Na Cava Mo Vulica Kina na iVolatabu?
O VILI, e cauravou momoqaqa vinaka, e vuli vinaka, qai tu vinaka vakailavo. Ia e sega ga ni lomavakacegu. E leqataka vakalevu ni sega tu ni vakainaki nona bula. Nona via kila se cava na inaki ni bula e lai vakadikeva kina na veimataqali lotu, ia e sega ni kunea na veika e vaqara voli. A sotava e dua na iVakadinadina i Jiova ena 1991, e solia vua e dua na ivola e vakamacalataki kina na ka e tukuna na iVolatabu me baleta na ibalebale ni bula. Tuvanaki sara me sa vulica o Vili na iVolatabu me rawa ni vakamatatataki vua na ulutaga oqo kei na ulutaga tale so.
E kaya o Vili ena nona nanuma lesu: “Na neirau raica wasoma na iVolatabu ena imatai ni gauna keirau vuli kina, au kila sara ga niu sa kunea na ka au vaqara tiko. Au taleitaka dina na ka e tukuna na iVolatabu. Ni oti na vuli, au kauta noqu motoka ina ulunivanua, au sobu au qai tabaka na tagi ena levu ni noqu marau. Au reki ni sa qai saumi noqu taro.”
Sega ni o ira taucoko era kunea na ka dina mai na iVolatabu era tabalaka na tagi ena levu ni nodra marau. Ia na kilai ni veika bibi me baleta na bula, e vakavumarau vei ira e vuqa. Era vakila na marau me vaka e sotava e dua na turaga ena vosa vakatautauvata i Jisu, o koya a kunea e dua na iyau sa vuni tu ena dua na were. E kaya o Jisu: “Ia ni sa rekitaka, sa la’ki volitaka na ka kecega sa tu vua, a sa volia na were ko ya.”—Maciu 13:44.
Na Ki Ina Bula e Vakainaki
E dua na taro bibi e dau vakasamataka vakalevu o Vili, Na cava sara mada na inaki ni bula? Sa vica vata na udolu na yabaki na nodra saga na dau vakasama vuku, na iliuliu ni lotu, kei ira na saenitisi mera kila na isaunitaro oya. Sa dua na ka na levu ni ivola era volai ena nodra saga tale ga mera sauma na taro oya. E matewale nodra sasaga, era vakabauta e vuqa ni na sega ni saumi rawa na taro oya. Ia, e tiko na isaunitaro. Dina ni titobu na isaunitaro, ia e sega ni vereverea. E vakamacalataki tu ena iVolatabu. Oqo na ki ina bula marau qai vakainaki: Meda veiwekani vinaka kei Jiova, na noda Dauveibuli qai Tamada vakalomalagi. Ena rawati vakacava oqo?
Na rua na sala ni noda toro voleka vua na Kalou, e vaka me rau veisaqasaqa. O ira era via toro voleka vua era na rerevaki koya, era na lomani koya tale ga. Meda na veivosakitaka mada e rua na tikinivolatabu erau duavata kei na tikina oqo. E vulica vinaka na tui vuku o Solomoni na bula ni tamata ena dua na gauna makawa sa oti, qai volatukutukutaka na ka e kunea ena ivola na Dauvunau ena iVolatabu. E tinia nona vakadidike, qai vola: “Tou rogoca nai tinitini ni ka kecega oqo: Mo rerevaka na Kalou, ka muria na nona vunau: ni sai koya ga oqo nai tavi taucoko ni tamata.” (Dauvunau 12:13, neitou na matanivola kala.) Ni oti e vica vata na senitiuri e kaya o Jisu ena nona tarogi se cava na ivunau levu duadua ena Lawa i Mosese: “Mo lomani Jiova na nomu Kalou e na lomamu taucoko, kei na yalomu taucoko, kei na nomu nanuma kecega.” (Maciu 22:37, neitou na matanivola kala.) E mawi beka na kena tukuni ni dodonu meda rerevaka na Kalou da qai lomani koya tale ga? Meda vakadikeva mada na bibi ni rere kei na loloma, kei na nodrau cakacaka vata me rawa kina na lomavakacegu e vu mai na veiwekani kei na Kalou.
Na Cava e Kena iBalebale Meda Rerevaka na Kalou
E ka bibi na rerevaka na Kalou ke da vinakata me vakadonuya o koya na noda sokalou. E kaya na iVolatabu: “Na rerevaki Jiova sa kenai vakatekivu ni vuku.” (Same 111:10) A vola na yapositolo o Paula: “Me da taura matua na loloma sa soli, eda sa qarava vinaka kina na Kalou e na yalomatua kei na rere.” (Iperiu 12:28) Na agilosi tale ga e raivotutaka na yapositolo o Joni a tukuna taumada ena nona kacivaka na itukutuku vinaka: “Dou rerevaka na Kalou, ka vakarokoroko vei koya.”—Vakatakila 14:6, 7.
