Ra Uqeti na Gonevuli Mai Kiliati​—Mera Tukuna “na Cakacaka Veivakurabuitaki”

ERA cavutu mai ena 52 na matanitu na le 6,635 era tiko ena porokaramu ni tuvaitutu ni kalasi 115 ni Watchtower Bible School of Gilead, ena 13 Sepiteba, 2003.

Era rogoca kina na nodra vakauqeti vakaivolatabu na le 48 na lewenikalasi mera tukuna yani vei ira na tamata ena 17 na veivanua “na cakacaka veivakurabuitaki ni Kalou.” (Cakacaka 2:​11, VV) Oqori na vanua era dui lesi kina na gonevuli mera lai daukaulotu.

O Stephen Lett, e lewe ni iLawalawa Dauvakatulewa ni iVakadinadina i Jiova qai jeameni tale ga ni porokaramu oqo, e vakadreta ena idola ni nona vosa: “Na vanua cava ga oni lesi kina se ituvaki cava oni na sotava, kua ni guilecava ni lewe vuqa era sa tiko kei kemuni, ka lewe lailai era sa tiko kei ira era veitusaqati.” A yavutaka tiko nona vosa o Brother Lett ena iKarua ni Tui wase 6, a vakadreti ira kina na gonevuli ni rawa nira nuitaka na nona veitokoni na Kalou o Jiova kei ira na le oba na agilosi, nira tukuna yani “na cakacaka veivakurabuitaki ni Kalou.” (2 Tui 6:​15, 16) O ira na lotu Vakarisito ena imatai ni senitiuri era a sotava na veitusaqati qai sega tale ga ni kauaitaki na nodra cakacaka vakavunau kei na nodra veivakavulici. Ena gauna oqo era sotava tale ga na ituvaki vaka oya na daukaulotu vakarisito. Ia, e rawa nira nuitaka na veitokoni mai lomalagi kei na isoqosoqo rairai i Jiova e vuravura.​—Same 34:7; Maciu 24:45, VV.

Tukuna “na Cakacaka Veivakurabuitaki ni Kalou”

Ni sa vosa oti na jeameni, a vunau sara o Harold Corkern, e lewe ni Komiti ni Tabana mai Mereke, ena ulutaga, “Kua ni Namaka Vakasivia na Ka​—E Marautaki Qai Vuavuaivinaka Kina na Veiqaravi.” A vakamacalataka o Brother Corkern ni gauna e vakadaroi kina na ka e namaki e rawa ni votu na yalolailai, me vaka e tukuna na Vosa Vakaibalebale 13:​12 (NW). Io, ni sa rui namaki vakasivia na ka, e dau vakavuqa me vakavuna na yalolailai. E gadrevi gona vei ira na gonevuli oqo me veiraurau na nodra rai, ra qai vakaraitaka na yalomatua ena veika e vauca na nodra bula, vaka kina o ira na tani. Mera namaka ni so na ka era na lekata, ia e sega ni dodonu me vakararawataki ira ena nodra saga mera vukei ira na so mera kila “na cakacaka veivakurabuitaki ni Kalou.” A uqeti ira na daukaulotu vou oqo o Brother Corkern mera nuitaki Jiova, qai vakauasivi ni dau “saumi ira talega era sa dauvakasaqarai koya.”​—Iperiu 11:6.

A vosa tarava o Daniel Sydlik, e lewe tale ga ni iLawalawa Dauvakatulewa, ena ulutaga “Na Cava na iNuinui Vakarisito?” A kaya: “Na inuinui e dua na ka e dodonu me tiko vua e dua na lotu Vakarisito. Oqo e dua vei ira na ivakatagedegede me tiko vua e dua me rawa kina na veiwekani vinaka kei na Kalou. Sa rauta me sega na nona inuinui e dua e sega ni lotu Vakarisito.” A tomana o Brother Sydlik ena nona vakamacalataka na veibasoga ni ka eda nuitaka tu na lotu Vakarisito, oqo e rawa ni vukea e dua me donu tiko ga nona rai, veitalia ke sotava na bula dredre. “Ni tiko noda inuinui eda na gugumatua qai yaloqaqa na vosota na ituvaki ni bula e veisiga.” Na nona inuinui e dua na lotu Vakarisito ena rawa ni vukei koya me raica ni o Jiova e Kalou ni inakinaki, ena marau tale ga na qaravi koya.​—Roma 12:12.

