Uqeti Mera Veiqaravi
NA CAVA e yavalati ira na 24 na veiwatini bulabula vinaka oqo mera biuta nodra vuvale, nodra itokani, kei na nodra vanua mera lai kaulotu i vanua tani? Na cava mera marautaka kina nodra lako ina vanua me vakataki Papua Niu Kini kei Taiwan, vaka kina o Aferika kei Amerika vakalatina? Baleta beka nira taleitaka mera lai saravanua? Sega. E uqeti ira nodra lomana dina na Kalou kei ira na wekadra.—Maciu 22:37-39.
O cei o ira oqo? Oqo o ira na gonevuli ni kalasi 109 ni Watchtower Bible School of Gilead. Ena siga Vakarauwai, 9 Sepiteba, 2000, era soqo vata e 5,198 ena Watchtower Educational Center—e tiko e Patterson, mai Niu Yoka—vaka kina ena so tale na vanua era rogoca ena talevoni, na ivakasala vakayalololoma me vukei ira na gonevuli mera daukaulotu gugumatua.
A jeameni ni porokaramu o Stephen Lett, e dua na lewe ni Komiti ni Veivakavulici ni iLawalawa Dauvakatulewa ni iVakadinadina i Jiova. E tekivuna nona vosa ena Maciu 5:13 (VV), “O i kemudou na masima kei vuravura.” E vakamacalataka o Brother Lett ni vosa i Jisu e rawa ni vakayagataki tale ga vei ira na gonevuli era tuvaitutu oqo. Me kena ivakaraitaki, e vakatuituinataka na kakana na masima. Era vaka gona na masima na daukaulotu ena laulau ni nodra cakacaka vakavunau.
Veivakayaloqaqataki
Sa qai kerei ira e so era sa qaravi Jiova tu mai vakadede o Brother Lett mera vosa vakalekaleka mai na iVolatabu, ia me veivakauqeti nodra ivakamacala. Na imatai me vosa o John Wischuk, e veiqaravi tiko ena Tabana ni Volavola. Na nona ulutaga e yavutaki ena Same 117, “Na Same Lekaleka Duadua e Vakauqeta na Yalo ni Kaulotu.” Nikua, e gadrevi raraba na nona vakadinadinataki o Jiova kei na nona Matanitu ena “veimatanitu kecega” kei na “veivanua kecega.” Era vakayaloqaqataki na gonevuli mera vakayacora na veika e tukuna na Same 117, nodra uqeti ira tale e so mera “vakavinavinaka vei Jiova.”
Tarava sa qai kerea na jeameni me vunau o Guy Pierce, e lewe ni iLawalawa Dauvakatulewa. E vosa ena ulutaga “Ni Moici Rawarawa, ia ni Tudei.” E dei na Vosa ni Kalou. Ena Vakarua 32:4 e vakatokai na Kalou o Jiova me Uluvatu, ia na nona Vosa e rawa ni moici, ni volai me baleti keda kece kei na noda dui veivosa kei na itovo vakavanua—io, me baleta na kawatamata kece. Era vakasalataki na gonevuli mera vunautaka na Vosa ni Kalou, me tara sara ga na lomadra kei na nodra lewaeloma na tamata. (2 Korinica 4:2) E vakasalataka tale o Brother Pierce, “Ni tudei ena ivakavuvuli dina, ia mo ni moici rawarawa. Kua ni beci ira era oka ena nomu ilesilesi baleta beka ga ni duidui na nodra itovo vakavanua.”
O Karl Adams, e dua vei ira na qasenivuli e Kiliati, sa oti oqo e via 53 na yabaki nona veiqaravi ena itikotiko liu, e qai vosa ena ulutaga vakavure vakasama “Ni Oti Oqo O na Lako i Vei?” E dina nira lesi ena 20 na vanua e veiyasa i vuravura na lewe 24 na veiwatini, ia na taro sa qai vure cake mai, O sa na lai tiko, o sa na raica na ka kece me raici ena nomu vanua vou, na cava e sa na qai vo? Eda bula ena vuravura e sega kina na lomavakacegu. Era via lako na tamata ena vanua vovou, ra qai via cakava na ka vovou mera vakamarautaki ira kina. Ena yasana adua, era taura na gonevuli na ilesilesi mai vei Jiova ra qai lesi ina vanua e vinakata o koya mera lai karona vakayalololoma kina nona “sipi.” E sega ni dodonu mera vakataki ira na Isireli ena gauna makawa, ena vuku ni nodra nanumi ira ga era calata kina na nona a rawa ni vakayagataki ira o Jiova mera vakalougatataki kina na kawatamata kece. Ia, e dodonu mera vakatotomuri Jisu Karisito ena nona tu vakarau me cakava ena veigauna kece na loma i Tamana qai talairawarawa tiko ga ena veituvaki kece e sotava.—Joni 8:29; 10:16.