E veiganiti vinaka me rerevaki na Kalou ni na vakainaki kina na bula, ia e duidui mai na rere sautaninini. Rairai eda na sautaninini ke vakasagai keda e dua na tamata rerevaki ivakarau ca. Na rerevaka na Kalou, se na rere vakalou e vakarokoroko vakaturaga kei na veidokai vua na Kalou. E okati tale ga kina na noda rerevaka meda vakacudruya na Kalou, baleta ni o koya ga na Turaganilewa, e Kaukaua Duadua, e tu vua na kaukaua kei na lewa me totogitaki ira na talaidredre.
Rau Cakacaka Vata na Rere Kei na Loloma
Ia o Jiova e sega ni vinakata mera qaravi koya na tamata baleta ga nira domobulataki koya. O Jiova na Kalou dau loloma dina. E vakavuna me vola kina na yapositolo o Joni: “Sa loloma na Kalou.” (1 Joni 4:8) E cakacaka vakayalololoma na Kalou o Jiova vei keda na kawatamata, e vinakata meda dolea ena noda lomani koya tale ga. Erau salavata vakacava na loloma oqori kei na noda rerevaka na Kalou? Erau qali vata na rua oqo. E vola na daunisame: “A vosa vuni nei Jiova sa tu vei ira era rerevaki koya.”—Same 25:14.
Vakasamataka mada na nona doka kei na nona rokovi tamana vakabibi e dua na gone. Ena gauna vata oya ena vakila na gone na loloma nei tamana. Ena vakabauti tamana na gone, ena nuitaka tale ga nona veidusimaki ni kila ni yaga vua. Ke da lomani Jiova tale ga qai rerevaki koya, eda na muria nona veidusimaki, ena yaga tale ga vei keda. Rogoca mada na ka e tukuna o Jiova vei ira na Isireli: “Ke sa tiko mada vei ira na yalo vakaoqo, me ra rerevaki au, ka vakabauta tikoga na noqu vunau kecega, me yaco kina vei ira na ka vinaka, kei na nodra kawa talega ka sega ni mudu!”—Vakarua 5:29.
Na rerevaka na Kalou ena sereki keda, eda na sega ni rarawa, eda na marau. E kaya o Aisea ena nona parofisaitaki Jisu: “Ena rekitaka sara ko koya na rerevaki Jiova.” (Aisea 11:3) E vola tale ga na daunisame: “Sa kalougata na tamata sa rerevaki Jiova, o koya sa rekitaka vakalevu na nona vunau.”—Same 112:1.
Ena sega ni rawa meda rerevaka na Kalou da qai lomani koya ke da sega ni kilai koya. Oqori na vuna bibi mo vulica kina na iVolatabu. Na vuli vaka oqo ena vukei keda meda kila na itovo ni Kalou, eda na raica tale ga ni ka vakayalomatua meda muria nona veidusimaki. Nida toro voleka vua na Kalou eda na vinakata meda vakayacora na lomana, eda na vinakata tale ga meda muria na nona ivunau, nida kila ni na yaga vei keda.—1 Joni 5:3.
E ka ni marau nida kila nida sa muria tiko na sala dodonu ena noda bula. E vakadinadinataki oqo ena ka e yacovi Vili me vaka e vakamacalataki ena itekitekivu ni ulutaga oqo. Wale tiko ga oqo e kaya: “Sa oti oqo e ciwa na yabaki mai na imatai ni gauna au vulica kina na iVolatabu, sa toso sara neirau veiwekani kei Jiova. Na yalo rekireki au vakila ena gauna oya, au sa mai sotava kina e dua na ivakarau ni bula mamarau. Vakavuna me makare tu ga kina noqu rai me baleta na bula. Au ogaoga ena veisiga ena cakacaka e vakainaki, sa sega na vaqara marau sega na betena. Sa qai yaco o Jiova me dua na ka dina vei au, au vakila tale ga ni kauaitaki au dina.”
Na ulutaga e tarava eda na veivosakitaka kina na kena yaga kei na noda marau nida bulataka noda kilai Jiova.
[Tikina bibi ena tabana e 5]
Na noda toro voleka vua na kalou e kena ibalebale meda lomani koya meda rerevaki koya talega
[iYaloyalo ena tabana e 6]
E marautaka o Jisu na nona rerevaki Jiova