O Wallace Liverance, na vunivola ni koronivuli e Kiliati, a vakauqeti ira na gonevuli mera “Lako Voli e na Yalo Tabu.” (Kalatia 5:​16) A vakamacalataka nona a yaco o Peruki, na vunivola i Jeremaia, me voleka sara ni muduka vakadua nona lako voli ena yalo tabu. Ena dua na gauna, sa yalolailai o Peruki mani tekivu qara e so na ka levu me nona. (Jeremaia 45:​3, 5) A kaya o Brother Liverance ni so mada ga era sa sega ni muri Jisu ra qai cakitaka na ka dina vakayalo, e dina ni oqo ga na sala e rawati kina na bula. E vakavuna oqo na kena sega ni matata vei ira na veika e vakavuvulitaka o Jisu, ra qai yalolailaitaka ni a sega ni yaco na veika era namaka. (Joni 6:​26, 27, 51, 66) O koya gona, na cava e rawa nira vulica mai na ivakaraitaki oqo na daukaulotu, ni nodra itavi mera veidusimaki me kilai o koya e buli keda kei na nona inaki? Era vakauqeti na gonevuli mera kua ni qara na vakaitutu, rogo, se vakayagataka na nodra ilesilesi soli vakalou mera rawata kina na veika ga e yaga vei ira.

A taroga e dua vei ira na qasenivuli e Kiliati o Mark Noumair: “O Dau Lomasoli se O Dau Yalodredre?” A yavutaka tiko nona vosa mai na Dauveilewai 5:​2, oya na nodra vakacaucautaki yadudua na Isireli ena vuku ni nodra bole mai vu ni lomadra mera lai veiqaravi ena mataivalu i Peraki. A vakacaucautaki tale ga na yalo era ciqoma kina na gonevuli mai Kiliati na veisureti i Peraki Levu Cake, o Jisu Karisito, mera vakaitavi vakalevu ena ivalu vakayalo. E dodonu mera kauaitaka na sotia i Karisito na nona veivakadonui o koya e digitaki ira. A vakadreti ira gona na gonevuli o Brother Noumair: “Nida sa tekivu kauaitaka ga na veika e vinaka vei keda, sa na mudu tale ga e kea na noda valuta na meca. . . . Na veiqaravi vakadaukaulotu e sega ni baleti iko. E baleti Jiova, na dodonu ni nona veiliutaki, kei na vakayacori ni lomana. Eda sega ni veiqaravi vakadaukaulotu baleta nida vinakata me vakamarautaki keda o Jiova, ia eda qaravi koya baleta ga nida lomani koya.”​—2 Timoci 2:4.

Tarava oya o Lawrence Bowen, e dua tale ga na qasenivuli e Kiliati, a liutaka na kena veivosakitaki na ulutaga “Vakatabui Ira e na Nomuni Vakavuvuli Dina.” (Joni 17:17) E kaya ni o ira na gonevuli ni ika115 ni kalasi era vakatabui mera italatala ni Kalou. Era vakaitavi tale ga ena cakacaka vakaitalatala ena gauna era vuli tiko kina, ena nodra vakasaqarai na tamata yalomalumalumu era taleitaka na ka dina. Me vakataki Jisu ga kei ira nona tisaipeli taumada, era sega ni “vosa vakataki” ira ga. (Joni 12:​49, 50) Era gu na vakamacalataka na ka dina e uqeti vakalou qai rawati kina na bula. Nodra vakatasuasuataka na veika era sotava kei na nodra ivakamacala e ivakaraitaki ni kena cakayaco vakalevu na iVolatabu vei ira na rogoci ira.

Veivakayaloqaqataki na iVakasala kei na Veika Dina e Sotavi

Ni oti oya erau vakataroga sara e so na lewe ni Komiti ni Tabana mai na veiyasa i vuravura o Anthony Pérez kei Anthony Griffin, erau veiqaravi voli ena Tabana ni Veiqaravi (Service Department) mai Mereke. Era vakamacalataka na tacida oqo na veika ni bolebole era na sotava na daukaulotu vou ra qai soli ivakasala yaga e yavutaki ena veika sara ga era dui sotava. E okati me ka ni bolebole na duidui ni itovo vakavanua, na draki ena vanua katakata, se na ivakarau ni bula vakalotu kei na bula vakapolitiki e duidui sara mai na kena era matau kina na gonevuli oqo. Na cava e rawa ni vukei ira na daukaulotu vou oqo mera vosota na bula ena ituvaki vou vaka oya? Nodra lomani Jiova, lomani ira na tamata, kua nira railesu, ra qai kua ni vakayacora na ka ena yalototolo. A kaya e dua na lewe ni komiti ni tabana: “O ira na lewenivanua ena matanitu au lesi kina, sa vica vata na senitiuri na dede ni nodra bula tu e kea. Kena ibalebale ni rawa tale ga niu bula e kea. Veigauna gona au sotava kina na dredre, au tovolea meu vuli kina, me vakavinakataki au. Ni o vakararavi ina masu kei na yalo i Jiova, o na vakadinadinataka kina na dina ni vosa i Jisu, ‘Au sa tiko vata kei kemudou.’ ”​—Maciu 28:20.