“Vakamareqeta na Veika Titobu ni Kalou” na ulutaga i Wallace Liverance, na vunivola ni Koronivuli o Kiliati. E dau wasoma na kena vakatautauvatataka na iVolatabu na Vosa ni Kalou me vaka na iyau, na vatutalei isaulevu, na iyau talei, kei na veika e tiko sara e cake na kedra isau qai dredre me kune. Kevaka o via “kunea na Kalou mo kilai koya,” e vakaraitaka na Vosa Vakaibalebale 2:1-5 ni dodonu mo “vakasaqara me vaka sai yau vuni.” E vakayaloqaqataki ira na gonevuli o Brother Wallace mera vakasaqara tiko ga na veika titobu ni Kalou nira veiqaravi tiko ena nodra ilesilesi vou. E vakamacalataka o Brother Liverance: “E yaga oqo, ni na tara cake nomu vakabauta kei na nomu nuitaki Jiova, ena vakaukauataka tale ga nomu inaki mo cakava tiko ga nomu ilesilesi. Ena vukei iko mo vosa ena doudou, mo dua tale ga na qasenivuli vinaka ni o vakamacalataka na inaki ni Kalou vei ira na tani.”
Me vaka na ituvatuva ni dua na lomanikalasi, e railesuva e dua tale na dauveivakavulici ni Koronivuli e Kiliati nona vakalougatataka o Jiova na nodra cakacaka vakaitalatala na gonevuli ena lima na vula sa oti. E dusia o Lawrence Bowen na veika a tukuna na yapositolo o Paula ena Cakacaka 20:20 me baleta nona cakacaka vakaitalatala e Efeso, qai vakabibitaka ni dau vakayagataka o Paula na galala cava ga me vunau kina. Me vaka ga na yapositolo o Paula, na nodra vakasavuirogorogo na gonevuli e vakaraitaka ni o ira e uqeti ira nodra lomana na Kalou kei na wekadra nikua era na sega ni tu vakasuka mera tukuna na ka dina kei na nodra laiva na kaukaua ni Vosa ni Kalou me cakacaka yaco vei ira era rogoca. Na veika oqo e tini ena veivakalougatataki i Jiova.
Vosa o Ira sa Qaseta
Ena gauna ni vuli, era kalougata na gonevuli ena kalasi oqo e Kiliati nira veimaliwai kina kei ira na lewe ni Komiti ni Tabana mai na 23 na vanua, era tiko tale ga e Patterson Educational Center ena nodra vuli lavotaki. Erau vakatarogi ira e levu na lewe ni Komiti ni Tabana o Leon Weaver kei Merton Campbell ena Tabana ni Veiqaravi, e so vei ira era a vuli tale ga e Kiliati. E veivakacegui vei ira na gonevuli, na nodra vuvale, kei ira na nodra itokani na nodra rogoci ira oqo nira sa qaseta na daukaulotu.
E so na ivakasala e tukuni vei ira na kalasi era tuvaitutu oqo me vukei ira ena nodra ilesilesi e vanua tani, era vaka oqo: “Me donu nomu rai. Kevaka o sotava e dua na ka e vou vei iko, se o sega ni kila, kua ni yalolailai. Vakararavi vei Jiova”; “vulica mo lomavakacegu ena veika o taukena, qai nuitaki Jiova ni na vakarautaka o koya na veika mo bula kina.” E so tale na ivakamacala e vakabi me vukei ira na gonevuli mera rekitaka tiko ga kina nodra ilesilesi. E so na ivakamacala e vaka oqo: “Kua ni vakatauvatana na nomu ilesilesi kei na vanua o lako mai kina”; “vulica na kena vosa qai vosataka vinaka me rawa ni o veitaratara vinaka kina kei ira na tamata”; “vulica na nodra ivakarau kei na itovo vakavanua, ni oqo ena vukei iko mo dei tiko ga kina ena nomu ilesilesi.” Na ivakamacala kece oqo e vakayaloqaqataki ira sara vakalevu na daukaulotu vou.
