Keitou Sega ni Rere ni Tokoni Keitou O Jiova

Talanoataka o Egyptia Petridou

Ena 1972, era soqoni vata mai na iVakadinadina kece i Saipurusi mera rogoca na ivunau lavotaki a vunautaka o Nathan H. Knorr, a liutaka tu na nodra cakacaka na iVakadinadina i Jiova ena dua na gauna balavu. E kilai au vinaka,ni bera mada ga niu vakamacalataki au yani, a taroga: “E dua beka na itukutuku mai Ijipita?” Ena 20 na yabaki yani e liu, au a sotavi Brother Knorr ena noqu koro mai Alexandria, e Ijipita.

AU A sucu e Alexandria ena 23 Janueri, 1914, au qase duadua vei keitou na lewe va na veitacini. Keitou susugi ena vanua e volekata na waitui. E dua na koro levu totoka o Alexandria, kilai levu ena kena ivolatukutuku kei na kena itaratara. Nira dau veimaliwai vakalevu na kaivalagi kei ira na kai Arapea, keimami vulica kina na vosa vakaArapea, vakaValagi, vakaVaranise, vakaItali, kei na vosa vaKirisi.

Ni mai vakacavari noqu vuli, dua sara noqu cakacaka ena vale ni veisisivi sulu vakaVaranise, au dau taleitaka na droinitaka na veimataqali sulu kei na cula na nodra isulu na marama rogo. Au dau lotu qai taleitaka na wili iVolatabu, dina niu sega ni kila na ibalebale ni ka au wilika tiko.

Donuya na gauna qori ena veiyabaki ni 1930, au sotava e dua na cauravou ni Saipurusi o Theodotos Petrides, e dua e kenadau ena veibo. Ia a vulica tale ga na caka loli kei na vavi keke, qai cakacaka ena sitoa ni keke kilai levu ena vanua ya. A vinakati au o Theodotos, dina niu marama lailai toka ga qai ulu loaloa. E dau lagata vei au na sere vaKirisi ni dodomo ena ruku ni noqu katubaleka. Keirau vakamau sara ena 30 June, 1940. A gauna marautaki dina qori. Keirau vakaitikotiko ena tabavale e ra ena itikotiko nei tinaqu. A sucu na neirau ulumatua o John ena 1941.

Kila na Ka Dina ena iVolatabu

Ena dua na gauna, a sega ni lomavakacegu tu o Theodotos ena veika e baleta na neitou lotu, qai dau taroga vakalevu na veika e baleta na iVolatabu. Au sega ni kila ni sa vulica tiko na iVolatabu kei ira na iVakadinadina i Jiova. Dua na siga, niu tiko e vale kei na luvequ, a tukituki sara ena matanikatuba e dua na marama qai solia vei au e dua na tikidua e volai tu kina e dua na itukutuku vakaivolatabu. Ena veidokai wale ga, au mani taura qai wilika sara. A solia tale ga mai e so na ivola vakaivolatabu. Cava tale, ratou tautauvata sara ga kei na ivola e dau kauta mai vale o Theodotos!

“Io, era tiko vei au na ivola qori,” au kaya yani. “Yalovinaka curu mai loma.” Au tekivu tarogi koya sara na iVakadinadina qo o Eleni Nicolaou, ena levu na taro. A vakayagataka na iVolatabu me sauma kina ena yalomalua noqu taro. Au taleitaka sara ga na ka a cakava. Sega ni dede, sa matata vei au na itukutuku ena iVolatabu. Ni mai cegu vakalailai na neirau veitalanoa, a raica sara o Eleni na itaba nei watiqu. Mani kaya: “Au kila na turaga ya!” Au kurabui sara ga, au sa qai kila na ka e dau cakava o Theodotos. E dau gole lo ena soqoni vaKarisito​—qai sega mada ga ni tukuna vei au! Ni yaco mai vale o Theodotos ena yakavi, au tukuna sara vua: “Na vanua o lako kina ena Siga Tabu sa oti​—ena macawa qo daru na lako vata!”

