iTalanoa ni Nona Bula

Vu ni Veivakalougatataki na Ka Lalai Keirau Vakuai Keirau Kina

TALANOATAKA O GEORGE KEI ANN ALJIAN

E sega vakadua ni keirau tadra vakaveiwatini ni dua na siga keirau na cavuta cala na vosa “kalavo” ena neirau via kaya na vosa “qasenivuli.” Sega ni keirau vakabauta ena neirau sa yabaki 60 tu vakacaca me keirau qai vulica na matanivola vovou ena kena sagai na veivosaki kei ira na turaga kei na marama ni Jaina. Ia, na ka sara ga oqori keirau cakava kei Ann ena icavacava ni veiyabaki ni 1980. Me keirau tukuna mada na ka lalai keirau vakuai keirau mai kina ena veiyabaki sa sivi qai vu ni veivakalougatataki levu vei keirau.

AU SUCU ena dua na vuvale mai Armenia, noqu lotu na lotu Vakarisito kei Armenia. E lotu Katolika o Ann. Keirau biuta ruarua na neirau dui lotu ena neirau vakamau ena 1950. Au a yabaki 27, e 24 o Ann. Keirau lai tiko sara ena tabavale e cake ni noqu sitoa ni sava isulu e Jersey City, New Jersey, Mereke. Sa va tale ga na yabaki na noqu taukena tiko na sitoa oqori.

Keirau volia e dua na vale totoka ena 1955 e Middletown, New Jersey, qai tolu na kena rumu ni moce. E 60 na kilomita na kena yawa mai na noqu sitoa, au dau cakacaka ena ono na siga ena loma ni dua na macawa. Au dau qai yaco ga e vale sa bogilevu. Au dau veitaratara ga kei ira na iVakadinadina i Jiova nira soli ivola vakaivolatabu wasoma yani ena noqu sitoa. Au dau taleitaka sara ga na wilika na ivola oqori. Dina ni levu na gauna au vakayagataka ena noqu bisinisi, ia au doka vakalevu na iVolatabu.

Au qai mai kila tale ga ni gauna au dau draiva tiko kina i cakacaka ena veimataka kei na veiyakavi e dau kaburaki tiko na ivunau vakaivolatabu ena siteseni ni retio ni Watchtower, se WBBR. Au dau vakarogoca vinaka sara na ivunau oqori, na noqu sa taleitaka tiko ga vakalevu na veika au rogoca e uqeti au meu kerea e dua na iVakadinadina me sikovi au yani. E lako yani i vale o George Blanton ena Noveba 1957, me tekivutaki kina noqu vuli iVolatabu.

Vakaduavatataka Noqu Vuvale na Sokalou Dina

Na cava mada e nona nanuma o Ann me baleta na vuli oqo? Me tukuna ga o koya.

“Taumada, au a tusaqati koya sara ga vakaukaua. Au dau veivakasosataki sara ga ena gauna ni vuli iVolatabu i George, mani nanuma o koya me veiveisau na vanua ni nona vuli, e vaka tiko oya me walu na vula. Ena gauna tale ga oya, sa tekivu lakova na soqoni ena Sigatabu ena Kingdom Hall o koya. Au kila ni sa taura sara ga vakabibi o koya na nona vuli baleta ni oqori ga na siga e galala kina. Ia, e tama qai watiqu vinaka tu ga​​—sa qai vinaka cake tiko ga na nona ivakarau​​—sa tekivu veisau tale ga na noqu rai. Ena so na gauna niu qusia tiko e dua na teveli lailai qai sega ni dua e raici au tu mai, au dau wilika sara na Yadra! e dau biuta tu kina o George. So tale na gauna e dau wilika vei au o George na Yadra! e sega ni kune kina e dua na ivakavuvuli vakaivolatabu, ia e vakamacalataki koya ga vakalevu na Dauveibuli.