Ni oti ga na veitarotarogi, e vosa tarava o David Splane, a dua tale ga na daukaulotu, a gonevuli ni kalasi 42 e Kiliati, e sa lewe tiko ni iLawalawa Dauvakatulewa ni iVakadinadina i Jiova, ena ulutaga vakavure vakasama “Gonevuli se Qasenivuli—O Cei Vei Rau?” E tarogi ira na kalasi era tuvaitutu oqo: “O na raici iko vakacava ni o lako ena nomu ilesilesi vakadaukaulotu? Mo dua na qasenivuli o sa kila kece na cakacaka vakadaukaulotu se o gonevuli e se levu tale tu na ka mo vulica?” E dusia o Brother Splane ni qasenivuli vuku ena raici koya me vaka e dua na gonevuli. E dodonu me tiko vei ira na daukaulotu na rai ni rawa nira vakavulici ira ena so na ka o ira kece era sota ena nodra ilesilesi vakaulotu. (Filipai 2:3) Era vakayaloqaqataki na gonevuli mera cakacaka vakavoleka sara kei ira na nodra itokani daukaulotu, na valenitabana, kei na ivavakoso era lewena. “Oni sa rawata na iotioti ni nomuni veitarogi, ia e sega ni mai cava e ke na nomuni se wili tiko ga mo ni gonevuli. Vakaraitaka vei ira kece ni o tiko e kea mo vuli,” e uqeta o Brother Splane.
Ni oti nona vosa, era taura nodra ivola na gonevuli, qai vakarogoi vei ira na tiko e kea na nodra ilesilesi. E gauna mosimosi dina vei ira na gonevuli era tuvaitutu, ni wilika tarava e dua e matataki ira na nodra inakinaki e vakaraitaka nira nakita dei mera na laiva na veika era sa vulica mai na Vosa ni Kalou me uqeti ira mera vakalevutaka tiko ga na nodra veiqaravi tabu.
Era duavata kece na tiko e kea ni ivakasala e soli ena vakaukauataka nodra inaki na gonevuli era tuvaitutu oqo mera lomana na Kalou kei ira na tani. E solia tale ga vei ira na yalodei mera vukei ira vakayalo na tamata ena nodra ilesilesi vakadaukaulotu.
[iYaloyalo ena tabana e 25]
VEIKA ME BALETA NA KALASI
Vanua era cavutu mai kina: 10
Vanua era lesi kina: 20
Levu ni gonevuli: 48
iVakatautauvata ni nodra yabaki: 33.7
iVakatautauvata ni yabaki ena dina: 16.2
iVakatautauvata ni yabaki ena cakacaka vakaitalatala vakatabakidua: 12.5
[iYaloyalo ena tabana e 26]
Nodra Tuvaitutu na Kalasi 109 ni Watchtower Bible School of Gilead
E nabataki na iyatu me tekivu mai liu me yaco i muri, e tuvai na yaca me tekivu mai na imawi me gole ina imatau.
(1) Collins, E.; Miles, L.; Alvarado, A.; Lake, J. (2) Van Dusen, L.; Biharie, A.; Heikkinen, H.; Koós, S.; Smith, H. (3) Ashford, J.; Ashford, C.; Boor, C.; Richard, L.; Wilburn, D.; Lake, J. (4) Chichii, K.; Chichii, H.; Ramirez, M.; Baumann, D.; Becker, G.; Biharie, S.; Ramirez, A. (5) Van Dusen, W.; Lemâtre, H.; Pisko, J.; Cutts, L.; Russell, H.; Johnson, R. (6) Becker, F.; Baumann, D.; Johnson, K.; Pifer, Á.; Madsen, C.; Lemâtre, J.; Heikkinen, P. (7) Smith, R.; Russell, J.; Collins, A.; Pisko, D.; Wilburn, R.; Koós, G. (8) Cutts, B.; Boor, J.; Madsen, N.; Pifer, S.; Richard, E.; Miles, B.; Alvarado, R.