Sa qai mai tinia vinaka na porokaramu o Samuel Herd, e lewe ni iLawalawa Dauvakatulewa, ena nona vosa ena ulutaga, “Tukuna Tiko ga na Cakacaka Veivakurabuitaki ni Kalou.” Na sovaraki mai ni yalo tabu ena siga ni Penitiko 33 S.K., a vakaukauataki ira na tisaipeli i Jisu mera tukuna “na cakacaka veivakurabuitaki ni Kalou.” Na cava ena vukei ira na daukaulotu vou oqo mera vunautaka yani na Matanitu ni Kalou ena yalogu? Na yalo tabu vata ga oya. O Brother Herd a uqeti ira na gonevuli mai Kiliati “me katakata na yalomudou,” oya mera marautaka nodra ilesilesi, mera kua ni guilecava vakadua na itavi ni veivakavulici era vakacolati kina. (Roma 12:11) “Na iVolatabu e dua na cakacaka veivakurabuitaki ni Kalou,” e kaya o Brother Herd. “Kua sara ni raica vakamamada na kena yaga. E lewena na itukutuku bula, ni umani tu kina na dina ni ka kece. Vakayagataka gona me vakadodonutaka na ivakarau ni nomu bula. Laiva me veisautaka na ivakarau ni nomu vakasama. Taqomaka na nomu vakasama ena nomu wilika, vulica, qai vakananuma vakatitobu na iVolatabu . . . Me nomu isausau mada ga qai o vakadeitaka mo vakayagataka nomu vuli mai Kiliati me yaga vei iko, mo tukuna tiko ga kina ‘na cakacaka veivakurabuitaki ni Kalou.’ ”

Ni wiliki oti na vakanuinui vinaka mai na veiyasa i vuravura kei na kena soli na nodra sitivikiti, a qai wilika e dua vei ira na gonevuli na nodra ivola na lewenikalasi ena nodra vakavinavinakataka na veivakavulici e caka vei ira e Kiliati. Sa qai mai tinia na soqo marautaki oqo o Brother Lett ena vosa veiganiti e yavutaki ena 2 Veigauna 32:7 kei na Vakarua 20:​1, 4. A sema vata oqo kei na veika sa kaya oti mai ena idola ni nona vosa, ena nona tinia: “O koya gona vei kemuni na gonevuli, ni kua ni guilecava ni oni lako yani, se tayabe yani ena ivalu vakayalo ina nomuni ilesilesi vou, o Jiova e tayabe vata tiko kei kemuni. Kua vakadua ni guilecava nira lewe vuqa era tiko kei kemuni, ka le lailai era sa tiko kei ira era veitusaqati.”

[Kato ena tabana e 25]

VEIKA ME BALETA NA KALASI

Vanua era cavutu mai kina: 7

Vanua era lesi kina: 17

Levu ni gonevuli: 48

iVakatautauvata ni nodra yabaki: 33.7

iVakatautauvata ni yabaki ena dina: 17.8

iVakatautauvata ni yabaki ena cakacaka vakaitalatala vakatabakidua: 13.5

[iYaloyalo ena tabana e 26]

Nodra Tuvaitutu na Kalasi 115 ni Watchtower Bible School of Gilead

E nabataki na iyatu me tekivu mai liu me yaco i muri, e tuvai na yaca me tekivu mai na imawi me gole ina imatau.

(1) Brown, T.; Goller, C.; Hoffman, A.; Bruzzese, J.; Trahan, S. (2) Smart, N.; Cashman, F.; Garcia, K.; Lojan, M.; Seyfert, S.; Gray, K. (3) Beckett, M.; Nichols, S.; Smith, K.; Gugliara, A.; Rappenecker, A. (4) Gray, S.; Vacek, K.; Fleming, M.; Bethel, L.; Hermansson, T.; Hermansson, P. (5) Rappenecker, G.; Lojan, D.; Dickey, S.; Kim, C.; Trahan, A.; Washington, A.; Smart, S. (6) Goller, L.; Burghoffer, T.; Gugliara, D.; Nichols, R.; Washington, S.; Kim, J. (7) Beckett, M.; Dickey, J.; Smith, R.; Garcia, R.; Hoffman, A.; Seyfert, R.; Brown, H. (8) Fleming, S.; Bruzzese, P.; Burghoffer, W.; Bethel, T.; Cashman, J.; Vacek, K.