Totoka Dina na Siga ni Tuvaitutu
“EDA kalougata ena totoka ni siga nikua. E cila vinaka na siga qai mai karakarawa yani na lomalagi. Drokadroka na co, ra qai sere na manumanu vuka. Sa dua na siga vinaka dina nikua, eda nuitaka gona ni na tini vinaka na soqo oqo. O Jiova e sega ni Kalou ni vakanuinuikara. E Kalou ga ni veivakalougatataki.”
Ena vosa oqori e dolava kina na porokaramu ni tuvaitutu ni ika117 ni kalasi ni Watchtower Bible School of Gilead, o Brother Samuel Herd, e dua na lewe ni iLawalawa Dauvakatulewa ni iVakadinadina i Jiova. A vakayacori na soqo oqo ena 11 Sepiteba, 2004. E okati ena kena porokaramu totoka na ivakasala momona vakaivolatabu, vaka kina na nodra vakasavuirogorogo na gonevuli ena ka era sotava ni vakacagau tiko na vuli kei na irogo mai vei ira na daukaulotu matua. Io, oqo e dua na siga vinaka dina vei ira na le 6,974 era tiko ena soqo ni tuvaitutu ena Watchtower Educational Center e Patterson, Niu Yoka, vaka kina vei ira na vakarorogo tiko ena so tale na vale ni isoqosoqo mai Brooklyn kei Wallkill era semati kece ena talevoni kei na vidio.
Vosa Veivakauqeti Vei Ira na Gonevuli
E veiuqeti o John Kikot, e dua na lewe ni Komiti ni Tabana mai Mereke, ena ulutaga, “Marau Tiko ni O Kaulotu.” E tukuna ni o ira na gonevuli ni Kiliati era dau kilai nira mamarau, me vaka e laurai ena tuvaitutu oqo. Era marau na gonevuli nira vakavulici ena iVolatabu ena loma ni gauna era vuli tiko kina, sa rawa gona mera na lai vukea e so tale mera marau tale ga. Ena sala cava? Oya ena nodra soli ira ena cakacaka vakaitalatala ena nodra itavi vakadaukaulotu. E kaya o Jisu: “A ka ni veivakalougatataki vakalevu [“marau,” NW] me soli ka, ka vakalailai ga me taura na ka.” (Cakacaka 20:35) Era na rawa ni marau tiko ga na daukaulotu vou oqo ke ra lai vakadamurimuria na Kalou o Jiova, na “Kalou mamarau,” e dau vakatakila na dina vei ira e so tale.—1 Timoci 1:11, NW.
A vosa tarava o David Splane, e dua tale na lewe ni iLawalawa Dauvakatulewa, ena ulutaga, “Ena Vakacava Nomu Veimaliwai?” E sega ni vakabekataki ni vinaka qai totoka na veimaliwai ena duavata, dina ni so na gauna ena gadrevi meda “ka kece ga vei ira na tamata kece ga.” (1 Korinica 9:22, VV; Same 133:1) Tomana o Brother Splane nira na lai veimaliwai na gonevuli kei ira na lewe levu ena nodra cakacaka vakadaukaulotu—o ira ena yalava ni cakacaka vakavunau, e so tale na daukaulotu, ira na mataveitacini ena nodra ivavakoso vou, kei ira ena valenivolavola ni tabana era na dusimaka na cakacaka vakaitalatala kei na veivakavulici. E vakatura gona e so na iwalewale yaga me rawa nira lai marautaka tiko ga kina na nodra veimaliwai ena nodra ilesilesi vou: Vulica na vosa ni vanua qai rokova na kena itovo, dokai ira na nomu itokani daukaulotu kei na nodra galala, lai talairawarawa tale ga vei ira na liutaka tiko na cakacaka i Jiova.—Iperiu 13:17.
Ena vosa e tarava, e taroga e dua vei ira na qasenivuli e Kiliati, o Lawrence Bowen, na ulutaga oqo, “O Dau Vakasama Vakatamata se Vakalou?” E tokaruataka vei ira na gonevuli ni o ira na dau ‘lewa me vaka na irairai ga’ e tuba era a sega ni ciqomi Jisu me Mesaia. (Joni 7:24) Nida tamata ivalavala ca, meda qarauna gona me kua ni ‘vakatamata na noda vakasama,’ ia me tiko ga vei keda na “vakasama ni Kalou.” (Maciu 16:22, 23, VV) O ira mada ga na matua vakayalo, ena gadrevi mera vakadodonutaka tiko ga na itovo ni nodra vakasama. Me vaka ga na waqa e soko tiko, ke vakadodonutaki tiko ga na kena kosi e rawa ni yaco vinaka ina vanua e vakanaulu tiko kina. E vaka kina o keda, eda na yacova kina na isausau, da levea tale ga na kasa vakayalo. Ena vukei keda gona ke da vulica wasoma na iVolatabu meda vakasama kina me vaka na “vakasama ni Kalou.”
