nira vakaraitaka tale ga na nona lagilagi. Oti, sa qai uqeti ira na gonevuli o Brother Bowen mera dokai Jiova ena vanua era na kaulotu kina ena nodra vukei ira na kena lewenivanua mera kunea na iyau talei dina.

E qai tinia na imatai ni iwasewase ni vunau na vunivola ni koronivuli, o Wallace Liverance. E nona ulutaga, ‘Tukuna na Vuku ni Kalou a Vunitaki Tu.’ (1 Korinica 2:​7, VV) Na cava sara mada na vuku ni Kalou e cavuta na yapositolo o Paula ena gauna a kaulotu voli kina? Oqo na sala uasivi duadua ena kauta mai kina na vakacegu kei na duavata e lomalagi, vaka kina e vuravura, na Kalou qaqa o Jiova. E uto sara ga ni vuku oqo o Jisu. E sega ni lai vunautaka voli o Paula na vakavinakataki ni bula raraba ena gauna oya. E vukei ira ga na lewenivanua mera kila na ka ena cakava na Kalou me vakadodonutaka kina na ca e sa mai basika ena vuku ni ivalavala ca i Atama. (Efeso 3:​8, 9) E kaya vei ira na vakarorogo o Brother Liverance: “Ni vakatotomuri Paula mada ga ena nomuni vakayagataka nomuni ilesilesi dokai ni veiqaravi mo ni tukuna yani kina na sala ena vakayacora kina o Jiova na nona inaki.”

Oti oya, sa qai liutaka o Mark Noumair, e dua tale ga na qasenivuli e Kiliati, e dua na veivosaki bulabula kei na so na lewenikalasi. E vakabibitaka ena nona ulutaga na veivosa i Paula e volai ena Roma 10:​10, “Era iTalatala Yaloqaqa o Ira Era Dau Vulica na Vosa ni Kalou.” Ra vakamacalataka na lewenikalasi na veika era sotava ena cakacaka vakavunau donuya na gauna era mai vuli tiko kina. E macala mai na veika era tukuna ni kevaka eda vulica na Vosa ni Kalou da qai vakananuma, ena qai tara na lomada na veika uasivi me baleti Jiova na Kalou kei na nona matanitu, ena uqeti keda meda kacivaka. Ena vula lima era mai tiko kina ena Watchtower Educational Center, era tauyavutaka kina e 30 vakacaca na vuli iVolatabu. Oqo ena yalava e sa wasoma mada ga na nodra vunau voli kina na ivavakoso era tu voleka e kea.

Rogoci Nodra iVakasala na Matua

Era vakila tale ga na gonevuli na yaga ni nodra veimaliwai kei ira na lewe i Peceli mai Mereke. E rua na lewe ni valenitabana mai Mereke, o Robert Ciranko kei Robert P. Johnson erau vakatarogi ira e vica era sa qaravi Jiova tu mai vakabalavu ena yalodina, okati kina e so na ivakatawa dauveilakoyaki era lai tiko tale ga ena dua na nodra vuli ena Watchtower Educational Center. O ira kece na vakatarogi oqo era a vuli kece ga e Kiliati, ra daukaulotu tale ga ena dua na gauna. E veivakadeitaki dina vei ira na mai vuli oqo, vei ira nodra vuvale, kei ira nodra itokani, na nodra rogoca na nodra ivakasala na turaga matua vakayalo era vakatarogi.

Oqo e so na nodra ivakasala: “Ni vakaogai kemuni ga ena cakacaka vakaitalatala kei na ivavakoso.” “Ni biuti kemuni ena kedra ituvaki na lewenivanua. Ni kua vakadua ni guilecava ni o ni daukaulotu, ni okata nomuni ilesilesi me sa nomuni vanua.” E kilai mai na so tale na ivakamacala ni veituberi e Kiliati e sa vakarautaki ira vinaka na italatala ena cakacaka vinaka, veitalia se vanua cava era lesi kina. Oqo e vica vei ira na ivakamacala: “Keimami vulica na duavata, na cakacaka vata.” “E vukei keimami na koronivuli me keimami ciqoma na ivakarau ni bula vou.” “Keimami vakavulici me keimami vakayagataka na iVolatabu ena dua tale na kena ivakatagedegede.”

