Taro na Dauwiliwili

E rawa beka nida vakadeitaka mai na Vakatakila 20:8 ni dua na iwiliwili vakaitamera ena temaki ira o Setani ena iotioti ni veivakatovolei?

Na Vakatakila 20:8 e vakamacalataka na iotioti ni nona vakatovolei ira na kawatamata e vuravura o Setani ena icavacava ni duanaudolu na yabaki ni veiliutaki ni Matanitu nei koya na Mesaia. E kaya na tikinivolatabu oqo me baleti Setani: “Ena qai lako tani yani ko koya me temaki ira na veivanua era sa tiko e na yasa i vuravura e va, ko Koki kei Mekoki, me vakasoqoni ira vata me ra vala: a kedrai wiliwili sa vaka na mata ni nuku ni matasawa.”

Dina ni sa levu na iyaya kei na iwalewale vakasaenitisi e rawa ni vakayagataki, ia se sega tu ga ni kilai na levu ni “mata ni nuku ni matasawa.” E rawa kina ni tukuni ni ivosavosa oqo e dusia tiko e dua na iwiliwili e tawakilai. Ia e kena ibalebale beka, ni oqo e dua na iwiliwili levu, e vakaitamera, se e dua na iwiliwili e tawakilai ia e bau levu toka?

Ena iVolatabu, e levu na sala e dau taurivaki kina na ivosavosa “vaka na mata ni nuku ni matasawa.” Kena ivakaraitaki, na Vakatekivu 41:​49, e kaya: “A sa binia na sila ko Josefa me vaka na nuku mai matasawa, na ka levu sara, ka qai sega ni wilika tiko; ni sa sega ni wili rawa.” E vakabibitaki e ke na kena sega ni wiliki rawa. E vaka tale ga oya na ka e kaya o Jiova: “Me vaka sa sega ni wili rawa na kalokalo mai lomalagi, se vakarauti rawa na nuku ni matasawa: ka’u na vakalewevuqataka vakakina na kawa i Tevita na noqu tamata.” Ni sega ni wiliki rawa na kalokalo ni lomalagi kei na nuku ni matasawa, ena vaka tale ga oya na veika e yalataka o Jiova vei Tevita.​—Jeremaia 33:22.

E dau vakayagataki vakavuqa na ivosavosa “na nuku mai matasawa” me dusia e dua na ka e levu qai vakaitamera na kena iwiliwili se ivakarau. Era lomaleqa vakalevu na Isireli e Kilikali ena nodra soqoni vata mai na mataivalu ni Filisitia e Mikimasi, nira “vaka na mata ni nuku mai baravi na kedrai wiliwili.” (1 Samuela 13:​5, 6; Dauveilewai 7:​12) A “sa solia vei Solomoni na Kalou na vuku kei na loma sa daukila rawa na ka levu sara, kei na daulomasoli, me vaka na nuku mai matasawa.” (1 Tui 4:​29) Dina ni cavuti ena rua na ituvaki oqo e dua na iwiliwili vakaitamera, ia e wiliki rawa.

“Na nuku ni matasawa” e rawa ni kena ibalebale tale ga e dua na iwiliwili e sega ni wiliki rawa, e sega ga ni vakaitamera. A kaya o Jiova vei Eparama: “Au na . . . vakavuqataka vakalevu na nomu kawa me ra vaka na kalokalo ni lomalagi, kei na nuku mai matasawa.” (Vakatekivu 22:17) Gauna e tokaruataka kina o Jiova na vosa ni yalayala oqo vua na makubu i Eparama o Jekope, e vakayagataka na ivosavosa “na kuvu ni qele,” e qai lai cavuta tale e muri o Jekope me “nuku mai matasawa.” (Vakatekivu 28:14; 32:12) Toso na gauna sa qai matata ni “kawa” i Eparama, e sega ni wili kina o Jisu Karisito, era le 144,000, e vakatokai ira o Jisu me “qele-ni-sipi lailai.”​—Luke 12:32; Kalatia 3:​16, 29; Vakatakila 7:4; 14:​1, 3.

Na cava eda vulica mai na vica na ivakaraitaki oqo? Na ivosavosa “vaka na mata ni nuku ni matasawa” e sega ni kena ibalebale ga na iwiliwili e sega ni wiliki rawa; se vakayagataki me dusia e dua na ka e levu sara se vakaitamera. Dau vakawasoma me dusia tale ga e dua na iwiliwili levu toka ia e wiliki rawa. E rawa kina ni tukuni ni kedra iwiliwili na ilala dauvakacaca era tokoni Setani ena iotioti ni nona vakatovolei ira na tamata ni Kalou e sega ni vakaitamera sara, ia ena dua toka na iwiliwili vinaka era na rawai. Me yacova mai edaidai, se sega tu ga ni kilai na kedra iwiliwili.