Porokaramu Vou ni Soqo ni Tabacakacaka

Ke dua e rere, e rawa ni kena ibalebale ni “titobu na nona vakarokoroko, vakabibi ke rokova tiko na Kalou.” Oqo dina na mataqali rere e kaya na iVolatabu ni ‘sa ivakatekivu ni vuku.’ (Same 111:10) Me kena veibasai, e dua tale na mataqali rere e lewa tu na vuravura i Setani e wavoliti keda tu. Eda na vorata vakacava na ituvaki oya nida bucina tiko na rerevaki Jiova? Na porokaramu vou ni soqo ni tabacakacaka ni yabaki vakacakacaka ni 2002 ena sauma na taro oya. Na kena usutu na “Rerevaka na Kalou ka Vakalagilagia.” (Vkta. 14:7, VV) Eda na qai kila kina e levu na sala e yaga yadua kina vei keda, vaka kina vakaisoqosoqo na rerevaki Jiova.

E dina ni rere e dau tukuni me nuiqawaqawa se yalolailai qai tu vakasuka ni sotavi na ituvaki dredre, ia e kaya na iVolatabu: “Sa kalougata [se, “marau,” NW] ko ira kecega era sa rerevaki Jiova.” (Same 128:1) Na porokaramu ni soqo ni tabacakacaka ena vakaraitaka vei keda na sala eda na vorata kina na ka ni bolebole e vauca na sokalou dina. Eda na raica e ke na sala era vukei kina na ka vou mera bucina na rere dina, ena qai uqeti ira mera qarava na Kalou ena lomadra, yalodra, nanuma kei na nodra kaukaua kece. (Mari. 12:30) Ena cava tiko na porokaramu ni imatai ni siga ena nona ivunau na ivakatawa ni tikina “Toro Voleka Sara Vei Ira O Lomana.” Ena vakamacalataka o koya na sala meda yadrava tiko kina na sasaga ni tevoro me vagolei keda tani mai vei Jiova, noda vuvale, kei ira na tacida vakarisito.

“Rerevaki Jiova, Sega ni Tamata” e usutu ni va na vosa veitaravi ena ikarua ni siga. E vakamacalataka na vuna kei na sala meda vorata kina na rere cava ga ena tarovi keda mai na noda vakayacora vakavinaka na noda cakacaka vakavunau, se meda yalodina tiko ga qai vinaka noda lewaeloma e koronivuli, vaka kina ena noda vanua ni cakacaka. Na vunau soqovi levu “Rerevaka na Kalou Qai Muria Nona iVunau” e yavutaki ena itukutuku veitaravi e vakamacalataki ena Vakatakila wase 14. Ena cava tiko na soqo ni tabacakacaka ena veidusimaki veivakauqeti “Lako Tiko ga Ena Rerevaki Jiova.”

So tale na ikuri ni porokaramu o na sega ni via calata oya na Koronivuli ni Vuli iTalatala Liutaki Vakalou, na ivakaraitaki ni Soqoni ni Cakacaka, vunau ni papitaiso, kei na ivakamacala lekaleka ni Vuli Vale ni Vakatawa. Sureti ira nomu vuli iVolatabu mera na tiko tale ga kina. Ke dua e via papitaiso me tukuna totolo vua na ivakatawa daulewa. O keda kece eda na via vakaraitaka na noda rerevaki Jiova dina da qai vakalagilagi koya ena noda sega ni calata e dua na ivunau ena porokaramu oqo!