“Dua na yakavi ni se lai vuli iVolatabu tu o George kei Brother Blanton, au wilika sara e dua na ivola a biuta tu na luvei keirau yabaki rua ena noqu yasa ni loga. E tukuni tu kina e dua na ka me baleta na nodra inuinui na mate. Dina niu sa wawale, ia au wilika ga baleta ni se qai mate oti ga o buqu, au lomabibi tiko kina. Sega ni bera noqu sa mai kila au qai taleitaka na ka dina vakaivolatabu me baleti ira na mate, nira sega ni vakararawataki tale tiko ena dua na vanua, era na vakabulai tale ena veivakaturi ena dua na gauna mai muri. Au duri cake sara ga mai ena noqu idavodavo, niu guta na wiliwili au qai toqa e so na ka au via vakaraitaka vei George ni suka mai ena nona vuli.

“E sega ni vakabauta na noqu sa veisau o watiqu. Au tusaqati koya ena gauna e biubiu kina, ia oqo au sa marautaka na ka dina vakaivolatabu au sa vulica! Na bogi oya keirau veitalanoa tu ga kina vakaivolatabu me yacova ni sa oti na tinikarua na kaloko. E vakamacalataka o George na inaki ni Kalou me baleta na vuravura. Na bogi tiko ga oya au kerea kina vua ke rawa ni dau mai vuli ga e vale meu vuli tale ga kina.

“E kaya o Brother Blanton me rau mai vuli tale ga na luve i keirau. Ia, keirau nanuma ni sega ni ganiti rau ni rau se gone, e dua e se qai yabaki rua, dua tale e yabaki va. E qai vakaraitaka vei keirau o Brother Blanton na ka e kaya na Vakarua 31:12: “Vakasoqoni ira na tamata, na tagane, kei na yalewa, kei na gone lalai, . . . , me ra rogoca, ka me ra vuli kina.” Keirau taleitaka na ituvatuva oya, keirau bau tuvanaka sara ga me rau vakamacala na gone ena gauna ni vuli. Keitou na vakarautaka vata ga na ka keitou na vulica, ia keirau na sega ga ni tukuna vei rau na ka me rau kaya. Keirau kila ni oqo na ka erau ciqoma kina na ka dina. Keirau vakavinavinaka tale ga ena veidusimaki i Brother Blanton me keitou toso kina vakayalo.”

Na Veika Dredre me Ulabaleti

Ni keitou sa duavata oqo ena vulici ni iVolatabu, e so tale na ka ni bolebole vou me keitou na walia. Me vaka ni yawa sara na noqu sitoa, au qai dau yaco ga i vale sa ciwa na kaloko ena bogi. Au sega gona kina ni dau tiko ena veisoqoni ena loma ni macawa, dina ga niu na tiko ena Sigatabu. Ena gauna oya, sa dau lakova kece na veisoqoni o Ann qai toso totolo sara tiko ga nona vuli. Au via tiko tale ga ena veisoqoni kece, au via vakavulici iratou tale ga vakavinaka na noqu matavuvale. Au kila ni dodonu meu sa vakuai au ena so na ka. Au nanuma kina me sa vakalailaitaki na aua ni noqu caka bisinisi, dina ga niu sa na calati ira kina e so na dauvolivoli.

E vinaka sara ga na ituvatuvanaki oqo. Keitou dau dikeva na neitou vuli vakavuvale me vaka sara ga na lima na soqoni e caka e veimacawa ena Kingdom Hall. Keitou vakatoka me ikaono ni neitou soqoni. Sa qai lokuci me dua na kena siga kei na kena gauna​​—ena yakavi kece ni Vukelulu ena 8 na kaloko. So na gauna ni oti na ivakayakavi, ni keitou sa maroroya tiko na iyaya ni kana ena kaya cake mai e dua, “Sa voleka na gauna ni ‘soqoni’!” Keu bera tiko yani i vale sa na tekivuna ga o Ann na vuli au qai tomana niu sa yaco yani.

E dua tale ga na ka e vakaukauataki keitou qai vakaduavatataki keitou vakavuvale oya na neitou dau raica vata ena veimataka na tikinivolatabu e veisiga. Ia, e dua na kena leqa. E sega ni tautauvata na gauna keitou dau yadra kina. Keitou veivosakitaka sara me sa dua ga na gauna keitou yadra vata kece kina, keitou katalau ena veimama ni 6, oti sa qai dikevi na tikinivolatabu ni siga oya. E vinaka sara ga vei keitou kece na ituvatuva oqo. Ni rau tubu cake na luve i keirau erau digitaka na veiqaravi e Peceli. Keirau raica ni tara na nodrau bula vakayalo na neitou dau veivosaki vaka oqo e veisiga.

