Tauyavutaka na Vuli iVolatabu ena iVola ‘Loloma ni Kalou’

1. Na cava na inaki ni ivola ‘Loloma ni Kalou’?

¹ Eda marautaka kece na ivola vou ‘Tiko ga ena Loloma ni Kalou,’ a soli ena Soqo ni Tikina ‘Dusimaki ena Yalo ni Kalou’! Me vaka e tukuni ena gauna ni soqo, ena dusimaki keda na ivola qo meda kila, da raica vakabibi tale ga na ivakatagedegede i Jiova me baleta na itovo. Ena sega ni vakayagataki meda veivakavulici kina ena yavu ni ivakavuvuli vakaivolatabu se veisoliyaki e veivale.

2. Ena vulici ena gauna cava na ivola qo, o cei ena vuli kina?

² Na ivola qo e vakarautaki mera vulica na vuli iVolatabu ni oti na ivola Kaya na iVolatabu. Me nanumi tiko ni so e totolo nodra toso, eso e berabera. Na vuli me vakatau gona ena levu ni ka e taura rawa o gonevuli ni bibi me matata vinaka vua na ka e vulica. Ena sega ni vakayagataki na ivola qo mera vuli kina e levu era sa rairai vulica e vica vata na ivola ena veigauna sa oti, ia era sega ni dau tiko ena soqoni vakaivavakoso se ra bese ni moica nodra bula me salavata kei na ka dina era vulica ena iVolatabu.

3. Na cava me caka ke da se caka vuli tiko ena ivola Qarava na Kalou?

³ Ke o se caka vuli tiko ena ivoIa Qarava na Kalou, e se vo tiko e vica na wase, o na rairai vakatulewataka mo vakaotia mada o qai uqeti gonevuli me wilika ga vakataki koya na ivola ‘Loloma ni Kalou.’ Ke sega, ena vinaka me sa dewa ga na vuli ena ivola vou qai tekivu ena imatai ni wase. Me vaka ga na ituvatuva ni ivola Kaya na iVolatabu, e vakatau vei keda na veivosakitaki ni ulutaga ena ikuri.

4. Ke papitaiso o gonevuli ni se bera ni oti na ivola Kaya na iVolatabu kei na ‘Loloma ni Kalou,’ na cava me caka?

⁴ Ke se bera ni oti na ivola Kaya na iVolatabu kei na ‘Loloma ni Kalou’ sa papitaiso o gonevuli, me tomani tiko ga na vuli ena ivola ‘Loloma ni Kalou’ me yacova ni oti. E dina sa papitaiso o gonevuli, se rawa ga ni o ripotetaka na gauna, veisikovi lesu, kei na vuli iVolatabu. Ke tomani iko e dua tale na dautukutuku, e rawa ni ripotetaka tale ga na gauna ke vakaitavi.

5. Ena vakayagataki vakacava na ivola ‘Loloma ni Kalou’ mera vukei kina na dautukutuku era sa sega tu ni cakacaka vakavunau?

⁵ Ke lesi iko e dua na lewe ni Komiti ni Cakacaka ni iVavakoso mo vuli iVolatabu kei na dua e sa sega tu ni cakacaka vakavunau, ena rairai tukuni sara ga vei iko na wase mo drau vulica ena ivola ‘Loloma ni Kalou.’ E sega ni veiganiti me caka tiko na vuli ena loma ni dua na gauna balavu. Na ivola vou qo e isolisoli totoka dina, e idusidusi ni noda tiko ga “e na loloma ni Kalou”!​​—⁠Juta 21.