Na imatai ni soqoni au a gole kina, eratou lewe tini ra veivosakitaka tiko na ivola na Maika. Au vulica sara kina e levu na ka! Tekivu mai na siga ya, e rau dau lako yani o George kei Katerini Petraki ena yakavi ni Vakaraubuka kece me keitou lai vuli iVolatabu. Eratou sega ni taleitaka na neirau vuli iVolatabu o tamaqu kei ratou na tuakaqu, ia a sega ni veitusaqati na taciqu yalewa, dina ni a sega ni mai dua na iVakadinadina. Ia, a qai vulica na iVolatabu o tinaqu. Ena 1942, keitou a yalataka neitou bula vei Jiova o Tinaqu, Theodotos kei au, keitou qai papitaiso ena waitui e Alexandria.

Yaco e So na Ka Dredre

A tekivu ena 1939 na ikarua ni Valu Levu, yaco sara na veivaluvaluti. Ena itekitekivu ni veiyabaki ni 1940, era a tiko volekati El Alamein na Turaganivalu ni Jamani o Erwin Rommel kei ira na nona ilawalawa, ra qai levu tu e Alexandria na sotia ni Peritania. Keitou maroroya sara e levu na kakana. Mani tataunaki vei Theodotos e dua na sitoa e volitaki kina na loli kei na veika kamikamica ena taoni o Port Taufiq volekati Suez, e nei nona boso, keitou mani toki sara e kea. Rau lai vaqarai keitou yani e dua na veiwatini e rau vosa vaKirisi. Dina ni rau sega ni kila na vanua keitou vakaitikotiko kina, rau vunau sara e veivale me yacova ni keitou sota.

Ni keirau se tiko ga e Port Taufiq, keirau vakavulici rau o Stavros kei Giula Kypraios ena iVolatabu, vaka kina na luvedrau o Totos kei Georgia, yaco me keitou veitokani voleka sara. Ena nona taleitaka vakalevu o Stavros na vuli iVolatabu, e dau tosoya ena dua na aua e muri na liga ni kaloko me keirau calata kina na iotioti ni sitimanivanua e gole i vale, qai vakavuna gona me keirau tiko tale vakadede. Dau yacova sara na bogi levu na neitou veitalanoa.

Keitou tiko voli e Port Taufiq me 18 na vula, oti keitou qai lesu tale i Alexandria ni tauvimate na tinaqu. A yalodina tiko ga vei Jiova yacova ni mai leqa ena 1947. Keitou vakila tale nona veivakayaloqaqataki o Jiova ena neitou dau veimaliwai kei ira na itokani vakayalo vaKarisito. Keitou dau vakacegui ira tale ga na daukaulotu era gole tiko ena nodra ilesilesi, qo na gauna e kele kina ena wavu e Alexandria na nodra waqa.

Marau kei na Leqa

Ena 1952, a sucu na ikarua ni luvei keirau tagane o James. Me vaka ni keirau itubutubu, keirau kila ni bibi me keirau tuberi rau na gone me rau kila na sokalou savasava vakayalo, keirau mani lomasoli me caka e vale na Vulivola ni iVavakoso, keirau dau sureti ira tale ga na cakacaka tiko vakatabakidua. O koya gona, a taleitaka sara vakalevu na ka dina ena iVolatabu o John, na neirau ulumatua, mani tekivu painia ena gauna se qai yabaki 16 kina. Ena gauna vata qori, e dau lai vuli ena bogi me vakaotia kina na nona vuli ena sekeneri.

Sega ni dede, e tauvi Theodotos e dua na mate ni uto, qai vakasalataki me sa kua ni cakava na cakacaka kaukaua. Se qai yabaki va kina o James, na luvei keirau. Na cava beka me keirau cakava? Sega li ni yalataka o Jiova: “Kakua ni ko rere; ni’u sa tiko vata kei iko”? (Aisea 41:10) Vakasamataka mada na neirau marau ena 1956 ni keirau sureti me keirau lai painia e Ismailia, volekata na Suez Canal! E levu sara na tikoyavavala e Ijipita ena veiyabaki e tarava, ra qai gadreva vakalevu na tacida lotu vaKarisito na veivakayaloqaqataki ena gauna qori.

Ena 1960 keitou biuti Ijipita, keitou yadua wale ga na katoisulu. Keitou lako sara i Saipurusi, na yanuyanu nei watiqu. Donuya na gauna qo, sa tauvimate bibi sara o Theodotos qai sega ni rawa ni cakacaka. Ia, rau qai solia vei keitou e dua na veiwatini lotu vaKarisito e dua na vale ena nodrau qele me keitou lai tiko kina. E rarawataki dina ni oti ga e rua na yabaki sa qai leqa na watiqu, keirau sa qai mai tu yani kei James. A mai tiko tale ga e Saipurusi o John, ia sa vakawati qai qarava tale tiko ga nona vuvale.

