E Tarova Beka na Loloma Vakarisito na Tawaveitovaki?

ESEGA ni vinakati ga vua na lotu Vakarisito me dau wili iVolatabu, dau masu, qai lagasere ni lotu ena Sigatabu. E vinakati tale ga me cakava e so na ka vua na Kalou kei na tamata. E kaya na iVolatabu: “Me da sa kakua ni veilomani wale ga e na vosa se e na gusu, ia e na cakacaka ga kei na dina.” (1 Joni 3:18, VV) O Jisu e kauaitaki ira dina e so tale. Era na vakatotomuri koya na lotu Vakarisito. A uqeti ira na nona itokani ena vakabauta o Paula mera ‘vakaogai ira tiko ga ena cakacaka ni Turaga.’ (1 Korinica 15:58, VV) Na cava na cakacaka ni Turaga? E okati beka kina na veisautaki ni ka e lalawataka na matanitu me rawa ni yaga vei ira na dravudravua kei na vakaloloma? Oya beka na ka e cakava o Jisu?

Dina ga ni a uqeti o Jisu me cakava vaka kina, a sega ni via vakaitavi ena veika vakapolitiki se me veitovaki. E sega ni ciqoma nona solia vua o Setani me lewai ira na veimatanitu e vuravura, a sega ni via veileti ena kena soli se sega na ivakacavacava, qai lako tani ena kedra maliwa na ilala era via buli koya me tui. (Maciu 4:8-10; 22:17-21; Joni 6:15) Dina ga ni sega ni veitovaki, ia e sega ni tarova oya na nona vukei ira tale e so.

E kauaitaka ga o Jisu na veika ena dei na kena yaga vei ira tale e so. Dina ni nona vakani ira na limanaudolu kei na nona vakabulai ira na tauvimate e vukei ira vakalekaleka e so, ia na veika e vunautaka ena tawamudu na kena yaga ina kawatamata kece. A sega ni kilai o Jisu me iliuliu ni veivakacokotaki, e kilai ga me ‘iVakavuvuli.’ (Maciu 26:18; Marika 5:35; Joni 11:28) A kaya: “A ka oqo ka’u sa sucu mai kina, ia na ka oqo ka’u sa lako mai kina ki vuravura oqo, me’u dautukuna na ka dina.”​—Joni 18:37.

Vunau e Uasivia na Politiki

Na ka dina e vakavuvulitaka o Jisu e sega ni ile vakapolitiki. E dusia ga na Matanitu ni Kalou ena qai kena Tui o koya. (Luke 4:43) Na Matanitu vakalomalagi oqo ena qai kauta laivi na veiliutaki vakatamata, ena kauta tale ga mai na veisaututaki tawamudu vua na kawatamata. (Aisea 9:6, 7; 11:9; Taniela 2:44) Na Matanitu oqo e inuinui duadua ga ni kawatamata. E sega li ni ka vakayalololoma cake na vunautaki ni inuinui dei oqo mai na nodra vakauqeti na lewenivanua mera vakanuinui vua na tamata me kauta mai na bula nuidei? E kaya na iVolatabu: “Dou kakua ni vakararavi vei ira na turaga, se vua na luve ni tamata, ni sa sega vua na ka mo dou bula kina. Sa lako tani na nonai cegu, a sa suka ko koya ki na kena qele; e na siga dina ko ya sa oti na ka e vakanananu kina. Sa kalougata ko koya sa nonai vukevuke na Kalou i Jekope, o koya sa nuinui tiko vua na nona Kalou ko Jiova.” (Same 146:3-5) A sega ni talai ira na nona tisaipeli o Jisu mera lai vunautaka na kena vakavinakataki na cicivaki ni veimatanitu, e tukuna ga mera lai vunautaka ‘na itukutuku vinaka ni matanitu’ ni Kalou.​—Maciu 10:6, 7; 24:14.

Oqo gona na “cakacaka ni Turaga” era lesi kina na dauvunau lotu Vakarisito mera cakava. Ni vinakati mera veilomani o ira na vakarurugi ena Matanitu ni Kalou, ena vakaotia na Matanitu oqori na bula dravudravua ni vota vakatautauvata na veika e taukena na kawatamata. (Same 72:8, 12, 13) Oqo e itukutuku vinaka dina e dodonu me vunautaki.

Era sa cakava tiko na “cakacaka ni Turaga” oqo na iVakadinadina i Jiova ena 235 na vanua. Era talairawarawa tale ga vei ira na veimatanitu me vaka e vakarota o Jisu. (Maciu 22:21) Ia era muria tale ga na vosa e tukuna vei ira na nona imuri: “Dou sa sega ni vakavuravura, ka ni’u sa digitaki kemudou mai vuravura.”​—Joni 15:19.

