Vakaitavi Vakalevu ena Tatamusuki Vakayalo

‘Ni vakaitavi vakalevu ena cakacaka ni Turaga.’​—1 KOR. 15:58.

1. Na veisureti cava a tukuna o Jisu vei ratou na nona tisaipeli?

ENA nona ilakolako e Samaria ena icavacava ni 30 S.K., a cegu vakalailai o Jisu ena dua na toevu volekata na taoni o Saika. Qori na vanua a tukuna kina vei ratou nona tisaipeli: “Dou tacake mo dou raica na were, ni sa matua vinaka tu me tamusuki.” (Joni 4:35) A sega ni tukuna tiko o Jisu na tamusuki ni dua na itei, a vakaibalebaletaka tiko ga na nodra kumuni na yalomalumalumu mera nona imuri. A sureti ratou gona o Jisu me ratou vakaitavi kina. E levu na cakacaka me caka, ia e lailai ga na gauna me caka kina!

2, 3. (a) Na cava e dusia nida bula ena gauna ni tatamusuki? (b) Na cava ena veivosakitaki tiko ena ulutaga qo?

² E vakaibalebale vakalevu ena noda gauna na vosa i Jisu. Eda bula ena gauna e “matua vinaka tu me tamusuki” kina na were ni kawatamata. E veiyabaki era ciqoma e milioni na veisureti mera vulica na ka dina ena iVolatabu e rawati kina na bula, era papitaiso tale ga e vica vata na udolu na tisaipeli vou. E itavi dokai meda vakaitavi ena tatamusuki levu duadua ena nona veidusimaki na Turaga ni tatamusuki na Kalou o Jiova. O sa “vakaitavi vakalevu” tiko ena tatamusuki qo?​—1 Kor. 15:58.

³ Ena tolu veimama na yabaki ni nona cakacaka vakaitalatala e vuravura o Jisu, a vakarautaki ratou vinaka nona tisaipeli ena itavi ni tatamusuki. Ena veivosakitaki ena ulutaga qo e tolu na lesoni bibi a vakavulica o Jisu vei ratou nona tisaipeli. E vakabibitaki ena lesoni yadua na itovo ena yaga vakalevu nida vakaitavi ena noda vinaka taucoko ena nodra kumuni na tisaipeli. Meda veivosakitaka yadudua mada.

Bibi na Yalomalumalumu

4. E vakaraitaka vakacava o Jisu na bibi ni yalomalumalumu?

⁴ Raitayaloyalotaka mada na ituvaki qo: Ratou se qai veiletitaka ga na tisaipeli se o cei e levu cake vei ratou. E kilai mai na irairai ni matadratou ni ratou veilecayaki, ratou cudru tale ga. A kaciva sara e dua na gonelailai o Jisu me duri ena kedratou maliwa, a vinakata me ratou raici koya matua, qai kaya: “O koya e yalomalumalumu [se “o koya e vakalailaitaki koya,” Byington] me vaka na gone lailai qo ena okati me levu duadua ena matanitu vakalomalagi.” (Wilika Maciu 18:​1-4.) A vinakati me ratou kila na tisaipeli ni levu cake o koya e “vakalailaitaki koya” ena matadra eso tale, sega ni rai ni vuravura qo, ni vakaliuci kina na rogo, vutuniyau kei na qarai ni tutu. O Jiova ena vakalougatataki ratou qai vakayagataki ratou ke ratou yalomalumalumu dina.

5, 6. Na cava e bibi kina mo yalomalumalumu ke o via vakaitavi vakalevu ena cakacaka ni tatamusuki? Vakamacalataka.

⁵ Nikua e levu era vakaliuca ena nodra bula na rogo, na iyau kei na qara itutu. Nodra cakava qori sa sega kina se lailai na gauna me kauaitaki kina na ka vakayalo. (Maciu 13:22) Ena yasana adua, era marau na tamata i Jiova nira ‘vakalailaitaki ira’ ena matadra na tamata, me rawa nira vakalougatataki ra qai vakadonui tiko ga vua na Turaga ni tatamusuki.​—Maciu 6:24; 2 Kor. 11:7; Fpai. 3:8.

⁶ Me kena ivakaraitaki e dua na qase ni ivavakoso e Sauca Amerika, o Francisco. Ni se cauravou, a biuta na univesiti me lai painia. A vakasamataka lesu: “Ena gauna au veimusumusuki kina meu vakamau, au a rawa ni qara na cakacaka me dei kina neirau bula vakailavo vakaveiwatini. Ia keirau nanuma me keirau bula rawarawa ga qai tomana neirau veiqaravi vakatabakidua. Emuri keirau qai vakaluveni, qai levu dina na icolacola. A vukei keirau o Jiova me keirau bula rawarawa tiko ga.” E tinia o Francisco: “Sa 30 vakacaca na yabaki noqu marautaka tiko na veiqaravi vaqase, au marautaka tale ga e levu na itavi lavotaki tale eso. Keitou sega vakadua ni veivutunitaka na neitou bula rawarawa.”

