Na Vuli iVolatabu e Vaqaqacotaka Nodra Vakabauta

“SA DUA dina na ka dokai na kena vulici tiko ena lima na vula na veika me baleta na Dauveibuli, eda vukei tale ga me tiko vei keda na nona rai!” e kaya ena siga ni tuvaitutu e dua na lewe ni ika122 ni kalasi ni Watchtower Bible School of Gilead. Era na nanuma vinaka na ika10 Maji, 2007, na 56 era tiko ena kalasi oya, ena nodra sa vakarau lai veiqaravi vakadaukaulotu ena 26 na vanua era na lesi tiko kina.

Ni oti ga nona kidavaki ira na 6,205 era a tiko, e kaya o Theodore Jaracz, e dua na lewe ni iLawalawa Dauvakatulewa: “Sega ni vakabekataki ni na uqeti kemuni dina vakayalo qai vaqaqacotaka na nomuni vakabauta na nomuni tiko ena tuvaitutu oqo.” Cavuti ratou veitaravi sara e lewe va, eratou na mai tauca e so na vosa taudonu vakaivolatabu mera uqeti ra qai vakasalataki kina na gonevuli mera na cakava vinaka nodra ilesilesi vakadaukaulotu.

Uqeti Mera Vaqaqacotaka Nodra Vakabauta e So Tale

E vosa o Leon Weaver, e dua na lewe ni Komiti ni Tabana e Mereke, ena ulutaga “Caka Vinaka Tiko Ga.” E tukuna vei ira na gonevuli ni levu vei ira sa rauta ni yabaki 13 nodra cakacaka tu mai vakatabakidua ena nodra cuqena na veivakavulici ena iVolatabu e vaqaqacotaka na vakabauta. E kaya: “Sa dua dina na cakacaka vinaka baleta era vakabulai kina na tamata, ia koya e uasivi sara oya ni vakalagilagi kina na Tamada vakalomalagi, o Jiova.” E uqeti ira na gonevuli o Brother Weaver mera ‘kaburaka tiko ga na ka ni Yalo Tabu’ ra qai kua ni ‘cegu na caka vinaka.’​—Kalatia 6:​8, 9.

O David Splane, e dua na lewe ni iLawalawa Dauvakatulewa, e cauraka e so na ivakasala yaga ena ulutaga “Tekivu Vinaka.” Uqeti ira na daukaulotu vou oqo o Brother Splane mera tekivutaka vinaka na nodra ilesilesi ena nodra muria e vica na tikina oqo: “Me dau donu tu ga nomuni rai. Kua ni dau vakasama vakariri. Dau matadredredre. Kua ni vosasuruya na ka. Dau yalomalumalumu qai dokai ira na mataveitacini ena vanua o lesi kina.” Sa qai kuria: “Ni o sa yaco ena nomu ilesilesi, saga mo solia sara kina nomu vinaka taucoko, me qai vakalougatataka mada ga o Jiova na yavamu totoka oqori ni kauta voli ‘na irogorogo vinaka ni ka vinaka’ vei ira na tamata.”​—Aisea 52:7.

Vosa tarava e dua na qasenivuli e Kiliati, o Lawrence Bowen, ena ulutaga “Na iVotavota e Dei.” E tukuna vei ira na gonevuli o Brother Bowen mera nanuma tiko ni a tauyavutaki na Koronivuli o Kiliati ena iKarua ni Valu Levu ena kena nuitaki vakatabakidua ni na yaco na Vosa ni parofisai i Jiova. (Iperiu 11:1; Vakatakila 17:8) Na koronivuli gona o Kiliati e dau vaqaqacotaka nodra vakabauta na gonevuli. Na qaqaco ni nodra vakabauta e uqeti ira sara ga mera gumatua ni tukuna na ka dina.

O Mark Noumair, e dua tale na dauniveivakavulici e Kiliati, e vosa ena ulutaga vakavure vakasama, “Au Nanuma Sara e Dua Niu Raici Kemuni.” E vakamacalataka na ivakaraitaki ni nona vakabauta na parofita o Ilaisa kei na nona yaloqaqa ni qarava nona ilesilesi. E yavutaka na nona ivakamacala ena 1 Tui 19:​21, qai kaya o Brother Noumair: “A tu vakarau o Ilaisa me veisautaka nona bula, me vakaliuca na cakacaka i Jiova, qai muri na veika me baleti koya.” E vakavinavinakataki ira na tuvaitutu ena nodra vakaraitaka tale ga na mataqali yalo vaka oya, qai uqeti ira mera na tomana tiko ga ena nodra ilesilesi vou.

Uqeti Ira Nodra Vakabauta Mera Doudou na Vosa

Me ikuri ni nodra vaqaqacotaka na nodra vakabauta na daukaulotu vou oqo ena gauna ni vuli, era vakayagataka vinaka tale ga na muanimacawa mera vunautaka kina na itukutuku vinaka. So sara kina na vakasavuirogorogo vinaka, qai matanataki ena itavi nei Wallace Liverance, e dua tale ga na dauveivakavulici e Kiliati. E ulutaga ni nona vosa “Keitou sa Vakabauta, Keitou sa Vosa Kina,” e vakamacalataka kina na veika a tukuna na yapositolo o Paula ena 2 Korinica 4:​13.

