Tukutuku Mai Na Daukacivaka Na Matanitu

Vakasuasuataki na Sore ni Ka Dina e Chile

ENA vanua dravuisiga ena vualiku kei Chile, e dau sivi e vica na yabaki qai tau na uca. Ia na gauna me sa tau kina na uca, era veisau na vanua dravuisiga qai veivatuvatu ni sa ubia na veisenikau duiroka. Na ituvaki rairai totoka oqo e dau dreti ira vakalevu na saravanua mai na veiyasa i Chile kece.

Ia, e dua tale na ka veivakauqeti e sa yaco tiko vei ira na tamata e Chile. Na wai ni ka dina ena iVolatabu sa drodrova tiko na veivanua kece, ra qai levu na tamata yalodina sa ra “se” mera tisaipeli i Jisu Karisito. Dua na sala e vakayagataki me vakatetei kina na wai ni ka dina oya na talevoni. Na ivakaraitaki e vica oqo era vakaraitaka na kena yaga na iwalewale ni vunau oqo.

• E dua e dau cakacaka vakaitalatala vakatabakidua na yacana o Karina, a kerei me vakaraitaka ena dua na porokaramu ni soqo ni tabacakacaka na kena vakayagataki na talevoni ena vunau. O Karina mada ga e se bera vakadua ni vakaitavi ena mataqali cakacaka vakavunau vaka oqo. Me vakayaloqaqataki me rawa ni vakaitavi ena porokaramu ni soqo, a lako mai vua e dua na qase kei na watina me ratou mai raica vata e so na sala me vakayagataki kina na talevoni ena vunau. Rau vakauqeti koya tale ga me masuta na veidusimaki i Jiova. E cakava vaka kina mani vakadeitaka me na tovolea.

A digitaka o Karina e dua na naba ni talevoni mai na dua na koro voleka. A sauma mai o koya e dauqarava na talevoni, qai vakamacalataka o Karina na inaki ni nona qiri. E sauma lesu tale mai vakavinaka o koya e dauqarava na talevoni, mani tuvai me rau veivosaki tale ni oti e tolu na siga. Na veisikovi lesu ena talevoni e lai tini sara ina vuli iVolatabu ena kena vakayagataki na brochure Na Cava e Loma ni Kalou Vei Keda? Mai na gauna oya, rau sa dau marautaka na nodrau vuli qai dau vakauta o Karina na ivola mera saumi kina na taro e dau taroga na marama oya.

• O Bernarda a vunau vua e dua na turaga ena nona qiriti koya cala mai. A sega ni cudru ni a vakasosani, ia mani vakamacalataka ga o Bernarda ni o koya e dua vei ira na iVakadinadina i Jiova qai vakaraitaka nona via vukei koya. E tekivu e dua na veitalanoa, qai vakarorogo vinaka sara na turaga oqo ena nona vakamacalataka na ka ena cakava na Matanitu ni Kalou me kauta tani na lewa ca. E solia nona naba ni talevoni vei Bernarda na turaga oqo, sa qai dau veisikovi lesu o Bernarda ena talevoni. Ena dua na gauna rau veitalanoa kina, a mani wilika vua e dua na tikina mai na ivola Na Ka Mo Kila Mo Bula Tawamudu Kina. E kerea me dua na nona ilavelave, mani vakauta vua o Bernarda e dua na ilavelave kei na iVolatabu. E tuvanaki me sikovi koya e dua na tacida tagane. Sa tomana tiko na tacida oya na kena “vakasuasuataki” na “kau” bulabula oqo.

Io, ena qele mamaca vakayalo ni vuravura oqo, e levu na sore ni itei era waraka tu mera kadre ni yacovi ira yani na wai dausoli bula ni ka dina. Udolu era a karamaca tu era sa mai “tubu” ra qai “se” mera dauveiqaravi yalodina i Jiova na Kalou.​—Aisea 44:​3, 4.