7. O saga tiko vakacava mo muria na ivakasala ena Roma 12:16?

⁷ Ni o vakuai iko mai na “qaciqacia” ni vuravura qo, o qai saga mo “yalomalumalumu ga,” o na rawa ni marautaka e levu tale na veivakalougatataki kei na itavi dokai ena cakacaka ni tatamusuki.​—Roma 12:16; Maciu 4:​19, 20; Luke 18:​28-30.

E vu ni Veivakalougatataki na Gugumatua

8, 9. (a) Vakamacalataka vakalekaleka na vosa vakatautauvata i Jisu me baleta na taledi. (b) Ena yaga vakalevu vei cei na vosa vakatautauvata qo?

⁸ Ena vinakati na gugumatua ke da via vakaitavi vakalevu ena cakacaka ni tatamusuki. A tukuna qo o Jisu ena vakatautauvata ni taledi.a Na vosa vakatautauvata qo e baleta e dua na turaga a vakarau gole e vanuatani, a tataunaka nona iyau vei ratou na tolu nona dauveiqaravi. A solia vua na imatai ni dauveiqaravi e lima na taledi, e rua na taledi vua na ikarua ni dauveiqaravi, qai dua na taledi vua na kena ikatolu. Ni biubiu ga nodratou turaga, a totolo sara nodrau “cakacakataka” nodrau taledi na imatai kei na kena ikarua ni dauveiqaravi. Ia na ikatolu ni dauveiqaravi e tamata “vucesa,” a buluta na nona taledi. Ni lesu mai nodratou turaga, a vakaicovitaki rau na imatai kei na ikarua ni dauveiqaravi ena nona lesia me rau “lewa e levu tale na ka.” A taura lesu na turaga na taledi mai vua na ikatolu ni dauveiqaravi qai vakatala tani mai na nona vuvale.​—Maciu 25:​14-30.

⁹ E macala gona nida na via vakataki rau na dauveiqaravi gugumatua ena vosa vakatautauvata i Jisu, ena noda vakaitavi vakalevu ena cakacaka ni veivakatisaipelitaki. Ia vakacava ke tarova na keda ituvaki na sasaga qori? De dua na leqa ni bula vakailavo e vakavuna meda cakacaka vakabalavu meda qarava rawa kina noda vuvale. Se sa toboki keda koso na bula va qase. Ke va qori na kemu ituvaki, ena uqeti iko na itukutuku e volai ena vosa vakatautauvata ni taledi.

10. A yalorawarawa vakacava na turaga ena vosa vakatautauvata ni taledi? E uqeti iko vakacava qo?

¹⁰ A kila vinaka na turaga ena vosa vakatautauvata i Jisu ni duidui na ka eratou rawa ni cakava nona dauveiqaravi. Qo ena nona lesia na nodratou dui taledi ena “ka e rawa ni ratou dui cakacakataka.” (Maciu 25:15) Me vaka e namaki, a levu cake na ka e rawata na imatai ni dauveiqaravi mai vua na kena ikarua. A vakaraitaka na turaga nona taleitaka na ka rau cakava na dauveiqaravi ena nona tukuna ni rau ‘dauveiqaravi vinaka qai yalodina,’ a mani saumi rau vakatautauvata. (Maciu 25:​21, 23) E tautauvata tale ga qori kei na Turaga ni tatamusuki na Kalou o Jiova, e kila vinaka ni na vakatau ena keda ituvaki na ka eda rawa ni cakava ena noda veiqaravi. Ena sega ni guilecava na noda qaravi koya mai vu ni lomada, ena saumi keda tale ga ena ka eda rawata.​—Marika 14:​3-9; wilika Luke 21:​1-4.

11. Ni sotavi na ituvaki dredre, vakamacalataka na yaga ni gugumatua me rawati kina na veivakalougatataki.

¹¹ E macala mai na nona ivakaraitaki e dua na tacida yalewa mai Brazil o Selmira, ni sega ni vakatau noda gumatua ni qaravi Jiova ke vinaka na keda ituvaki. Ena ruasagavulu na yabaki sa oti, a lauvana mate o watina vei ira na daubutako, a mani qarava duadua voli e tolu na luvena. E daumeimei qai yawa na vanua ni nona cakacaka, ena taura e vica vata na aua nona vodo qai taubale ena vanua osooso, e veivakaocai dina. Ia mai na dredre kece qori, a cakava na veiveisau me rawa ni painia tudei kina. Emuri rau qai tomani koya e rua na luvena ena veiqaravi vakapainia. A tukuna, “ena veiyabaki sa sivi, rauta ni 20 vakacaca au vakavulici ira ena iVolatabu, era sa lewe ni noqu ‘vuvale.’ Me yacova mai qo, au se marautaka tiko ga nodra loloma kei na nodra veitokani. Qo na ka talei e sega ni voli rawa.” A vakalougatataka dina na Turaga ni tatamusuki na gugumatua i Selmira!

