Marautaka Nomu Cakacaka Vakaukaua
1. Na cava e rawa ni vakaseavutaka na noda gugumatua ena cakacaka vakaitalatala?
1 A buli na tamata me “marautaka na nona cakacaka vakaukaua.” (Dauv. 2:24, NW) Ia ke sega ni vuavuaivinaka na noda cakacaka vakaitalatala, na yalolailai ena rawa ni vakaseavutaka na noda gugumatua kei na noda marau. Na cava meda cakava me donu tiko ga kina na noda rai?
2. Na cava me donu tiko ga kina na noda rai ke sega ni taleitaki na noda cakacaka vakaitalatala?
2 Donu Tiko ga na Noda Rai: Meda nanuma tiko nira le lailai ga era ciqoma na ivakavuvuli i Jisu, ia e vuavuaivinaka na nona cakacaka vakaitalatala. (Joni 17:4) Ena nona vosa vakatautauvata me baleta na daukakaburaki, a parofisaitaka o Jisu ni levu era na sega ni taleitaka na sorenitei se itukutuku ni Matanitu ni Kalou. (Maciu 13:3-8, 18-22) Ia e levu na ka ena rawati ena noda cakacaka vakaukaua.
3. E rawa vakacava meda “vua” ke ra sega mada ga ni taleitaka eso na noda vunau?
3 Sala Eda Vua Kina Vakalevu: E tukuni ena vosa vakatautauvata i Jisu ni o ira era ciqoma na itukutuku vinaka era na “vua.” (Maciu 13:23) Ni tubu qai matua e dua na vuniwiti, ena sega ni vuataka na vuniwiti lalai, ena vuataka ga na soreniwiti vou. Na lotu vaKarisito tale ga e vuavuaivinaka na nona cakacaka, e sega ni tukuni sara ni na vuataka e dua na tisaipeli vou, ena kaburaka ga vakalevu na sorenitei ena nona vunautaka na Matanitu ni Kalou. Na levu ni ka “vinaka” ena rawati kina ena vakacegui keda veitalia ke ra tataleitaki na tamata se sega. Eda sa vakaitavi sara tiko ga ena kena dokai na yaca i Jiova. (Aisea 43:10-12; Maciu 6:9) Eda marautaka tiko na itavi dokai meda cakacaka vata kei na Kalou. (1 Kor. 3:9) E marautaka tale ga o Jiova na “vua ni tebenigusuda.”—Iper. 13:15, 16.
4. Na cava eda na rairai sega tu ni kila me baleta na noda cakacaka vakaitalatala?
4 Meda nanuma tale ga ni rairai sa yaga tiko na noda cakacaka vakaukaua, ia eda sega ga ni raica tiko. De dua eso era rogoca na ka e vunautaka o Jisu era qai nona tisaipeli ni sa vakacavara na nona cakacaka vakaitalatala e vuravura. E va tale ga qori na sorenitei ni Matanitu ni Kalou eda kaburaka, de dua ena taura toka na gauna me qai vakawakana se tubu ena lomana e dua, eda na rairai sega ni kila tale ga na nona gole mai ena dina. Io, e levu na ka vinaka e rawati ena noda cakacaka vakaitalatala. Koya gona, meda “vua tiko ga vakalevu” da qai vakaraitaka nida tisaipeli i Jisu.—Joni 15:8.