E Kauti Ira Mai e Kiliati na Yalo ni Cabori Ira

E TAUYAVU na Watchtower Bible School of Gilead me vakavulici ira na tagane kei na yalewa mera veiqaravi vakadaukaulotu e vanua tani. O cei era tauri e Kiliati? O ira ga era cabori ira.(Same 110:3) E laurai oqo ena 8 Sepiteba, 2001, nira tuvaitutu na ika111 ni kalasi.

E so vei na gonenivuli ena kalasi oqo era sa biuta oti na nodra vuvale, itokani, kei na nodra vanua mera veiqaravi ena vanua e gadrevi vakalevu kina na veivuke. Nira cakava oya, era vakatovolea kina se rawa nira veiveisautaka nodra bula mera bula rawa kina ena dua tale na vanua. Kena ivakaraitaki, erau a veisautaka nodrau bula o Richer kei Nathalie me rau toki i Bolivia, o Todd kei Michelle i Dominican Republic, vaka kina o David kei Monique ina dua na vanua e Esia me rau lai vakatetea kina itukutuku vinaka ni Matanitu ni Kalou. E so tale na gonevuli sa ra veiqaravi mai Nicaragua, Ecuador, kei Albania.

A uqeti o Christy me vulica na vosa vakasipeni ena sekeneri, e vukei koya me lai veiqaravi me rua na yabaki e Ecuador ni bera ni vakamau. E so era lewena na ivavakoso e nodra vanua e dua tani na kena vosa. E dua tani na ka erau sotava o Saul kei Priscilla, ni rau vakaraitaka na yalo ni cabori rau me rau vakavinakataka nodrau vosa vakavalagi ni bera ni rau mai vuli.

E lekaleka ga na 20 na macawa ni vuli daukaulotu. Sa siga ni tuvaitutu, ra qai maliwai ira na gonevuli na nodra itokani kei na nodra vuvale nira vakarorogo matua ena ivakasala kei na vosa ni veivakayaloqaqataki.

A jeameni ni porokaramu o Theodore Jaracz, a lewe ni ikavitu ni kalasi ni koronivuli e Kiliati, sa lewe tiko ni iLawalawa Dauvakatulewa ni iVakadinadina i Jiova. Me vaka e dua na isoqosoqo, e dolava nona vosa ni kaya, ni se sega vakadua ni tiva tani ena kena inaki, oya mera vakavulici na gonevuli e Kiliati mera vunautaka na itukutuku vinaka ni Mataniti ni Kalou ena vuravura raraba.(Marika 13:10) E vakaiyaragitaki ira na gonevuli qo o Kiliati mera vakaitavi vakalevu cake ena vunau ni vakatauvatani e liu, ra qai lesi ena veiyasa i vuravura e gadrevi vakalevu kina na daukaulotu. E vakauqeti ira o Brother Jaracz mera vakayagataka vinaka na veika era vulica e Kiliati nira tomani ira na daukaulotu sa ra veiqaravi rawa tu ena 19 na vanua.

iVakasala Taudonu Vei Ira na Tuvaitutu

A so tale na ivunau. O William Van De Wall, e lewe ni komiti ni tabana e Mereke, e vosa ena ulutaga “Daukaulotu Yalogu​—iVakatakilakila ni Lotu Vakarisito Dina.” E vakabibitaka na itavi ni ‘veivakalotutaki’ ena Maciu 28:19,20, qai uqeti ira na gonevuli: “Vakatotomuri Jisu ena nona mamakutu qai daukaulotu ena yalogu.” A vukei ira na dakaulotu mera na gu tiko ga ena cakacaka, ni kaya: “Muria e dua na ituvatuva vinaka; dau vuli vakataki iko, kila na toso ni isoqosoqo; kua ni guilecava na vuna o lesi kina.”