12. Eda na gumatua vakacava ena cakacaka vakavunau?

¹² Ke da sotava eso na ituvaki e vakadredretaka noda vakaitavi ena cakacaka vakavunau, eda rawa tiko ga ni vakalevutaka noda vakaitavi ena noda saga me vuavuaivinaka. Nida vakayagataka vakavinaka na vakatutu yaga ena noda Soqoni ni Cakacaka e veimacawa, ena laulau noda vunau nida tovolea eso tale na iwalewale vovou. (2 Tim. 2:15) Ena yasana adua, ke rawa, eda rawa ni veisautaka noda ituvatuva se vakuai keda sara ga mai na ka e sega so ni bibi meda tokona kina na cakacaka vakavunau ni ivavakoso.​—Kolo. 4:5.

13. Na cava e bibi duadua ena kena bucini qai dei tiko ga noda gugumatua?

¹³ Me nanumi tiko ni noda gugumatua ena vakatau ena noda lomani Jiova kei na noda vakavinavinakataki koya mai vu ni lomada. (Same 40:8) A rerevaka nona turaga na ikatolu ni dauveiqaravi ena vosa vakatautauvata i Jisu, a nanuma ni dau lavaka vakasivia na ka qai turaga yalodredre. Oya na vuna e lai buluta kina na nona taledi qai sega ni cakacakataka me vakalevutaka na iyau ni nona turaga. Me vorati na yalowele qori e bibi meda bucina da qai vakamareqeta noda veiwekani voleka kei na Turaga ni tatamusuki o Jiova. Me tiko na gauna ni noda vuli da qai vakasamataka vakatitobu na nona itovo talei​—nona loloma, dauvosota, kei na nona yalololoma. Nida cakava qori eda na uqeti meda qaravi koya mai vu ni lomada.​—Luke 6:45; Fpai. 1:​9-11.

“Moni Savasava”

14. Na cava e vakabibitaki vei ira na vinakata mera dautatamusuki?

¹⁴ Ena nona vosa tiko ena iVolatabu vakaIperiu na yapositolo o Pita, e vakaraitaka kina na inaki ni Kalou vei ira na dauveiqaravi e vuravura, e kaya: “Me vaka ni Kalou Savasava o koya e kacivi kemuni, me savasava tale ga na nomuni ivalavala kece, ni sa volai: ‘Moni savasava niu savasava o yau.’ ” (1 Pita 1:​15, 16; Vunau 19:2; Vkru. 18:13) E vakabibitaki eke ni vinakati vei ira na dautatamusuki mera savasava vakayago, vakayalo tale ga. Eda na rawata na ka e bibi ya ena noda cavuikalawa meda savasava vakaivakatakarakara. Ena caka vakacava ya? Ena veiuqeti ni ka dina ni vosa ni Kalou.

15. Na cava ena cakava ena vukuda na kaukaua ni dina ni vosa ni Kalou?

¹⁵ E vakatauvatani na vosa dina ni Kalou ina wai e dau veivakasavasavataki. Me kena ivakaraitaki, a vola na yapositolo o Paula ni ivavakoso vaKarisito lumuti e savasava ena mata ni Kalou me vaka e dua na yalewavou e savasava me wati i Karisito, ni vakasavasavataki “ena wai ni vosa ni Kalou, . . . , e dodonu me savasava me kua ni vakamelei.” (Efeso 5:​25-27) Me vaka ga a dau vunautaka, a tukuna tale ga o Jisu na kaukaua ni veivakasavasavataki ni vosa ni Kalou. Nona vosa vei ira nona tisaipeli a kaya: “Ia o kemudou dou sa samaki oti ena vuku ni vosa au tukuna vei kemudou.” (Joni 15:3) O koya gona, na dina ni vosa ni Kalou e kaukaua me veivakasavasavataki vakayago, vakayalo tale ga. Nida vakalaiva na dina ni Kalou me vakasavasavataki keda ena sala qori, ena vakadonuya na Kalou na noda sokalou.