Sa ra veisau na dautokona na politiki e liu nira mai vulica na iVolatabu. E kaya e dua na daunipolitiki mai Itali a lewe ni Catholic Action, e dua na isoqosoqo e liutaka tiko na lotu: “Au a vakaitavi ena politiki baleta niu vakabauta tu ni dodonu meda vakaitavi ena politiki kei na vakatorocaketaki ni bula raraba.” E vakacegu mai na itutu vaka turaganikoro ni dua na siti me rawa kina ni vunautaka na Matanitu ni Kalou me vaka e dua na iVakadinadina i Jiova. E vakamacalataka vaka oqo na vuna ena guce kina na nodra sasaga na daunipolitiki dina ga ni vinaka na nodra inaki. “Na vuna e vaka kina oqo na vuravura e sega ni baleta nira sega ni saga mera vakavinakataka na vuravura o ira na tamata vinaka, ia sa vodi na nodra sasaga baleta ni levu na tamata era ca.”

Nodra sega ni vakaitavi ena politiki nira vunautaka tiko na inuinui duadua ga ni kawatamata e sega ni tarovi ira na lotu Vakarisito dina mera vukei ira tale e so. O ira na vukei mera mai vakarurugi ena Matanitu ni Kalou sa ra veisautaka na nodra itovo rerevaki, era talairawarawa ina veiliutaki, sa totoka sara na nodra bula vakavuvale, qai veiraurau na nodra raica na iyau vakavuravura. Vakauasivi, o ira na iVakadinadina i Jiova era vukei ira tale ga na lewenivanua mera veiwekani voleka kei na Kalou.

Era yaga tale ga na dauvunautaka na Matanitu ni Kalou vei ira era vakaitikotiko vata. Vakauasivi ena nodra uqeti ira mera nuitaka na matanitu ena kauta mai na veivakacegui dina vei ira na lomana na Kalou. Nira sega ni veitovaki, e rawa vei ira na lotu Vakarisito mera solia na veivuke duadua e dei qai yaga e kune ena gauna oqo.

[Katona ena tabana e 7]

Mai na Politiki ina Vunautaka na Matanitu ni Kalou

Ni se gone, a vulica o Átila vua na nodratou bete ni koro e Belém, mai Brazil, me valuta na veivakasaurarataki. E marautaka o Átila na nona rogoca ni sa vakarau sereki na kawatamata mai na veivakasaurarataki, mani curu sara ina dua na ilawalawa e vulica kina na kena vakarautaki na tayabe ni kudru me saqati kina na lawa ni matanitu.

Ia e marautaka tale ga o Átila nona vakavulici ira na luvedra na lewe ni ilawalawa oqo ena ivola a soli vua, na Vakarorogo Tiko ki Vua na Qasenivuli Levu.a E vakavuvulitaka na ivola oqo na itovo vinaka kei na talairawarawa vei ira na veiliutaki. E kurabuitaka o Átila se cava era sega ni muria kina na itovo uasivi i Jisu o ira na cata na veivakasaurarataki ra qai guilecavi ira na vakasaurarataki se vakaloloma nira sa veiliutaki. Oqo e vakavuna nona kere vakacegu mai na ilawalawa oya. Oti e dua na gauna era tukituki yani ina nona katuba na iVakadinadina i Jiova ra qai vakamacalataka vua na Matanitu ni Kalou. Sega ni dede sa vulica na iVolatabu. E vulica kina na iwali dina ni nona vakasaurarataki na kawatamata.

Donuya na gauna e vuli iVolatabu tiko kina, e lakova o Átila e dua na vuli ni lotu Katolika e veivosakitaki kina na vakabauta kei na politiki. Era kaya na kena qasenivuli ni “ka ruarua oya erau via tautauvata ga.” E lako tale ga ina soqoni ena Kingdom Hall. Na soqoni oqo e duatani dina! E sega kina na vakatavako, gunu, se veiwali ca. E vakatulewataka me tomani ira na iVakadinadina i Jiova ena cakacaka vakavunau, sega ni dede sa papitaiso. Sa qai raica tale ga ni o ira na cata na veivakasaurarataki era na sega ni walia na nodra leqa na dravudravua.

[iVakamacala e ra]

[iYaloyalo ena tabana e 6]

Nodra tawaveitovaki e sega ni tarovi ira na italatala lotu Vakarisito mera vukei ira tale e so