O se Nanuma Tiko?

O taleitaka na ka o wilika ena itabataba ni Vale ni Vakatawa era se qai taba oti ga? Raica mada ke rawa ni o sauma e vica na taro oqo:

• Na porokaramu cava e vauca na Vunau ena Ulunivanua o rawa ni muria me vakamamadataka na nomu lomaocaoca?

E veisiga o rawa ni wilika e yadua na ivakavuvuli i Jisu ena vunau oya se ena dua vei iratou na Kosipeli. Ni o vakasamataka vakatitobu, o qai saga mo bulataka, e sega ni vakataratutu ni o na marau vakalevu kina, ena vakalailaitaka na nomu lomaocaoca.​—12/15, taqana e 12-​14.

• Na cava e tolu na vuna levu e dodonu kina vei ira na qase ni ivavakoso mera vakavulici ira na dauveiqaravi vakaitalatala mera colata e levu tale na itavi?

E tubu tiko ga na kedra iwiliwili na iVakadinadina i Jiova, o koya gona, e gadrevi e levu tale na tagane nuitaki mera vukei ira na papitaiso vou oqo mera toso. E so vei ira na qase ni ivavakoso sa dede sara na nodra veiqaravi tu mai, sa tarabi toka vei ira na nodra yabaki ni bula, se ra sa tautauvimate. E dua na iwiliwili levu tale ga ni qase gugumatua e raba sara na itavi era qarava, sa macala ga ni oqo ena yalana na ka era na cakava rawa ena nodra dui ivavakoso.​—1/1, taqana e 29.

• E laurai vakacava ina noda bula nida nuitaki ira na kalou e sega ni dina?

E levu era qarava na kalou ni nodra dui lotu, ia era ka mate na kalou oqo, ni sega ni rawa nira veivakabulai me vakataki Peali ga ena gauna i Ilaija. (1 Tui 18:​26, 29; Same 135:​15-​17) E so tale era taleitaki ira na dauveivakamarautaki, se o ira na dauqito rogo, ia e sega ni rawa vei ira na tamata rogo oqo mera solia na inuinui me baleta na veigauna mai muri. Ena yasana kadua, e bula dina o Jiova qai dau vakayacora na nona inaki.​—1/15, taqana e 3-5.

• A vakasalataki o Keni, ia a qai lulevaka, na lesoni cava eda vulica kina?

Na Kalou e solia tu vei keda na galala ni vakatulewa, e tu kina vei keda na kaukaua meda digia na ka e vinaka, da vukitani mai na ca. A sega ni cakava oqo o Keni. E vakaraitaka tale ga na itukutuku vakaivolatabu oqo ni dau vakatauca o Jiova na nona lewa vei ira era sega ni veivutuni.​—1/15, taqana e 22-​3.

• Na cava sa qai bibi ga kina ena gauna oqo meda qarauna me savasava na noda bula?

Sa veisau sara na ivakarau ni noda bula, sa lailai gona na gauna meda samaka kina na noda dui itikotiko me vaka e dau kena ivalavala. E bibi me savasava na kena qaravi na keda kakana kei na meda wai, ni na vakavu tauvimate ke sega ni vakayacori vaka kina. Ia me kuria na savasava vakayago, e vakabibitaka na iVolatabu meda kauaitaka tale ga meda savasava vakayalo, savasava na noda itovo kei na noda vakasama.​—2/1, taqana e 3-6.

• A tukuna o Paula me baleti ira na ivakadinadina ni se bera na gauna vakarisito, nira “na qai taura vata ga kei keda ko ira ko ya na ka e a yalataki.” Ena vakayacori vakacava oqo? (Iperiu 11:​40, VV)

Ena duanaudolu na yabaki eda vakanamata tiko kina oqo, ena veiqaravi mai lomalagi o Karisito kei ira na tacina lumuti ena nodra itutu vakatui kei na bete mera vakayagataka vei ira era na vakaturi na yaga ni isoro. Ena sala oqo era “na qai taura” kina “na ka e a yalataki” o ira na yalodina me vakataki ira na cavuti ena Iperiu wase e 11.​—2/1, taqana e 23.

• Na cava e vakaibalebaletaka o Paula ena nona kaya vei ira na Iperiu: “Ko ni sa sega mada ni vala me yacova sara yani na vakadavei ni nomuni dra”? (Iperiu 12:​4, VV)

E dusia tiko o koya na mate. E tu na kedra ivolatukutuku e so era yalodina me yacova sara na mate. Era sega ni se vakatovolei me yacova na ivakatagedegede oya na Iperiu a volavola tiko vei ira o Paula, ia e vinakati mera toso mera matua cake, mera vaqaqacotaka na nodra vakabauta mera vosota rawa kina na veika cava ga era na sotava.​—2/15, taqana e 29.

• Ena cala beka vua na lotu Vakarisito ke vakawainimatetaka na yago ni wekana lomani e mate?

Na vakawainimatetaki ni yagomate e caka me kua ni kasere totolo kina. Ia e so ena gauna makawa era cakava me baleta na nodra vakabauta vakalotu. Sa macala ga ni sega ni na duavata kina e dua e qarava na Kalou dina. (Dauvunau 9:5; Cakacaka 24:15) Na vakawainimatetaki ni yagomate ena vakaberaberataka ga na ka e sega ni tarovi rawa, oya nida na lesu tale ina qele. (Vakatekivu 3:​19) E sega gona ni cala ni caka oqo ke lawa ni matanitu, se lomadra e so na lewenivuvale, se gadrevi mera waraki kina na lako vakayawa mai ina veibulu.​—3/15, taqana e 29-​31.

• Na ivakaraitaki cava soti ena iVolatabu e dusia ni ciqomi ira na lewe ni matanitu kece na Kalou?

O Jiova a lesi Jona me lai vakaroti ira na kai Ninive, qai uqeti koya me ciqoma na nodra veivutuni. O Jisu a veivakayarayarataki ena nona vosa kei na nona ivakaraitaki mera lomani na kai Samaria. Erau vakaitavi ruarua na yapositolo o Pita kei Paula ena kena vakatetei na itukutuku vinaka vei ira na sega ni Jiu. Na ivakaraitaki kece oqo e dusia ni vinakati meda vukei ira na veimatatamata kece.​—4/1, taqana e 21-4.