“Dou Lako Mai Vei Au, . . . Ka’u na Vakacegui Kemudou”

E Veivakacegui ni ‘Vunautaki na Vosa’

OQO e dua na tamata e uasivi qai cakava tiko e dua na ilesilesi bibi. E veilauti dina na iwalewale ni nona veivakavulici nira “kurabui sara na lewe vuqa e na nonai vakavuvuli.” (Maciu 7:​28) E sega ni vakacauoca ena vunau. Na nona gauna, kaukaua kei na nona iyau e vakayagataka taumada ena kena vunautaki na Matanitu ni Kalou. E dina taucoko ni o Jisu e lakova e levu na vanua me vunau kina, me veivakavulici tale ga, qai sega ni dua erau tautauvata ena ka oya.​—Maciu 9:​35.

Na cakacaka vakatotolotaki i Jisu me “vunautaki mada na i Tukutuku Vinaka ni matanitu” vei ira na bula tiko ena gauna oya kei na nona vukei ira nona tisaipeli mera vunau e vuravura raraba. (Maciu 4:​23; 24:​14, VV; 28:​19, 20) Ena vakayalolailaitaki ira beka na nona imuri ivalavala ca era lewe vica ga na vakaitamera kei na vakatotolotaki ni veika a vakacolati vei ira?

E sega sara ga! Ni vakaroti iratou na nona imuri o Jisu me ratou masu vua “nai Taukei ni were” na Kalou o Jiova me levu tale na tamata cakacaka, sa qai talai iratou yani o Jisu me ratou veivakavulici. (Maciu 9:​38; 10:1) E vakadeitaka tale vei iratou ni ilesilesi oqo ena kauta mai na veivakacegui dina kei na nuidei. E kaya o Jisu: “Dou lako mai vei au, . . . ka’u na vakacegui kemudou.”​—Maciu 11:28.

E Vakavureki

Sa dua dina na veisureti vinaka oqori, e caka ena dela ni loloma kei na veikauaitaki! E vakaraitaka na nona kauaitaki iratou dina nona tisaipeli o Jisu. Eratou kunea dina na vakacegu na nona imuri ni ratou cakava vinaka na nodratou itavi me ratou vunautaka “na i Tukutuku Vinaka” ni Matanitu ni Kalou. E kauta mai vei iratou na marau dina kei na lomavakacegu.​—Joni 4:​36.

Ni se bera ni mai bula e vuravura o Jisu, sa dusia tu mai na iVolatabu ni marau oya e tiki ni noda sokalou tabu vua na Kalou. E matata oqo ena nona lagata na daunisame: “Dou ia na sere vei Jiova, na vuravura kecega. Dou qaravi Jiova e na marau; dou toro mai vua ni dou sa sere tiko.” (Same 100:​1, 2) Edaidai, era lave domodra na tamata ena vakacaucau vei Jiova, e vaka na nodra kaila na mataivalu qaqa nira vakaraitaka na nodra vakavinavinaka. O ira na soli ira vakatabakidua vua na Kalou era toro vua ena “sere.” E veiganiti vinaka oqori ni o Jiova e “Kalou mamarau,” qai vinakati ira na nona tamata mera marau tale ga nira vakayacora tiko na nodra yalayala vua.​—1 Timoci 1:​11, NW.

iTalatala Era Vakacegui

Ena rawa vakacava me vu ni vakacegu vei keda na noda cakacaka vakaitalatala, me kua ni veivakaocai? Io, e vaka dina na kakana e vakabulabulataki Jisu na cakacaka i Jiova. E kaya: “A qau kakana me’u kitaka na loma i koya sa talai au mai; ka me’u vakaotia na nona cakacaka.”​—Joni 4:​34.

