Taro na Dauwiliwili

A tu e vei o Taniela ni ratou vakatovolei na tolu na Iperiu ena matakau levu e vakaduria o Nepukanesa ena buca o Tura?

E sega ni vakamacalataka na iVolatabu, ena sega kina ni dua e kila se a tu e vei o Taniela ena gauna ni veivakatovolei oya.

E so era kaya ni nona itutu o Taniela ena mata i Nepukanesa e cecere cake mai vei Setareki, Mesaki, kei Apetiniko, e sega kina ni gadrevi vua me lako ena buca o Tura. E macala ena Taniela 2:​49 ni a tu o Taniela ena dua na gauna ena itutu e cecere cake mai vei iratou na nona itokani. Ia e sega ni rawa nida vakadeitaka ni ka oqo e sega ni lai soqoni kina kei ira e so tale ena mata ni matakau.

Nira via vakamacalataka nona yali o Taniela, e so tale era kaya ni rairai lako ena dua na ilesilesi vakaturaga se a tauvimate, a sega ni tiko rawa kina. Ia, na iVolatabu e sega ni kaya oya. Se cava ga e yaco, a sega ni veiletitaki nona yali o Taniela, baleta ni kevaka me a veiletitaki, e sega ni vakabekataki nira na vakayagataka na vakailesilesi dauvuvu ni Papiloni mera beitaki koya kina. (Taniela 3:8) Na gauna ni bera na ka oqo vaka kina ni sa oti, e vakadinadinataki koya o Taniela ni tamata yalodina vua na Kalou se mani veivakatovolei cava ga e sotava. (Taniela 1:8; 5:​17; 6:​4, 10, 11) O koya gona, kevaka e sega ni kaya na iVolatabu na vuna a sega ni tiko kina o Taniela ena buca o Tura, e rawa ga nida nuidei ni a yalodina tiko ga vua na Kalou o Jiova.​—Isikeli 14:14; Iperiu 11:33.