16. E rawa vakacava nida savasava tiko ga vakayalo, vakayago tale ga?

¹⁶ Ni bera nida vakaitavi ena tatamusuki, eda na biuta tani mada eliu na ivalavala dukadukali kei na ivakarau tawasavasava vakayalo. Me rawa nida dei tiko ga ena ilesilesi dokai qori, e bibi meda ivakaraitaki ena noda tokona na ivakatagedegede cecere i Jiova ena noda bula vakayago, vakayalo tale ga. (Wilika 1 Pita 1:​14-16.) Eda dau kauaitaka vakabibi na savasava vakayago, e dodonu tale ga meda dau vakamalumalumu me vakasavasavataki keda na ivakavuvuli dina ni vosa ni Kalou. Qori noda wilika e veisiga na iVolatabu kei na noda tiko wasoma ena soqoni vaKarisito. E kena ibalebale tale ga noda muria na veidusimaki i Jiova ena noda bula. Na noda cakava qori eda na valuta kina na gagadre ca ni lomada kei na noda vorata na veivakacalai ni vuravura qo. (Same 119:9; Jeme. 1:​21-25) Io, e veivakacegui dina nida kila ena veiuqeti ni dina ni vosa ni Kalou, eda rawa ni “vakasavasavataki” mai na ivalavala ca bibi sara mada ga!​—1 Kor. 6:​9-11.

17. Na ivakasala vakaivolatabu cava meda vakasamataka meda rawa ni savasava tiko ga kina?

¹⁷ O dau taleitaka me vakasavasavataka nomu bula na ivakavuvuli dina mai na vosa ni Kalou? Me kena ivakaraitaki, o raica vakacava na ivakasala me baleta na kena vakarerevaki na veivakamuai ni ka ni veivakamarautaki? (Same 101:3) O dau saga mo levea na veimaliwai e sega ni yaga kei ira na nomu icaba se o ira ena vanua ni cakacaka oni sega ni vakabauta vata? (1 Kor. 15:33) O dau saga vagumatua mo valuta na nomu malumalumu e rawa ni vakadukadukalitaki iko ena mata i Jiova? (Kolo. 3:5) O sasagataka tiko mo tawasei iko mai na veileti vakapolitiki, kei na yalo ni boletaki vanua e takalevu tu ena qito nikua?​—Jeme. 4:4.

18. Ena yaga vakacava noda savasava vakayago kei na savasava vakayalo meda vua kina vakalevu?

¹⁸ Ena yaga nomu talairawarawa ena yalodina. A vakatauvatani ira nona tisaipeli lumuti o Jisu ena taba ni vaini, mani tukuna: “Na tabaqu kece e sega ni vua e kauta laivi o koya, na tabaqu kece e vua e samaka me rawa ni vua vakalevu.” (Joni 15:2) Eda na vua vakalevu nida muria na veidusimaki kei na veivakasavasavataki ni vakavuvuli dina mai na iVolatabu.

Veivakalougatataki ena Gauna qo kei na Kena se Bera Mai

19. Era vakalougatataki vakacava na tisaipeli i Jisu ena nodra vakaitavi ena cakacaka ni tatamusuki?

¹⁹ O ira na tisaipeli yalodina i Jisu era muria nona veituberi, a sobuti ira na yalotabu ena Penitiko 33 S.K. mera nona ivakadinadina ena “veivanua yawa sara kei vuravura.” (Caka. 1:8) Era veiqaravi mera lewe ni ilawalawa dauvakatulewa, era daukaulotu, ivakatawa dauveilakoyaki, era qarava na itavi bibi ni kena vunautaki na itukutuku vinaka “vei ira na kabuli kece e ruku i lomalagi.” (Kolo. 1:23) Era vakalougatataki kina ra qai vu ni marau vei ira na so tale!

20. (a) Na veivakalougatataki cava o vakila ni o vakaitavi vakalevu ena tatamusuki vakayalo? (b) Na cava o sa vakadeitaka mo na cakava?

²⁰ Io, nida yalomalumalumu, gugumatua, kei na noda tokona na ivakatagedegede cecere ni Vosa ni Kalou, eda na marautaka tiko ga noda vakaitavi vakalevu qai vuavuaivinaka na noda cakacaka ni tatamusuki vakayalo e caka tiko nikua. E levu era vakila na rarawa e salavata mai kei na domodomoiyau kei na gagadre vakavuravura, ia eda vakila na marau dina nida bula rawarawa ga. (Same 126:6) E bibi duadua ni ‘sega ni ka wale na noda veiqaravi ena cakacaka ni Turaga.’ (1 Kor. 15:58) Ena vakalougatataki keda na Turaga ni tatamusuki, na Kalou o Jiova ena ‘noda cakacaka kei na noda kauaitaka dina na yacana.’​—Iper. 6:​10-12.

[iVakamacala e ra]

O na Sauma Vakacava?

Nida sasaga meda vakaitavi vakalevu ena cakacaka ni tatamusuki . . .

• na cava e bibi kina na yalomalumalumu?

• eda na bucina qai dei tiko ga vakacava noda gugumatua?

• na cava e bibi kina meda savasava tiko ga vakayago, vakayalo tale ga?

[iYaloyalo ena tabana e 17]

Ena yaga na yalomalumalumu meda bula rawarawa ga da qai vakaliuca tiko ga na Matanitu ni Kalou