E vaka tale ga kina, nira kune vakacegu ena nodra “vunautaka na Vosa “ o ira na dauvunau yalodina edaidai. (2 Timoci 4:2) E kaya o Connie, e dua na lotu Vakarisito uabula, e dau sivia na 70 na aua na gauna e vakayagataka ena cakacaka vakavunau ena dua na vula: “Au lomavakacegu, au marau ni oti e dua na siga ni noqu cakacaka vakavunau, dina ga niu wawale.”

Vakacava ke sega ni ciqomi na itukutuku ni Matanitu eda kauta yani? E tomana o Connie: “E sega vakadua niu bau veivutunitaka noqu vakaitavi ena cakacaka vakavunau veitalia ga ke ra sega ni via vakarorogo. Kuria oqo na noqu kila niu vakamarautaki Jiova, qai vakavureki meu dau vunautaka na ka dina, baleta ni gauna au vakayacora kina oqo, e vakadeitaka e lomaqu na inuinui talei e yalataki tu ena iVolatabu.”

Era kaya tale na so ni vakaibalebale vei ira na nodra bula ena gauna era tubera kina e so tale mera mai veikilai kei na Kalou. E kaya o Meloney, e dua na tacida yalewa e rawata wasoma e sivia na 50 na aua ena dua na vula: “E veivakacegui na cakacaka vakavunau baleta ni vakainaki kina na noqu bula. E seavu yani na noqu lomaocaoca kei na nuiqawaqawa niu cakacaka vakavunau.”

E kaya o Millicent, e dua na iVakadinadina i Jiova italatala yalodina: “E dau yaga vei au ena veigauna kece na noqu tukuna vei ira na tani na inaki ni Kalou vua na kawatamata kei na noqu vakamacalataka na kena vakalesui mai na vuravura Parataisi. E vakaraitaka vei au ena veisiga ni tiko dina o Jiova qai solia vei au na vakacegu kei na loma e marau o koya e sega ni dua tale e rawa ni solia vei au.”

O Ira na Vakacegui

O ira na vunautaka ena yalodina na Matanitu ni Kalou era vakacegui ena nodra cakacaka vakaitalatala, vaka kina o ira na ciqoma na itukutuku ni bula. E dina ga ni vakavulici e dua na qasenivuli mai vei ira na bete kei na sisita mai Potukali, ia e vakila vakataki koya ni sega ni vakaceguya na nona gagadre vakayalo na lotu e lewena tiko. Era sega ni dau saumi na nona taro vakaivolatabu. Ena nona vulica gona na iVolatabu kei ira na iVakadinadina i Jiova, e kunea sara ga na veika titobu ena iVolatabu. E marau vakalevu na qasenivuli oqo. “Au dau nanamaki ena noqu mai vuli ena veisiga Vukelulu,” e kaya, “ni dau saumi qai vakadinadinataki na noqu taro yadudua mai na iVolatabu.” Edaidai, sa yalataki koya na tacida oqo, qai vakacegui ira tale ga na tani ena nona vunautaka yani na ka dina mai na iVolatabu.

E matata kina ni o ira na iVakadinadina i Jiova era sega ni yalolailai ena vuku ni nodra ilesilesi bibi se na levu ni nodra yalava. E sega tale ga ni vakayalolailaitaki ira na veitusaqati se o ira na sega ni kauai. Era saga ga vakaukaua mera vakayacora vinaka na nodra ilesilesi mera vunautaka na Matanitu ni Kalou. Era vunautaka na itukutuku vinaka vei ira na tamata kece ena vanua cava ga era kune kina​—ena ikelekele ni lori mai Mereke (1), dua na raraniwaqavuka mai Korea (2), mai na ulunivanua na Andes (3), se dua na sitoa e Lodoni (4). O ira na imuri i Jisu edaidai era marautaka na nodra cakava e vuravura raraba na cakacaka oqo e veivakalougatataki. E dina ena nona yalayala o Jisu ni na vakacegui ira, me rawa nira vakacegui ira tale ga kina na tani.​—Vakatakila 22:17.