E vosa tarava o Guy Pierce, e lewe ni iLawalawa Dauvakatulewa. E vakamacalataka na ulutaga “Dou Vakasama Tiko ga Vakatitobu.” (Roma 12:1,NW) E vakasalataki ira na lewe ni kalasi qai uqeti ira mera vakayagataka na kaukaua soli vakalou mera vakasama kina vakavinaka. E kaya: “Ni vakasamataka vakatitobu na ka e kaya o Jiova ena nona vosa. Ena taqomaki kemuni.” (Vosa Vakaibalebale 2:11) E vakauqeti ira talega o Brother Pierce mera kua ni dau yalodua ni rawa ni tarova nodra “vakasama vakatitobu.” Ena yaga dina na ivakasala oqo nira sa na daukaulotu.

Tomana o jeameni ni kacivi Lawrence Bowen, e dua vei ira na qasenivuli e Kiliati, me vosa ena ulutaga “Vakadeitaka Mo Kua ni Kila e Dua na Ka.” E dusia ni salavata kei na nona cakacaka vakadaukaulotu ma Korinica, na yapositolo o Paula a ‘vakadeitaka me kua ni kila e dua na ka, o Jisu ga, e lauvako ena kauveilatai [se, “kaunirarawa,” NW].’ (1 Korinica 2:2, VV] E kila o Paula ni yalotabu, na igu kaukaua ni duadua ena lomalagi kei na vuravura e cuqena tiko na itukutuku e usutu tiko ni iVolatabu: na vakadinadinataki ni dodonu ni veiliutaki i Jiova ena vuku ni kawa yalataki. (Vakatekivu 3:15) Era uqeti na 48 na gonevuli mera vakataki Paula kei Timoci mera daukaulotu vinaka, ra qai kabita na “[i]vakarau ni vosa dina.”​—2 Timoci 1:13.

“Vakavinavinakataka Nomu iTavi Dokai, e iSolisoli ni Kalou,” e ulutaga ni otioti ni vica na vunau e dolavi kina na porokaramu. O Wallace Liverance, na vunivola e Kiliati, a vukei ira na tuvaitutu mera kila ni nodra yaco mera daukaulotu e ivakaraitaki ni loloma ni Kalou, e sega ni dodonu ga me nodra ilesilesi, se nira sa rawata ga. Ni vakayagataka na ivakaraitaki Paula, e kaya o Brother Liverance: “O Jiova a sega ni digitaki Paula me yapositolo ina veivanua baleta ni tamata daucakacaka, me nanumi kina ni sa dodonu ga me digitaki ina ilesilesi oya. A sega tale ga ni vakatau ena nona yabaki se levu ni ka e kila. Ena rai vakatamata, de a dodonu beka me nei Panapasa na madigi. A sega tale ga ni vakatau ena vosa, ni gusumacala cake o Apolosa mai vei Paula. E ivakaraitaki ni loloma i Jiova.” (Efeso 3:7,8) E vakauqeti ira na gonevuli o Brother Liverance mera vakayagataka nodra isolisoli, se veiqaravi mera vukei kina e so tale mera itokani ni Kalou ra qai ciqoma na “[i]solisoli walega ni Kalou na bula tawamudu, ena vuku i Jisu Karisito na noda Turaga.”​—Roma 6:23.

E tarava o Mark Noumair, e dua tale na qasenivuli e Kiliati, e liutaka na veivosaki bula kei ira e so na gonevuli ena ulutaga “Dauvuavuaivinaka na Vakavakarau.” (Vosa Vakaibalebale 21:5) Nodra ivakamacala e vakaraitaka ni kevaka e vakavakarau vinaka e dua na italatala, vakabibi me vakarautaka na lomana, ena lomani ira na tamata. Ena kila na ka e kaya. Ena kaya qai cakava na ka e veitaraicake vakayalo. “Oqo na ka e vinakati vua e dua me daukaulotu vinaka kina,” e dusia o Brother Noumair, ni vakayagataka nona ivakaraitaki ni daukaulotu tu mai Aferika.