A vakacavara na tiki ni porokaramu oqo o Wallace Liverance, e dua tale ga na qasenivuli i Kiliati. E yavutaki ena Aisea 55:1 na nona ulutaga, “Na Cava O na Volia?” E uqeti ira na gonevuli mera “volia” na veivakabulabulataki, na marau, kei na kaukaua e taka mai na vosa ni parofisai ni Kalou me baleta na noda gauna. Na parofisai i Aisea e vakatauvatana na vosa oqo ni Kalou me vaka na wai, waini kei na wainisucu. E rawa vakacava ni voli, ia e “segai e nai lavo se nai voli”? E vakamacalataka o Brother Liverance ni rawati oqo ena kena nanumi matua na parofisai ni iVolatabu, me biu laivi na rai kei na ivalavala vakayago, qai sosomitaki ena rai kei na ivalavala vakalou. (Aisea 55:2, 3, 6, 7) Nodra cakava oqo na daukaulotu vou, era na vakaukauataki ena vanua era lesi kina. Na tamata ivalavala ca e dau nanuma ni vakatau na marau ena kena vakaliuci na iyau vakayago. “Kua ni vakabauta,” e kaya o Brother Liverance. “Kua ni vakabauta na rai vaka oqori. Tikica na gauna mo vulica vakavinaka kina na Vosa ni parofisai ni Kalou. Ena rawa ni vakabulabulataki iko, vakaukauataki iko, qai vakamarautaki iko ena vanua o lesi kina.”
Totoka Nodra Vakasavuirogorogo kei na Nodra Vakatarogi na Gonevuli
Era vakaitavi wasoma na gonevuli ena cakacaka vakavunau. E liutaka gona o Mark Noumair, e dua tale na qasenivuli i Kiliati, e dua na itavi era okati kina e so na lewenikalasi. Oya na nodra vakatasuasuataka na ka sara ga era sotava ena vunau qai kena usutu, “Sega ni Maduataka na iTukutuku Vinaka.” (Roma 1:16) Era taleitaka na vakarorogo na rogoci ira era kenadau sara ena cakacaka vakaitalatala, na vunau e veivale, ena salatu, kei na veisitoa lelevu. O ira na gonevuli era kila e so tale na vosa, era vakaliuliu na vunau vei ira era vosataka na vosa tani ena yalava ni ivavakoso era dui lesi kina. E so tale na gonevuli era vakayagataka vinaka na ivoladraudrau e yavutaki vakaivolatabu, era tabaka na iVakadinadina i Jiova, mera veitalevi lesu ra tauyavutaka tale ga kina na vuli iVolatabu. Io, era “sega ni maduataka” na vunautaka na itukutuku vinaka.
A qai vunau o Brother William Nonkes, e cakacaka ena Tabana ni Veiqaravi (Service Department), a vakatarogi ira na daukaulotu dede mai Burkina Faso, Latvia, kei Rusia. Era tukuna e so na ivakasala yaga me lakolako vata kei na usutu ni vunau, “O Jiova e Vakaicovitaki Ira Vakayalololoma na Yalodina.” E dua vei ira na vakatarogi a uqeti ira na gonevuli mera vakasamataka na mataivalu i Kitioni era a lewena e 300 na sotia. A tiko na vanua a lesi mera duri kina na sotia yadua, e lai vakavuna na qaqa nei Kitioni. (Dauveilewai 7:19-21) Era na kalougata vaka kina o ira na daukaulotu era na yalodina ena vanua era lesi kina.
