Tukutuku Mai na Daukacivaka na Matanitu

Vakacegui Nona Gagadre Vakayalo

O SAIPURUSI e dua na yanuyanu e ciri toka ena tokalau vualiku ni dua na tutu ni Wasawasa Levu (Mediterranean Sea). E kilai o Saipurusi ena gauna vakaivolatabu ni levu kina na kopa kei na kauvaro vinaka. Rau a vunautaka kina na itukutuku vinaka ni Matanitu ni Kalou o Paula kei Panapasa ena imatai ni nodrau ilakolako ni kaulotu. (Cakacaka 13:​4-​12) E se vakamawe tu ga edaidai na itukutuku vinaka vei ira e levu na lewe i Saipurusi. E vakadinadinataki oqo vei Lucas, e dua na turaga yabaki 40 vakacaca. E kaya:

“Ena neitou vuvale keitou lewe vitu na veitacini, keitou vakaitikotiko ena neitou vanua ni susu manumanu. Au dau taleitaka na wilivola ena gauna au se gone kina. Au dau taleitaka vakalevu e dua na ilavelave lailai ni iVolatabu Vakirisi Vakarisito. Niu se qai yabaki tini, au a tauyavutaka kei na so na noqu itokani e dua na ilawalawa lailai ni vuli iVolatabu. Sega ni dede sa kasura tale, baleta nira nanuma e so na kena turaga ena koro ni keitou sa vukitani.

“Ena gauna au lai vuli kina i Mereke, au sotava e vuqa na tamata era duidui lotu. E vakabulabulataka tale na noqu taleitaka na ka vakayalo. Levu na gauna au vakayagataka ena vanua ni wilivola ena univesiti meu vulica kina na veimataqali lotu. Au lai lotu tale ga ena veimataqali lotu, ia na sasaga oya e sega ga ni vakaceguya na noqu gagadre vakayalo.

“Au lesu tale i Saipurusi ni sa oti noqu vuli, au lai cakacaka sara vakadairekita ena nodra vanua ni vakadidike na vuniwai. Dau sikovi au tiko yani ena noqu vanua ni cakacaka o Antonis, e dua na kena turaga iVakadinadina i Jiova. Raica toka na isoqosoqo ni lotu Vakirisi (Greek Orthodox Church) na nona dau veisiko tiko yani o Antonis.

“Sega ni dede sa lai raici au yani e dua na daunicioloji, lai tukuna meu sa kua tale ni qai veivosaki kei ira na iVakadinadina i Jiova. A vakavulici vei au niu se gone ni lotu dina ga na lotu Vakirisi, au mai tu suka tale e ke, au muduka tale ga na neirau veitalanoa kei Antonis, ia sa tekivu me keirau veitalanoa vakaivolatabu kei koya na daunicioloji. Au vakasikova e levu na monastiri e Saipurusi. Au lako sara ena vualiku kei Kirisi meu lai sikova na ulunivanua o Athos, ena nodra rai na lotu Vakirisi Vakarisito e vuravura raraba ni oqo na ulunivanua tabu. Ia e se sega ga ni saumi na noqu taro vakaivolatabu.

“Au masuta na Kalou me vakatakila vei au na ka dina. Sega ni dede sa sikovi au tale mai o Antonis ena noqu vanua ni cakacaka, au vakasamataka ni oqo sara ga na isau ni noqu masu. Sa mudu sara ga e ke na noqu veitalanoa kei na daunicioloji oya, sa tekivu me keirau vulica sara na iVolatabu kei Antonis. Toso vinaka sara noqu vuli, au mani papitaiso ena Okotova 1997, niu sa yalataki au vei Jiova.

“Taumada ratou a saqati au o watiqu kei na rua na luve i keirau yalewa erau qase, dua e yabaki 14 kei na dua e yabaki 10. A uqeti watiqu na noqu itovo vinaka, vakavuna sara me lako ina soqoni ena Kingdom Hall. Sa dua na ka nona qoroya na nodra yalovinaka na iVakadinadina kei na nodra veikauaitaki. E qoroqoro vakalevu ena nodra matai ni vakayagataka na iVolatabu. Mani yaco sara me via vulica na iVolatabu kei ira na iVakadinadina i Jiova o watiqu kei rau na luvequ yalewa qase. Vakasamataka na levu ni noqu marau ena nodratou papitaiso ena Soqo ni Tikina “Na Vosa ni Yalayala ni Kalou,” e vakayacori ena 1999!

“Sa qai cegu na lomaqu niu sa kunea na ka dina. Ena gauna oqo keitou sa mai duavata kece vakavuvale ena sokalou savasava vei Jiova, o watiqu kei na va na luvequ.”