Rerevaki Jiova e Veisiga Kece
1 “Na rerevaki Jiova sa kenai vakatekivu ni vuku.” (Same 111:10) Ena uqeti keda meda caka vinaka meda dro tani tale ga mai na ca. (Vkai. 16:6) Na rere oqo, e kena ibalebale na noda dokai koya na Dauveibuli mai vu ni lomada, e uqeti keda meda kua ni vakacudrui koya se talaidredre vua. Oqo e dua na ka meda bucina da qai vakaraitaka dina e veisiga kece.—Vkai. 8:13.
2 Sega ni rawarawa noda sotava e veisiga na yalo ni vuravura i Setani, ni uqeti keda meda muria na kena itovo ca. (Efeso 6:11, 12) Sa matau ni malele ina ca na yagoda ivalavala ca. (Kala. 5:17) O koya gona, meda rerevaki Jiova tiko e veisiga ena noda talairawarawa ina nona ivakaro, nida na rawata kina na bula.—Vkru. 10:12, 13.
3 Ena Iperiu 10:24, 25, eda vakadreti kina meda dau soqoni vata da qai veivakayaloqaqataki “ia me vakalevu” ena gauna sara ga oqo. E bibi na noda dau tiko wasoma ena soqoni ke da via bula ena iotioti ni veisiga oqo. Nida rere ni vakacudruya na Kalou ena uqeti keda oqori meda dau tiko ena soqoni da qai raica vakabibi na kena inaki. O ira na rerevaka na Kalou era raica ni nodra vakaitavi ena soqoni vakarisito e itavi dokai.
4 E dua tale na sala eda vakaraitaka kina noda rerevaka na Kalou, na noda talairawarawa ena ivakaro meda vunautaka na itukutuku vinaka. (Maciu 28:19, 20; Caka. 10:42) E usutu ni noda cakacaka vakavunau meda vukei ira tale e so mera rerevaki Jiova ra qai vakamalumalumutaki ira ina lomana. Eda cakava oqo ena noda dau veisikovi lesu, da saga me tekivu kina na vuli iVolatabu, da qai vakavulici ira ena ivakaro kece ni Kalou. Eda sa vakaraitaka tiko gona kina na noda rerevaki Jiova kei na noda lomani ira na wekada.—Maciu 22:37-39.
5 O ira era sega ni rerevaka na Kalou era sega ni vakavinavinakataka na veika vakayalo, ra qai rawai ena ivalavala kei na rai ni vuravura oqo. (Efeso 2:2) Me noda inaki dei mada ga meda ‘qarava vinaka na Kalou ena yalomatua kei na rere.’ (Iper. 12:28) Eda na vakalougatataki nida rerevaki Jiova e veisiga kece.