Lomani ena Gauna ni Leqa

A qai sureti keirau o Stavros kei Dora Kairis me keitou lai tiko vata. Au mani tekiduru qai vakavinavinakataki Jiova ena nona kauaitaka kei nona vakarautaka na veika keirau gadreva. (Same 145:16) Erau mani nanuma o Stavros kei Dora me rau sa na volitaka nodrau vale, rau qai tara e dua na Kingdom Hall ena tabavale e ra, me qai sema kina e rua na rumu lalai me neirau kei James.

Toso na gauna, a vakamau tale ga o James, rau painia sara vakaveiwatini yacova ni sucu na imatai ni va na luvedrau. Ena 1974, ni oti e rua na yabaki mai na veisiko nei Brother Knorr, a yaco na tikoyavavala ena veika vakapolitiki e Saipurusi.a Era biuta nodra vale e levu na lewenivanua okati kina o ira na iVakadinadina, ra dro sara ina so tale na vanua. Dua vei ira qori na luvequ o John. A toki kei watina i Kenada, kei na tolu na luvena. Ena gauna vata qori keitou marautaka na kena tubu tiko ga na iwiliwili ni dautukutuku e Saipurusi.

Na gauna au taura kina noqu peniseni, sa qai rawa meu vakaitavi vakalevu ena cakacaka vakavunau. Ia ena vica na yabaki sa oti, a qai paralasi e dua na wase ni yagoqu (stroke), au mani lai tiko vata kei James, kei na nona vuvale. Ena gauna au tauvimate bibi kina, au curu i valenibula me vica vata na macawa, oti au qai lai tiko ena vale ra dau qaravi kina na malumalumu. Dina ni dau momosi na yagoqu, au dau vunau ga vei ira na nasi, ira na tauvimate, kei ira na vulagi. Levu na gauna au dau vakayagataka meu vuli taudua kina, au dau tiko tale ga ena Vulivola ni iVavakoso ena nodra veitokoni vakayalololoma na taciqu vakayalo.

Lomavakacegu Niu sa iTabaqase

Au dau lomavakacegu niu rogoca na kedra itukutuku o ira keirau a vakavulica kei Theodotos. Levu vei ira na luvedra kei na makubudra era sa veiqaravi tiko vakatabakidua ena gauna qo​—so e Ositerelia, Kenada, Igiladi, Kirisi, kei Suwitisiladi. Nikua ratou sa vakaitikotiko mai Kenada, o John, na watina kei na luvena tagane. Sa painia tiko na luvedrau qase yalewa kei na watina. Rau a sureti ena ika124 ni kalasi ena Koronivuli e Kiliati na luvedrau gone duadua o Linda kei Joshua Snape na watina.

Rau sa tiko mai Jamani na luvequ o James kei na watina. Erau veiqaravi tiko e Peceli e rua na luvedrau tagane​—dua e Aceni mai Kirisi, kei na dua tale e Selters, mai Jamani. E painia tiko e Jamani na luvedrau tagane gone duadua, vaka kina o luvedrau yalewa kei na watina.

Sa levu dina na ka me na talanoataki vei tinaqu, kei na watiqu lomani o Theodotos ena gauna rau sa na vakaturi kina! Rau na marau dina ni rau raica na ivotavota rau a biuta tu mai.b

[iVakamacala e ra]

[Tikina bibi ena tabana e 24]

Keitou vakila tale nona veivakayaloqaqataki o Jiova ena neitou dau veimaliwai kei ira na itokani vakayalo vaKarisito

[Mape ena tabana e 24]

(Raica tale na ivola)

SAIPURUSI

NICOSIA

WASA NA MEDITERRANEAN

IJIPITA

KAIRO

El Alamein

Alexandria

Ismailia

Suez

Port Taufiq

Suez Canal

[Credit Line]

Based on NASA/Visible Earth imagery

[iYaloyalo ena tabana e 23]

Kei Theodotos ena 1938

[iYaloyalo ena tabana e 25]

Na luvequ tagane o John kei watina

[iYaloyalo ena tabana e 25]

Na luvequ tagane o James kei watina