Kakaburaki e Dua na Vuniwainimata

Erau semati vakacava nona sasaga e dua na vuniwainimata mai Lviv e Ukraine, kei na tauyavu ni dua na ivavakoso vosa vakarusia ni iVakadinadina i Jiova mai Haifa, e Isireli, rauta ni 2,000 na kilomita na kena yawa qai ulabaleta e vica vata na vanua? Na italanoa oqo e vakaraitaka na dina ni ka e tukuna na iVolatabu ena Dauvunau 11:6: “E na mataka mo kaburaka na nomu sila, ia e na yakavi me kakua ni cegu na ligamu: ni ko sa sega ni kila se cava vei rau ena yaco.”

E TEKIVU na noda italanoa ena 1990 ni vakaitikotiko voli e Lviv o Ella, e dua na marama sa uabula toka e tikitiki Jiu. Sa ratou vakavakarau tiko o Ella kei na nona vuvale me ratou toki i Isireli. Ni bera nodratou toki, e lako me lai laurai vua e dua na vuniwainimata, e iVakadinadina i Jiova. Ena gauna vata oya e vakatabui tu kina nodra cakacaka na iVakadinadina i Jiova mai Ukraine. Ia e sega ni tu vakasuka na vuniwainimata oqo me wasea vei Ella na nona vakabauta e yavutaki ena iVolatabu. E kidacala o Ella ni tukuna vua o vuniwainimata ni Kalou e tiko na yacana. E vaqaqa sara ga o Ella, rau mani veivosaki vinaka kina ena iVolatabu.

Na levu ni nona taleitaka o Ella na nodrau veivosaki, e kerea kina vua na vuniwainimata me rau veivosaki tale ena macawa e tarava, qai kerea me dua tale ni oti oya. Sa tataleitaki sara tiko o koya, ia e dua ga na leqa. Sa totolo sara tiko mai na gauna me ratou toki kina vakavuvale i Isireli. E se levu na ka e vinakati vei Ella me vulica! Me vakayagataki vinaka na gauna lekaleka sa vo, e kerea kina o Ella me vuli iVolatabu e veisiga me yacova sara ni sa toki. Dina ga ni sega ni lai tomana o Ella nona vuli ena gauna e tadu kina i Isireli, ia sa vakawakana toka na sore ni ka dina e lomana. Ni mai voleka ni cava na yabaki, sa qai tekivu vulica tale vagumatua o Ella na iVolatabu.

E kacabote na ivalu ena toba o Perisia, qai bololaki Isireli o Iraki ena gasau vuka. E ka ni veitalanoa na ivalu oqo. Ena dua na siga, ena loma ni dua na sitoa levu, e rogoca sara o Ella na nodratou veitalanoa tiko e dua na vuvale eratou lako mai Rusia, eratou se qai toki vou ga mai. Dina ga ni se vuli iVolatabu tiko o Ella, ia e torovi iratou na vuvale oqo qai wasea vei iratou na vosa ni yalayala e yavutaki ena iVolatabu me baleta e dua na vuravura sautu. Ratou mai vulica kece kina vakavuvale kei Ella na iVolatabu, na budratou, o Galina; vaka kina o Natasha na tinadrau na gone; na luvena tagane o Sasha (Ariel); kei Ilana na luvena yalewa.

E imatai ni lewenivuvale oqo me papitaiso o Sasha, dina ga ni sotava kina e levu na veivakatovolei. Dina ni gone ivakaraitaki vinaka, e taleitaki qai rokovi, ia a vakatalai tani ga mai koronivuli baleta ni sega ni vakadonuya nona lewaeloma vakarisito me vakaitavi ena vuli sotia, e dua na tiki ni lesoni me vulici e koronivuli. (Aisea 2:​2-​4) E kau cake sara ina mataveilewai levu e Isireli na kisi oqo nei Sasha, qai vinaka ni vakarota na mataveilewai me vakalesui tale o Sasha e koronivuli me rawa ni vakacavara vinaka nona vuli. E kuruseta na vanua taucoko o Isireli na kena itukutuku. Sa ra qai mai kila tale ga kina e levu na lewenivanua e Isireli na ka era vakabauta na iVakadinadina i Jiova.a

Ni oti nona tuvaitutu o Sasha ena koronivuli torocake, sa tekivu sara ena cakacaka vakaitalatala vakatabakidua ni iVakadinadina i Jiova. Nikua sa dua o koya na painia lavotaki, e qase tale ga ni ivavakoso. Sa tomani koya tale ga na ganena o Ilana ena cakacaka vakaitalatala vakatabakidua. Sa papitaiso tale ga o Natasha na tinadrau, kei Galina, na budrau. Se vua tiko ga na sorenikau a bucina na vuniwainimata!