Levu Tale na iTavi ni Oti na Papitaiso

Au papitaiso ena 1962, au qai volitaka na noqu sitoa ni oti e 21 na yabaki, au cakacaka voleka ga e vale meu volekati iratou kina noqu veitinani, me rawa tale ga ni keitou qaravi Jiova vata. E itekitekivu sara ga ni levu tale na veivakalougatataki oqori. E neitou isausau me keitou na cakacaka vakaitalatala vakatabakidua kece. A yaco sara ga oqori ena itekitekivu ni veiyabaki ni 1970 ni sa mai veiqaravi vakaitalatala kina vakatabakidua se painia tudei na neirau ulumatua o Edward, ni oti ga nona vuli ena sekedri. Sega ni dede, sa tekivu painia tale ga o George, tarava sara yani o Ann. Eratou dau vakauqeti au sara ga vakalevu ni ratou mai talanoataka na ka eratou sotava ena cakacaka vakavunau. Keitou veivosakitaka vakavuvale na sala me keitou bula rawarawa ga kina me rawa ni keitou cakacaka vakaitalatala vakatabakidua kece. Keitou nanuma me sa volitaki na vale. Sa yabaki 18 na neitou tiko kina, e neitou vale tale ga vakavuvale. Dua na ka neitou taleitaka na vale oqori ia e vakalougatataki keitou o Jiova ena neitou vakatulewa me volitaki.

A sureti o Edward me veiqaravi e Peceli ena 1972, o George ena 1974. E dina ni keirau dau vakananumi rau sara ga vakalevu, ia e sega ga ni tiko ena neirau vakanananu ni ka marautaki ke rau a veiqaravi voleka toka ga, rau vakawati, rau vakaluveni tale ga. Keirau marau ga ni rau sa qaravi Jiova tiko e Peceli.a Keirau duavata kei na ka e tukuni ena Vosa Vakaibalebale 23:​15, e kaya: “Na luvequ, kevaka ena vuku na lomamu, ena reki dina na yaloqu.”

Keirau Painia Lavotaki

Keirau painia tiko ga ena gauna rau sa veiqaravi ruarua tiko kina na gone e Peceli. Dua na siga ena 1975, keirau taura e dua na ivola ni veisureti me keirau lai cakacaka vakapainia lavotaki ena dua na vanua e dau tarai tu vakavudua e Clinton County, Illinois. Keirau sega ni namaka na veisureti oqori! E kena ibalebale oqo ni keirau sa na biuti New Jersey, na vanua keirau volekati rau kina na gone e Niu Yoka, o ira na neirau itokani, kei ira na weka. Ia, keirau raica oqori me ilesilesi mai vei Jiova, keirau vakuai keirau kina ena so na ka, e qai vu ni veivakalougatataki.

Oti e vica vata na vula neirau veiqaravi tiko ena vanua tarai vakavudua oqori, keimami sa tekivu soqoni ena nodra vale ni soqo na lewenivanua e Carlyle, Illinois. Ia keimami vinakata sara ga e dua na vanua tudei. E kunea sara e dua na tacida mai kea e dua na tiki ni qele e tiko kina e dua na vale lailai e rawa ni redetaki. Keimami samaka vinaka sara​​—e loma, e tautuba tale ga​​—qai caka me dua na vale ni soqoni lailai. Keimami se nanuma vinaka tiko ga e dua na ose e dau via kila se cava keimami cakava tiko. Levu na gauna e dau iro yani ena katubaleka me raica na ka e caka tiko ena soqoni!

Toso na gauna sa dua sara na ivavakoso e Carlyle, keirau marautaka na neirau a vakaitavi ena kena tauyavu. Rau vukei keirau e rua na veiwatini painia gone, o Steve kei Karil Thompson, rau mai veiqaravi tale ga ena vanua e dau tarai tu vakavudua. E vica vata na yabaki nodrau veiqaravi e kea na Thompson, oti rau sa qai lai vuli ena Watchtower Bible School of Gilead rau qai lesi me rau lai kaulotu ena Tokalau kei Aferika, ia erau sa veiqaravi tiko e kea ena cakacaka vakaivakatawa dauveilakoyaki.