Taravi koya o Daniel Barnes kei Charles Woody, erau lewe ni vuvale e Peceli, rau vakatarogi ira na sa veiqaravi oti vakadaukaulotu kei ira se veiqaravi tiko. E vakabibitaki kina na nona dau veikauaitaki o Jiova, kei na nona dau vakalougatataki ira na qaravi koya ena yalodina. (Vosa Vakaibalebale 10:22; 1 Pita 5:7) Tukuna e dua na daukaulotu: “Keirau vakila sara ga vakaveiwatini nona veikauaitaki o Jiova ena gauna keirau vuli tiko kina e Kiliati. E vaqaqacotaka dina na neirau vakabauta. E bibi mera vakabauta na dauveiqaravi kece ni Kalou, wili kina o ira na daukaulotu, baleta nira na vakatovolei, era na sotava na leqa kei na nuiqawaqawa.”

Gumatua ena Vulici ni iVolatabu me Qaqaco Kina na Vakabauta

Mai tini vinaka na tuvaitutu oqo ena vosa i Samuel Herd, e dua na lewe ni iLawalawa Dauvakatulewa, ena ulutaga “Uqeti Ira Tiko ga na Mataveitacini.” Cava na inaki ni nodra vuli na gonevuli? “E kena inaki oya mera vakacaucautaki Jiova ena ka era tukuna, mera vakavulica na ka dina ena yalava vou era lesi kina, ra qai veivakayaloqaqataki,” e kaya o Brother Herd. Ia, e tukuna vei ira na gonevuli ni rawa tale ga ni veivakayalolailaitaki na ka era tukuna. (Vosa Vakaibalebale 18:21; Jemesa 3:​8-10) E uqeti ira mera vakatotomuria na ivakarau ni nona dau vosa o Jisu. Rau a vakarogoci Jisu tiko na nona tisaipeli ena dua na gauna rau qai kaya: ‘Sega li ni a katakata na lomadaru . . . ni a serelaka tiko vei kedaru na iVolatabu?’ (Luke 24:32) Kaya o Brother Herd: “Ke dau veivakayaloqaqataki na ka o tukuna, ena tara sara ga na lomadra na mataveitacini ena vanua o lesi kina.”

Oti sa ra qai taura na nodra ivola na tuvaitutu. Wiliki tale ga e dua na nodra ivola ni vakavinavinaka na lewenikalasi. E tukuni kina: “Keimami kila ni bibi dina na kena vakayagataki na ka e sa vulici oqo me qaravi kina ena yalodina na itavi vakadaukaulotu. Keimami sa tu vakarau oqo ni lako yani ina iyalayala kei vuravura, e neimami masu tale ga ni na vakalagilagi vakalevu na noda Dauniveivakavulici Levu, na Kalou o Jiova ena neimami sasaga.” Ra vakasausau mai vu ni lomadra na vakarorogo tiko. Sega ni vakabekataki ni a vaqaqacotaki dina nodra vakabauta na tiko ena tuvaitutu oya.

[Tikina bibi ena tabana e 17]

“Ke dau veivakayaloqaqataki na ka o tukuna, ena tara sara ga na lomadra na mataveitacini ena vanua o lesi kina”

[Kato ena tabana e 15]

VEIKA ME BALETA NA KALASI

Vanua era cavutu mai kina: 9

Vanua era lesi kina: 26

Levu ni gonevuli: 56

iVakatautauvata ni nodra yabaki: 33.4

iVakatautauvata ni yabaki ena dina: 16.8

iVakatautauvata ni yabaki ena cakacaka vakaitalatala vakatabakidua: 13

[iYaloyalo ena tabana e 16]

Nodra Tuvaitutu na Kalasi 122 ni Watchtower Bible School of Gilead

E nabataki na iyatu me tekivu mai liu me yaco i muri, e tuvai na yaca me tekivu mai na imawi me gole ina imatau.

(1) Howitt, R.; Smith, P.; Martinez, A.; Pozzobon, S.; Kitamura, Y.; Laud, C. (2) Fiedler, I.; Beasley, K.; Matkovich, C.; Bell, D.; Lippincott, W. (3) Sites, W.; Andersen, A.; Toevs, L.; Fusano, G.; Rodríguez, C.; Yoo, J. (4) Sobomehin, M.; Thomas, L.; Gasson, S.; Dauba, V.; Bertaud, A.; Winn, C.; Dobrowolski, M. (5) Yoo, J.; Dauba, J.; Mixer, H.; Newton, M.; Rodríguez, F.; Mixer, N. (6) Laud, M.; Lippincott, K.; Martinez, R.; Haub, A.; Schamp, R.; Pozzobon, L.; Toevs, S. (7) Howitt, S.; Kitamura, U.; Newton, D.; Haub, J.; Sites, J.; Thomas, D. (8) Sobomehin, L.; Matkovich, J.; Fusano, B.; Winn, J.; Schamp, J.; Andersen, D.; Dobrowolski, J. (9) Fiedler, P.; Bell, E.; Beasley, B.; Smith, B.; Bertaud, P.; Gasson, M.