E toso tale tiko ga vakayalo o Ella, sega ni dede sa tekivu me vunau e veivale. Rau sota sara kei Faina, e se qai yaco ga mai Ukraine, ena imatai ni vale e vunau kina. E dau lomabibi o Faina. E qai kila e muri o Ella ni marama dau lomabibi oqo e se qai oti toka ga nona masu vua na Kalou: “Au sega ni kila se o cei o kemuni, ia ke oni rogoci au, mo ni vukei au.” Dua na veitalanoa vinaka rau cakava kei Ella. Dua na ka na levu ni nona vakatataro o Faina, qai vakasamataka sara vakavinaka na kena isau. Yaco na gauna me sa vakadinata nira vakavulica tiko na iVakadinadina i Jiova na ka dina mai na iVolatabu. Veisautaka o koya na nona porokaramu ni vuli ena univesiti, me rawa ni levu nona gauna e vakayagataka ena ivavakoso kei na cakacaka vakavunau. E papitaiso o Faina ena Me 1994. Sa tekivu cakacaka vakapainia sara o koya, qai cakacaka toka vagauna ena tabana ni kompiuta me rawa ni vukei koya vakailavo.

Ni cakacaka vakavunau tiko ena Noveba 1994, e vakila vakasauri o Ella ni sa malumalumu mai na yagona. Ni lai dikevi e valenibula e laurai ni tauvi koya na bodra ni wawa. Ena kena yakavi ni siga tiko ga oya, sa lutu sara ena 7.2 na ivakarau ni nona dra. Sa qai vakarautaka vei ira na vuniwai e dua na qase ni ivavakoso e lewena tiko o Ella, na itukutuku ni mataqali veiqaravi vakavuniwai e tu e sega ni vakayagataki kina na dra. E jeameni tale tiko ga o koya ni Komiti Veitaratara kei na Valenibula.b E mani caka vei Ella na veisele e sega ni vakayagataki kina na dra, qai vakavuna nona bula vinaka tale.​—⁠Cakacaka 15:​28, 29.

E druka sara vakalevu na nodra vuniwai na marama e qaravi Ella tiko, o Karl, e Jiu ia e sucu mai Jamani. E nanuma lesu o Karl ni o rau na nona itubutubu, erau bula ena veivakararawataki ena gauna i Itala, erau kilai ira na iVakadinadina i Jiova ena keba ni veivakararawataki. E vakataroga o Karl e levu sara na taro. Dina ni osooso vakalevu o Karl ena nona cakacaka vakavuniwai, ia e dau biuta vakatikitiki na gauna me vulica kina vakawasoma na iVolatabu. Ena yabaki ga e tarava sa tekivu tiko ena soqoni vakarisito e dau caka e veimacawa.

Na cava sa yaco ena sorenikau a kaburaka na vuniwainimata? Eda sa raica oti na ka e yaco vei Sasha kei na nona matavuvale. O Ella, e sa mai painia lavotaki sara. Na luvena yalewa o Eina, e se qai biu vuli ga, sa tekivu tale ga me tadolova na cakacaka vakapainia. Sa painia lavotaki tale ga o Faina. O Karl, na nodra vuniwai na marama a qaravi Ella, sa dua o koya na iVakadinadina papitaiso, e italatala dauveiqaravi tale ga, sa wasea tiko na mana ni ka dina ena iVolatabu vei ira e qarava vakavuniwai.

Na ilawalawa vulagi lailai oqo era vosa vakarusia, era a mai lewe tu ni ivavakoso vosa vakaiperiu e Haifa, ia nikua, sa mai tauyavu sara e dua na ivavakoso vosa vakarusia gugumatua qai sivia na 120 na kena dautukutuku ni Matanitu ni Kalou. E vu vakatikina na tubu oqo ena nona saga na vuniwainimata mai Lviv me kakaburaki!

[iVakamacala e ra]

[Mape ena tabana e 29]

(Raica tale na ivola)

UKRAINE

ISIRELI

[Credit Line]

Mountain High Maps® Copyright © 1997 Digital Wisdom, Inc.

[iYaloyalo ena tabana e 30]

Ella kei luvena yalewa, o Eina

[iYaloyalo ena tabana e 31]

Na ilawalawa mamarau ni iVakadinadina vosa vakarusia e Haifa. Mai na imawi ina imatau: Sasha, Ilana, Natasha, Galina, Faina, Ella, Eina, kei Karl