Sa qai vosa ena ulutaga levu ni porokaramu o John E. Barr, e dua sa lewe ni iLawalawa Dauvakatulewa tu mai vakabalavu. E vosa o koya ena ulutaga, “Sa Yaco na Nodra Vosa ki na i Yalayala kei Vuravura.” (Roma 10:​18, VV) Sa ra cakava rawa tiko beka na itavi levu oqo na tamata ni Kalou ena gauna oqo? Me qai sega! Ena yabaki 1881 sara era a tarogi kina na dauwili Vale ni Vakatawa: “O vunau tiko?” Sa qai kauta lesu tale o Brother Barr na nodra vakanananu na vakarorogo tiko ena kaci vakairogorogo a vakayacori ena soqo ni tikina ni 1922 e Cedar Point, Ohio, Mereke: “Kacivaka na Tui kei na Nona Matanitu!” Toso o gauna, ia e toso vata kei na nodra yalogu na dauveiqaravi yalodina ni Kalou mera kacivaka yani na itukutuku uasivi ni Matanitu ni Kalou ina veivanua kece ga. Ena ivola kei na vosa, sa yaco yani kina na itukutuku vinaka ina iyalayala kei vuravura​—oqo me dokai, qai vakalagilagi ga kina o Jiova. Sa qai tinia o Brother Barr ena nona vakayaloqaqataki ira na gonevuli mera kua ni guilecava nira na vakalougatataki. E kaya: “Ena veisiga, ni o masu vei Jiova ena vanua o sa na lesi kina, vakavinavinakataki koya mai vu ni lomamu ni o bau vakaitavi ena vakayacori ni veivosa oqo, ‘Sa yaco na nodra vosa ki na i yalayala kei vuravura.’ ”

Oti na vunau oqo, sa ra qai wiliki na ivola ni vakanuinui vinaka, solia sara na jeameni na nodra sitivikiti na gonevuli. Ena yalomarau salavata beka kei na yaloluluvu nira sa vakarau biuta na nodra koronivuli lomani, sa qai lako mai e dua na nodra mata na gonevuli me mai wilika na ka era sa nakita dei. Era vola ina iLawalawa Dauvakatulewa kei na vuvale e Peceli na nodra sa nakita dei mera vakacaucautaki Jiova “mai na gauna oqo ka sega ni mudu.”​—Same 115:18.

Sa noda masu nira na lai marautaka o ira era se qai vuli oti oqo na nodra itikotiko vou, era na lai vuavuaivinaka tale ga ena nodra vunautaka na itukutuku vinaka e vuravura raraba, me vaka ga era a vakayacora o ira era sa tuberi oti e Kiliati ena rauta ni 60 na yabaki sa oti.

[Kato ena tabana e 23]

VEIKA ME BALETA NA KALASI

Vanua era cavutu mai kina: 12

Vanua era lesi kina: 16

Levu ni gonevuli: 48

iVakatautauvata ni nodra yabaki: 34.4

iVakatautauvata ni yabaki ena dina: 17.6

iVakatautauvata ni yabaki ena cakacaka vakaitalatala vakatabakidua: 13.5

[iYaloyalo ena tabana e 24]

Nodra Tuvaitutu na Kalasi 114 ni Watchtower Bible School of Gilead

E nabataki na iyatu me tekivu mai liu me yaco i muri, e tuvai na yaca me tekivu mai na imawi me gole ina imatau.

(1) Rosa, D.; Garrigolas, J.; Lindström, R.; Pavanello, P.; Tait, N. (2) Van Hout, M.; Donabauer, C.; Martínez, L.; Millar, D.; Festré, Y.; Nutter, S. (3) Martínez, P.; Clarke, L.; Maughan, B.; Fischer, L.; Romo, G. (4) Romo, R.; Eadie, S.; Tuynman, C.; Campbell, P.; Millar, D.; Rosa, W. (5) Lindström, C.; Garrigolas, J.; Markevich, N.; Lindala, K.; van den Heuvel, J.; Tait, S.; Nutter, P. (6) Maughan, P.; Pavanello, V.; Eadie, N.; West, A.; Clarke, D.; Markevich, J. (7) Fischer, D.; Donabauer, R.; Curry, P.; Curry, Y.; Carfagno, W.; West, M.; Tuynman, A. (8) Van Hout, M.; Campbell, C.; Festré, Y.; Carfagno, C.; van den Heuvel, K.; Lindala, D.