A vunau tarava o Samuel Roberson, e dua tale na qasenivuli e Patterson, na ulutaga ni nona vosa, “Yaco Mo Ka Kece ga Vei Ira Kece ga na Tamata,” a okati tale ga kina na veitarotarogi. E vakataroga e va na lewe ni Komiti ni Tabana, mai Senegal, Guam, Liberia, kei Madagascar. E 170 taucoko na daukaulotu era cakacaka tu ena veivanua oqo. Ra rogoca na gonevuli na sala e dau veivuke kina na Komiti ni Tabana vei ira na daukaulotu vou mera vakamatauni ena nodra yalava ni cakacaka. E dau vakavulici ira ena itovo ni vanua ena rairai malewa beka, vakauasivi vei ira mai na veivanua vakavalagi. Me kena ivakaraitaki, ena so na vanua e matau vei ira na tagane, okati kina o ira ena loma ni ivavakoso vakarisito, mera veitauriliga nira taubale vata me ivakatakilakila ni veitokani. Ena so na vanua era vakarurugi ena valenitabana e Guam, e duatani sara na kakana e dau vakarautaki. Ia era sa vakamatauni ira kina e so, e rawa sara tale ga ni cakava oqo na daukaulotu vou.
Sa qai vakamacala o Guy Pierce, e dua na lewe ni iLawalawa Dauvakatulewa, ena ulutaga “Yalodina Tiko ga ina ‘Nona Matanitu na Noda Turaga.’” E vakadreti ira na vakarorogo: “E vakainaki na nona bulibuli o Jiova. E tiko na ka e tuvanaka tu me baleti ira na nona ibulibuli. E se sega ni veisau na nona inaki e vauca na vuravura oqo. Sa totolo sara tiko na kena vakavatukanataki. E sega ni dua na ka me na tarova.” (Vakatekivu 1:28) E uqeti ira kece o Brother Pierce mera vakamalumalumu ena veiliutaki ni Kalou, dina ga ni sotavi tiko na veika dredre e vu mai na ivalavala ca ni imatai ni tamata, o Atama. “Eda bula tu oqo ena gauna ni veilewai. Sa lekaleka na gauna meda vaqarai ira kina na tamata lomadina mera mai kila na ka dina. Vakayagataka vakavuku na gauna sa vo mo tukuna yani kina na itukutuku vinaka ni Matanitu ni Kalou,” e vakadreta o Brother Pierce. E rawa nira nuitaka na veitokoni ni Kalou o ira era tokona ena yalodina na nona Matanitu.—Same 18:25.
Ni sa cava na porokaramu, e qai wilika na jeameni na ivola ni vakanuinui vinaka mai na vica na valenitabana e veiyasa i vuravura vei ira na gonevuli. Oti oya, sa soli sara na nodra sitivikiti na gonevuli qai wilika e dua na gonevuli na ivola ni vakavinavinaka ena veivakavulici a caka vei ira. Sa mai cava vinaka e dua na siga totoka era na guiguilecava dredre na tiko kina.
[Kato ena tabana e 23]
VEIKA ME BALETA NA KALASI
Vanua era cavutu mai kina: 11
Vanua era lesi kina: 22
Levu ni gonevuli: 48
iVakatautauvata ni nodra yabaki: 34.8
iVakatautauvata ni yabaki ena dina: 18.3
iVakatautauvata ni yabaki ena cakacaka vakaitalatala vakatabakidua: 13.4
[iYaloyalo ena tabana e 24]
Nodra Tuvaitutu na Kalasi 117 ni Watchtower Bible School of Gilead
E nabataki na iyatu me tekivu mai liu me yaco i muri, e tuvai na yaca me tekivu mai na imawi me gole ina imatau.
(1) Thompson, E.; Norvell, G.; Powell, T.; Kozza, M.; McIntyre, T. (2) Reilly, A.; Clayton, C.; Allan, J.; Blanco, A.; Muñoz, L.; Rustad, N. (3) Guerrero, Z.; Garcia, K.; McKerlie, D.; Ishikawa, T.; Blanco, G. (4) McIntyre, S.; Cruz, E.; Guerrero, J.; Ritchie, O.; Avellaneda, L.; Garcia, R. (5) Powell, G.; Fiskå, H.; Muñoz, V.; Baumann, D.; Shaw, S.; Brown, K.; Brown, L. (6) Shaw, C.; Reilly, A.; Peloquin, C.; Münch, N.; McKerlie, D.; Ishikawa, K. (7) Münch, M.; Peloquin, J.; Kozza, T.; Avellaneda, M.; Allan, K.; Ritchie, E.; Norvell, T. (8) Cruz, J.; Baumann, H.; Clayton, Z.; Fiskå, E.; Thompson, M.; Rustad, J.