“Toro Voleka Yani Vua na Kalou, Ka na Toro Voleka Mai Vei Kemudou Ko Koya”

Veisau na Bula me Vakainaki

E TUKUNA o Sandra, na marama ni Mexico, ni dua o koya e dau murilomana. A sega gona ni dau taleitaki se kauaitaki ena gauna ni nona bula vakaitabagone. A kaya: “Ena noqu bula vagoneyalewa au dau vakila na galili, au dau lomatarotarotaka e Ievu na ka me baleta na noqu bula kei na kena inaki.”

Ni se vuli o Sandra, sa dau tekivu gunuva na waini e maroroya tu o tamana e nodratou. Toso na gauna, sa volia ga na mena qai yaco sara me daumateni. “Sa sega ni vakainaki vei au na bula,” a kaya. Na levu ni nona lomabibi, sa tekivu vakayagataka kina o Sandra na wainimate gaga. E kaya: “Na ka ga e vukei au meu guilecava kina na noqu leqa oya na veika e tawa tu ena noqu kato: e dua na tavaya gunu, so na wainimate gaga, se so na mariwana.”

Ni qai cava nona vuli vuniwai o Sandra, sa ca sara na nona daumateni. A saga me vakamatei koya ga, ia a sega ni rawa.

A sega ni kunea o Sandra ena vuqa na matalotu na veivakacegui vakayalo kei na veikauaitaki. Na levu ni nona yalolailai, a masu vakawasoma kina vua na Kalou ena nona taroga: “Oni sa lako i vei? Na cava oni sega ni bau vukei au kina?” Donuya na gauna e yalo bibivoro tu kina a qai vunau vua e dua na iVakadinadina i Jiova. A yaco sara me vuli iVolatabu. E tarai Sandra sara ga ni mai vulica ni “voleka ko Jiova vei ira sa ramusu na yalodra.”​—Same 34:18.

A vukei Sandra na nona qasenivuli ni vuli iVolatabu me raica ni Kalou o Jiova e kila vinaka tu nida na rawai rawarawa nida sega ni uasivi, e vu mai na kena dewavi keda na ivalavala ca i Atama. Sa qai mai vulica tale ga o Sandra ni kila tu na Kalou nida na sega ni rawata na ivakatagedegede dodonu e vinakata. (Same 51:5; Roma 3:​23; 5:​12, 18) Dua na ka na nona marau ni kila ni o Jiova e sega ni dau vakananuma tale tiko na noda malumalumu, qai sega tale ga ni namaka vakasivia na ka meda cakava. E kaya na daunisame: “Kevaka ko ni sa nanuma, Jiova, nai valavala ca o cei kemuni na Turaga, me na bula rawa?”​—Same 130:3.

E tara sara ga na loma i Sandra na bibi ni ka dina vakaivolatabu me baleta na isoro ni veivoli i Jisu Karisito. Ena yavu ga oqo, e vakadonui ira kina vakayalololoma na kawatamata talairawarawa o Jiova, dina nira ivalavala ca. (1 Joni 2:2; 4:​9, 10) Io, e rawa ni ‘bokoci na noda ivalavala ca’ da qai vukei me kua ni tiko vei keda na nanuma ni sega na keda yaga.​—Efeso 1:7.

E levu sara na lesoni yaga e vulica rawa o Sandra mai na nona ivakaraitaki na yapositolo o Paula. E vakavinavinakataka vakalevu o Paula na nona lomasoli na Kalou me vosota na nona ivalavala ca makawa, kei na nona tokoni koya me saga vakaukaua me rawa na nona malumalumu. (Roma 7:​15-​25; 1 Korinica 15:​9, 10) A vakavinakataka o Paula na ivakarau ni nona bula, ‘a vakamalumalumutaka na yagona, qai vakabobulataka’ me tiko ga kina ena sala e vakadonuya na Kalou. (1 Korinica 9:​27) A sega ni vakatara me vakabobulataki koya na nona gagadre vakayago.

E dau vakacaraki Sandra na nona malumalumu, ia e saqata voli ga. A masuta vagumatua na veivuke i Jiova me valuta rawa kina, qai kerea tale ga na nona yalololoma. (Same 55:22; Jemesa 4:8) Nona vakila o Sandra na veikauaitaki ni Kalou, a vakavuna me veisautaka sara ga na nona bula. E kaya: “Au vakayacora oqo ena noqu cakacaka vakatabakidua.” O Sandra a vukei rau tale ga na tuakana kei na tacina me rau mai kilai Jiova. Ena nona “caka vinaka,” e dau bole me vakayagataka na nona kila vakavuniwai ena nodra soqo ni tikina na iVakadinadina i Jiova.​—Kalatia 6:​10.

Vakacava na veika e dau vakabobulataki koya tu kina o Sandra? A kaya ena nuidei: “Sa savasava na noqu vakasama. Au sa sega ni gunu, vakatavako, se vakayagataka na wainimate gaga. Au sa sega ni bobula kina. Au sa kunea na bula e vakainaki.”

[Tikina bibi ena tabana e 9]

“Au sa kunea na bula e vakainaki”

[Kato ena tabana e 9]

Yaga ni iVakavuvuli Vakaivolatabu

Oqo e so na ivakavuvuli vakaivolatabu e vukea e levu mera sereki mai na veika tawasavasava era a bobula tu kina:

“Me da vakasavasavataki keda mai na dukadukali kecega ni yago kei na yalo, me da ia sara na ka savasava e na rere vua na Kalou.” (2 Korinica 7:1) Na Kalou e vakalougatataki ira era vakasavasavataki ira mai na veika dukadukali, ena nodra biuta tani na veitovo tawasavasava.

“Oqo na rerevaki Jiova me cata na ka ca.” (Vosa Vakaibalebale 8:​13) Nona rerevaka na Kalou mai vu ni lomana e dua, ena vukei koya me biuta tani na nona itovo ca, wili kina na vakayagataki ni wainimate gaga. Oqo ena vakamarautaki Jiova, qai taqomaki koya tale ga mai na veimate rerevaki.

“Dau talairawarawa ki na matanitu kei ira na veiliutaki.” (Taito 3:​1, VV) Ena vuqa na vanua, e sega ni vakatarai vakalawa me taukeni se vakayagataki e so na mataqali wainimate gaga. O ira gona na lotu Vakarisito dina era sega ni taukena se vakayagataka na wainimate gaga ni cala vakalawa.