Veika Erau Sotava ni Rau sa Yada

O SANDRA e dua na yada e vakaitikotiko mai Ositerelia. Nona mate o watina ena vica na yabaki sa oti a vakidacalataki Sandra sara ga. “Au luvuci ena rarawa levu ena nona mai yali na noqu daulomani qai itokani vinaka duadua. Au sega mada ga ni nanuma seu a yaco vakacava i vale ena noqu biubiu mai valenibula se na veika au a vakayacora ena vo ni siga oya. Ena vica na macawa e tarava, na levu ni noqu lomanuiqawaqawa sa lai vakavuna kina me momosi tu ga na yagoqu.”

O Elaine e dua na itokani i Sandra, e qase cake vua qai yada voli mai ena ono na yabaki. O Elaine a qaravi watina tiko o David, e tauvi kenisa, ena ono na vula ni bera ni mate. E tarasui dina na nona rarawa, ni sega ni dede ga na mate i watina e vakila ni vaka me sa mataboko mai. Oti tale e rua na yabaki a matabuto ena matanalevu. A sega ni kunea rawa vua o nona vuniwai e dua na mate. Ia, e dikeva rawa ni a kubuta lo voli ga o Elaine na nona rarawa, mani vakatura kina me lesu i vale qai saga vakaukaua me tagi. “A taura na gauna me qai seavu na noqu rarawa,” a kaya o Elaine, a qai tukuna ni gauna e galili kina, “Au dau lako sara ga ina rumu ni moce meu lai ubia tu na uluqu ena isulu i David.”

Io, ni mate na nona daulomani e dua, e levu na ivakarau ni yalo e vakatubura mai. Ni sa yada e dua e sega ni vakaibalebaletaka wale ga ni sa mate o watina, ia e vauci kina e levu tale na ka. O Sandra, me kena ivakaraitaki, e vaka me veilecayaki ni sega ni vakila tu na veika e cakava. Me vakataki ira e mositi ira na nodra se qai yada wale tiko ga oqo, a vakila tale ga o koya ni dau vakamuai rawarawa qai sega ni dei na lomana. A nanuma lesu o Sandra: “Sa dau matau ga me qai nei watiqu na iotioti ni vakatulewa, ia vakasauri ga au sa mai tiko taudua meu qai vakatulewataka ga na ka. Au dau moceyadrayadra. Au oca qai wawale. E dredre dina meu kila na ka meu cakava.”

Ena veisiga e dau sotavi ena vuravura raraba na ituvaki e tautauvata kei na kena erau sotava o Sandra kei Elaine. Na tauvimate, vakacalaka, ivalu, veilabalabati vakayavusa, kei na ivakarau kaukaua ena kena basoga kece ga, e vakavuna me tubu na kedra iwiliwili na yada.a E vuqa vei ira na marama oqo era kubuta lo tu ga na nodra rarawa, nira sega ni kila na cava mera cakava. Era na veivuke rawa vakacava na nodra itokani kei na wekadra mera vakamatauni ina bula oya? Na ulutaga e tarava e koto kina e so na ivakasala ena yaga sara vakalevu.

[iVakamacala e ra]