Kaulotu​—Cakacaka Veivakacegui

O Ralph Walls kei Charles Woody erau vakatarogi ira e so na daukaulotu matua era tiko tale ga ena Patterson Educational Center ena dua na vuli. Na veitarotarogi e vakaraitaka ni nodra lomani na tamata e vakavureki ena cakacaka vakadaukaulotu. E vakayaloqaqataki ira na gonevuli, nodra vuvale, kei na nodra itokani nira rogoca vei ira na daukaulotu matua oqo na veivakacegui ni veiqaravi vakadaukaulotu.

O John E. Barr, e lewe tale ga ni iLawalawa Dauvakatulewa, nona na vunau lavotaki, e kena ulutaga “Dou Seretaka Vei Jiova na Sere Vou.” (Aisea 42:10) E vakaraitaka o Brother Barr ni vosa “na sere vou” e basika vakaciwa ena iVolatabu. E taroga, “Na sere vou ni cava qo?” E qai sauma: “Na veitikina wavolita e dusia ni seretaki na sere vou baleta na veika vouvou e vauca na veiliutaki i Jiova.” E vakauqeti ira na gonevuli mera duavata ni lagata na nodra vakacaucautaka na Matanitu ni Kalou qaqa ena veilutaki ni Tui e Mesaia, o Karisito Jisu. E vakamacalataka o Brother Barr ni veika era vulica e Kiliati ena vukei ira mera kila vinaka na veika e vauca na “sere vou.” “E vakabibitaka na koronivuli ni gadrevi mo ni ‘lagata’ vata kei ira na mataveitacini ena vanua oni lako kina na veivakacaucautaki vei Jiova; saga mo ni dau veiyaloni kei ira ena nomuni ilesilesi.”

Nira taura nodra ivola na gonevuli, sa qai wilika e dua ena kalasi na nodra ivola ni vakavinavinaka ni vuli e Kiliati.

O rawa ni vakalevutaka nomu veiqaravi vua na Kalou, me vuavuaivinaka? Ke vaka kina, mo sasaga vagumatua, me vakataki ira ga na gonevuli sa ra tuvaitutu oqo. Oqo na ka e vukei ira mera daukaulotu. E vakilai na marau ni dua e cabori koya ena cakacaka ni Kalou.​—Aisea 6:8.

[Kato ena tabana e 25]

VEIKA ME BALETA NA KALASI

Vanua era cavutu mai kina: 10

Vanua era lesi kina: 19

Levu ni gonevuli: 48

iVakatautauvata ni nodra yabaki: 33.2

iVakatautauvata ni yabaki ena dina: 16.8

iVakatautauvata ni yabaki ena cakacaka vakaitalatala vakatabakidua: 12.6

[iYaloyalo ena tabana e 26]

Nodra Tuvaitutu na Kalasi 111 ni Watchtower Bible School of Gilead

E nabataki na iyatu me tekivu mai liu me yaco i muri, e tuvai na yaca me tekivu mai na imawi me gole ina imatau.

(1) Yeomans, C.; Toukkari, A.; Nuñez, S.; Phillips, J.; Dawkin, M.; Silvestri, P. (2) Morin, N.; Biney, J.; López, M.; Van Hout, M.; Cantú, A.; Szilvassy, F. (3) Williams, M.; Itoh, M.; Van Coillie, S.; Levering, D.; Fuzel, F.; Geissler, S. (4) Yeomans, J.; Moss, M.; Hodgins, M.; Dudding, S.; Briseño, J.; Phillips, M. (5) López, J.; Itoh, T.; Sommerud, S.; Kozza, C.; Fuzel, G.; Moss, D. (6) Williams, D.; Dudding, R.; Geissler, M.; Morin, R.; Biney, S.; Cantú, L. (7) Dawkin, M.; Hodgins, T.; Levering, M.; Silvestri, S.; Van Hout, D.; Briseño, A. (8) Van Coillie, M.; Nuñez, A.; Kozza, B.; Sommerud, J.; Toukkari, S.; Szilvassy, P.