E sega ni dede sa oso na neimami vale ni soqoni, sa gadrevi kina me dua na vale levu. Se baci vukei keimami tale na tacida vata ga a kunea na imatai ni vale, e volia e dua na tikiniqele ena rauta vinaka sara ga na Kingdom Hall. Dua na ka na neirau marau ena vica tale na yabaki e muri ni keirau sureti ena kena vakatatabutaki na Kingdom Hall vou e Carlyle! E noqu itavi dokai sara ga na ivunau ni kena vakatatabutaki. Keirau taleitaka vakalevu na neirau ilesilesi e kea qai ka ni veivakalougatataki mai vei Jiova.

Yalava Vou ni Cakacaka

Keirau a lesi e Harrison, New Jersey ena 1979. E voleka ni 12 na yabaki neirau veiqaravi tu kina. Donuya na gauna oqori keirau vuli iVolatabu kina kei na dua na yalewa ni Jaina, e vakavuna mera mai vuli tale ga kina e levu na kai Jaina. Ena gauna tale ga oya, keirau sa qai kila kina ni vica vata na udolu na gonevuli kei na vuvale kai Jaina era tiko wavoliti keirau. E vakavuna sara ga oqori me keirau via vulica nodra vosa. Dina ni sa na tikici na gauna ena veisiga me vulici kina na vosa vou oqori, ia era vuli volatabu rawa kina e levu tale na kai Jaina ena vanua keirau tiko kina.

Ena veiyabaki oqori, e dau levu na veika lasa keirau sotava, vakauasivi neirau saga tiko me keirau kila na vosa vakajaina. Dua na siga e tukuna o Ann vua na itaukeinivale ni o koya e dua na “kalavo” e dau veivakavulici ena iVolatabu, ia e saga tiko me kaya ni “qasenivuli” ni iVolatabu. E tautauvata toka na kedrau icavucavuti. E dredre ga na itaukeinivale qai kaya: “Kerea mo curu mai. Au se bera vakadua ni vosa vua e dua na kalavo e dau veivakavulici ena iVolatabu.” E se ka ni bolebole tiko ga vei keirau na vosa vakajaina.

Oti oya, keirau se baci lesi tale ena dua na vanua vou e New Jersey, keirau cakacaka ena nodra yalava na kai Jaina. E muri keirau sureti me keirau toki i Boston, e Massachusetts, sa tiko rawa kina e dua na iwasewase ni vosa vakajaina, sa oti toka e tolu na yabaki na kena tauyavu. E itavi dokai vei keirau na neirau tokona tiko na iwasewase oqo me vitu na yabaki, keirau marautaka ni tauyavu kina e dua na ivavakoso ena 1 Janueri, 2003.

Veivakalougatataki ena Vuku ni Lomasoli

Eda wilika na veisureti i Jiova ena Malakai 3:​10, mera kauta yani vua na nona tamata na isoro kei na madrali me rawa kina ni vakalougatataki ira me yacova sara nira sa mamau. Keitou volitaka na bisinisi au dau taleitaka vakalevu. E volitaki na neitou vale vakamareqeti. Keitou vakuai keitou tale ga ena so tale na ka. Ia, e lailai sara oqori ni vakatauvatani kei na veivakalougatataki keitou sotava.

E vakalougatataki keitou dina vakalevu o Jiova! Keirau marautaka na nodrau ciqoma na gone na ka dina, na neirau veiqaravi vakatabakidua ena cakacaka ni veivakabulai, vaka kina na neirau raica sara ga na nona vukei keirau tiko ga o Jiova ena veika keirau gadreva. Sa vu ni veivakalougatataki dina na ka lalai keirau vakuai keirau kina!

[iVakamacala e ra]

[iYaloyalo ena tabana e 25]

O Louise kei George Blanton, kei Ann ena 1991

[iYaloyalo ena tabana e 26]

Na Kingdom Hall mai Carlyle, a vakatatabutaki ena 4 June, 1983

[iYaloyalo ena tabana e 27]

Keirau kei ira na lewe ni ivavakoso vou ni vosa vakajaini e Boston

[iYaloyalo ena tabana e 28]

Keirau vata kei Edward, Connie, George, kei Grace